14/04/2010, 06:18 PM
|
 | زعيــم مميــز | | تاريخ التسجيل: 19/08/2005
مشاركات: 5,779
| |
][ .. وتقولون وين جمهور الرياض ..!! .. اسباب غياب وعزوف الجماهير .. نمتنى تحرك من الإداره لحل هذه المشاكل .. ][
السلام عليكم اول شي ابارك للجميع التأهل الذي كان مستحقا ً .. حتى لو كانت مباراة البارحه لم تنتهي بفوزنا لكن تأهلنا لأننا الأجدر .. عموما ً موضوعي هو عن امور تحدث في الملاعب وفي استاد الملك فهد بالتحديد اولا ً .. الأمن الذي تخلى أهم مهامه وأصبح يتفنن في إستفزاز الجماهير .. في كل مباراة نجد أنواع القرارات الغريبه والعجيبه والتي هدفها نرفزة وتطفيش الجمهور الهلالي .. من هذه القرارات / اي شخص يطلع يصلي قبل المباراه ما يرجع .. وكأنهم يقولون اجلس ولا تصلي وتراك لو طلعت منت براجع .. !! اي شخص يحمل شال موبايلي ما يدخل الملعب ولو لقاه احد العساكر يحمل هالشال يا ويله ..!! ( وكانت في مباراة مس كرمان ) . اي شخص يحمل اي شال واي علم ما يدخل الملعب .. شخص قدامي اعجبني باستفزازه للعسكري وقال له انا جبت معي شالين شال هلالي ونصراوي انت منعت الهلالي طيب الشال النصراوي تقدر تمنعه ..!!  ممنوع دخول المشروبات موية او بيبسي او عصير .. لكن عادي تخش بشاي ثانيا ً .. الزحيف [ واعذروني على هاللفظ بس ما لقيت لفظ يشيرلهم ] هالفئه ذي تكرهك في شي اسمه كورة .. تكره اوم الملعب منهم .. همهم بس انه يظهر للناس انه وخوياه أقوى ناس في الدنيا .. واكثر ناس زاحفين واكثر ناس كوميديين ومهسترين .. وهم على العكس تماما ً .. ازعاج وهياط وقلق وغباء مستفحل وفوق هذا كله فضاوه وبطاله .. هالفئه تلقونهم بثياب نوم دائما ً لا وفيهم ناس يربطون شاش على روسهم ولا على يدينهم وهم اساسا ً مافيهم الا العافيه .. بس عشان يبين للناس انا راعي مشاكل .. وتلقونهم دائم عند الرابطه ويتجمعون في مكان يكون مكشوف على العالم كلها وتلقى الي يقط ذبات على ذاك ولا الي يستهبل ويستخف دمه وهو اصلا ً سامج .. والله من اشوفهم اكره المباريات واقول في نفسي هذي اخر مباراه اجيها لكن حبي للهلال يمنعني .. ثالثا ً ... المدخنون : هالفئه الله يهديهم .. بعضهم طيب بس تقوله يالغالي لو تكرمت طف زقارتك على طول تلقاه يتقبل برحابة صدر ويطفيها .. وبعضهم يطالع فيك بنص عين ويكمل زقارته .. وفي ناس اكثر بجاحه يطالع فيك ويقول كل العالم تدخن .. والله اني صرت احرص اجلس في مكان اتأكد ان الي قدامي ما يدخنون .. وفي احد المباريات اقسم بالله كرهت الكورة على ابوها .. تخيلوا قدامي ثلاثه يدخنون وجنبي واحد تخيلوا يوم يدخنون الدخان يصير كنه سحابه تجيني وانواع الكح والقروشه .. الله يعينا عليهم بس ويهديهم لكن اعظم شي لا كانوا هالمدخنين من الزحيف هنا ام المصايب .. رابعا ً .. الشوارع والزحام : معروفة الرياض بالزحمه والقلق .. تخيلوا والله الذي لا اله الا هو اني البارح طلعت من الملعب بعد ما انتهت المباراة .. وما دخلت الحي الي انا فيه الا على الساعه 12 وربع من قو الزحمه .. خصوصا ً يوم تقفل خريص من الامطار الي جت .. والي كان فيه راح يذكر المكان .. قبل كوبري المعيزيله وانت مع خريص بإتجاه الغرب .. يالله الشارع توقف والى الان ما ادري وش السبب يمكن اخذنا نص ساعه والشارع واقف تماما ً اخر شي تحرك .. بعد طلعت الروح .. خامسا ً .. شباك التذاكر : هذي المشكلة قليلة الحدوث لكنها تحدث بشكل كبير في المباريات الي على ملعب الملز .. زحام الله لا يوريكم .. خصوصا ً في رمضان .. تمسك الدور وشف عاد متى يجيك الدور .. اذكر مرة جيت بعد صلاة العشاء وجلست انتظر الدور وما دخلت الملعب الا في الدقيقه 20 .. وقت مباراة الهلال ونجران [ 5 / 0 ] .. لكن زي ما قلت هالمشكلة قليله وما تأثر بشكل كبير .. كل الي أتمناه ان ادارة النادي ممثلتا ً برئيس النادي الأمير عبدالرحمن بن مساعد .. أن يولي هذه الأمور أهمية ويحرص على متابعتها وعلى إيجاد حلول .. وأخذ حقنا من هذا التسلط وإيقاف مسلسل تطفيش الجمهور الهلالي سواء في ملعب الملز او في ملعب الاستاد شكرا ً لكم   |
![][ .. وتقولون وين جمهور الرياض ..!! .. اسباب غياب وعزوف الجماهير .. نمتنى تحرك من الإداره لحل هذه المشاكل .. ][](iconimages/t884505_rtl.gif)
الوضع الشجري
