Lionel Messi


نواف ... كيفك ؟؟

هلا وغلا .. بخير بشوفتك

* رايك بمصطلح حموضة العالميه ?

مشكلة بعض الأعضاء الله يهديهم مايتقبّل وجهة نظر الآخر يعني بفرض وجهة نظرة بالغصب !

* عزوف كثير من الاعضاء سواء باقي الاقسام والبقاء فقط بروابط الانديه حقتهم .. او من الشبكة عموما .. وبعضهم ومن فتره طويلة اكيد اذا تذكر شفنا كم رابطه سووا خروج جماعي من الشبكة .. له سبب برايك ؟؟

والله شوف أنا بصراحه أحد المقصرين بحق الأقسام الباقيه خصوصاً العالمية مكتفي تقريباً بإعداد التقديمات , بصراحه في السابق كنت أوفّق بين العالمية والروابط لكن في الفترة الأخيرة بصراحه صرت يالله وبالله يصير عندي وقت أدخل الرابطة اللي من جد مقصّر بحقها أولاً مسألة وقت وثانياً ربما البعض يجد الراحه أكثر بالروابط خصوصاً أن الروابط غالباً ماتكون جمعه أخويه فيرتاح الواحد بتواجده بالرابطه أكثر من أي مكان آخر سواءً في أحد أقسام الشبكه أو خارجها

بالنسبه لغياب بعض الأعضاء بصراحه كان خسارة كبيرة لنا وربما الأختلاف بوجهات النظر كان أحد أسباب خروجهم لكن الحمد لله القسم يتواجد فيه أعضاء نحسد على تواجدهم ومازال القسم بخيررررر وأعتقد بالفترة الأخيرة يشهد تطور كبير أكثر من السابق بمساهمة المشرفين الله يعطيهم العافية واللجنه الإستشاريه الله يقويهم

* لو اعطيت كامل الصلاحيات بالشبكة وش بتسوي ؟؟

ما أعتقد إني بسوي شيء أفضل من اللي قاعدين يسوونه القائمين عليها الله يبيّض وجيهم

* يقولون تفت كورة مشاء الله عليك .. وش مركزك ؟؟

ماهو بالحيل ثلاث مراكز تقريباً أكثر شيء أجيدهن الوسط الأيمن وورى الهجوم ومحور , لكن المركز اللي أرتاح فيه هو المحور

* حكمتك او اكثر من حكمة تتعامل فيها بحياتك ؟؟

عامل الناس كما تحب أن يعاملوك

* نواف بعد 4 سنوات وش يتمنى يكون ؟؟

أتمنى لي ولكم دوام الصحه والعافية

* ما يراودك حلم السفر والهجوله حول العالم ؟؟

إلا والله يابراسي هجوله مافكر فيها أحد

* رايك بـ موضه البلاك بيري ؟؟

ممتاز لكن يؤخذ كموضه طبعاً لا !

* موتر احلامك ؟؟

حمارتك العرجاء تغنيك عن سؤال اللئيم مافكرت والله بالموضوع ولا يشكل لي أي أهتمام بصراحه

* مفكر تتزوج .. والا ناوي تطول عزوبي ؟؟

لا مطوليييييييييييين , العزوبية نحسد عليها

* ميوزك تسمع ؟؟ ايش المفضل عندك ومطربينك المفضلين .. وهيفاء وهبي وين تصف عندهم ؟؟

اي والله أسمع , وبالنسبه للمطربين كثير لكن عندك أبونورة وماجد المهندس أكثر أثنين أسمع لهم

وبالنسبة لهيفاء على رأس قائمة الفنانين عندي بفديوهات الكليب لا والله الصراحه أكرهها كره شدييييييييد

* هلاليتك كم تعطيها من 100% .... وهلال اول .. وهلال الحين وش فرقهم ؟؟

أعطيها 3000% , هلال الآن إمتداد لتاريخ إبداعات هلال أوّل

* معلقك المفضل ؟؟

علي سعيد الكعبي

* قد حصلت وقابلت مشاهير صدفه او مرتب لها ؟؟

قابلت الأمير فيصل بن فهد بن عبدالله رئيس شركة F6 وصاحب ملكية 50% من أسهم ليفربول وكانت بالصدفه

شخصيه جداً مرحه ومتواضع لأبعد الحدود ودار بينا حديث عن ليفربول وعن الدوري الإنجليزي عامة

* بصرآآحه .. رايك بمحدثك الكريم من ايجابيت وسلبيات ؟؟

والله والحلا عليك سلبيه وحده بس سجلتها وهي إنك ماقد جيت بمباريات العالمية بالفترة الأخيرة

والله بدون مجامله شخصية تشرف بمعرفتها وكنت أتمنى إستمرارك باللجنه لأنك من جد شكلت إضافة كبيرة للجنة والبونديز ليجا مفتقدك

* كلمة اخيره للرابطة واعضاءها ؟؟ ورايك بكرسينا الموقر وكيف شفت استضافتك ومصالة اسئلتنا ؟؟

رابطة بصراحه تعتبر واجهه للشبكه بتواجد أعضاء مميزين تحسدون على تواجدهم وبالنسبكة للكرسي بصراحه حالياً أستمتع بقراءة الأسئله والإجابه عليها لكن شكلك ودك تخنقني لأني تأخرت عليك بإرسال الأجوبة

ويعطيك العافيه يابعدي وصدقني نورت الكرسي ..

الله يعافيك وأشكرك على الإستضافه اللي أسعدتني كثير

almnsi555


أنا عندي سؤال واحد بعد اذنكم

تحت أمرك

بالنسبة لآخر مواجهتين بين برشلونه وتشلسي شاهدنا الكثير من الاحتجاجات من جانب التشلساوية على (الغش) التحكيمي في المباراة

وكان ردنا دائما بأن ما حصل في الاياب ضد تشلسي
حصل مثله في الذهاب ضد برشلونه (يعني يوم لك ويوم عليك)

ما رأيك في كلام كل من الكتالونيين والتشلساوية؟؟

من الطبيعي كل واحد بيبرر موقفه لكن من وجهة نظري الخاصه أن اللي حصل بالإياب مايقارن باللي حصل بالذهاب

PUYOL Carles

دنيدل

هلا

# رأيك مشكلة الجمهور مع القرارات وتقديرات الحكام .. نابعه من عقده محليه ؟ .. يعني هنا للأسف .. اتوقع الحكام الأوروبيين يمديهم يفتحو فيلا بس من المبالغ الا ياخذوها في الخليج .. وكلها من وجهة نظري .. بسبب قلة الثقه بالحكام المحليين .. مع اننا ياما شفنا حكام خليجيين محترمين ولهم نظره حلوه من ناحية التحكيم ! .. يعني ليه دايم المساس بالنوايا .. والميول التشجيعيه على حساب الثقه بالحكام واخلاقيات المهنه الخاصه بهم ؟

سؤالك طويل ولحسني شوي لكن بجاوب على حسب فهمي للسؤال

أنا واحد من الذين إذا أخطأ حكم أجنبي بصراحه مايكون عندي مثل خطأ حكم سعودي لأسباب عديده أبرزها الميول والضغوطات اللي يواجها الحكام محلياً وأن الحكم الأجنبي أخطاءه ربما تكون مقبوله لأن الحكم الأجنبي ماتشكك بميوله وتحيزه لفريق دون الآخر, عندنا حكام خارجياً مافي أفضل منهم لكن محلياً عليهم أخطاء بدائيه مايخطيها حكم مبتدئ وأعتقد هذا يعود للضغوطات التي يعانون منها الحكام لعدم وجود حصانه وصار كل من هب ودب يرذلهم ويشكك بذممهم وتأثروا بما يقال عنهم وأصبحوا يبحثون عن إرضاء أصحاب التصاريح !

GeRaRd

# برأيك من سيضع بصمه قويه بمونديال كأس العالم 2010 ؟!

الأرجنتين

# بكل صرآحة ٍ متى شجعت تشيلسي ؟! وآيش الي خلآك تشجع تشيلسي ؟!

أواخر التسعينات , اللون الأزرق والأسطورة زولا

# رآيك بـ موضوع فآبري ! ؟ كثير من الصحآفة والجرآيد والموآقع آلآوربية ! تقول آنه فآبري بآلنهآية بيرجع البرشآ هل هذآ الكلآم صحيح ! ؟ وآعتقد بيكي قآل : بآلنهآية فآبري بيرجع ! ؟ لـ البرشآ بس المسآلة مسآلة وقت ! ؟ هل آنت مقتنع في آنتقآل فآبري لـ البرشآ ؟!

والله سياسة الأرسنال تقول أن مسألة أنتقال فابري للبرشا مسألة وقت بغض النظر عن سياسية الأرسنال أعتقد أن فابري لديه رغبه بالإنتقال للبرشا والعودة لإسبانيا ومسألة أنتقاله مسألة وقت لا أكثر

# يقول آنك تفت كورة ؟! هل هذآ صحيح ! ؟ وآيش مركزك !

سبق طرحه وتمت الإجابه عليه

# ويش آمنيآتك !؟ في الحيآة

كثير والله وتأتي في مقدمتهم رضى الوالدين اللي أتمنى إنهم يكونون راضين عني تمام الرضى , وثانياً جولة حول العالم

# بكل آمآنة ويش رآيك بـ وآين روني !؟ وخصوصا ً في الفترة آلآخيرة ؟! وهل ترشحه من آفضل المهآجمين !؟ في آلعآلم ؟!

روني مستلج لما أنتقل كريس للريال تقريباً الجميع كانوا يخالفوني الرأي بأن روني بيكون العلامه الفارقه للمانيو بعد رحيل كريس , صحيح روني مايمتلك المقومات اللي يمتلكها كريس لكن قاعد يسوي اللي كان يسويه كريس للمانيو وبعبارة عاميه أختصرها " شايل المانيو على اكتافه "

طبعاً مرشح والموسم هذا بصراحه ماشفت بروز كبير للمهاجمين غير روني ودروجبا ويأتي بعدهم بدرجه أقل ميليتو

# من هو آفضل لآعب عندك في العآلم !؟

مادري أنت تقصد حالياً أو على مر التاريخ ؟ لكن بجاوب الأثنين

طبعاً على مر التاريخ مارادونا وحالياً دروجبا

# هل سمعت المعلومة الجديد من المعلق فآرس عوض ! ؟ عندمآ الهلال يفوز ع السد في الدوحة يكون بطل بطولة آسيآ .. ؟!هل مقتنع في هذي المعلومة آم لآ؟! وهل تتوقع الهلال يحرز البطولـة !؟ وخصوصا ً الهلالين مشتآقين كثير لـ آلآسيوية ! ؟

إي والله سمعته طبعاً قالها من باب التفاؤل للهلاليين وإلا مو شرط ياخذها الهلال لكن الدوحه دائماً فال خير على الهلال والمنتخب السعودي , لكن قالها والا ماقالها أنا قايلها قبله ومتفاءل كثييييييييير بآسيا هالموسم بإذن الله

# وشكرا ً .. لك ’’
وأن شآء الله مآكون ثقلت عليك !

العفووو حبيبي لا والله بالعكس عسل على قلبي

J.COLE

هلا والله بالريـس نواف , منور

هلا فيييييييك ياريس النور نورك يابعدي

1 ) جـرايم التحكيم أثرها يكون أكبر في التشامبيونز بدون شكّ , وهالجرايم شرشحت جميع الأندية بدون استثناء - لكن - هالأندية كثير منها تفوقت على التحكيم وحصلت مبتغاها لكن تشيلسي لا ... شالسبب في رأيك ؟!

تشيلسي في الفترة الأخيرة خاصه واجه ظروف ماواجهها أي نادي ثاني ومع ذلك محافظ على قوة المنافسه بالشامب من تغيير مدربين وإصابات وغيرها لكن أعتقد أن الفريق غير موفّق وإلا على الأقل كنا نستحق لقب واحد بالخمس سنوات اللي راحت !

2 ) لو خيروك بين " سكولاري " و " جرانت " ... وخيروك بين " موري " و " هيدينك " , أيهم أزين للبلوز في الحالتين ؟

خياراتك صعبه جداً

الخيار الأول صعب جداً وكلا المدربين بصراحه ما أخذوا الفتره الكافيه للحكم عليهم , سكولاري صحيح ماقدم مستويات مع الفريق ولا نتائج لكن لا ننسى أن سكولاري في البداية أخطأ خطأ كبير بتسريح الكثير من اللاعبين والعمل على نظام المنتخبات والإكتفاء بعدد قليل من اللاعبين يصل لـ 24 لاعب تقريباً مع اللاعبين الصاعدين وأيضاً الظروف ما أعتقد إنها مشت معه في البداية من إصابات وغيرها !

جرانت برضوا ما أخذ الفترة الكافيه مع الفريق صحيح الفريق قدم فيها نتائج غايه في الروعه لكن لا ننسى أن كلارك وتين كايت كان لهم دور كبير بالنتائج خصوصاً كلارك اللي من طلع من النادي والنادي عايش بأزمه وكل بين فترة وفترة نسمع مشكله في الفريق سواءً من لاعبين أو غيره لكن على وقت كلارك ماكنا نسمع عن ذلك إطلاقاً !

لكن المنطق يقول إني أحكم على النتائج اللي حصلت للفريق مع المدربين وبالتأكيد وقتها بختار سكولاري

بالنسبة لمورينهو وهيدينك بصراحه هالأثنين من أفضل المدربين لدي على الساحه العالمية مدربين يعرفون كيف يتعاملون مع المباريات من نواحي كثيرة واللي يعجبني فيهم أكثر إهتمامهم بالجانب النفسي للاعب وهذا أشوفه سر نجاح أي مدرب في العالم

ولو وقع الاختيار بينهم بالتأكيد راح أختار موري مو تقليل من هيدينك وكلهم أشوفهم لو رجعوا للفريق راح يشكلون أضافة لكن موري يعرف كل صغيرة وكبيرة عن النادي ويعرف كيف يتعامل مع أجواء الدوري الإنجليزي بشكل عام

3 ) الظهير الأيمن الأساسي بوسينجوا , والبديل إيفا , مو حرام ان إيفا القتالي على الدكّة وبوسي المزاجي أساسي ؟

إلا والله شيء يغبن ويرفع الضغط ومن الموسم اللي راح وأعتقد أنت تدري بحكم متابعتك الدائمه للرابطة إني كنت اطالب بإيفا يكون أساسي بدال المزاجي بوسينجوا وفعلاً بآخر الموسم وبعد ماتعرض لبوسي لإصابه شفنا إيفا وش سوا مع الفريق وكان وحش بكل ماتعنيه الكلمه من معنى

وأبشرك بوسينجوا لآخر الموسم ماراح نشوفه

4 ) " تن كات " له فضل كبير على برشلونة و تشيلسي , هل هو في رأيك السبب في إخفاق برشلونة لعدم تواجده في موسم 07/08 والسبب أيضاً في وصول تشيلسي إلى فاينل التشامبيونز ؟ أم المدربين هم الأثر في ذلك سواءً من " ريكارد " بالنسبة للإخفاق أو " جرانت " بالنسبة للنجاح ؟ أم ظروف وأحوال الفريقين في ذاك الوقت هي كان لها الدور الكبير في الحالتين ؟

تين كات مدرب كبير وأعتقد فعلاً إنه كان وراء أخفاق البرشا ذلك الموسم لأنه إذا لم تخني الذاكرة أن البرشا ماتغير كثير عن الموسم اللي قبله عناصرياً ولكن الاختلاف كان برحيل تين كات اللي كان يشكل ثنائي رائع مع ريكارد

بالنسبة لجرانت أنا أجزم بأن تين كات وكلارك أيضاً كانوا وراء تأهل الفريق لنهائي دوري الأبطال وما أنسى رغبة اللاعبين أولاً وأخيراً اللي بذاك الموسم شفنا روح الفريق البطل في نهايته وهذا الدور الفعلي لكلارك لأنني حتى الآن ماني مقتنع داخلياً بأن جرانت مدرب أو على الأقل مدرب لفريق كبير وفي بطولة كبيرة

5 ) " فرانكي , بالاك , كارفا , جو كول " أكثر اللاعبين تفاوت في المستوى من مباراة إلى أخرى هالموسم , شالسبب في رأيك ؟

بصراحه مالهم أي عذر بمستوياتهم اللي قاعدين نشوفها ! فرانكي ممكن طريقة آنشي أثرت عليه لكن ماهي عذر إطلاقاً يعني اللاعب في بعض المباريات نشوفه مختفي كلياً يعني مو معقول حتى هذه نرجعها للطريقه ! بالاك يلعب في مركز غير مركزه وأعتقد أكثر اللاعبين اللي ممكن نكن لهم العذر

كارفا لا تعليق ! مع إنه ببعض المباريات يقدم مستويات خياليه لكن ما ابي لاعب مباراة يعطينياه توب وخمسه بعدها دمار !

جوي أكثر لاعب أحزني على مستواه ! الإصابات أثرت على اللاعب لكن مو بالطريقه اللي حنا قاعدين نشوفه فيها , جوي أبجديات الكرة في بعض اللقطات مايعرف يقدمها ! في الفترة الأخيرة تطور مستواه وصار أفضل من أول ومستبشر خير بالفترة الجايه من جوي

6 ) أكثر الخطوط بحاجة إلى الدعـم من رومان في تشكيلة البلوز ؟

الوسط والهجوم

7 ) " نادي مغمور " يعني ممنوع يدخل ضمن قائمة الأندية الكبيـرة مهما فعل , هل من المعقول تاريخ النادي هو يحدد دخوله ضمن المنافسات أم لا .. طيب اللي يبي يصنع له تاريخ وين يروح ؟! بالله وشرايك في أصحاب هالمقولات ؟

ماذكرته أنت يختصر لك عقول وفكر هذه العقليات !

1 ) أوباما - قنبلة إعلامية فقط لا غيـر , أو بمعنى أحرى " قول بدون فعل " .. مع أو ضد ؟

الرجل حتى الآن لم يظهر كل ماعنده على الأقل بعد مرور سنتين من فترة ولايته تتضح معالم ساسيته

2 ) التحيز مع من يدعون " الإلتزام الديني " ووضعهم في المناصب الأفضل في وظائفهم رغـم ان معظمهم أقل منها .. كيفية التعامل مع هذه الظاهرة في رأيك ؟

لم نأتي بجديد فهذه الظاهره ليست حكراً على هذه الفئه فكثير من يعملون في سوق العمل , يعملون في غير تخصصاتهم

3 ) " التطور " أو " التصحيح " كلمة مفقودة سياسياً أم إجتماعياً أكثر ؟

في كلتا الحالتين !

4 ) نظام " النسبة الموزونة " لِـ طلاب الثانوية , في اعتقادك هل هدف وزارة التربية منه تحقق أم لا ؟

لم ولن يتحقق

5 ) " تخصيب اليورانيوم " حق مشروع لِـ الأمريكان فقط !! بغض النظر عن الأسباب اللي يتداولها الإعلام , ليش دول الخليج في رأيك ماتوقف موقف إيران وسوريا - في هالناحية فقط - وتتطور في النواحي اللي تطمح لها أي دولة في العـالم ؟

دول الخليج مسالمه وهذه النقطه تبعدها عن التفكير في تخصيب اليورانيم حتى لو كان سلمي !

6 ) " مجلـس الشورى " رغـم فضائله وإيجابياته إلا ان كثيـر من الشعب تبخسه حقه .. شالسبب ؟

لإختلاف الأراء فيه وبطئ تنفيذ الآليات المتفقه عليها ! " ورضى الناس غايه لاتدرك "

عذراً نواف ثقلنا عليـك , بس والله من معزتك حبينا نتعرف عليك أكثر

سنعك بالرابطة أوريك بالعكس عسسسل على قلبي والله

محب الذئب9

هلا أنّوس أحد موصيك علي ؟

س1 / بدايتا كيف سجل نواف في شبكة الزعيم + كيف كانت بدايتك مع النت .. ؟

بدايتي بالنت كانت 2001م وكانت من خلال خالي العزيز هو اللي علمني كل شيء وكان عندي جهاز كومبيوتر يعني ماناقاصني شيء أبد إلا إني أشبك سلك التيلفون واشتري الكرت , وبدايتي مع الشبكة كانت من أول ماعرفت النت طبعاً في البداية تصفّح وبعد سنه أو سنه ونصف تقريباً قررت التسجيل

س 2 / نواف كيف صار هلالي .. ؟ البيت - المدرسة - الحارة - لاعب معين حبيتة

تقريباً البيت أكثر شيء أثّر على ميولي لأن البيت كله هلاليين بالفطرة

الهلال بشكل عام اسرك وسحرك بلعبة حدثنا عن ذالك < فديتني وانا اسولف فصحى ..

الهلال مهما تحدث عنه لايمكن أصف لك اللي بداخلي عن هذا الكيان الهلال نعمه من رب العالمين وأحمد الله ليل نهار إني إنتميت لهذا الكبير , وأختصر لك الحديث بكلمتين " عشق الروح وبلسم المجروح "

س 3 / ماهي قصة تشجيع نواف للبلوز .. ؟

ماهي قصه مجرد ماهي إعجاب في البداية ومن ثما متابعه وبعدين خلاص علقنا القصه بدأت من آواخر التسعينات وكنت أحرص على متابعة الملخصات أو الأخبار حتى أتصيد أخبارهم لكن مع بداية الألفيه الجديده أصبحت ملازم للأزرق وتقريباً في البدايه شدني فيه هو وجود لاعبين كبار مثل الأسطورة زولا ودينيس وايز وأندريه فلو وديساييه

ومن متى صرت تشوف مباريات الدواري الاوروبية .. ؟

تقريباً من بعد كأس العالم 94م وأنا من ذلك الوقت وأنا حريص على كرة القدم الأوروبية

س 4 / انجاز السداسية البرشلونية وش تقول عنه .. ؟

إعجازي

س 5 / سياسة فينجر في ادارة فريق ارسنال وش رايك فيها .. تصدير المواهب الشابة وعدم التمسك بالنجووم الى تقريباً اغلبهم طلع على يدة .. ؟

سياسه غريبه صراحه من فينجر ! عنده لاعبين شبان يحسد عليهم لكن برضوا يحتاج للاعبين خبره ويكون فيه مزج في التشكيل بين الشباب والخبرة ولو فكر في هذا الجانب ما أعتقد أن الأرسنال بيغيب كل هالفترة عن الإنجازات !

س 6 / سياسة الناديين برشلونة وريال مدريد في جلب النجوم والاعتماد على مدارس
النادي .. ؟

الإعتماد على المدرسه يراح يؤتي ثماره بكل تأكيد ومدرسة البرشا أشوفها من أفضل مدارس العالم وكل موسم تخرج لنا لاعب لاعبين من طراز فريد , والأندية الكبيرة جميعها تقريباً بدأت تلتفت لهذا الجانب وتقليل صرف الأموال بالمستقبل

س 7 / تذكر اول مباراة اوروبية شاهدتها .. اذا تذكر متى كانت وبين مين ومين .. ؟

لا والله بالضبط ما اذكر

س 8 / ديربي البوكا والريفير قد تفرجت علية .. !! ؟

إيييييه ديربي يمتعك بالمضاربات اللي داخل الملعب

س 9 / منتخب الارجنتين يمتلك مواهب خيالية ومن طراز رفيع جداً
رايك فية وهل هو قادر على تحقيق كاس العالم .. ؟

المنتخب الأرجنتيني منتخب كبير وولاد للمواهب لكنه منتخب بصراحه مايعرف يعامل مع البطولات الكبيرة ومايفرق بين الجديه والمتعه لكن كأس العالم القادم أتوقع للمنتخب الأرجنتيني شأن كبير حتى مع قيادة الحشاش

س 10 مردونا المدرب كيف تشوفة .. ؟

مارادونا لاعب كبير لكن مو شرط يكون كذا كمدرب لكن أكبر خطأ أتخذه هو تعيين ماسكيرانو قائد للتانجو اللي ما أشوف أي صفه من صفات القائد الحقيقي ومن الظلم تعيينه بتواجد رموز أمثال زانيتي وفيرون !

س 11 / افضل لاعب يشوفة نواف محلياً وخارجياً في الماضي والحاضر .. ؟؟
يعني لاعب واحد محلى ولاعب واحد خارجي يقول عنه نواف هذا اسطورتي ..

محلياً سامي الجابر وخارجياً مارادونا

انتهت اسئلتنا الرياضية الى ان شاء الله ما ثقلنا عليك فيها ( فيس متلطم داري انه مثقل )

لا ولوووووو

س 12 / اكلة يحبها نواف واكلة ما يحبها .. ؟

اللي أحبها معكرونه بالباشاميل أما الأكله اللي مايحبها مافي شيء معيّن والله

س 13 / نواف يتابع التلفزيون او لا .. ؟ غير الكورة طبعاً ..
وش هي البرامج او المسلسلات او او او الى يحرص يشوفها نواف .. ؟

متابعتي له قليييييله جداً بغير المباريات أو الأفلام , وأكره المسلسلات

وحالياً فيه برنامج زد رصيدك على قناة بداية بصراحه من أشد المتابعين له برنامج ديني وفيه فائدة كبيرة

س 14 / اتصالك وش هو وكم سرعتة .. ؟

DSL وسرعته 512

س 15 / نواف يدور المميز " رقم جوال ، لوحة سيارة ، " .. ؟

رقم جوالي مميز , لكن اللوحه لا عاديه جداً ومافيها ولا رقمين متشابهين

س 16 / سافرت خارج المملكة .. ؟ اذا سافرت وين رحت .. ؟
واذا ماسافرت وين ودك تروح .. ؟ ووش هي المدن الي رحت لها في
مملكتنا الحبيبة .. ؟ " السؤال طويل حبتين "

إي نعم سافرت لمصر والبحرين وبإذن الله لندن عن قريب وكثير من المدن اللي ببالي ونفسي أروح لها مثل باريس وميلانو وروما وبرلين والمملكه تقريباً لفيتها كلها

انتهينا من الاسئلة العام الحين اسئلة خاصة بالمنتدى ..

يعجبني تنويعك << بيجلدك

س 17 / نواف معروف انه راعي طويلة في الردود .. ما تمل وانت تكتب الرد .. ؟

لا والله أستمتع وأن أكتب لأني أكتب كل اللي في خاطري ما أترك شيء

س 18 / نواف كم يعطي المنتدى حالياً من وقتة .. ؟
وكم كان يعطى المنتدى من وقتة عندما كان عضو بدون منصب
وهل تغير التوقيت مع تدرج المناصب .. ؟

حالياً للأسف قرابة ساعتين يومياً وفي السابق تقريباً من ست ساعات وأكثر

بصراحه تغير شيء كبير الإنشغال أصبح أكثر وقلة مشاركتي في القسم وأصبح تركيزي على أداء واجبي في اللجنة والوقت اللي أدخل فيه النت يكون أغلبه في اللجنة

س 19 / كمسؤل للجنة الاعلامية لمنتدى العالمية ورئيس لرابطة
تشلسي " مناصب كبيرة " .. كيف يشوف نواف نفسة فيها .. وهل هو قادر
على الاستمرار فيها سوياً لفترة طويلة .. ؟

تشرفت بالثقه اللي منحوني إياها وأتمنى إني قدمت ولو شيء بسيط يبيض الوجه مع إني ماني راضي عن اللي اقدمه أحس إني مقصر كثييييييير سواءً في اللجنة أو في الرابطة , وبصراحه ما أشوف نفسي إني قادر على الاستمرار بالمنصبين معاً

س 20 / اقسام يتصفحها ويرد فيها نواف غير العالمية .. ؟

متابعتي للأقسام الثانيه قليله جداً لكن ربما منتدى الجمهور أقرب قسم لي بعد العالمية وأشارك فيه بين فترة وفترة

س 21 / المنتدى هل تتواجد فية بشكل يومي .. ؟

إذا مافيه شيء يمنعني أكيد بحرص إني أكون متواجد على طول

س 22 / اكثر الاوقات الى يحب نواف يتصفح فيها المنتدى
صباح - ظهر - عصر - بعد العِشا - اخر الليل - منتصف الليل ..

آخر الليل

س 23 / اعضاء تحب قراءة ردودهم دائماً .. ؟

كثير والله وصعب إني أحصرهم لكثرتهم

اعتقد انه طفح الكيل
منى ومن اسئلتي .. اعتذر عن طول الاسئلة وان شاء الله ما ثقلنا عليك < لا ابد مرة 23 سؤال ولا ثقلت ههههههههههههههه

نواف ..

لا والله بالعكس حبيبي والله إستمتعت فيها ومثل العسل على قلبي وربي

F-C-Barca

نواف كيف حالك ؟؟ بصراحه انا مااعرفك ابدا ابدا لاكن اتوقع انك من الاعضاء المحترمين والفعالين في الشبكة والدليل ان كل الناس هنا ترحبك بقوة

أبشرك بخير وعافية الحمد لله وترحيبهم من طيب أصلهم

س// تشلسي الموسم هذا جالس يقدم مستويات خرافيه تتوقع عند اي حد سيقف
تشلسي الموسم هذا يعني كم له من بطوله ؟؟

جميع البطولات الكبيرة حظوظ الفريق مازالت قوية فيها , الكأس مافيه منافس له تقريباً إلا أستون فيلا والدوري متصدر ومصيره بيده ودوري الأبطال عاد من إيطاليا بنتيجه أشوفها مقبوله جداً

لكن ممكن الفريق يجد نفسه خارج هذه البطولات إذا إستمر التفاوت بالمستوى اللي نشوفه بالفترة الأخيرة لكن بإذن الله نطمع بالثلاثية

س// البريمير ليج دوري مثير وحماسي ونشوف له حضور كبير في UCL لاكن
في الدوري الاوروبي (( كاس الاتحاد الاوروبي )) مانشوف له حضور كبيير مرره
في رأيك وش الاسباب

كأس الإتحاد الأوروبي يكون فرصه كبيرة للفرق المتوسطه اللي تخرج من الشامبيونز ليج ومستوى الفرق الإنجليزي المتوسطه كـ أستون فيلا وإيفرتون وغيرهم أقل من إمكانيات الفرق اللي دائماً مانشوفها تبدع بأوروبا ليج مثل بريمن وشاختار وغيرهم من الأندية الكبيرة في بلادها

س// بالله عليك موب افريقيا تستاهل مقاعد اكثر في كآس العالم يعني نشوف منتخبات
واجده في افريقيا تستاهل انها تروح كآس العالم لاكن تظلمها عدد المقاعد المحدده
من الــ FIFA للقارة السمراء طيب يكثرون النقاعد لو على حساب مجموعات
اضافيه في كاس العالم

إلا والله إنها غابنتني وربي وأتمنى زيادة مقاعد أفريقيا في كأس العالم على حساب مقاعد أوروبية وفي الفترة الأخيرة شفنا تفوق كبير من المنتخبات الأفريقية حتى على المنتخبات الأوروبية وتكون ند قوي لها وتتفوق في أغلب الأحيان

س// جوركوف .! لاعب كبير ويتمتع بصفات كبيره جدا هداف صانع لعب من
الطراز الاول قدم قويه شاب .! تتوقع انه يجلس موسم اخر مع بوردو لان ماشفنا
فرق قويه من اوروبا مهتمه بالاعب بشكل جدي .!؟

لا عب كبير وأستغربت تفريط الميلان فيه خاصه بنفس الموسم اللي إنتقل فيه كاكا ! لكن من وجهة نظري إن زيركوف لو يقعد موسم آخر في بوردو أفضل له أو ينتقل لفرق أكثر إمكانيات من بوردو مثلما فعل ريبري مع العروض المغريه اللي جاته فضّل الإنتقال للبايرن وهذي أشوفها خطوة مهمه فعلها ريبري وأتمنى من زيركوف يفعل نفس الخطوة ومايكون مستعجل على تمثيل فريق كبير حتى يكتسب خبره أكثر وثقه أكبر أيضاً

س// رآيك بــ:

مادة الوطنيه ,,,

لم يحسن إستغلالها

ابراهيم الفريان ,,,

مغسول وجهه بمرق

منتدى الرياضه العربية والعالمية

هو الشبكه العنكبوتيه بأكملها من المستحيل أخش النت وما أدخله

نواف ارجو انك استمتعت في البقاء معنا مشكور ..

أستمتعت جداً وحياك الله يابوعابد

, ... ,

في النهايه أشكركم على الاستضافه اللي أضافت لي شيء كبير وأتمنى إني كنت خفيف الظل عليكم وأعتذر أولاً من يوسف على تأخير إرسال الإجابه على الأسئله وأعتذر منكم أيضاً لظروف خارجه عن إرادتي وإنشغال وإرتبطات خارج الشبكة تسببت في تأخير إرسال هذا الحوار في حينه

العذر والسموحه وأتمنى تستمتعون بقراءة هذا الحوار اللي بدون مجامله إستمتعت فيه

يعافيك ربي نواف ..
تاخرت صحيح لكن اشوا اننا شفنا اجابات عسل مثلك ..
ان شاء الله يتحقق لك اللي تبي ونورت الكرسي والرابطة ..
ومشكور يالغلا وان شاء الله ماتبخل علينا وخل نشوفك بالرابطة ..
المعذره على قل التواجد شباب ..