والله من جد ازعاج صوتهم بالشارع اسمعه

عاد من زن الاهازيج واغاني الرابطه ورب شغل طقاقات
انتهى شغل الطبول والطيران كنك تحضر جن الله يرجهم مع اغانيهم الهبله
والله زي ماقلت صوت لجمهور وترديد عبارات واسماء اللاعبين افضل من هالخربطه
ودك ياخي هالرابطه يقلعونها وراء الساعه تحسهم جايين شكشكه ولا سامري ولاهم حول المباراه اصلا

تحياتي لك ..

>>>>>>>>>>>>>>>>>>>>>>>>>>>>>>>>>>>>>>>>>>>>>.

ايه والله انك صادق تشجيع نايم وقلق وبثاره

حتى ياخي اغانيهم مدري شتبي مشمشه مشمشمه وشو ذي << حقت الحقوي المريض


انا يعني ممكن اوافق يكون فيه صوت طبل بس عشان يحرك الجمهور شوي

او يعني يكون فيه ميكروفون عشان يعلم الجمهور انهم بيسووون الموج

ولا يشغلون الميكرفون اذا فيه احد مصاب او صار فيه شغب يحالوون يهدون فيه الجمهور

انا من ناحيتي احب الأهازيج بالعكس الواحد يتحمس مع الرابطه بس لابد تكون بشكل منظم

مثل القرني حق الأتحاد ومثل رابطة الاهلي والله متعه اذا تابعتهم

اما حق رابطتنا مع الأسف غير منظم ولا عنده اهازيج جديده


دمتم

اي والله قلقــ......الله يسامحهم والله مايزدون اللاعب عثااا..بس

كلام جميل , لكن من يوصل اصواتنا للمعنيين

هل صدق بيصير اللي نقوله , والا كنك يا زيد ما غزيت !!

عاد انا بنت مريحة راسي , بس راحمتكم :d لاني انبسط اذا شفت جمهور كثير

.
.

والله اخر مافكر فيه الرابطه !!
ازعاج , على قلـة فايده !!
ورجـــه , وعــوار راس !!

والله اانت الصادق واللي يمنعني الحضور هالشي بالاضافه للدخااان اكرمكم الله

اقول يازين الامواج والتصفيق


نبي تشجيع اوربي ويجب تنبيه الرابطه على هذا الشي

والله من جد
يعني هتافات ماادري وش تبي
نبغى تنظيم زي العااااااااااالم
بصراحه آشك في بعض الاحيان اناا جالسين في عرس

طرح رائع اخوي

لاعدمناااااااااااااااااااااااااااااااااااااكـ

ياعزيزي ..

انت الحين منت جاي تنتقد او تشتكي انت جاي تهرج وتضحك العالم علينا ..

وصدقني لو كان قصدك انه فعلا اوجعك راسك ( على كلامك ) .. تقدر الله لايهينك تبعد عن الرابطة وماراح تسمع ( هالازعاج على حد وصفك ) ومااعتقد انك ماتملك 10 ريال وتجلس بالدرجة الاولى وتفتك من الازعاج >> عاد الله ياهالازعاج كلها مايكين بس لا وموجهه على الملعب وماهي موجهه على المدرج ..

يااعزائي لانكذب على بعض ونضحك على بعض ..

هذي في الاول والاخير رابطتنا ومجلسنا واي شيء عليها هو علينا ..

والرابطة موجودة من نشئت الهلال ( وانا مستعد واتحمل هالكلام ومسوؤليته ) وبالمناسبة المغفور له بإذن الله الامير عبدالله بن سعد ((( كان عضو في رابطة الهلال ))) لمعلوميتك فقط انت وغيرك ..


والطبول موجودة من اكثر من 30 سنة واتحدى برضو على ذلك او الي يخالفني الرأي ..

والتطوير قائم الآن وكل يوم رابطتنا تتحفنا بشيء جديد بس انتم صبركم عليها , وبالمناسبة رابطتنا من افضل روابط المملكة فـ انا اتحدى اي نادي في المملكة يعمل الحركات الاوروبية و الزلزال والمراوح والموج غيرنا .. واتحدى بعد اي رابطة عندها اهازيج تفاعلية زي ياهلال عزك عزنا او حبيبكم مين و و و الخ..



ولازم نعرف كلنا ان في كل اندية العالم رابطة للنادي .. ولاكن طرق التشجيع تختلف بـ اختلاف الاماكن والقارات .. فمثلا تشوف في اوروبا اناشيد تردد طوال فترة المباراة وهذي تكون مشغلة من ادارات الملاعب في تلك المنطقة فـ مثلا جمهور نادي ليفربول الانجليزي يردد اهزوجته الشهيرة ( لن تسير وحدك ) بمساعدة من ادارة ملعبه ( الانفليد ) و ايضا جمهور برشلونة الاسباني تنطبق عليه الحكاية ( يعني يكون التشجيع والترديد من قبل ادارة الملعب وتشغيل الاغنية او الانشودة ) ..

وفي افريقيا يكون هنالك تشجيع بـ استخدام ابواق التشجيع ( الي هي فعلا انواع الازعاج واكبر دليل كأس القارات الاخير ) >> ماصار تشجيع تقول اصوات ذبان



فـ يااخي الفاضل الي جالس يصير عيب والله .. اذا بتجرح انت وغيرك فلن تنجح رابطة او مجلس جمهور ابدا ثق بـ هذا الكلام ..

والرابطة الآن تسير في الاتجاه الصحيح والآن ماسك الرابطة 3 قائدين لها ..

الاستاذ / محمد غندر .

و الاستاذ / محمد العبيد .

و والاستاذ / صلاح البطاطي .

وبـ اشراف مجلس الجمهور والاخ / تركي الهديب .



فـ ارجوكم ياحبايبي ياجمهور الزعيم .. لو يجي احد بس ويشوف التعب الي يتعبونه اعضاء الرابطة ومجلس الجمهور ( رغم قلة الدعم ماديا وايضا معنويا ) وايضا المضايقات من ادارات الملاعب ( والتطفيييييييش ) صدقوني والله مايتجرى يتكلم عليهم ..

وبـ اذكرلكم موقف حصل قبل يومين بس ..


الاستاذ / محمد العبيد ( طبعا هو الي مسك المايك في مباراة الرياض وايضا بمباراة المنتخب وبمساعدة صلاح البطاطي ) ..

المهم .. الاستاذ محمد العبيد تخيلوا معاي حضر مباراة الرياض وهو جاي من الشرقية ( برا ) ورجع بعد نهاية المباراة مباشرة , واليوم الي بعده برضوا مسك الخط وجاء عشان مباراة المنتخب وبعد المباراة رجع مباشرة .. يعني تخيلوا معاي 400 كيلو رايح 400 كيلو جاي يومين ورا بعض ودوام بالصباح برضوا .. بالله هل يستاهل هذا الرجل التجريح منك ومن غيرك ؟؟

جاوب بنفسك واتق الله يااخي .. ترى الظلم ظلمات يوم القيامة ..


احنا بشهر فضيل .. ياقل خير او اسكت .. واعلم انك محاسب على كل حرف تكتبه ..


قال تعالى : ( مايلفظ من قول الا لديه رقيب عتيد ) .

ماتدري يمكن بظلمك واهمالك لتعب هذا الشخص والرابطة عموما ان يصيبك مكروه بسبب هذا الظلم .. فـ احذر قبل لايصير شيء لايحمد عقباه ..


وصدقوني اعضاء الرابطة مطلعين على الموضوع وكل شيء يكتب هنا ويحاولون بقدر الامكان ان يطورون نفسهم ويعملوا حركات واهازيج جديدة وجماعية ..


وبـ الاخر هم اخوانا وتربطنا فيهم اشياء كثيرة .. كلنا مسلمين وكلنا سعوديين وكلنا هلاليين جمعنا هذا الكيان الرائع ولله الحمد ..

وياعزيزي ارجوك فكر كثيرا قبل ان تنزل اي موضوع فـ انت محاسب والله ..


والله يوفق هلالنا لكل خير .. سواء جمهور او رابطة او مجلس جمهور او لاعبين او اعضاء شرف او ادارة .. كلنا نعاون بعض لرفعة الازرق ..


اتمنى كلامي مايروح عبث ..




اخوك فهد ..



تحياتي وتقديري ..

ممكن سؤال لك ؟

انت تتكلم على مباراة الرياض اللي في النادي أمس ؟
والا مباراة ثانية
للمعلوميه والتوضيح للاعضاء :
في كل مباراه للهلال يكون هناك عدد 6 مايكات على الاقل ماعدى يوم أمس مجرد عدد 2 مايك
ومسوين تخفيض للصوت عنوه
لعدم وجود حضور جماهيري مع توقعنا العكس
اعضاء الرابطه اعتمدوا على جزئية الاهازيج التي يكررها الجمهور وكان التفاعل بسيط لعدم وجود جمهور أولا وثانيا ضغط المباراة في بداية المباراة
تطالب باسكات الرابطه ولم تطالب بكثافة الحضور الجماهيري ليكون الصوت السائد هو صوت الجمهور وليس الرابطه يا من تطالب بالتشجيع الجماعي

اخوي maxyy
بانتظارك بجانب المجلس في المباريات القادمه لنكون يدا بيد من اجل هدير المدرجات

اخوي T.R.a.n.z.i.T
اتحدى اذا انت تحضر مباريات لان اللي قلته مو صاير لا مشمشه ولا شي الاهازيج اللي كانت بالامس كلها جماعيه ومباشره للجمهور ورغم قلة الحضور كان تفاعل

الاخوه الاعضاء :
جميعا نعلم أن الكل يطمح بالارتقاء في كل شي حتى في تعاملنا الشخصي واخلاقياتنا وليس فقط في مدرج
يحق للجميع النقد ولكن النقد الهادف وليس التطبيل لجمع مجموعه من الاعضاء تقوم باكمال ما يقوم به العضو من اساءات لاعضاء الرابطه او المجلس
هناك اساليب في الطرح الراقي والذي من خلاله يكون هناك نقاش راقي بدون اساءات ويكون هناك وضع الملاحظات بطريقة احترافيه وبحلول عقلانيه وليست كما نراها من بعض الاعضاء هداهم الله بالاساءاه إلى رجال يخدمون الكيان الازرق الذي يكون أقل واجب علينا شكرهم
فهل سألت نفسك يوما لو كنت مكان الشخص ماذا ستكون فاعل علما بأن الرابطه موضوعه من إدارة النادي وهي المسئوله عنها فكأنك تنتقد كيان كامل
لا اريد الاطاله ..
الجميع يريد التطوير ولكن نأمل أن نجد اقتراحات مقبوله وليست مستحيله وخصوصا في طرق التشجيع الاوروبي الذي يجب مراعاة الفارق في العدد الجماهيري فليست مباراه يكون فيها عدد 1000 شخص وتريد ان تطبق جميع الحركات الاوروبية
هناك منطق وعقل نفكر به فأي شي يكون على حد المعقول والمقبول وغير المخالف ثقوا أن الرابطه ومجلس الجمهور تقوم بالنظر جديا في الموضوع ومتابعة لما يكتب في موقع الزعيم

صحيييح كلامك
مع فائق الاحترام والتقدير