★★.. رابطة عشاق السيدة العجوز ..:: 2009-2010 ::.. ★★ - صفحة رقم 683 - نادي الهلال السعودي - شبكة الزعيم

يوفااااوي10 · #1 07/06/2010, 12:24 AM

ماروتا : 'دييغو لا يصلح في يوفنتوس'

مقتطفات من كلامه

قال ماروتا لتوتو سبورت

يوفنتوس مستعدون لبيع دييغو لانه "لا ينسجم مع خطة 4-4-2 ،" هذا مااكده المدير العام بيبي ماروتا.

وقال "هناك عروض لدييغو ،" ، وأنا لا أعتقد أن البرازيلي يتناسب مع خطة 4-4-2.

"وفي مواجهة عرضا رائعا ، وأعتقد أننا يمكن بيعه. احترس من بعض الاسماء الاخرى في الصحف ، كما يمكن أن

يكون هناك بعض المفاجآت القادمة ليوفنتوس.

"ومع ذلك ، جيانلويجي بوفون واليساندرو دل بييرو ليسو للبيع. هم رموز النادي والنقاط المرجعية الأساسية لاعبين شبان. "

وقال "عندما كنت في يوفنتوس ، فمن واجب عليك ان تبدا بالتسوية" ، وأصر ماروتا. واضاف "نحن نبني فريقا الفوز بلقب الدوري الايطالي الفائز ، أو على الأقل محاولة.

اعذرونا على الترجمه

Ibra_9 · #2 07/06/2010, 01:02 AM

السلام عليكم ورحمة الله وبركاته

شباب تكمله لموضوع ماركيزو وسب روما

الزبدة كنافارو يقول ... هو تقدم علينا شوي بالنشيد وقمنا نضحك عليه

Marchisio in particolare, tra suono della banda e coro del pubblico. Per quello, solo per quello, ci siamo messi a ridere

ونفس جي جي يقول ماسمعت ولا كلمة فيها سب لروما

http://www.tuttojuve.com/?action=read&idnotizia=22546

عاشق السيدة العجوز · #3 07/06/2010, 01:27 AM

في شي محيرني

ماروتا قبل امس مصرح تصريح لسكاي

اليوم يصرح برضو لنفس القناة

فيه لعبة بالموضوع

كونك تقول فيه اسمين نفاوضهم بيكونون مفاجئة ولا ذكروا في الاعلام

اتوقع انها مسألة تظليل من ماروتا

القادمان هما كراسيتش و البوسني دجكو

لعبة اعلامية خبيثة من ماروتا

الجانب المؤسف في التصريح هو اثبات الرغبة لبيع دييقو

اذا كان دل نيري ما صرح بهالشي الي هو ان دييقو غير مناسب لخطة 442

كيف ماروتا هو الي يذكر هالنقطة ؟

الحقيقة مدري وش يفكر فيه هالاعور ولا عرفنا سياسته الى الان

كل الي اقوله الله يستر

forza_JUVE10 · #4 07/06/2010, 01:50 AM

إقتباس


	"ومع ذلك ، جيانلويجي بوفون واليساندرو دل بييرو ليسو للبيع. هم رموز النادي والنقاط المرجعية الأساسية لاعبين شبان. "

والله من ذا التصريح عرفت ان ماروتا توقعوا منه أي شيء

أي لاعب غير الثنائي ممكن ينياع أو يدخل في صفقة

الله يســترررررر من الأيام القادمة.

Juventino · #5 07/06/2010, 02:11 AM

بكل صراحة انا مع تصريح ماروتا إن دييقو ما راح يكون مناسب لليوفي الموسم القادم

دييقو صانع العاب تقليدي يعني خلف المهاجمين فقط سواءً بـ 4-2-3-1 أو 4-3-1-2

والمعروف إن ديل نييري يعتمد على خطة 4-4-2 بشكل كبير ودييقو ما أشوف إنه يقدر يلعب لا جناح ولا محور بهالخطة

فليه تجلس 25 مليون يورو على مقاعد الاحتياط أو بموقع ما راح يقدم فيه متطلبات هذا الموقع

ماروتا إن باع دييقو فبعدها أقدر أقول إنه 100 % واحد من هالاثنين آجويرو أو دزيكو بيكونون باليوفي

صحيح إن دييقو لاعب كبير واتواقع إنه بينجح بشكل كبير لو يروح لنادي زي أرسنال أو روما

بس معنا أحس صعب نجاحه خصوصاً كجناح أيسر !!

حظيظ · #6 07/06/2010, 02:08 AM

السلام عليكم !!

بالنسبه لموضوع بيع دييقو !!!

مو مشكله يبيعون دييقو .. بس بشرط يجي كارسيتش ودزيكو واقويرو ..

لأنه لو بيلعب على الاطراف بيكون بيبي وكراسيتش ،،، الهجوم دزيكو ومن ؟؟؟ يبي يحط دزيكو واحد البعارين الي عندنا ما يصلح ابد

لازم يكون مهاجم 9.5 زي دلبييرو ودلبييرو كبير ما يعطي زي ما يعطون الشباب !!

لو كان دييقو بيبقى يمكن يلعب مهاجم ثاني وهذا الي اتمناه .. اما اذا راح معناته يا جيوفنكو يا دلبييرو بيكون مهاجم ثاني ،،

لو كانو بيعتمدون على جيوفنكو زين على زين اما دلبييرو ارجع واقول ما ينفع نعتمد عليه موسم كامل !!

تبقى المشكله الاكبر هي ترميم الدفاع الي ما سمعنى عنه شي اكيد !!

---

بالنسبه للدفاع وقدوم موتا وكاسيريس !! والي تكلمنا عنها انهم كلهم يلعبون يمين ..

كاسيريس لعب مع برشلونه ظهير يسار باحد المباريات الي شارك فيها .. ونفس الكلام لعب ظهير يسار مع منتخب بلاده !!

يعني ممكن يعتمد على هاللاعب بالجهه اليسرى ووجود موتا يمين ..

واللاعب هذا الي متكاثرين عليه 11 مليون .. برشلونه جابوه من فياريال ب18 مليون

يعني القيمه الي الحين اتوقع صعب ينزلون عنها برشلونه وتعتبر مش بطاله خاصه ان اللاعب صغير ..

إقتباس


	اتوقع انها مسألة تظليل من ماروتا القادمان هما كراسيتش و البوسني دجكو لعبة اعلامية خبيثة من ماروتا

هههههههههههههههههههههههههههههههههههههههههههههههههههههههههههه يا كافشهم انت يا خطير يا قوي يا خويي

والله هالاعور ما يندرى عنه شي او انه ماخذ اجازه ويقرا السوالف من الصحافه !!

الغريب بالموضوع ... مافيه كشافين لنادي اليوفي من بعد ما توالت الاداراة الجديده ؟

------

بكرا عندي اختبار نهائي ادعولي يا شباب ...

ejeex · #7 07/06/2010, 02:10 AM

هلا شباب .... كيفكم ان شاء الله بخير

و الله حقيقة انا كنت ناوي انزل مقال الليلة عن اليوفي > لا يا تركي مو اللي كلمتك عنه

المهم ... بس صار لي موقف اليوم و غير جوي صراحة

و بما اننا رابطة كل شيء ....

و الشباب دايم يقولون لنا قصصهم بالخارج

انا حبيت اقول قصتي ... و قصتي هنا في الرياض

انا شاب عادي وسيم >

< طموح عايش في شرق الرياض عند مخرج 15

لي انا بعض اصدقاء الدراسة اللي ما انقطعت عنهم

حتى يوم دخلت الجامعة

عندنا عادة اسبوعية

كل احد او اثنين نطلع نلعب كورة ...

حتى لو الدنيا اختبارات ولا حر ولا برد ... لازم نلعب

بس اللي صار اليوم شيء يمكن يغير حياتي انا كانسان اولا و اخرا

....

بعد اللعب و التعب ... مرينا انا و الشلة " شلة معايا زميل " بنده اللي على مخرج 15

و كان على غير العاده فيه دوريتين عند الباب

عاد حب الاستطالاع ثانيا , و ابي اشري ماء اولا > لا احد يقول بقاله الساعة كانت 1 بالليل

مريت .. شفت ام و معاها 3 اطفال

ولد تقريبا عمره 5 سنوات و بنت عمرها 3 سنوات و بحجرها طفل رضيع

و جنبهم شنطه ... و الدوريات واقفين يتكلمون مع رجال

عرفت ان الرجال هو زوج الام ... و كان يصرخ بصوت عالي على الظابط و يقول وين اروح

دوام و طردوني و بيت و طردني و فلوس ما عندي

صراحة ... انا لا شعوريا كلامه دخل بخاطري كثير

يعني لما قارنت نفسه فيني ... انا و لله الحمد عندي سيارة , و ساكن ببيت مع اهلي و انام بغرفه لحالي و كل شيء عندي و لله الحمد

وهو المسكين ... انا ما ادري عن قصته ... بس الوضع يقول انه لا حول له ولا قوه

دخلت السوق .. و شريت ماء و كم حاجه لهم

و انا طالع اشوف الام تنوم العيال الثلاثة على الارض و تغطيهم بطرف عبايتها ...

و الحمد لله ان المكافئات كانت نازله و الصرافة كانت قريبه ... و زي ما يقولون خلها على الله

سويت اللي هو واجب علي انا كمواطن و انسان و مسلم

بحكم ان الرجال كان مع الظابط يتكلم قدمت اللي معي للام

صراحة الام بكت و رفضتها بالبداية ... بس لزمت عليها و قلت انتم تحتاجون اكثر مني

بعدين رحنا حنا و الشباب و فرينا كم فره

رجعنا و لقيتهم رايحين ... وين ما ادري

بس حقيقة منظر الام وهي تنوم اولادها على تغطيهم من عبايتها و بكائها و جلوسهم قدام الباب خلاني اعرف قدري و اعرف النعم اللي عندي

و الواحد يحمد ربه على النعم اللي هو فيها ... الصيف جاي و كل واحد بغرفته مكيف و مرتاح و شبعان و عنده سيوله ماليه

و غيره ينوم عياله بالشارع و يغطيهم بطرف عبايته ولا ثوبه

الله لا يغير علينا النعم اللي علينا

و كل واحد يقول الحمد لله يارب على النعم

و يتخيل نفسه قبل لا ينام مكان العائله ذيك عشان يعرف قدره

.....

ادري الموضوع مو بمحله

بس زي ما تقولون رابطة كل شيء

تشاو

عاشق السيدة العجوز · #8 07/06/2010, 02:27 AM

إقتباس


	ejeex زعيــم فعــال

صراحة قصة مؤثرة يا صالح والله يجزاك خير على الي سويته

السعوديين يموتون من الجوع

وحكومتنا الرشيدة تتبرع للبنان والمغرب والبحرين بالمليارات

الرياض وجدة يغرقون بالمياة والصرف الصحي

وحكومتنا الرشيدة تتكفل ببناء المشاريع التنموية في البلدان التي يصيفون فيها طويلين العمر وحاشيتهم

الطلاب يدرسون في مباني قديمة وبالية ومهترئة

وحكومتنا الرشيدة تتكفل ببناء المدارس في لبنان وغيرها

حظيظ تراك خويي ان سحبتني الداخلية مع اذني بكرة

حظيظ · #9 07/06/2010, 03:03 AM

إقتباس

الرسالة الأصلية كتبت بواسطة عاشق السيدة العجوز


	صراحة قصة مؤثرة يا صالح والله يجزاك خير على الي سويته السعوديين يموتون من الجوع وحكومتنا الرشيدة تتبرع للبنان والمغرب والبحرين بالمليارات الرياض وجدة يغرقون بالمياة والصرف الصحي وحكومتنا الرشيدة تتكفل ببناء المشاريع التنموية في البلدان التي يصيفون فيها طويلين العمر وحاشيتهم الطلاب يدرسون في مباني قديمة وبالية ومهترئة وحكومتنا الرشيدة تتكفل ببناء المدارس في لبنان وغيرها حظيظ تراك خويي ان سحبتني الداخلية مع اذني بكرة

تراك مانت صديقي

بالنسبه لسالفة صالح نقول له جزاك الله خير وزين سويت والله يفرج عنهم مصيبتهم
---

اما ردك يا مبارك صراحه انا انقد على اي واحد يقول زي هالكلام ..

أولن لأن فيه الضمان الاجتماعي يعطي فلوس للأسر المحتاجه وغير كذا فيه الجمعيات الخيريه ..

للأسف فيه ناس كثير تحتاج وعندهم عزة نفس الدوله والشعب والجار بنفسه ما يدري عنهم لأنهم ما يشتكون ..

كثير من الناس يحط اللوم على الدوله بس .. وليه يتبرعون وليه يسون وليه وليه وهذي اشياء سياسيه اكبر مننا كلنا ويمكن تكون اشياء مفروضه على الدوله !!

لكن قبل نتكلم عن الدوله وليش وليش !! حنا مسلمين وهذي من مسؤلياتنا بعد !!

يعني تخيل لو كل مواطن سعودي يخرج زكاته السنويه ( ومانبيه يتصدق بريال واحد بس ) .. اتحداك لو كان فيه واحد فقير ..

لكن المشكله كلنا الحين ايماننا ضعيف ونادر تلقى الي يطلع زكاته صح !!

انا من الفضاوه هاليومين نسولف بسالفة واحد كان داخل ب33 مليار ريال بالاسهم وبعد ما طاحت الاسهم بقاله 12 مليار ..

طبعن الي بالاسهم بس 33 مليار فما بالك الي برا الاسهم .. المهم انا فاضي شغل هاليومين زي مانتم شايفين

قلت ابي احسب زكاة هالشخص المحترم

طلعت زكاته 850 مليون ريالن ينطح ريال .. هذا شخص واحد ولاهو امير ولاهو من المعروفين !!

يعني بالله عليك لو كل واحد بالسعوديه يطلع زكاته كم تتوقع مجموع الزكاة بالسعوديه ؟؟؟؟ انا عن نفسي اتوقع فوق 100 مليار وهذي تكفي كل المحتاجين بالسعوديه وجيران السعوديه !!

فما بالك الصدقات والتبرعات وا وا وا ... للأسف اذا قل الايمان وضعف الاسلام تكثر المشاكل ... ولو رجعنا لديننا وافتكينا من كل واحد يحط اللوم علي غيره كان انحلت الامور .. لكن وين الي يفهم

<<---- يحس انه خطير وممكن يصير امام جمعه راتبه 4500

نرجع لليوفي ...

بصراحه لو يكون فيه مبادله بين دييقو ودزيكو بتكون ضربة معلم .. لكن المشكله لو مبادله وفوقها 20 مليون

بنكون خسرانين !!

والاعور سألوه متى بيكون فيه شي رسمي بالانتقالات .. يقول بعد اسبوع او اقرب !!

---

لا ويقولون دزيكو مسلم

بس انه يصلي صلاة وحده باليوم ( على ذمة احد الشباب )

Rocky Juve · #10 07/06/2010, 01:02 PM

الله يرجكم ، داخل أدوّر أخبار

و أنتم سوالفكم سياسة

و الله من الزحف

يا شباب غلاف التوتوسبورت اليوم ، يقول وصول نيدفيد الجديد !

أما غلاف الكوريرو منسمين

، يقولون إن فيه مبادلة بين اليوفي و ميلان !

هونيتلار وأودو من أجل سيسوكو و بولسين و بعد ذلك مانشيني و كاسيرس !!!!

عسى ما شر !

أما لو تصيرمشكلة و الله

اليوفي و بس · #11 10/06/2010, 01:29 AM

السلام عليكم و رحمة الله و بركاته ..

يا هوووووه وش تعبت و انا أقرأ في الصفحات الي راحت .. الله يقويكم

المهم بدخل معكم في سواليفكم .. و نبدأ بالسياسة

مبارك

الوعد يوم الدين و وقتها عن رب العالمين الي ما أخذ حقه بالدنيا بيآخذه بإذن الله و الا بالله كم

نسبة الشباب الي يقدر يحلم انه يمتلك بيت يضفه هو و زوجته و عياله بدون ما ينكسر ظهره من قروض البنوك

ناصر

الله يقوم الوالده بالسلامه و يكحل عيونها بشوفتك و يردك سالم لأهلك

أيوب

المدرب بعد ما شاف مقاس الكرش حولني من مركز لحاق الكور لـ مشجع رابطة رسميا و

أعتقد اني اقدم مستوى مشرف يليق بسمعة الفريق

_______________

صفقات و كلام و كالعاده اكثر من نصه بيطلع كلام فاضي ..

المهم مثل ما تفضلتوا خط الدفاع + مهاجم محترم تعتبر الأولويات للفريق اما سالفة ايوب الي يبي يمشي بضاعة فريقه علينا اقوله العب على غيرنا

دييغو شكله بيطلع .. للأسف اتمنى يعطى الفرصة لأن موهبه مثله حرام تمر علينا و تمشي كذا

_______________

على فكرة / باركولي تم الانتقال من مدينة الغبار الرياض الى مدينة الغبار الي اقل شوي الاحساء .. طبعا الشركة

حطتها ترقية و دعواتك بالتوفيق و اي واحد يبي يآكل هوا و يقعد يسدد بالسيارة الين يتفل العافية يتواصل معاي

لي عودة بكرة ان شالله و فمان الله

ejeex · #12 07/06/2010, 02:36 AM

لا يعني على الاقل يكون عندنا بدل بطاله ولا ملجئ

الحكومة ما قصرت ... بس فيه حالات استثنائية و ناس ساكتين

اقلها تحط مجمعات سكنية ... العائلة المنكوبة او المنقطعه يجلسون فيها الى ان تشوف لهم الحكومة صرفة

يعني ياخذون اوراقه و يدورون له شغل و يجلسونه ببيت

و بعد فتره اذا حصلوا له شغله تناسبه عطونه مبلغ و قالوا لك شهر تدور لك بيت

اقلها المنكوبين يصرفون اعمارهم

يعطيك العافية عاشق على الرد

forza_JUVE10 · #13 07/06/2010, 02:42 AM

السلام عليكم

الله يعطيكم العافية شباب كفيتو ووفيتو..

سالفة ماركيزيو غريبه و أنا قريت عنها اليوم الصباح بس ما خشت مزاجي صراحة غريب المووضووع!

عموما ديغو خروجه صار يعتمد على العروض داللي بتجيه يعني إن توافقت راح يبيعونه

مع أن ديل نيري قال ماعنده مشكلة مع ديغو راح يلعبه بالخطه حقته بالغضب

وديغو ميت ما يبي يطلع يبي يعطي موسم زيادة عشان يثبت نفسه ويرد على الجميع!!

الكلام كله متعارض ولكن الميركاتو ما خلص و كل شيء راح يبان مستقبلا

أغلبنا يعارض على بيع ديغو وهو قرار خاطئ

ليش ما يجيبون مهاجم وجناح يساند ديغو

و يضبط الدفاع ومن منها يستقر الفريق...

ejeex

القصة والله محزنة للأسف هذي موجوده في الرياض يعني ما خفي أعظم

الحمدلله على النعمة يارب

أبوصلوح يبيلنا مباراة ضد فريقك معايا زميل

اول ما تخلص اختبارات بلغني ممكن ترتب لها نلعب ماتش

forza_JUVE10 · #14 07/06/2010, 02:54 AM

|| goal.com = اليوفي وميلان يتابعان بيرباتـوف ||

|

على الرغم من تأكيدات السير أليكس فيرجسون أن ديتمار بيرباتوف مهاجم مانشيستر سيبقى بالأولد ترافورد حتى الموسم القادم، لكن يبدو أن ذلك ليس بشكل نهائي ومازال مستقبل البلغاري في محل شك.

ففي تقرير نُشر في اليوروسبورت فإن النادي الإنجليزي العملاق يبحث عن طريق لخفض مرتبات اللاعبين بداية من الموسم القادم وربما يكون نجم توتنهام السابق أول ضحايا هذه الخطة أو المنظومة.

في إيطاليا يتأهب كلاً من ميلان ويوفنتوس لمتابعة وضع المهاجم بيرباتوف في سوق الانتقالات، مع بحثهم القوي عن مهاجم يعالج مشكلات خط الهجوم لديهم.

يقدر سعر اللاعب البلغاري الآن بـ22 مليون يورو وهناك عدة أندية من ألمانيا تتابعه كبايرن ميونيخ وشالكة بشكل كبير.

http://www.goal.com/ar/news/2375/%D8%B3%D9%88%D9%82-%D8%A7%D9%84%D8%A7%D9%86%D8%AA%D9%82%D8%A7%D9%84%D8%A7%D8%AA/2010/06/06/1961906/%D9%8A%D9%88%D9%81%D9%86%D8%AA%D9%88%D8%B3-%D9%88%D9%85%D9%8A%D9%84%D8%A7%D9%86-%D9%8A%D8%AA%D8%A7%D8%A8%D8%B9%D8%A7%D9%86-%D8%A8%D9%8A%D8%B1%D8%A8%D8%A7%D8%AA%D9%88%D9%81-%D9%86%D8%AC%D9%85-%D9%85%D8%A7%D9%86%D8%B4%D9%8A%D8%B3%D8%AA%D8%B1-%D9%8A%D9%88%D9%86%D8%A7%D9%8A%D8%AA%D9%8A%D8%AF

forza_JUVE10 · #15 07/06/2010, 03:44 AM

الله يعطيكم العافية شباب

حظيظ
تمنياتي لك بالتوفيق في إمتحانك النهائي بكــره

شباب بحول الله بيكون ميركاتو اليوفي من خلال ما نقرأ

( بونوتشي - موتا - بيبي - كراسيتش - دزيكو )

ننتظر إنهاء صفقة قبل المونديال وهي بيبي شكلها !

وباقي الصفقات تدريجيـا ..

واللـه أعلم