السلام عليكم ورحمة الله وبركاته
اسعد الله اوقات الجميع بالخير والمسرات وجلب البطولات

اذكر يوم كان عمري 10 سنوات وذلك الوقت كنت من سكان احلى احياء الرياض حي الملز و سطح بيتنا يطل على ساعة ملعب الملز وقد كبرت وانا اسمع اخواني يتكلمون دائما عن الازرق حتى ادمنت ذلك الحب و دائما يحضرون للملعب ليشاهدوا الهلال حينما كان الولاء للفريق من اللاعبين ولاء خالص لاتشوبه شائبه حب المال وطبعا اخوي الكبير كان شديد وانسى انه يبي ياخذني معه وش كنت اسوي انا من شدة لهفتي على الحضور؟؟؟ كنت اروح للملعب واشوف لي واحد معه عياله واقوله تكفى دخلني معك وقل للعسكر اني معك لأن ذاك الوقت ممنوع يدخل الصغير لحاله وانا عمري 10 سنوات والدخول كان للصغار بلاااااش0000 واذا دخلت قلتله شكرا ورحت لحالي0000 طبعا اطلع دايم بالدقيقة 35 من الشوط الثاني عشان يمديني اوصل للبيت قبل اخوي000000

طيب تسألون انت وش تبي جالس تقص قصة حياتك وابرد عليكم انا واقول بكيفي فايز بالدوري وابسولف لين يجي كاس ولي العهد احد عنده اعتراض؟؟؟

لا الصراحة كان ماذكر اعلاه مدخل للموضوع الرئيسي وهو اعتداء رجال الامن على الجمهور 0000وبسم الله ابرجع اسولف عليكم من جديد واقول0000

** انا الان عمري 35 سنه ومن 25 سنه وانا احضر اغلب مباريات الهلال وخاصة الجماهيرية وبصراحة ما قد جاء رجل امن وتلفظ او اعتدى علي بالضرب بالعصا كما يتداول البعض بان رجال الامن يعتدون على الجمهور المسالم المسكين اللي يمشي ويباري الساس00000

**اسأل نفسك اول ليش رجال الامن موجودين ؟؟ يمكن معزومين على المباراة وملزم عليهم فيصل عبدالهادي على العشا عقب المباراة لكن انا ابقولكم ان رجال الامن الواحد منهم يطلع من بيته 12 الظهر ويروح لدوامه ويطلع مناك للملعب والحضور 2 الظهر ويجلس حتى بعد نهاية المباراة بساعتين يعني يالله يطلع 12 ويوصل لبيته 1 بالليل وكل ذاك الوقت وهو واقف مايجلس !!!

**طيب انت بدوامك او بأي مكان يخصك وانت مسؤول عنه وجاك واحد قلق ماتعصب عليه اذا تعدى حده معك طيب اذا جاء واحد ويبي يدخل لبيتك بالقوة لاسمح الله تبي تقوله تكفى لا وتبوس خشمه والا اقرب ابوجلنبو وتعطيه على راسه ؟

**من كلامي اقول الله يقوي رجال الامن على مثل الاشكال اللي ماتعرف من الرياضة الا اسمها واعتقد انكم تعرفون انه فيه تخصص يسمى (امن الملاعب) ويدخل من ضمنه المعالجة الفورية والتدخل السريع لافشال اي حالة شغب مهما كان حجمها 00وخلوا عنكم العاطفة يوم شفت رجل امن يضرب مشجع هلالي قلت اعتداء وما ادري ايش 000اللي اعرف ان اغلب جمهور الزعيم ينادي بالتشجيع المثالي اللي هو احضر وشجع وانصرف بأدب000

**قصة بسيطة تحكي حال المشجع المشاعب اللي حضر يبي على قولة الورعان (يهجوول) 000يحكى ان شخص اشتكى اخرعند القاضي بأنه ضرب ابنه وعندما حضر الخصمان سأل القاضي المدعي واجابه بدعواه فسأل المدعى عليه عن ذلك فقال المدعى عليه للقاضي قل لا اله الا الله ياشيخ فردد الشيخ الشهاده وطلب المدعى عليه ذلك مرة ثانية وثالثة ورابعة من الشيخ ان يردد الشهادة فغضب الشيخ وقال لا اله الا الله بصوت مرتفع يملؤه الغضب الشديد فرد عليه المدعى عليه هذه اجابتي ياشيخنا الفاضل فانت غضبت من تكرار الشهادة فما بالك بي وانا اتصبر عن هذا الولد من ايام وهو يمشي خلفي ويرمي علي اقذر الكلام فقد نفذ صبري!!

**الخلاصة / الملاعب الاوروبيه ليش شكلها حلووووو ؟؟ لأنه مافيه مضمار ولا فيه شبك طوله 3 متر مثل ملاعبنا اللي ماردت المشاغبين المتسلقين اللي يطالب بعض الجمهور باحترامهم وعدم ضربهم والمشكله انهم دائما مايرددون من امن العقوبه اساء الادب واعتقد انهم مايعرفون المعنى لان العقوبه طبقت وزعلوااااا !!!

*** اخواني والله عندي كلام كثير وخاصة عن الدخول المجاني لان مشاكله واجد وتصدقون ان في مباراة الهلال والوحدة الاماراتي الله لا يعيدها بعد المباراة صارت مضاربه قدامي على شارع جابر من الجمهور اللي طالع وفيها سكاكين ودم واجد هذولا هم اللي يعتدي عليهم رجال الامن ومن على شاكلتهم ومحشومين كلكم عن هالاوصاف 00

*** كلامي هذا ماهو موجه الا للمشجع المشاغب الغير محترم ومن يدافع عنه وتقبلوا مني الاعتذار الشديد على الاطاله لان السواليف معكم زينة والموضوع من زمان مضيق صدري وتوي اقدر اكتب عنه وتكفون اذا كنت زليت بشي فارجو السموحه وكما قلت سابقا انتم اصحاب القلوب الرحيمه ايها الزعمااااااااء

مآشآء آلله عليك يآكلأش مآخليت شي


آجل آلرجآل يدخلك آلملعب وتسحب عليه بآشر عليه آقل شي هههههههههههههه


بصرآحه موضوعك وكلأمك منطقي وقريته كآمل ومثل مآقلت آلمشآغبين و ( آلمهجولين ) هم آللي خربوآ على آلعآقلين

وآلله يآخوك نصهم يجي آلمبآرآه ومآيدري من آللي يلعب ووسط آلمدرج يسآلك كم آلنتيجه وبرى آنوآع آلشغب وآلمشآكل


آلله يعطيك آلعآفيه طرح موفق

إقتباس **قصة بسيطة تحكي حال المشجع المشاعب اللي حضر يبي على قولة الورعان (يهجوول) 000يحكى ان شخص اشتكى اخرعند القاضي بأنه ضرب ابنه وعندما حضر الخصمان سأل القاضي المدعي واجابه بدعواه فسأل المدعى عليه عن ذلك فقال المدعى عليه للقاضي قل لا اله الا الله ياشيخ فردد الشيخ الشهاده وطلب المدعى عليه ذلك مرة ثانية وثالثة ورابعة من الشيخ ان يردد الشهادة فغضب الشيخ وقال لا اله الا الله بصوت مرتفع يملؤه الغضب الشديد فرد عليه المدعى عليه هذه اجابتي ياشيخنا الف **قصة بسيطة تحكي حال المشجع المشاعب اللي حضر يبي على قولة الورعان (يهجوول) 000يحكى ان شخص اشتكى اخرعند القاضي بأنه ضرب ابنه وعندما حضر الخصمان سأل القاضي المدعي واجابه بدعواه فسأل المدعى عليه عن ذلك فقال المدعى عليه للقاضي قل لا اله الا الله ياشيخ فردد الشيخ الشهاده وطلب المدعى عليه ذلك مرة ثانية وثالثة ورابعة من الشيخ ان يردد الشهادة فغضب الشيخ وقال لا اله الا الله بصوت مرتفع يملؤه الغضب الشديد فرد عليه المدعى عليه هذه اجابتي ياشيخنا الفاضل فانت غضبت من تكرار الشهادة فما بالك بي وانا اتصبر عن هذا الولد من ايام وهو يمشي خلفي ويرمي علي اقذر الكلام فقد نفذ صبري!! اضل فانت غضبت من تكرار الشهادة فما بالك بي وانا اتصبر عن هذا الولد من ايام وهو يمشي خلفي ويرمي علي اقذر الكلام فقد نفذ صبري!!

كنك تتكلم عن ابو رزق الله يذكره بالخير وهذه فعلا وقعت عندما رجموه الاولاد بالحجار وكل يوم على نفس المنوال وقدك عارف القصة

موضوع كاما والكامل وجه الله

اخوي انا معك بكل نقطه والله .. اتمنى ما عاد نشوف دخول مجاني


تسلم يمينك يالغلا



بس تعااااااال اخوك للحين ما يدري انك كنت تسوي الحركات ذي من وراه

ابسالك .. هذا وشو : سياج ... صح

وين العسكري يفرشهم

اذا جاوبت بكلمك عن قصة حياتك

إقتباس الرسالة الأصلية كتبت بواسطة زعـ X5Xــيم ابسالك .. هذا وشو : سياج ... صح وين العسكري يفرشهم اذا جاوبت بكلمك عن قصة حياتك

خخخخخخخخخخخخ والله يالرد هذا جامد ويروع !!

بس من جد يجب أن لايكون ذريعة لنا لنتاعطى مع الفرح بصورة غير حضارية ومخالفة للتعليمات

حتى وإن كان الوضع غير مريح ولايجعلك تنتشي كما تحب

إقتباس الرسالة الأصلية كتبت بواسطة زعـ X5Xــيم ابسالك .. هذا وشو : سياج ... صح وين العسكري يفرشهم اذا جاوبت بكلمك عن قصة حياتك

هذي مشكلتنا لازم يطبق النظام على الغير الاول عشان نقتنع وانت ياخوي اذا منظر الصوره عاجبك فهذا شي ما اجادلك فيه لانها قناعات اما اذا ما اعجبتك وهذا مااعتقده منك فلازم تقتنع بكلامي لاني اقول رجل الامن مايعترض الا طريق المشاغب وتخيل لو الجمهور طب الملعب وش تبي تقول اكيد سوء تنظيم ورجال الامن نايمين وماادري ايش يعني رضا الناس غايه لاتدرك
تقبلني بصدر رحب يازعيم

والله انك صادق

اي مباارة الدخول مجاني لازم انواع الشغب وانواع المشاكل بعد المباراة

ومباراتنا مع العين

انا حاضرها

وما شفت المضاربه الي تقول عنها

بس شفت كم واحد يتمشون بعد المباراة وفيه باص مليان عمال يمشي وخذ انواع الترجيم بالحصرى وتكسير القزاز هههههه