المرة السابقة اللي وضعت فيها موضوع كان عن مباراة الهلال والاهلي في الدور الثاني من الدوري
وللأسف المشرفين اعتمدوا الموضوع في وقت متأخر جدا حتى ان الموضوع ما كان له داعي فترة اعتماده

السلام عليكم ورحمة الله وبركاته
هارد لكم يا زعماء التعادل اللي كان اشبه بالهزيمة .... لكن هذا درس بإذن الرحمن لمباراة الاياب في الامارات وجرس انذار ل الفريق انه يآخذ حذره من الفرق اللي تلعب بخطط دفاعية >>> والفوز جاي لا محالة ان شاء الله

أولا : اعتب على جمهور الهلال في الرياض على حضورهم السيء (زمن دخول المجان ذهب بلا رجعة ) لأن الزعيم مو متعود على ملئ الواجهة باستاد الملك فهد ( شجعت الزعيم بعمر ال6 سنوات وعتدها كنت ارى المدرجات ممتلئة عالآخر في مباريات عادية وليس في المشاركات الاسيوية او النهائيات فقط ) وهذا اللي شدني لعشق الزعيم بالاضافة الى فن ابويعقوب وباقي فرقة الرعب , لو أخذنا جولة على القهاوي اللي عند كبري الفحص الدوري بالرياض وندخل بنشوف جمهور يملي الملعب و تبقى ناس ما لها مكان بالملعب ( تعرف جماهيرنا من الشالات اللي بالسيارات وللي معلقه على رقبته غير الخلفية الزرقاء اللي متسند عليها ابو الشباب عاشق المعسل والشيشة

ثانيا : اشكر بعنف كل اللي تواجدوا بالملعب وخصوصا اللي جاي من آخر الدنيا .. لكن لايكفي الحضور مع اكياس الفصفص ( اتمنى عدم بيع الفصفص ) لأنه وبصراحة تشوف معظم الجمهور مشغول بالفصفص ومايشجع الا (دقايق بسيطة) بعد الهدف ... وبعدها يرجع لحبيب القلب ( مستر فصفص ) >>> يتقولون وصوت التشجيع اللي كان واضح بالتلفزيون ... وانا اقول لكم ارجعوا للمباراة وتشوفون في بعض فترات المباراة كانت الرابطة ترتاح اشوية والجمهور نام له اشوي على مارجعت الرابطة ..... وممكن عالاقل يقولوا كلمة ( زعيم ...هلال ..الخ) الى ان يسترجع رئيس الرابطة واللي معاه طاقتهم وحناجرهم لاعدمناهم...
(( كنت ادرس بالرياض , ولم افوت مباراة استطيع حضورها ... ولكن كانت ظروف الدراسة لاتسمح كثيرا حتى بمشاهدة المباراة بالتلفزيون , والآن عدت للشرقية مقر العائلة الموقرة وسنة الامتياز <<< أخصائي علاج طبيعي "شوفوا لي واسطة اشتغل بالنادي" )) ولو سمحت لي الظروف و ربي حضرت ... يالله ان شاء الله تسمح الظروف مستقبلا .... بس وش تسوي اذا كان الدوام مايخلص الا 5 العصر وانا اصحى من الساعة 6 ونص
"ماتقدر تسوق على تعب وكلنا شفنا تهور مشجعي الزعيم اللي صار لهم حادث في طريق الخرج و توفو رحهم الله "


ثالثا : لجمهور الفوز .... جيريتس والطاقم الفني والاداري اعلم بالفريق منا ... وكلام جيريتس الاسبوع هذا ان الجماهير مو هي اللي تفرض عليه التشكيلة صحيح ... الجمهور شغله ملئ المدرجات و تحميس اللاعبين و دعم الفريق معنويا

رابعا (الأهم) : مستوى الفريق بشكل عام ومدى تأثره بغياب حبيب القلب (ويلي )
لا أحد ينكر ان ويلي يمثل ثقل فني كبير بالزعيم ولكن كلنا شاهدنا بالامس سيطرة الزعيم على مجريات المباراة بشكل تام الا في اخر 15 ساعة ( مقولتي هي المباراة 90 دقيقة لاتنتهي الا مع صافرة الحكم ) وغياب ويلي ليس بعذر
الزعيم قدم مباراة ممتازة من الناحية التكتيكة والفنية وكان من المفترض الخروج على الاقل بهدفين بكل شوط رغم الدفاع المستميت من الاماراتيين

ننتقل لأداء اللاعبين بشكل ادق في المباراة

ابوعبدالعزيز (الاخطبوط) : كل المباراة كنت 10 على 10 رغم قلة الهجمات اللي وصلت مرمانا لكن غلطة الشاطر بمليون في الهدف القاتل .. لأنه وبكل بساطة كنت محتاج نصف خطوة للأمام (بحكم خبرتك) من اجل ان تصل للكرة بشكل اسرع وضمان عدم ولوجها للمرمى اذا لمستها بل تخرج الى خارج المرمى لا ان تقف على خط المرمى و عندما تقفز تتجه الى داخل المرمى وكأن الكرة جاية من داخل المرمى ... راجع حساباتك يا كبير ... و معذور
والاعتذار من شيم الكبار والاساطير .... شد حيلك يا بطل اكيد بتكون لك بصمات في اسيا مثل مباراة السد

خط الدفاع
- الزوري : لعب مباراة بشكل جيد وكان له انطلاقات جميلة ومنها التسلل الغير صحيح عليه , ولكن احب اقول له دائما حاول ان تركز بالعرضيات وارفع رأسك لترى اين يتواجد زملائك ( في الشوط الاول كان فيه كذا عرضية غير مفيدة للفريق لهذا السبب) , لا احملك مسؤولية الفاول اللي تسجل منه هدف التعادل لأنه وبكل بساطة هذي غلطة الهوساوي
- المرشدي : أداء راقي و استخلاص الكرة بدون عمل فاولات او اخذ كروت صفراء , ناجح بدرجة امتياز في تطبيق مصيدة التسلل مع الغالي ابو كلبشة , ودي تركز اشوية انت وابو كلبشة بالركنيات وتتفاهمون مين يدخل على الكرة من جهة ( نقطة الجزاء ) ومين يشغل المدافعين في خط الستة مثل ما صار في مباراة مس كرمان في هدف ابوكلبشة
- الهوساوي(ابوكلبشة) : صراحة بديت اخاف من اخطائك القليلة المؤثرة (الاسيوية لا مجال بها للأخطاء البسيطة)
مباراة مس كرمان كلنا قلنا الهدف يفداك بس مو كل مرة تجيب العيد فينا
لاحظوا ان المشكلة نفسية اكثر من انها فنية ... لأنه وبكل بساطة المباراة في نهايتها و معظم اللاعبين بقول في نفسه الحكم الحين بيصفر وبنآخذ ال3 نقاط ( هذه النقطة ركز عليها جيريتس والاسطور الجابرية كثير)
- لي يونغ : لا تعليق وخصوصا انك تغطي دفاعيا وهجوميا وعيني عليك باردة >>> اشبهك بسيارة الميني كوبر لسلاسة أداءك وبدون فلسفة في استخلاص الكرة من الخصم وتمريرها لزملائك وبناء هجمة

خط الوسط :
المقاتل رداوي : قدم مباراة كبيرة فكان ساترا للدفاع بشكل كبير حتى اني حسيت انو في اكثر من رادوي بالملعب من كثرة تغطيته للملعب ... و تسلم على تمريرة الهدف ... هذا هو المقاتل ( يا لبى قلبك )

الفريدي : لاعب يغطي دفاعيا بشكل ممتاز في حال كانت الهجمة علينا لكن اذا استخلص الكرة من الخصم او استلم كرة من زملائه اللاعبين .. يحلف يمين انه مايسلمها للاعب آخر الى بعد دقيقة دقيقتين .. او على حسب المزاج
بالعربي ( بطيء جدا ) , واكثر حاجة عجبتني فيك اليوم تسديداتك المتقنة واستخدامك المكر الكروي المحمود

الشلهوب : يجب ان تعرف متى تسدد ومتى تمرر لزميلك مثل ما صار في كم هجمة بالشوط الاول , بس اعجبني حماسك و تسحيبك بالمدافعين ... بس كان ناقصك القرار الاخير ( التسديد على المرمى او التمرير لزميل آخر )
المحياني : افضل لاعب بالمباراة مع المقاتل رادوي , تحركات ايجابية و تمرير صحيح , ضربات رأسية ... بس الله يهديك ركز في الكرات العرضية الارضية او المتوسطة الارتفاع وكيف تاخذ مركز يخليك تلعبها في القوووووول

الكاسر ياسر : اليوم كان ادائك جميل بس كان ودي انك تستغل مهارتك الفردية في كسب فاولات قريبة من ال18 عشان نيفيز و رادوي يستفيدوا منها ...

البدلاء :
العابد : أداء رائع وقتالية واستبسال على الكرة رغم البنية الجسمانية الضعيفة بس الله يهديك انسى الاستعراض وخصوصا ان النتيجة 1-0 غير مأمونة
الغاامدي و الغنام : ماقصرتوا في الدقايق اللي لعبتوها لكن لي عتب عليكم في الفاول اللي تسجل منه الهدف ( الزوري اضطر يعمل الفاول ) لأنكم مو مغطيين المنطقة اللي حول ال18 ( وهذا هو المقصد من ادخالكم للمباراة)

جيريتس : بصراحة سويت اللي عليك ... بس اذا اللاعبين خرجوا عن تعليماتك اكيد بتضيع ال3 نقاط
وتغييراتك كانت ممتازة باستثناء تغيير الشلهوب .. فمن وجهة نظري المتواضعه .. المفترض اخراج الفريدي وادخال خالد عزيز مع تغيير في اماكن اللاعبين قليلا .. الشلهوب جناج يسار , نيفيز خلف المهاجمين مع وضع رادوي محور هجومي في الجهة اليمنى للإستفادة من تسديداته الصاروخية او تمريراته المتقنة ( مثل ماشفنا كيف وضع الكرة للمحياني )

من هنا و هناك :
- الزعيم لا زال متصدرا لمجموعته ولا زالت الامور كلها بأيدينا
- التعادل غير مقبول في دور 16 وخصوصا انها مباراة واحدة ... وتذكروا ان التعادل اخرجنا مرتين وليس الهزيمة
(ام صلال بالبلنتيات في دور ال16 و مباراة الوحدة الاماراتي "1-1" في دور الثمانية)
- يجب على ادارة الفريق الاول عدم جعل اللاعبين يصرحون للإعلام الا بإذن من ادارة الكرة وفي المركز الاعلامي
والابتعاد عن عقد الحوارات المطولة ( محتاجين تركيز على مبارايات آسيا ) مع مراجعة الاسئلة المطروحة على اللاعبين وعدم السماح للاعلاميين الالتقاء باللاعبين في منازلهم الا بإذن من الادارة ( كما يحدث في اوروبا) والصيف جاي بالطريق اخذوا راحتكم في التصريحات عساكم تسوون حوارات بجريدة كاملة او 5 ساعات بالتلفزيون
- كيف نطالب نيفيز التسجيل من الفاولات والتي كانت نادرة في المباراة ... مباراة الشباب التي ابدع فيها نيفيز بالفاولات واحدة بالقائم والثانية بالقوووول ( كانت مليئة بالفاولات القريبة من 18 وهذا هو شغل ياسر و ويلي في كسبها او حتى نيفيز يحاول كسبها بنفسه)
- سيناريو مباراة اليوم صورة طبق الاصل من مباراتنا مع الكويت الكويتي في نفس المسابقة ... الزعيم متحكم بالمباراة كاملة وفي النهاية غلط بسيط يضيع ال3 نقاط ... مع الاختلاف في عدد الجمهور لكن كان الدخول مجاني
- امنى من جيريتس التنبيه على اللاعبين انهم يحتفظوا بالكرة آخر دقائق المباراة و العمل على ابطاء رتم المباراة لامتصاص اندفاع الفريق المنافس للمخافظة على التقدم وليس بناء هجمات تنلفب مرتدات علينا

في الختام ... آسف على الاطالة لكن حبي للزعيم اجبرني على المعلفة السابقة


عاشق الزعيم حتى الثمالة
اخوكم :
blue_drooops