مممممممممم
موضوع يعني وش اقول اذا بتكلم لغة عربية فصحى يمكن انجلط
نبدا سيدا بالموضوع
الصراحه شفت الردود كلها واعجبني كم رد وحاب اتكلم عن كم نقطة.
اذكر ايام الثانوي والي تعتبر ايام المراهقه كنت كاي شاب سعودي يعتقد انه الصح وانه يبي مصلحه اهله.
طبعا لما يكون مع اخوياه ويسمع التعليقات الي تجي عالبنات بالشارع, مثلا وحده لابسه عباية بدون نقاب بس مغطية وجهها ويشوف الكم الهائل من التعليقات ويرجع البيت ويشوف اخته تلبس كذا يقوم الدنيا كلها لااااازم تلبسين نقاب.
طيب شرعيا مو حرام البنت متحشمة الام راضية الابو راضي انت وش دخلك.
هل تتوقعون جاي يمنع هالشي على اساس دين؟؟؟؟؟ لا طبعا عشان تقايليد وعرف وعشان اخوياه والناس يشوفون الي تلبس زي كذا بنت نص كم يعني بالعربي تفكير زبالة.
عشان اكون واقعي انا عشت تقريبا هالحالة وكانت العاطفة الي تقودني ونظرة الشباب للبنت كيف, فاحاول ان اخلي مظهرها زي ما يعجب بعض الناس والي يشوفون انه صح
طبعا ما اقدر اقولها شي بس كانت معاملتي معها قاسية ما اكلمها بعض الاحيان المسكينة, وللحين حاقد على عمري من ذيك الايام.
ما اقدر اقولها شي لان ثقافة بيتنا قل الي عندك لابوك وامك اما تجي تكلمها مااااااالك شغل اذا كانت تفكيرك كذا, وحط عليها خطين.
كيف تفكيرك كذا, يعني ان يكون هجوم على البنت مو نصيحة وفي فرق بينهم.
طبعا تغيرت الامور والحمدالله تحسنت النظرة عندي وبديت افهم الحياة صح واكتشفت اني كنت انسان **** مع اهلي بعض المرات.
الحين انا واحد استانس معا خواتي واحب الجلسة بالبيت معاهم وامطيح الميانة بدرجة قوية مو لان يا زعم ابي اتقرب منهم عشان ما يضيعون, لا لاني واحد احبهم واحب الجلسة واعتبرها احلى من الجلسة مع اخوياي بمليون مره, ولما اشوف بعض الاشياء الي تضايقني اقولها لهم والحمدالله يسمعون مني لاني جاي انصح وحابلهم الخير وهم عارفين هالشي.
طبعا انا ادرس بكندا حاليا وكل ما اجي اجازة السعودية احاول اسوي اي شي يرضيهم واخليهم يفتخرون فيني وما اخليهم يشوفون ان اخو فلان احسن من اخوي ومن ذا الكلام لان البنات يحبون هالحركات, واعيد الكلام ثاني مره اني اسوي هالشي وانا مستانس ومبسوط, يعني تكون اجازتي اسبوعين احاول اخلص امورهم الي بدوني صعبة انها تنجز بما ان اخوي بدبي وابوي مشغول بشغلة.
طبعا بالجهه الثانية, كنت احسب اني لو نفذت كل طلباتهم وحققت كل الي يبونه بصير خدمت مصلحه البنت, بس اكتشفت شي ثاني, كييف؟
قبل ما اجي السعودية كنت باشتري لاختي الي بالسمستر الاول بالجامعه لاب توب هديه لان ما عندها والا تبي لاب توب, طبعا توقعت ان هالشي بيفرحها وبيفرح اهلي اني فكرت فيها.
بس لما قلت للوالده الله يحفظها بجيبلها لاب توب قالتلي مو الحين البنت مو جاهزه له, طبعا انا ؟!؟!؟!
اختي عندها جهاز كمبيوتر بالصالة بس فكرة الوالده ان مو وقته البنت بالهسن وبهالوقت يصير عندها جهاز حاليا ما تحتاجة بالدراسة وممكن تكون سلبياته اكثر من ايجابياته بما انه بيكون خصوصية تامة بالاب توب.
وطبعا مو اي شي تبيه تحصلة.
بالمقابل تعوضها ان تشريلها مجوهرات بسعر اكثر من الي هي تستاهلة تعويض عن اللاب توب والاشياء الثانية.
الفكرة من الموضوع حلو تدلع البنت وتكون اخو سند لهم بس بنفس الوقت يكون في حد لكل شي والام هي اكثر وحده عارفة هالشي ومنه تقدر تتصرف انت.
ارجوا اني ما طولت عليكم وغثيتكم بس هذي تجربتي بالحياة طال عمري
مشكور اخوي على الموضوع التوووحفة الي خلاني ابرز مواهبي
.. 
هع .. 
.. 
ا .. 
<< هع 
.. مو اطلب من التلفون 
الوضع العادي
