قادم الى الرياض من اجل زياره مريض ثم التوجه للمعب .. دلوني على مستشفى قوى الأمن لاهنتم
 

السلام عليكم ..


طبعا هذي الايام مكثر روحات للرياض من الشرقيه لجل عيون الزعيم :alzaeem:


لكن غدا آردت الذهاب الى الرياض لضرب عصفورين بحجر .. أولا زيارة أحد الاقرباء

يرقد في مستشفى قوى الأمن في الرياض ..

وثانيا الذهاب للملعب ..




اذا ماعليكم كلافه يا أهل الرياض الطيبين واللي بصراحه ما قصرتم معي يوم مباراة القادسيه

ووصلتوني للملعب باسهل الطرق وما احتجت لاي وسيلة مساعده بفضل الله ثم بفضلكم


ابيكم ترشدوني لطريق مستشفى قوى الأمن .. من بعد ما أعدي تفتيش الرياض ..

بأسهل الطرق ...

انا سمعت انه في الملز أو قريب من شارع الستين .. !!

بس لا تاخذون بكلامي وتراني ماعرف شئ كل اللي اعرفه طريق الخرج ثم مخرج 13 ثم 15 ثم

ملعب الملز ههههههه ..

يعني الحين هذي ثالث مرة لان المرة الاولى ملعب الملك فهد والثانيه فيصل .. وهذي الثالثه :)


الله يعطيكم ألف عافيه ..

وياليت يالمشرفين تخلون الموضوع لاني والله محتاج اجابة عاجله ..

اولا& نحيك ع حضورك للملعب وماهي غريبه عليكم وانا حااااااااضر ان شاء الله
ثانيا& انتبه للطريق لا تسرع وتوصل بالسلامه
ثالثا& قوى الامن مالي خلفيه فيه شكرا لك واعتقد اخواني الزعماء راح يفيدونك

هههههههههه


الله يووصلك بالسلامة ان شاءالله

مستشفى قوى الأمن:

أنت جبتها

ادخل مع مخرج 14 باتجاه الغرب (يعني وأنت جاي من 13و12 تروح يمين)

طوااااااااااااااااااااااااالي تلقى المستشفى بوجهك حرف T

طبعا بعد ما تدخل من عند مخرج 14 باتجاه الغرب تتعدى 3 اشارات والاشارة الرابعة هي اللي يكون فيها المستشفى بوجهك

توصل بالسلامة وأهم شي توكل على الله ولا تسرع

كيف الحال اخوي ونصيحتي لك خذ راحتك بالخط ولاتستعجل اهم شي توصل بالسلامة انشاء ياغالي وربي يوفقك

ثانيا انا اشوف انك تجي من طريق الدمام وتنزل على الدائري الشرقي الين يجيك مخرج 14

من مخرج 14 ادخل يمين ولاتروح لايمين ولايسار الين يجي تقريبا بعد اربع اشارات بيجيك حرف تي اللي هو طريق الستين بوجهك وتلقى المستشفى قدام يمين وانت واقف عند الاشارة عند حرف التي واذا تبي اي مساعده زيادة دق علي بكرة ولاتستحي انا موجود وانا اخوك وبرسل لك اياه بالخاص وربي يوفقك

توصل بالسلامة يالغالي ..

صح هذا وصف دقيق جداً .. تسلم اخوي
تقبل تحياتي .. عادة الزعماء مساندة بعضهم البعض

أولا السلام عليكم ورحمة الله وبركاته وحياك الله يااخوي وتاصل بالسلامه
ثانياً بالنسبه للمريض ادعو الحي القيوم من بيده الشفاء أن يشافي مرضاكم ومرضانا ومرضى المسلمين أجمعين
ثالثاً بالنسبى لمستشفى قوى الأمن انا بعطيك وصفه كالتالي :
1- أنت داخل للرياض وحلو انك تعرف مخرج 13 تدخل مع مخرج 13 متجه لمكه وليس للدمام
2- تستمر مع الطريق اللي انت فيه الى ما يجيك كبري الخليج اذا تعرفه واذا ماتعرفه ماتفرق هو كبري طويل وتدخل مع مدخل طريق صلاح الدين ومع الاشاره يسار بيجيك المستشفى على اليمين.

أو بما انك تعرف ملعب الملز فأضل لك عشان ماتضيع اذا وصلت لملعب الملز تخليه على يمينك وانت على شارع الستين بتجيك بعد رابع اشاره ديور ويجيك المستشفى على اليمين وبالماريه بتجيك اشاره وقدامك بيكون بنك البلاد هي الاشاره اللي بعدها .

واتمنى انك تاصل ومااضيعك يالغالي
الله يحفظك وينصر زعيمنا
مع الف سلامه

تووصل بالسلامه اخووي وشوي شوي لا تسررع واناا اخووك حيااتك اهم اماا بالنسبه للوصف اعتقد اان الشبااب ما قصرووا وصفهم دقيق

تاصل بالسلامه

لاتسرع على هونك


الله يوفق الهلال

طيب ياشباب الله يعطيكم العافيه ..

بس يعني الحين ابيكم تثبتو لي ..

1- اعدي تفتيش الرياض
2- ادخل مخرج طريق الخرج ( خريص ) < صحيح ؟
3- مخرج 13 ( مكه ) مدري يسار ولايمين ؟
4- سيدا الين كبري الخليج ثم طريق صلاح الدين
5- الاشاره يسار .. المستشفى على اليمين


اكدو لي او صححو لي واكون شاكر لكم

توصل بالسلامه ان شاء الله .. اهم شي لاتسرع :)

وان شاء الله يفيدونك الاخوان اللي من اهل الرياض

عز الله غديت من كثر التواصيف:laugh:



اسهل شي اذا ضعت لا سمح الله وقف لك ليموزين وخله يوصلك :yes:


تحياتي لك وتوصل بالسلامه