السلام عليكم ورحمة الله وبركاته ..


من مخترع كرة القدم ؟ ..

الجواب أكيد سلطان بن فهد طال عمره ..

وش سبب انجازات وزارة الصحة ؟ ..

الجواب اكيد سلطان بن فهد طال عمره ..

من مخترع الهاتف ؟ ..

الجواب اكيد سلطان بن فهد مافيه شك ..


طيب وش سبب اي اخفاق وطني ؟ ..

الصحافة والاعلام وتخاذل اللاعبين اللاعبين وحكّام ابن همام وأغنية جابر الكاسر :d ..

سلطان بن فهد ماله دخل ابد ..

ولخبطة الدوري والـ 372534 مسابقة للموسم الواحد وقرارات تجي لخاطر " وهذي حبة على راسك " .. هذي كلها خطط مدروسة من قبل توحيد المملكة .. :s2:



انجازات السعودية كلها مثل سهم جحا ..

وجحا عزمه أحد السلاطين .. وجحا يزعم انه احسن قوّيس بديرتهم ..

جابوا له القوس .. وقالوا له يالله .. نبي تشق هالتفاحة نصّين ..

قوّس السهم .. واثره بعيد عن التفاحة .. قال هالتقويسة تقويسة واحد بديرتنا ...

وقوّس الثانية .. ولاصابت .. قال هذي تقويسة ولد خالتي ..

قوّس الثالثة .. وبعد ماصابت .. قال هذي تقويسة فلان ..

جرّبت ميتين تقويسة .. بالاخير ضرب التفاحة .. قال وهذي عاد هي تقويسة جحا :d

هذي هي انجازات المملكة مع سلطان بن فهد ..



دورينا لو تحطون اسمه الدوري السعودي البريطاني بيستمر مثل ماهو عليه ..

قوانين تطلع مع قهوة المغرب .. وقرارات تصنع بالعزايم .. وبعضهم يقومونه بنص الليل يصادق على قرار ..


دورينا لا يمكن بأي حال من الاحوال إنه يتطور الا بتغيير جذري ...

وهالتغيير يبي له مادة .. مهب كم مليون من زين ..



اندية محترفة تلعب بملاعب عمرها عمر أندية ..

اغلب الملاعب اشك انها كانت بالاصل ملاعب .. اتوقع قبل كانوا يزرعون بها جح وحولوها ملعب للحاجة :d ..


منشآت آكل عليها الزمن .. معدّات قديمة كانت تستخدم لتدريب الاغريق ..



نقل تلفزيوني سيء مقارنة بإيرادات الدوري من جماهير واعلانات ..

اعلاميا .. مافيه تحفيز كروي بالبلد .. الا بالجرايد وبعض القنوات ..

مع ان المفروض التحفيز الجماهيري الكروي يكون بإعلانات الشوارع .. والبوردات الالكترونية اللي بكل مكان ..



دورينا المحترف المفروض يلزم الاندية بالتعاقد مع شركات تصميم وتصنيع ملابس ..

الى متى وبعض الاندية تفصّل طقومهم بأماكن من شاكلة البطحاء والخالدية .. !!؟


أكاديميات وملاعب حكومية وبطولات مصغرة ترعاها الشركات .. بدال دوريات الحواري والملاعب الترابية ..

والاندية ترسل مستكشفين ويتابعون اللاعبين والمواهب .. وكلن يتنقى على كيفه :d



اشياء كثيرة تبي لها مادة .. علشان يطلع الدوري ( محترف ) وجماهيري ..

لكن المشكلة في اللي مستلمين مناصب ادارية بالاتحاد انهم يحبون الدراهم ..


فدوري ( زين ) مجرد لخبطة لعقود الاندية .. واضافة مشاكل النوادي في غنى عنها ..

مقارنة بعرض زين اللي مايواكب قوة الدوري عندنا .. يعني بالعربي ماراح يسوي شي للأندية .. يمكن يسوي لناس ثانية ..




## موبايلي --|


موضوع تعليق موبايلي لدفعتها السنوية .. شي ضد موبايلي وضد مصلحتها ..

يعني فريق شريك لك .. وش دخلك بزين ؟؟ ..

مسألة الاعلان على قمصان اللاعبين مهب شي مهم مقارنة ان موبايلي يدعمها الجمهور الهلال ...

حتى لو ان موبايلي ماحطت شعارها على الطقم .. هي مسألة شراكة يكسب منها الطرفين ..

ولا اشوف اي تعارض لو حطوا شعار زين جنب شعار المحترفين !!! ..

خاصة ان الشعار بيكون صغير .. وعلى كتف اللاعب .. يعني وين المشكلة !! ..


موبايلي استغلت اسم الهلال .. والهلال تنازل عن عرض الاتصالات ورفض عرضهم بالمرة الثانية مع انه كان اكبر ..

لمين اشتد عود الشركة بالمملكة .. وصارت عاد تشرّط ..


اي شخص بالمملكة .. يدري ان موبايلي شريكة الهلال .. يعني وش الفايدة انهم يعترضون على زين ؟ ..

يعني الغاية من العقد بين الهلال وموبايلي تمّت .. والشعار هذاه ببطون اللاعبين :d ..

وارباح موبايلي واصلتها سواء حطت زين شعاره على قميص النادي او ماحطته


**

اتمنى من ادارة الهلال البحث عن شريك ..

اذا كانت موبايلي تعتبر الهلال مجرّد ( لوحة إعلانية ) حنا في غنى عنها ..


أتمنى اني وفّقت باللي طرحت ..

لكم مني جزيل الشكر على القراءة .. ابوساري :d

مشكور على الطرح الرائع كذا سلطان بن فهد يوخر نفسه في كل شي الى المدح موجوووووووووووووووود