دوري ( مـطـبـات ) ... اصبرشوي وتبي ( تنهبل ) يا جيريتس
حيـــــــــاكم
لاجديد مع دوري ( الترانزيت )
ولا جديد مع دوري فريد من نوعه ( يقدّم رجل ويفهق الاخرى )
مايمدينا نحضر مباراة او ثنتين ... الا وحنا ( ملطوعين ) كم اسبوع نحتري الثالثة
يعني بالعقل
مدرب جديد وتوّه ماسك الفريق... وتوّه يحط رجله على اول خطوة
المباراة الاولى كانت استفتاحية وتعارفية وشي طبيعي ان الانسجام يكون مفقود
لكن المباراة الثانية هي بداية الانسجام لفريق يحتوي مدرب ولاعبين جدد
وكان الاداء فيها طيّباً والنتيجة ممتازة والتناغم على اعلى مستوى
لينصدم التناغم بقطع الاوتار وتوقف قسري عن العزف
وخذ لك اجازة يابوالحبايب الى بعد العيد
وفي مباراة الوحدة القادمة راح يرجع الفريق الى نقطة الصفر مثل مباراة القادسية
كل شي يختل ياعالم
حساسية اللاعبين تقل على الكورة
حماس الجماهير يتضاءل للحضور
برنامج المدرب يروح في خرايطها مع هالتوقفات المستمرة
وكلنا نذكر كوزمين في الموسم الماضي كيف عاف نفسه وقفلت معه
طيب ليش هالتخبط ؟؟؟
وعلشان إيش ؟؟؟
مباراة الملحق مدري ( الصاله ) 
اتمنى احد من عقلاء لجنة المنتخبات ( اذا فيهم عاقل ) يجاوبني على هالسؤال :
هل منتخب البحرين ( مجهول ) وغير معروف لدينا حتى نعسكر قبل لقائه بعشرة ايام ؟؟
ألا تكفي يومين قبل المباراة ؟؟؟
هل المنتخبات الاوروبية اللي ماتستدعي نجومها الا قبل المباراة بيومين كلهم غلط وانتم صح ؟؟؟
وبعدين ينعاف المعسكر اللي ياخذ مني اللاعب سليم ويرجعه لي على ( نقّاله)
كلنا سعوديين... ولا نزايد على منتخب الوطن... لكن ( في فمي ماء ) 
المعسكرات الطويلة للمنتخب ( دمّرت ) المسابقات المحلية
وهي السبب الاول في هبوط مستوى الدوري واللاعبين ايضاً
ارجعوا بالذاكرة قليلاً الى الوراء
في العام الماضي كم لاعب هلالي عاد الينا من معسكر المنتخب ( معطوب ) ؟؟
والسبب هالمعسكرات الطويلة اللي ما انزل الله بها من سلطان
مادام اللاعبين مع انديتهم مستمرين في تدريباتهم اليومية واللياقة تمام... وش الداعي للمعسكر ؟؟
وبعدين الخساير اللي تتكبدها الاندية في فترة التوقف من يتحملها ؟؟
رواتب مدرب عالمي مثل جيريتس ومحترفين مثل ويلي ورادوي ونيفيز ولي يونغ
شهر كامل بدون لعب وبكامل التكاليف الباهظة تدرون عاد منهو الرابح الاكبر من هالتوقف ؟؟
اخونا في الله ( مصلح ) 
لأننا وبسبب التوقف عطيناه مساحات واسعة وصار هو حديث المجالس والمنتديات 
.
.
.
متفرقات
* والله ثم والله اني من يبدأ معسكر المنتخب ( احط ايدي على قلبي ) خايف على لاعبي الهلال من الاصابات والرباط الصليبي
* بعد التوقف الوحده... ثم النصر... مباراة الوحدة فرصة طيبة لاستعادة الحساسية قبل الديربي
* البلطان يشرشح المرداسي... والمرداسي يعتزل التحكيم... وهذا شي طبيعي دام المسؤول الاول عن الرياضة وهو ( القدوة ) يشرشح الحكام بعد مباراة كوريا
* بعد مكالمة ( طلعت القدّيه ) الشهيرة بكل مافيها من فضايح... افلقوني اذا القيادة الرياضية اتخذت أي اجراء 
الوضع الشجري
