السـلام عليكم ورحمة الله وبركاته
مساء / صبـاح الزعامه
اسند اليكم الفيــّة الشاعر ناصر ملاقي المسطح الشمري نقلا عن الشاعر نفسـه وحصريا لشبكة الزعيم بمناسبة حصول الزعيم على لقب نادي القرن آملاً ان تنال على استحسانكم ..

بالالف انا ابدا بين مجده وماضيه = والفين معه الفين نعمٍ بناديه
هذا الهلال الي قصدته وانااعنيه = منذو بزغ نوره بماض السنيني
والباء بكل الفخر ننظم به اشعار = سمّي باسم من زوّد الكون بانوار
هذا الهلال الفوز له اينما سار = نخبة اسودٍ باللقا جاهزيني
والتاء تواريخه بالاقطار معروف = وعند البشر كله من الحب مألوف
وفي داخل الميدان يلعب بلا خوف = ياما انهزم ضده من النايفيني
والثاء ثلاث سنين عمره وخمسين = تاسيس صرحه عند كل الملايين
وانظر لجمهوره لياجوك عانين = اصله زعيم وقاسيٍ مايليني
والجاء جنا كل الفخر في مسيره = وايضا انتصاراته لغيره عسيره
في نخبةٍ بالفوز والله جديره = والضد دايم حسبت العاجزيني
والحاء حوى ناديه من دون تغيير = شواهدٍ فيها وثايق وتعبير
وسام ثابت ماهو هرجٍ وتزوير = فوق الجبال الصامده والجبيني
والخاء خذيت افتح سجله واراعيه = يقهر بها الغاوي ويحتار قاريه
نادٍ عريق وعالياتٍ مبانيه = ماينكره اهل الوفاء الدارسيني
والداء دليل انه كسب من يودّه = الخصم لاجاء يوقفه دون حدّه
ويلبّسه ثوب الهزايم يردّه = خلاه تالي جملة الخاسريني
والذاء ذهابه نايبٍ عن وطنّا = باسم الرياضه والوطن منه حنّا
شال اسمنا عالي ليا نال عنّا = بالفوز رغم الحقد والحاسديني
والراء رياح الفوز عطّر شذاها = لمشجعينه يوم بالفوز جاها
زعيمها الوافي محقق رجاها = غصبٍ على النقّاد والمغرضيني
والزاء زهى لون السما هو شعاره = ازرق وفيه الباس يعطي اشاره
والابيض يوحي للشمس في نهاره = وتفسيرها متروك للعارفيني
والسين سيّد كل ملعب ليابان = وزعامته عنوان في كل ميدان
مهما حصل او صار او الذي كان = كالشمس ماتخفى لزومٍ تبيني
والشين شرح الصدق ماظن به عيب = والعيب في قول الخطا بالاساليب
واكبرها قول الدجل هي والاكاذيب = والا الحقيقه منبع الطيبيني
والصاد صافي كل تحليل الاخبار = لاصار قاريها غشيمٍ ومحتار
يلقى الهلال بوسطها يلتهب نار = واسمه خذا من حجمها صفحتيني
والضاد ضاع الي تحداك ياهلال = ماعاد هو حولك ولو يدفع المال
يمشي ورا مهزوم في كل ابو حال = ثم انتهى وايضا اختفى مايبيني
والطاء طفت شمعة نوادٍ غريبه = وشمعة هلال العز ناره مصيبه
تطفي شموعٍ لو تعالى لهيبه = وختامها تبعد مع المبعديني
والظاء ظلالك يازعيم النوادي = مايساوي ظل اللي قديمٍ وبادي
اكيد بالميدان جاهر تعادي = اصلك عنيد وصخرتك ماتليني
والعين علمك في قوانين الالعاب = فيها الامانه والوفاء عنه ماغاب
ماشي بنظامٍ لو تحدتك الاسباب = مبداك واضحك من وفى المخلصيني
والغين غاب الضد ساعة حضورك = واظلم سما ناديه واخفاه نورك
وفيه دوحة الميدان دامت صقورك = باللعب وفنونه من البارزيني
والفاء فوزك فخرنا بكل الاحوال = وتناقله من بعدنا اجيال واجيال
انت الزعيم انت البطل ابو الابطال = يشهد بذلك كل شخصٍ اميني
والقاف قدت اكبر سفينه بالالعاب = وربانها لكل الرياضه كالاطناب
والكل من حوله لها يضرب حساب = وترجع لنا بربّانها فايزيني
والكاف كلن يمدح الي يريده = لاصارت الافعال صحٍ اكيده
مثل الهلال بحق قلت القصيده = بالفيةٍ والكل له مـأيديني
واللام لامن البطل صال او جال = شف للمدرج بالوصف جاه زلزال
شيب وشباب ونقوة رجال وابطال = باعلامهم لك بالولاء رافعيني
والميم من لايفهمون الحضاره = قله ترى الكوره ولعبة أماره
مثل الزعيم استحوذه بالشطاره = كل العصور الماضيه والسنيني
والنون نال بكل الاعوام تقدير = هلال البطوله مثل موج الاعاصير
زعيم له حبٍ بروح الجماهير = وايضا بعيدين المدى شاهديني
والهاء هجد ضده ولاعاد قامي = ونقول له ابعد عليك السلامي
هذا الزعيم اللي له الفعل سامي = شيٍ موكد والموكد يقيني
والواو والله مدحنا بنادي القرن = اسمٍ عظيم لبعض الالسن ترى مرن
تهتال لامنه لعب او تمرن = ويطرب له الزاير مع المعجبيني
والياء يتم القاف بهلال الامجاد = النادي الي ساد من فوق الاسياد
وللخصم هو دايم عنيدٍ ومرصاد = وجملة قواميسه لها حافظيني
وختامها لبلادنا الحب نهديه = ولمملكتنا الود بالقلب نبنيه
وباخلاصنا حنّا نعادي معاديه = ونصد عنها زمرة المفسديني
واعلامنا باسم الرياضه بنتها = ومن بذلها وتشجيعها هي رعتها
وباخلاقها المثلى من الله حمتها = هي مجدنا هي نصرة المسلميني
واهل الرياضه كلهم مع شبابه = تفدى بحاله للوطن مع ترابه
والا العدو خاسي ويضرب حسابه = من شعبها الوافي لهالمخلصيني
وهذي الهديه لكل منهو هلالي = من شاعرٍ يبدع ليا جا المجالي
بعيد عن كل الحسد والخيالي = وعن الذي حقده بقلبه دفيني
وبعيد عن نشر الفتن والبلاوي = وايضا الدرب كانه كثير الملاوي
وعن الامور الخايبه والمساوي= دامي لسبعين السنه مقبليني
وآخر كلامي خاتمه بالسلامي = لمنهو لدينه مخلصٍ له يحامي
ودون الوطن يشهر عظيم الحسامي = وهذا صحيح بكل رجلٍ رصيني
وصلاة ربي عد وبلٍ نثر ماه = على النبي واعداد حرفٍ كتبناه
ونستغفر المعبود عن كل زلاه = اللي لعبده لاستجاره يعيني