السلام عليكم ورحمة الله وبركاته
يالله حيه ,
كردود تعجبني ردودك و تحليلاتك للمباريات ,
التي تنم على رجل عاقل و ناضج و ذكي .
عندي ثلاث أسئلة لك ,


الأول ,
كثرت النقاشات عن " بيليجريني " واستمراره من عدمه مع النادي الملكي
رأيك في الموضوع و السبب في ذلك ؟

الثاني ,
البريمير
من الأقرب له البلوز أم , المان ؟
وما رأيك بأنشيلوتي كمدرب

الثالث ,
من الأقرب لكأس العالم ؟
يا ليت تتكلم عن حظوظ فرنسا و ألمانيا إذا فيك حيل ,


شاكر لك ,

.

صباح الخير
ماشاء الله العالم نشاط اليوم .. يا زين الاسبوع اللي راح تطلع والشوارع هادية وفاضية ومافي قلق و زحمات وتفحيط الصبح

إقتباس الرسالة الأصلية كتبت بواسطة Glamorous Madrid السلام عليكم ورحمة الله وبركاته يالله حيه , كردود تعجبني ردودك و تحليلاتك للمباريات , التي تنم على رجل عاقل و ناضج و ذكي .

وعليكم السلام و رحمه الله وبركاته
الله يحييك يا بعدي .. تسلم من طيبك شهادة أعتز فيها .. و صراحة و بدون مجاملة من الاقلام المميزة اللي نفخر بوجودها في الفترة الأخيرة .. و أشكرك على كلامك الطيّب .. من طيبك

إقتباس اكثرت النقاشات عن " بيليجريني " واستمراره من عدمه مع النادي الملكي رأيك في الموضوع و السبب في ذلك ؟

جاوبت على هالسؤال يا غالي .. لكن ما يمنع اني اعيد الإجابة إنت تستاهل .. مانويل زي ما ذكرت مدرب يحتاج لـ جو صحي هادئ يساعده يعمل بهدوء .. الرجال توفر له هالشرط و بميزانية يد رونالدو اليمنى فقط ونتائجه طانت رائعة مع الغواصات .. الشرط هذا لو توفر اتوقع له النجاح .. طبعا ما اتوقع يتوفر لأن الريال تعود على هالوضع و تعود على الظغوطات و الصحافة المتعصبة اللي تشجع .. لكنها دايم تخرّب على الفريق
الشي المهم الريال كم مدرب الفترة الآخيرة ؟! .. عدد مو معقول .. اقلها كل موسم مدرب جديد .. طيب وين الاستقرار .. وين الاجواء اللي تساعد أي مدرب يعمل .. إدارات الريال اغلبها تستجيب للظغوطات بالعادة .. بيريز صرح ان مشروعه لمده اربع سنوات .. بس ما اتوقع راح يكون مع مدرب واحد !
شخصياً افضّل مدرب يعطي أشكل للصحافة بالعربي واشوفه ينفع مع الجو المحيط بالملكي .. مورينيو مثلاً ؟! .. انا دايم أشوف الميزة اللي تخلي مدربين البريمر ليغ يستمرون هو الجو الصحي .. و الصحافة هناك تبقى مجرد ورق وما يكون لها تأثير داخل الأندية ويبقى الرأي الأول و الأخير للمدير الفني .. لاحظ حتى التسميّة تختلف هناك مدير فني وفي الليغا وحتى الكالشيو مدرب .. لكن يبقى بالكالشيو تأثير الصحف أقل منها في اسبانيا .

إقتباس البريمير

إقتباس من الأقرب له البلوز أم , المان ؟ وما رأيك بأنشيلوتي كمدرب

تبقى الاحتمالات موجودة .. ممكن يصير أكشن ما استبعد بس تبقى الافضلية لـ تشلسي .. ان شاء الله نلقطه
انشيلوتي مدرب كبير لا جدال فيها .. صحيح احياناً قناعاته غريبة بس يبقى واحد من أفضل المدربين بالعالم .. يعيبه الدوريات يواجه مشاكل كثيرة .. حتى مع تشلسي هالسنة تجيه فترات يكون فيها غريب .. زي قبل فترة كان ماشي الفريق على تكتيك معين ويفوز و يضرب بقوة .. بعد مباراتين غيرة والنتيجة فوز صعب على بولتون بالستامفورد و خسارة ضد السبيرز بالوايت هارت لين .

إقتباس من الأقرب لكأس العالم ؟ يا ليت تتكلم عن حظوظ فرنسا و ألمانيا إذا فيك حيل ,

امممممم .. ممكن نقول اسبانيا - البرازيل - انجلترا - المانيا - الارجنتين .. ممكن يكون بين هالمنتخبات .. ولا استبعد ايطاليا كذلك تبقى رقم صعب في المونديالات بالذات بعد الأزمات .. اشوف حظوظ اسبانيا اكبر .. إنجلترا عندها كل الإمكانات بس ينقصها حارس مُعتبر مثل كاسياس و بوفون و خوليو سيزار .
المانيا حظوظها كبيرة .. المنتخب هذا مهما كان سيء لكن يسوي شي .. ولا أدل من عبارة سمعتها من علي الكعبي يقولك الالمان عندما يكونون سيئين يوصلون للنهائي .. على مستوى الاسماء منتخب اقل شي تقول عنه منتخب فخم
فرنسا وضعها مأساوي مع دومنيك .. مدرب عنيد .. لاعبين غريبين مستوياتهم مدرب كيف ولا الومهم احس المدرب خلاص اعطى ما عنده .. غير المشكلة الاخيرة اللي ظهرت على السطح حول اغتصاب القاصرات واللي اتمنى من كل قلبي انها تكون غير صحيحة خصوصاً أن أغلب المتورطين اللاعبين المسلمين .. يعني جو المنتخب ما يشجع ان الواحد يقول ممكن تسوي شي
الميزة بالمونديال انه يخلي الاحتمالات مفتوحة للتوقع بس بالنهاية تصير اشياء غير متوقعة دائماً .. فترة شهر ممكن تشوف منتخب مليان مشاكل يشد حيله وتسلك معه الظروف و الحظ وقبل كل شي توفيق رب العالمين ويشيل البطولة .. عموماً بالنسبة لي اتمناها للأرجنتين أو انجلترا أو إسبانيا بالترتيب .. ملينا من البرازيل ياخي

.. المنتخب مشكلته بالحارس ولو انه حراسه جيدين بس تنقصهم الخبرة .. والشي الثاني المدرب يواكيم لوف مشاكله كثيرة مع اللاعبين .. هبوط مستوى كلوزة او غيابه عن المباريات + تألق كوراني مع طرده قبل فترة بسبب انسحابه مسبب له حرج كبير

إقتباس شاكر لك ,

الشكر لك يا غالي على تواجدك اللي اسعدني بدون مجاملة
وأتمنى تكون إجاباتي كافية وافية

هلا وغلا يالله حيه
الله يسلمك ويبارك فيك ابد تحت أمرك يا بعدي
ولا تقولني مالم أقل

إقتباس السؤال الاول .. مارأيك بما ذكرته انا اعلاه ؟؟؟ وهل ماذكرته بردك على مرسال يمثل وجه نظرك الحقيقيه عن المعلمون ؟؟؟

اول شي روق روق المعلمين اقدع ناس .. والله شف يا غالي انا اعرف ان التعليم فيها مرمطة .. خصوصاً بسالفة التعيين .. يعني مسألة يعيّنون واحد من ابها مثلاً بـ عرعر .. وتلقى واحد من عرعر ونفس التخصص ويمكن نفس التقدير بعد يدرّس بـ أبها .. هذي فيها ظلم وإجحاف ! .. بس الكلام على ان المدرسين حالهم افضل من حال غيرهم .. مثال بسيط حنا خريجين كليات صحية قبل ندرس وقعونا على اقرار وان وظايفنا مضمونة اول ما نتخرج و النتيجة أكثر من 500 صيدلي على الاقل لهم سنتين جالسين و الاحتياج على قفى من يشيل .. وين ما رحت مستوصف أو مستشفى أو مركز صحي حكومي قالوا طالبين 10 , 12 , 13 صيدلي .. اللي ابوصله لك المعلمين وضعهم فيه صعوبات بس هم احسن من غيرهم بكثير اقلها من ناحية الإجازات .. الظاهر هم أكثر ناس يأجزون اللهم لا حسد .. رواتبهم معقولة جداً .. دوامهم جداً معقول .. ومع ذلك يتشكون .. لازم يتركون الطمع شوي ويحمدون ربهم على اللي هم فيه <--- قلب عليهم

إقتباس اذكروا لي موظف حكومي يدفع من ماله الخاص لاجل اتمام عمله او لاجل وظيفته غير المعلمون والمعلمات

ترى منت مجبور تدفع .. والله اني صادق .. تدفع لهم ليه وانا اخوك ؟! .. اذا تقصد التحضير و الاشياء هذي ومكافآة الطلاب و الهدايا هذي تقدر تسويها بدون هدايا .. الشي الثاني انا موظف بمكان حكومة بس نظام تعاقد واحياناً ادفع من جيبي .. بس الله حق اكثر الاحيان ترجع لي .. فلا تسوون انكم الوحيدين اللي تدفعون من جيبكم

إقتباس السؤال الثاني ... قلت انك من الجوف ...من وين من الجوف بالضبط ؟؟؟ انا اتوقع بما ان المنسف اكلتك المفضله اتوقع من القريات ؟؟؟؟

لا يا بعدي من سكاكا

إقتباس السؤال الثالث ... هل للهلال شعبيه عاليه بالجوف او بسكاكا ؟؟؟ او ماسمعناه ان اكثر شباب سكاكا نصراويين ؟؟؟ << اتمنى ان ماسمعته خطأ حتى لا اكره ديرتي << ترا اسويها

اخس عليك تكره ديرتك علشان النصر
شعبية الهلال كبيرة جداً .. بس اكون معك صريح النصر اكثر .. من تالي ما ادري بس يمكن تكون الكفة متوازنة .. شخصياً اعرف نصراويين كثير قلبوا اتحاديين .. فممكن نسبة الهلاليين زادت

إقتباس السؤال ... الكتاب عندي منذ سنه ولم استطع قرائته ... كل ماأفتحه يجيني احباط واسكره ... كيف قرأته ؟؟؟ وكيف اقنع نفسي بالقراءه؟؟؟ مع يقيني بفائدته ؟؟؟

غريبة .. مدري بس عن نفسي احب اوفر جو مناسب للقراءة .. يعني ما احب اقرا كذا لمجرد القراءة بس .. اظبط الجو واكون فعلاً بمود اني اليوم خلاص ابي اقرا كتاب .. يعني مسألة انك مثلاً تمسكه وتبي تفهم وش فيه وانت نصك نوم هذي انسى .. بالمختصر حاول تقراه بتركيز وعلى مهل وبجو مافيه ازعاج واهم شي ما يكون فيك نوم
بالنسبة لي اشوفه واضح جداً ومافيه ذاك التعقيد واهم شي زي ما قلت لك يبيله تركيز و ذهن صافي بس

إقتباس بالاخير اعذرني على تعليقي على نقطه المعلمون والمعلمات واني رديت بعصبيه شوي وياما سمعنا هالعبارة قبل هالمره والمثل يقول ماتحرق النار الا رجل واطيها وقد يكون الامر اخف بقليل لو المعلمون والمعلمات عند اهلهم وبديرتهم مو تموت ناس وتجي ناس وهم اخر من يعلم وماغير تقطع عمودي الفقري من هالخطوط ... يقطع الراتب وسنينه بس يقربوني لأهلي >>>> ماغيرت رايك

يا بعد تسبدي يعين الله .. الحين الواحد لازم يتعب ويشقى علشان يحصل لقمة عيشة .. وان تسان تبي نصيحتي كمل دراسات عليا مدري عن نظامكم عاد .. بس اخوي انا خلص من الكلية وطلع امريكا على طول اخذ ماجستير والحين يتسدح بالجامعة هنا محاضر (قل ماشاء الله )
قل آمين .. يا جلعهم يحطونك بأقرب مدرسة عند بيتكم .. وابد معذور يا غالي والسالفة اخذ وعطا وسواليف وآراء متبادلة ولك الحق بالتعبير مثل مالي حق بابداء الراي كذلك
بعدين وش تبي تنقل للديرة كلهم نصراويين
الله يحقق لك اللي ببالك .. وجعلك تجي تبشرني انهم نقلوك للمكان اللي تبي
نورت يابن الديرة