|
عندما نصبح مدربين وعلماء نفس السلام عليكم ورحمة الله وبركاته سيداتي سادتي .. هوريو الجميع .. :d تحت اطلالة المطر والسحب تمتزج بالأمطار والثمار واوراق الازهار تتفتح مع صبح جديد حيث يتلاكم فيه نسيم الصباح الباكر مع منتصف الليل الموحش , تتفتح الدرايش مضيئتن ذلك الضوء الصغير القابع تحت أنظار الشجر في أعماق البحار لينير الدروب ويضع اللمسات الاخيرة على يوم آخر من الأيام التي لطالما كانت أيام وليست ساعات ودقائق .. والله يا أنا حطيت توفيق الحكيم بخامس .. :d يقول أرخميدس في نظريته الفيزيائية حول النباتات " الفاضي يعمل آضي " .. وأضاف روبنسون كيلفرمان في كتابه الشهير (ماعندنا شغل ) الذي ترجم لسبع وسبعين لغة "We don't have job " : " لقد أدهشني خلال زيارتي المملكة العربية السعودية قدرة الشباب على فهم الحياة خلال 21 يوم ونص ريال " فالسيد روبنسون يوم يقول ادهشني باين انه مندهش .. والا كان ماقال ادهشني وانا عاد يوم قريت كتابه حسيت من كلامه انه مستانس اننا اذكياء ونعرف كل شي بالدنيا بسرعة .. وعندنا خبرة من يوم كنا بظهور آباءنا وأجدادنا فلذات أكبادنا .. عاد قعدت أغني بين وبين نفسي ياسلامي عليكم يالسعودية خمس دقايق :d .. لما أدخل الشبكة واشوف انسان عشريني ويمكن طعشي .. يحط صورة لرادوي مثلا .. ويفصفص حياة رادوي " من إلى " .. بسبب ان رادوي عاوجن خشته بذيك الصورة .. فهذا انسان مبدع لآخر درجة .. انا لو اني بدال الملك .. كان اصرف له راتب وهو جالس ببيتهم .. بس ارسل له صور على الايميل .. وهو يرسل لي التشخيص علطول :d اللي مخليني " مندهش " :d .. يقول ان رادوي حزين بسبب زوجته وانه بهالصورة يفكر بعياله .. !! يعني ماكتفى برادوي وحالته النفسية بذاك الوقت .. عطانا تاريخ رادوي العاطفي والنفسي كله من نظرة شلون لو جلس معه رادوي نص ساعة .. كان مايطلع رادوي الا وهو داخلن الاسلام من قوة انشراح الصدر ماشاء الله .. صراحة كهلالي .. وسعودي .. افتخر بوجود ناس من بلدي ومن نفس ميولي الرياضية .. عندهم هالكم الزاخر من الموهبة الربانية .. ( صورة واحد يدعي ويحمد الله ) وبما اني افتخر بوجود علماء نفس متواضعين باخلاقهم للناس البسطاء اللي مثلي واشكالي .. فأنا بنفس الوقت كإنسان بسيط مثلي واشكالي أفتخر بوجود مدربين اختصرو السنين واختصرو الوقت .. يعني والله اتعب وانا مندهش :d .. شلون انسان عرف بالهلال قبل خمس سنين او حولها ـ .. وعنده إلمام كامل بكل شي يدور بالملعب .. يعني حتى انه يترفّع عن كلمة " المدرب ابخص " :d .. عيب يصير المدرب ابخص .. دامه يتابع كورة من مبطي .. تقريبا اربع خمس سنين .. ويعرف مستوى اللاعب من أول ركضه .. بعضهم يعرف مستوى اللاعب من صورته فماشاء الله تبارك الله يعني الواحد يعطي رايه باللاعب والمدرب ويمشي لموضوع ثاني .. ماعنده وقت يضيعه ليه يضيع وقته ؟ .. هذي اشياء بديهية .. الانسان البسيط العادي يعرفه .. فااااااااااااء .. ماله داعي يشرح :d لو قلت ان عندنا اداريين بالموقع .. صدقون ماراح يصدقن احد .. لازم اجيب الواحد واخليه يشوف بعينه شف ذاك الموضوع اللي يلزخ بسامي لزخ .. وتعليقات على ادراته وانتقادات بعدين الانتقاد زين وسامي اداري توه جديد على هالمجال لازم حنا نعلمه شلون يصير اداري زي الاداريين الكويسين وننتقده علشان يتعدل اسلوبه :d واذا ماتعدل اسلوبه عاد .. لازم يجي واحد متخصص ويمون على الادارة وينزل موضوع يطالبهم بطرد الاداري فاااااااااااااء .. الدعوى كلها تخصصات .. مابه شي بالمنتدى يمشي عشوائي .. كل أبونا خبرة بكل شي :d ماشاء الله علينا .. تف تف تف الله لا يضرنا .. فجأة .. ألقى نفسي مع اعضاء اخوياهم اللاعبين .. اللي قد شاف سامي ببقالة يشري فيشار وحاسب عنه .. واللي كان يسرق علوك هو ويوسف الثنيان يومهم صغارين .. واللي اهدا لصالح النعيمة جوال N96 في حفل اعتزاله .. علاقات طيبة صراحة .. واتمنى اننا نخفف من زياراتنا للاعبين لأننا نضغطهم نفسيا مثل ماقالوا المحللين النفسيين :d انا خلال هالصيف اكتشفت اشياء كثيرة .. اندهشت بالحيل .. وعمّت الدهشة أرجاء المنزل ماينخاف على الهلال بوجود هالكوادر الوطنية صراحتن :d وأحب أهني الملك عبدالله بهالشعب اللي كل شي يعرفه .. واقوله أرقد وآمن يابومتعب :d |
موضوعك يالغالي يعبر عن نفسك انت ولاعن الغير الغير يهتم في شي له شخصيا ماهوشرط يناسبك انت ( ورضاء الناس غايه لاتدرك )) وياليتك في حالك افضل ............................................ مشكور |
يعطيك ألف عافية أخوي " الصمت أبلغ الكلام " تحياتي |
:d جبت العيد الله يهديك :to: صحيح سالفه رادوي مدري من وين طلعت !! لكن هذي اجتهادات ويمكن تصيب ويمكن تخيب :rose: |
والله شكلي ضربت على الوتر الحساس :d مع ان الموضوع عادي جدا وهو ماله دخل بالناس انا الحين اقول للناس مالكم دخل بشغل النادي والادارة .. وقاعد انتقد الناس اللي تتفيهم بشغل المدرب والادارة وهم ماعندهم اي خبرة والحين تقولون لي لا تتدخل بشغل غيرك .. طيب غيري ماتدخل بشغل غيره ؟ :D الله يصلحكم الزعامة بعيون زرقاء وش بك تنافخ طيب اخوي وصديقي صاحب العيون :d انت ردك صدقني هو نفس موضوعي .. :D انت تقولي مالك شغل بغيرك .. وانا كاتب موضوع كامل اقول به مالكم شغل بغيرك وتقول رضى الناس غاية لا تدرك .. فعلا النادي المفروض يحط هالشعار قبال النادي :D انت اختصرت موضوعي وانت يقالك ترد علي .. نفس الكلام اللي اكتبه عن الاعضاء انت تكتبه عني زي ثنعنش .. الصمت ابلغ من الكلام .. واذا كان الكلام من فضة فالسكوت من ذهب .. والله مافهمت شي من الرد اخوي زي ثنعش .. بس حسيت انك تبي توصّل شي مهم .. :d دمي ازرق .. وين جبت العيد بالضبط ؟ :d والله الموضوع عادي جدا جدا .. ولا اشوفه يحتاج زعل ولا شي .. مجرد اني أقول " اعطو الخبز لخبازه " .. بس فعلا الموضوع ضرب على وتر حساس جدا .. ويمكن اني أطلت بالمدح والثناء على شعبنا اللي يعرف كل شي :d مشكورين اخواني على المرور و فاعسالا |
هههههههههههههههههههههههههههه يعلم الله إني فاقد صاحب هاليوزر من زمان يوزر تطريبي سهل ممتنع أحييك على ماكتبته,, وفعلا مشكلتنا أن الجميع فاهم والجميع منظّر والجميع يشوف مصلحة الدنيا كلها من منظوره هو فقط ولاعليه في غيره النقد مقبول ومطلوب ولكن يجب أن يعرف كل شخص أدواته وحدوده وخطوطه الحمراء فليس من المقبول أن يبنى الرد على الهوى أو التوقع, وبالتأكيد ليس من المقبول التجاوز في النقد أن استخدام الأحكام المسبقة واستحضار الأخطاء والمواقف السابقة كل التحية لك يابو ساري,, ولاتقاطع |
ابو ساري بالتوفيق يالغلا ..هههههههههههههههه والعيون زرقاء ودمه ازرق ..ماعليك منه ..واللي على راسه بطحاء يحسس عليها ههههههههههههههههه بالتوفيق وواصل واعجبتني المقدمه |
موضوع أكثر من رائع سلم كاتب الموضوع كتب فابدع عيني عليه بارده اما عن التخصصات فشعبنا صار يفتي ويتدخل في امور الدين فما بالك بالكورة أمرها سهل هي كلها جلد ومنفوخه هواء لا تعقدهــــــــــأ ^_^ تقبل تحياتي |
والله ياهو قديييييييييييييييييييييييييييييم هالأدمي وينك ساحب على المنتدى المشكله ان أغلب الأعضاء المميزين والكبار تاركين المنتـدى للأشخاص الي انت كاتب عنهم هالموضوع يآحبيبي تعبنا والله الواحد صار يدخل الشبكة ويقرأ مواضيع إدارة الأخبار ويحط فباله كم عضو مميز يشوف هل لهم مواضيع ولا يطلع أبو ساري أسلوبك ماتغير والزمن مايغير أصيل شاكرلك هالموضوع الي لامس الجرح << يعنني اعرف احتسي وبصراحه ذكرني بنقطة ذكرها الأستاذ مغاط يقول تحلمت اني صغير وخدودي حمراء ودايم احب اسابق الشغالات بالحوش ولكن مشكلتي هالايام صايرن احب اقترح خطط وأنتقد الاعبيـن واعرف من الي يتنسقون وووو لاتحرمنا من جديدك ويعلم الله وسعت صدورنا بأسلوبك الساخر |
موضوع أكثر من رائع سلم كاتب الموضوع كتبت فآبدعت اخي شكرآ لكـ .. |
ههههههههههههههههههههههههههههههههههههههههههههههههههههه بصراحه بصراحه ادخل بعض المواضيع اقراها ولاارد بلا من زين موضوعها اللي ماادري وش يبي واللي المكررة اللي اقلقونا بها (اي ار تي , رادوي زعلان , التايب , وغيرها وغيرها) من جد بعض الشباب اللي يصلحهم ينزل موضوع فشخره على قولتهم وهو جايبن العيد فيه مادرى انه مكرر ولادرى انه يجيب الضغط ولادرى ان موضوعه ماله اي داعي .... الله يتقبلك ياابو ساري جبتها على الوتر الحساس |
والله تختلف من دكتور لدكتور تحياتي لك ولموضوعك لاعدمنااااااااااكـ |
يا خلفهم يا ثنياني .. تدري إنك أنقذت رقبتي :d .. الله يجزاك خير على هالترفيع .. من زود الوناسة ارسلت ردك بقروب إيميلات :d ولو كل الناس مثلك ثنياني .. كان الحين نلعب على نهائي كأس العالم < يمديك :d تسلم على مرورك العطر أيها الصديق الزعيم أوباما هو يا إني لمست بالموضوع شي يوجع .. أو إني يعني حولها كذا :d تسلم أوباما على المرور العطر .. :rose:< أقلقت أمكم عند العطر :d asnab شكل تسبدك حايمة من موضوع السوار اللي على اليد :d الشكوى لله عاد .. اذا وصلت للدين مالك الا تمسك راسك .. والا الكورة سو اللي تبي .. شكرن على المرور أسناب اذا صح الاسم علي :rose: طيار هلالي هلا وغلا طيار .. بالعكس طيار انا متواجد داييييييمن متعووووده :d بس يعني يمكن اني اقرأ أكثر من إني اكتب .. ومشكلتنا بالألفية الجديدة أن الحاسوب أو الكمبيوتر الشخصي أصبح في أيادي الكبار والصغار وهذا مما لا شك فيهو .. < اسلم يابوساري :d والله وانا اخوك ودك مرات تحط المنتدى عائلي بدون حضور الاطفال :d تسلم طيار على ردك .. والله وسعت صدري .. والمنتدى به من اللي ينشد بهم الظهر كثير .. المشكلة ان هالكثير ضدهم كثير بعد .. ومغاط كاتب انا اشهد انه كاتب < لا عمرك تشهد :d ودامه حلم انه يسابق الشغالات .. أكيد وصل خير :d يعطيك العافية على ردك العطر :rose:< ياخي ماعندي غير هالكلمة وش اسوي أمورة الزعيم شكرا أختي الكريمة وجزاكي الله خيرا .. سلمت يداك وردك .. :rose: سلطلط الهلالي شف مع اني ما أدري وش معنى اسمك و حسيت اني حول يوم أقراه .. بس اسم جذاب صراحتن :d آمين يارب يتقبلن انا وياك بالجنة بعد عمر طويل .. شكرن سلطلط على المرور العطر قسم اني كتبت اسمك مرتين غلط .. sowaid وش اللي تختلف من دكتور لدكتور ؟ :d لكن فعلا هي تختلف من دكتور لدكتور زي ماقلت .. :d شكرن اخوي على المرور العطر :rose: من اليوم ورايح منب قايلن عطر أبد |
| الوقت المعتمد في المنتدى بتوقيت جرينتش +3.
الوقت الان » 01:32 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd