نادي الهلال السعودي - شبكة الزعيم - الموقع الرسمي

بسم الله أولاً ودائما...

عندما تدخلك هلاليتك الى المنتدى لتشعر بالانتماء لوطنك الهلال تشعر بالسعادة لأنك محاط بإخوانك في الانتماء الهلالي من كل جانب...
يكتبون من اجل الهلال...يفرحون لانتصاراته ..يثورون كعادتهم عند الخسارة ...وينتقدون كل شيء ولا يرضيهم حتى لو اكتمل هلالهم بدرا..
علاقة الهلال مع الجمهور وعلاقة الجمهور مع الهلال حالة خاصة واستثنائية تحتاج الى دراسة مستفيضة لمعرفة طبيعة هذه العلاقة الشائكة..
في مناسبات عديدة حضر جمهور الهلال وملأ مدرجات اكبر استاداتنا الرياضية استيعاباً...وغاب نجوم الهلال..وخرج الجمهور مبكراُ غاضباُ...ولكن الانتماء يحتم الوفوف مع الكيان الهلالي في كل الحالات....كنت اتمنى دائما ان نصل لمرحلة ارى فيها جمهور الهلال ينتظر حتى صافرة الحكم النهائية ليصفق ويحيي لاعبيه عند خسارتهم..

لكن....

..واتمنى ما احد ياخذ موضوع الحضور بشكل شخصي...لأننا وبصراحة شفنا موقف ما كان له داعي ابدا من جمهور الهلال...وبصريح العبارة احبطنا كلنا كهلالييين حتى اللي ما حضر او يتعذر محبط من المنظر اللي شافه..

سبق ورديت في موضوع ثاني...وقلت اللي ما وده يحضر لا يبرر ويتعذر بأعذار واهية بصراحة..

اللي يقول اختبارات...الله اكبر يالمذاكرة اللي مقطعه العالم...
الشي الثاني الطلاب مسموح لهم ما يجون ...او يعني كل جمهور الهلال طلاب!!!!!!

اللي يقول عساكر ومدري ايش...يعني جماهير الفرق الثانية اللي تجي الملاعب عساكرهم من فرنسا !!!

واللي يقولك دوام وسبت ومدري ايش...نقول مليون من سكان الرياض تعبانين ومداومين وعندهم اشغال معقولة مافيه 20 الف يقدرون يجون الملعب!!!!!!

ومثل ما قلت فيه حقيقة ما احد راضي يعترف فيها ..وهي ان الاغلبية للأسف كانوا يتوقعون ان الفريق راح يخسر بما ان النجوم الكبار ما لعبوا..فقالوا ماله داعي نكلف انفسنا ونحضر

المشكلة الاساسية مو ان المشجع يحضر او ما يحضر..هو بالاخير حر..لكن لا يجي في المنتدى يزايد ويزابد على اللاعبين او المدرب ويقوم الدنيا ويقعدها كأنه فيرقسون وهو مباراة ما يحضرها ولا يقف مع اللاعبين في الوقت اللي يحتاجونه..
اذا الجمهور ما وقف مع اللاعبين وعايش كل لحظاتهم بالاخير اللاعبين انفسهم بيصيرون اخر شي يفكرون فيه ارضاء الجمهور..
لأن مو معقول ...طول الموسم يطلبون من اللاعب يكرف ويتعب ويفوز وهم ما يحضرون...ويجونك بالمباراة النهائية بس علشان يهيصون وينبسطون واذا ما فازوا اللاعبين يا ويلهم..

صار جمهورنا او نقول اغلبه للأسف جمهور فوز وجمهور لاعبين..اذا اللاعب الفلاني ما لعب او العلاني ما لعب ما يحتاج يحضر ..ويجيك بالاخير يذل ام الفريق ليش مافاز.

المفروض الجمهور يكون هو وقود اللاعبين والمحرك الاساسي لهم حتى اكثر من الادارة او المدرب ويشعرون انه واقف معهم ومتحمس معهم ويقدر الجهد اللي يبذلونه..وهذا للأسف اللي يفتقده او افتقده الهلال...

انا ما عندي مشكلة لو ان البعض اللي يقول البطولة تنشيطية وماهي مهمة فعلا يفكر كذا...لكن متأكد وهذا اللي دايم يصير اذا جا النهائي يا ويل اللاعبين لو مافازوا بالبطولة..ومن الان اغلب اللي يقولون الكلام هذا يطالبون بتدعيم الفريق بنجومهم الفايف ستار علشان يجيبون لهم البطولة...والشباب الصغار اللي وصلوا الهلال للنهائي بكيفهم...لا تشجيع ولا وقفة ولا حضور ولا دعم وبالاخير بعد يحطون مكانهم لاعبين ثانين علشان يفوزون...هذا بصراحة كلام ما يدخل العقل.

المفروض جمهور الفريق يكون انتماءه للكيان بغض النظر عن الاسماء...بغض النظر عن البطولات...يدعم ويساند ويشجع من يرتدي شعار الهلال...وبعدها يكون له الحق كل الحق انه ينتقد لأنه دفع مهر انتقاده وهو اساس وروح الفريق.

اتمنى بيوم من الايام نوصل لمرحلة نملأ مدرج الهلال دائما..واللي ما يقدر فيه الف يسد مكانه ويكون الأهم هو الهلال..حتى لو خسر بشرف نقف بعد الهزيمة ونحيي نجومنا ونشد من ازرهم..

اتمنى ان يستعيد جمهور الهلال الروح التي كان يبثها في ارجاء الملعب وفي اللاعبين..والا سنصل في يوم من الايام الى ان اللاعبين بيلعبون بمزاجهم ولا همهم جمهور يحضر في النهائيات للفوز ولا يدعم الفريق في كل مباراة.

على الفوز نلتقي