ما عندي خبرة بموضوع المقدمات

بس لاحظنا بالفترة الأخيرة

انتشار موضة

جمهور الرياض

جمهور يفشل

جمهور نهائيات

جمهور نجوم

حضروا الجمهور وعبوا الملعب

تبدأ الأسطوانة الثانية

جمهور ياكل حب

جمهور ما يشجع

جمهور وجوده زي عدمه

ونادرا ما تلقى أحد يمدح هالجمهور المظلووم




الكل كان ساكت عن جمهور الرياض هالموسم لأن أقوى حضور له من فترة

إلى أن جت مباراة الأهلي بالأستاد

وفي ناس ما صدقت لقت لها فرصة

رغم أن الحضور كان جيد جدا

لو أن هذا الحضور كان بالملز

كان رجع نصهم بيتهم

لأن ما بيلقوا مكان لأن واجهة الملك فهد أكبر من الملز

وتقريبا أكبر من أغلب االملاعب السعودية إذا مو كلها

قالوا نستنى مباراة الأهلي اللي بنصف نهائي

ولقوها الفرصة الذهبية

ونسوا أن المباراة بوقت اختبارات نهائية

وأنها بأول الأسبوع

يوم السبت أصعب يوم على الطالب والموظف

بتقولوا مالها دخل نظم وقتك بتحضر المباراة كلها ساعتين

أقول معاك حق أن المباراة ساعتين لو كنت بتشوفها بالبيت

بس أغلب جماهير الهلال اللي بره الرياض

ما يعرفوا معاناة الجماهير للحضور

بأوريكم حسبة بسيطة لجدول أغلب سكان الرياض

المدارس تخلص الساعة 1 أو قبل

وعلشان ترجع البيت توصل الساعة 1 ونص لو وصلت بدري وبيتك قريب من المدرسة



ترجع البيت تبي تتغدا وتصلي العصر وبتنام

تقوم على المغرب تصلي المغرب وترجع البيت

لو قررت تروح الملعب لازم من المسجد للملعب

ونقول الساعة 6 تقريبا لما تطلع للملعب

وحتى توصل الملعب تكون الساعة صارت 6 ونص

ما تعرفوا زحمة الرياض ومشاويرها ياللي بره الرياض

لأن لو رحت بعد الساعة 6 احتمال ما تلقى لك مكان

أو تتورط عند البوابات ويقفلوها بوجهك



ألحين المباراة تبدأ الساعة 8

أنا الساعة 7 أكون جلست بمكاني

مع مراعاة أن ممنوع دخول أي نوع من المشروبات لداخل الملعب

مو زي باقي الملاعب

بدأت المباراة الساعة 8

نقول خلصت بعد شوطين بدون أشواط إضافية

يعني الساعة بتكون 9:45 خلصت المباراة

بتطلع من الملعب علشان تخلص من الزحمة اللي جنب الملعب وتمسك طريق البيت

تكون صارت الساعة 10:15

هذا لو طلعت بدري وما علقت بالزحمة



طبعا الواحد يبي يتعشى يروح يشوف له أي مطعم بالطريق ويتعشى ويرجع البيت

صارت الساعة 11:30

ما شاء الله عليه خلص سريع سريع ووصل بيته



ولاحظوا الملخص اللي فوق والمباراة شوطين بدون إضافي

وكمان بدون لا يذاكر

تبي حسبة بسيطة

من الساعة 6 إلى 11 ونص انت بره البيت

5 ساعات ونص علشان تحضر مباراة

وللمعلومية لسع ما ذاكرت

بالنسبة ليا رغم حبي للهلال وعشقي الكبير له

أشوف المباراة بالبيت ساعتين على قولتكم

وأوفر لي 3 ساعات ونص أذاكر

ولا أتمرمط بالملعب

صح أحب الهلال

بس ما بيفيدني لو دمرت مستقبلي علشان مباراة

وهي آخر سنة بالثانوي >> يلمح أنه بيتخرج هالسنة

طبعا أنا ما أتكلمت عن الموظفين

وطلاب الجامعات

اللي أغلبهم يرجعوا بعد العصر بيتهم

لو أن المباراة بآخر الأسبوع

أربعاء خميس جمعة حتى لو ثلاثاء

لو أنها مباراة بوقت غير موعد الاختبارات النهائية

جاهز أحضر

أما تجي لي بأهم وقت للطالب وبأول يوم بالأسبوع

مو ذنبي ما أحضر

وهو مافي تنظيم بالملعب ولا في تنظيم بجدولة المباريات

لو أني من الجماهير اللي بره الرياض

والهلال ما يجي عندي غير مرة أو مرتين بالسنة

جاهز أحضر لو بكرة عندي اختبار نهائي

وجمهور الرياض ما قصر هالموسم

أفضل حضور له

بالتشجيع والأهازيج

وتقريبا هو الجمهور الوحيد اللي ما تعاقب الهلال بسببه

أنا ما أبي أتكلم على جماهير المدن الثانية

لأن بالأخير كلنا جمهور لنادي واحد

وأتمنى من الإدارة التصرف حيال الموضوع

والله في جماهير تتكلم على جماهير الرياض

تخلي الواحد يبي يحلف ما عاد يحضر مباراة بسببه

أتمنى ما أكون أطلت عليكم

واللي بيقول رأيه

أتمنى عدم التجريح





دمتم زعماء