السلام عليكم ورحمة الله وبركاته

والله من زمان ماكتبت مواضيع بس الي صار اليوم خلاني اكتب قصص مو مواضيع ..

اول شي الله يسلمكم طلعت انا وخمسه من العيال للملعب المهم يوم وصلنا وشرينا وكان معنا اعلام للهلال وشعارات متعوب عليها وشرينا التذاكر ويوم رحنا بندخل الملعب وقبل لاندخل يوم فتشونا خذو الاعلام الي كانت معنا وخذو كل الاعلام الي مع الجمهور والشالات قلنا لهم ليش تأخذونها قالو تعليمات الأداره قلنا مهيب مشكله ويوم جينا بندخل مع البوابه 51 قال لنا العسكري الي واقف الاماكن مليانه وحنا نشوفها فاضيه قال بالحرف الواحد يله انقلع انت وياه دورولكم مكان ثاني المهم حنا نشينا ولا قلنا علشان ماندخل في سين وجيم ومعروف اي مشكله تسير لك مع الامن ولا الشرطه الخطاء عليك ميه بالميه قلنا نروح للبوابة الي جنبها الي هي 52 ويوم دخلنا وباقي على نهايت الشوط الاول 20 دقيقه قلت انا للعيال عن اذنكم باروح لدورة المياه الله يكرمك , المهم يوم جيت باطلع قال الامن الي عند الباب والله اذا طلعت ان ماتدخل قلت ليش قال بس كذا مزاجي قلت دقيقتين قال اطلع وش بتدخل من هنا ولا لا قلت باطلع وامري لله ويوم طلعت وقضيت حاجتي وشطفت البوابه وجيت بادخل طبعا هو يدخل الناس يوم شافني قال انت بزر اعطيك كلمه ولاتسمعها يله اقلب وجهك لأمسح بوجهك الارض هاذا وش ترد عليه وش تقوله مشيت وانتظرت الين نهايت الشوط الاول ثم دخلت وهو ماشافني بعد .

انا الي حبيت اوصله لأدارة الكره بنادي الهلال بقيادة الامير عبدالرحمن بن مساعد ان يشوفون حل مع حراس الامن الي كل واحد رافع خشمه وهو ياله جاب شهادة متوسط وترك الدراسه, انهم مايمنعون الشالات والاعلام ويكونون يعرفون الاسلوب مع الناس لان الناس مهوب لعبه ينافخون ولا يبون احد ينفس ..

واذا تبون جمهور سوو الي قلت عليه ولا على كذا اخاف معاد يجي الا 5مشجعين كل مباراة ينقص الجمهور عشرة الاف مشجع .

ودمتم بود