وانا واقف بالاشارة

ألتفت يميني واشوف راعي BMW ( حوت ) ماسك الجوال ويزبد لشخص ما

وواضح من ملامح وجهه انه ( قافله معه ) ومغلدم ومكشّر وضارب بوز

خلص المكالمة ورمى الجوال على المرتبه اللي جنبه

ولّع زِقاره وشفط ام امها تقول هموم الدنيا كلها على راسه


وعلى الجهة الثانية

واحد راعي مازدا صغيرة وموديلها قديم شوي

ناسف الشماغ ويشرب سفن اب ومسفهل

ورااااااايقه معه وماعنده أي مشكلة

ولّعت الاشارة خضراء ومشيت وانا اهوجس بهالمنظرين واضحك

اللي معه الـ كاش ومبحر بالدراهم ( قافله معه ) وشايل طاجن سِتُّه على راسه

والطفران ( فال امها ) وجادع همومه مع الدريشه وراضي بالوضع

طيب وين الخلل ياجماعة الخير ؟؟

حتى في الدوام وبشكل يومي

السيكورتيه اللي رواتبهم ضعيفه دايم مستانسين وعايشين حياتهم بكل عفويه

والهوامير المدراء اللي رواتبهم أطول من فاتورة العثيم ليلة رمضان

دايم مكشرين ونفسيات ومحد فيهم راضي وكل شي قدامه غلط بغلط

ياعالم تراها ( وصخ دنيا )

( بحسب ابن آدم لقيمات يقمن صلبه ).. اللهم صل وسلم على محمد
.

.

ليلة ( مرقوق ) ساخنة...

يا له من حلم مهوب صاحي

فوق صلعة ذلك الشايب المهذري

كنت اتزحلق بكل سعادة وشطانة

وبإنسيابية شديدة تتحدى سلاسة المايونيز

ولكنني وبلحظة تناحة نادرة.. زلقت من فوق الجبهة بسنتيمترات بسيطة

وجيتكم مجاوب من بين الحواجب ومتجه بشكل عمودي على جادة الخشم الطويل

حاولت اتجوّد بأرنبة الأنف.. لكنها كانت مدهنه وما اراد الله اني انجح بعمليتي الفدائية

وماكان الا انني مسطت بوسط تبسي المرقوق

ووجدت نفسي تائهاً بين غابات الكوسا واحجار الفاصوليا وكثبان المرقوق

وبدون أي مقدمات.. اقتحمت عالم شلقة قرع ذهبية

ويالـ السَكرَة المباحة.. يبطي السدر الكشميري

وبعد خروجي وانا مرتفع من قاع تلك القرعة

تفك معي بعد اصطدام دميجتي بكتلة ضخمة متوحشة من لحم الحاشي المفترس

يالها من متحلطمة متشرذمة مشرئبّة صمّاء

لكنها طعيمه بنت الإيـه

حينها لم اجد بدّاً من التكشير عن أنيابي ونهش جميع فصول تلك الروايه

وبقرصةٍ لعينةٍ من ناموسةٍ ألعن ... فتحت عيوني

وماشفت الا هذاك التبسي اللي يتراقص طرباً قدامي بكل استفزاز

وبعد الانتهاء من همد المريقيقه..

سطل ممتليء باللبّن الخاثر كفيل بأن يقذف بك الى عالم مجهول

حيث لا احد سواك انت وجحا واشعب في مسرحية ( لم ) و ( لن ) تبدأ

.

.

رومانسيات صخراويات

يا من هواه قد أعزّهُ وأذلّني ... ياللي وجهتس يقول للقمر كش عليك إفحز لي

كيف السبيل الى وصالك دلّني ... استحي على روحتس وخوذي الجوال واتّصلي

ليتني لم أذق من شهدك ما اتعبني ... أطعم من حلاو البقر والمهلبيه والتطلي

بيضاء كـ لبنٍ عاشقه لم يهتني ... عقبتس فطمت وعفت اللبن وكبيت سطلي

بعيون ساحرة ياصاح ما بك لمتني ... نعن ابو عيونتس الخضر كنّهن علم الاهلي

والقوام رشيق كغصن لبان لم ينثني ... آآآبوتس يالعصلا ياملحتس جمالتس أصلي