اخوي ابو عبدلله ..

اتكلـم عن نفسي .. حالياً مادخل المطبخ ..ولاأفقه في الطبخ شي .. لأسباب وجود العاملات وامي .. والوجبات السريعه

بس قبل ماتزوج اي بمعنى فترة الخطوبه .. صعبه أروح لبيت الرجال وانـا ماعرف شي .. فشيله..
وطبيعي راح اتعلم في بيت اهلي واجرب عليهم قبل ماجرب على ولد الناس وكتاب الطبخ قبل ملابسي في الشنطه وهذا حق من حقوق الرجل ..

إذا أنـا ماعطيته أبسط حقوقه .. بتأكيد أكون زوجه مقصره بحقه ..
والواحد لازم يخجل من نفسه اذا كل مره أكل من برى ,, (لصبر حدود )
و من الأفضل أن أبدا انا واتعلم عشان عيونه


في الاخير الله يرزقك الزوجه الصالحه .. الي تسعدك وتسعدها ...

أهلاً وسهلاً حبيب ألبي أبو عبدالله
الله يسعدك ويوسع صدرك قل آمين
تعجبني فيك روح الفكاهة

بس يا ترى لو كان هالسيناريو والحوار .. مع زوجة شامية مو سعودية وش راح يكون؟
خلني أكمل الحرش مع السعوديات وأعطيك هالمعلومة القيّمة ..
في مسابقة أجريت هنا في المجلس العام عن الطبخ ..
90% من المتشاركات شاركن بأطباق حلا
يعني هذا حدّهن وهذي هي قدرتهن
الله يعين أزواجهن على الفطور والغداء والعشاء .. كله بيصير حلا

أعيد وأكرر .. العوض يا شبابنا في الجنة مع الحور العين

ملاحظة:
( هذا الرد أتاني من البريد .. وهو يمثل وجهة نظر كاتبه فقط , و لا يمثل بأي حال من الأحوال وجهة نظر المشاغب ولا إدارة الموقع و مسؤوليه. )

يعطيك العافية ابو عبدالله ..

إقتباس اقول إعادة مباراة مصر وايطاليا امس ماشفنا المباراة انا كنت اهلي واهلي ماعندهمART

ماتدري أن المباريات تجي فيها لقطات تغث بعض الحريم .. لا بعد إيطاليا

إقتباس سؤال للرجال فقط : هل تتقبل رفض زوجتك دخول المطبخ لأسباب غير مقنعه .. أجب بنعم أو لا مع بيان الحلول التي ستتخذها في حال كانت اجابتك لا والتعليل اذا كانت اجابتك نعم

بصراحة .. أنا لا أقبل .. ويجب أن تعلم المرأة أن مثل مالها حقوق فأن عليها واجبات
والمطبخ يعتبر من تلك الواجبات التي يجب أن تقوم بها المرأة ..


وبعدين يابوعبدالله جالس تسوق للمطعم اللى تبي تفتحه ..


تقبل تحياتي والله يرزقك بنت الحلال

إقتباس الرسالة الأصلية كتبت بواسطة متابعة بجنون وأنت وشدراك انها بس كيكه لا نسوي فتوش وكبسه وبيتزا وكبه وغيرها ...

مدام هذا الهم شايله من ألحين أجل مالك ألا تدعي إن [ربي يرزقك بوحده نَفَسْهَاَ حلو بالطبخ ]

//

وبالنسبة للمسابقة اللي أزعجونا فيها الأعضاء
ترى البنات دققوا فيها على الشكل أكثر من الطبخة نفسها
ويحسبون الجائزة على التنسيق والفن في تحضير الأكل
ما دروا إن القائمين على المسابقة مشـفّـح
وما برد قلبهم غير كبسة هلالي موت

//

المهم بغيت أذكّركم بمكرونة البيتزا اللي سويتها
لبى قلبي أنا ما أحب الطبخ
بس إذا طبخت .. طبخت
يعني أجيب لك طعم ونكهة تحلم فيها أنت وياه

//

بس في النهاية ومن رأيي المتواضع جداً
أنا مو بس أبي شغالة إذا تزوجت
لا ألحين فيه تطورات
لازم شغالة للبيت
ومُربية للبيبي
وطبّاخة تخصص شغل نظيف
وطبعاً مو أي جنسية لازم من المغرب العربي

//

القحماني .. إحلـــم محد رادك
ويا رب يحقق لك كل ما تتمنى ويرزقك بالزوجة الصالحة ويسخّرك لها ويسخّرها لك ,
عوااااااافي ,

إقتباس سؤال للرجال فقط : هل تتقبل رفض زوجتك دخول المطبخ لأسباب غير مقنعه .. أجب بنعم أو لا مع بيان الحلول التي ستتخذها في حال كانت اجابتك لا والتعليل اذا كانت اجابتك نعم

اصلا الحمدلله ربي عطاني ميزه اني اكره اكل المطاعم من يوم انا صغير
يعني الله يعينها الي بتزوجها
عز الله انها بتنكرف في المطبخ لين تخرج عيونها
لو رفضت تطبخ تزوجت عليها
والله من جد لا تفكرني امزح

هلا وسهلا أخوي القحماني ..

موضوع ما يصلح لي صراحة بتعلم الطبخ وبعدين بدخل موضوعك

::
::

إقتباس الرسالة الأصلية كتبت بواسطة algohmani بالنسبة للخدامه انا من رأيي اذا تبغا تكره حرمتك بالخدامات اعط الخدامه وجه زائد واقعد اضحك وسولف معها وشوف كيف تطيرها وتقولك ماعاد نبغا خدامات في بيتنا اوعى تسويها وتخرب بقعه

آآآآآآآآآخ بس
شف أنا لو زوجي يسوي فيني كذا .. لا أطلع من البيت وأخليه يقابلها

يالله ورينا شلون عاجبتك هي وجهها
يعني وقفت عشان سالفة شغالة
يعني تسوي مشاااااااكل عشان بس في شغالة << خشت جو



** عندي سؤال..:

طيب ليه بابا ما سوى مشاكل مع ماما بداية زواجهم عشان الشغالة .. هذا وهم
زمان تو العالم يعرفون شيء اسمه خدم ..؟




المهم المهم .. أنا ما عندي مشكلة أطبخ الغداء ( إذا ما كنت موظفة ) , بس

بالويك إند لازم أذوق العشاء من يدينه <<< اما رجال يطبخ لزوجته عشاء كثري منها كثري


الصراحة يا أخوي .. هو كل شيء مقدور عليه في البيت الا المطبخ أكرهه ما أحبه << قريت يا زوجها؟


::
::

الله يعطيك العافية أخوي ,
ويعطيك الي تتمنى يارب

السلام عليكم ورحمة الله وبركاته

هلا بالقحماني

شكل العطاله خلتك تفتح عيون الشباب علينا

بصراحة اشوف الطبخ شي ضروري
وش هالمعده الي بتتحمل اكل يوميا من المطعم وانا ماحب غداء المطاعم مو سناعه فيني لاني ماحب اطبخ

حتى لو كنت ماطبخ ببيت اهلي اشوف اني مجبورة اطبخ بعدين طبعا مو غصب واتوقع مو واجب علي بعد
ولكن بالعقل يعني من بيطبخ غيري
خدامة مستحيل اقبل انها تشاركني بداية حياتي وتقيد حريتي والحمد لله انا ماتعودت على اكل خدامات حتى في بيتنا امي الله يطول بعمرها تطبخ

وكل شي يتسهل والانسان ماطلع من بطن امه متعلم اسبوع شهر وبتصيرين تتقنين الطبخ
ويالشباب ترا حنا مو مانطبخ عجز وكسل او مانعرف لان سهل نتعلم
بس المطبخ يعتبر هواية وعلى قولة الحريم هذي لها نفس بالطبخ
يعني مشكلتنا مانحب الطبخ بس لاصار غصب علينا بنحبه اكيد
والي يتطنزون بالحلى ترا بعض الحلويات صعبة ودي اطبخ طبخة دسمة ولااسوي حلى لانه مو مضمون انه يضبط ودخلي وطلعي وذوبي واخلطي
سالفه يعني

الشي الي ماهضمته اني بحوس كم ساعه وتقطيع وتحمير والخ وبالنهاية الي بياكلة شخص واحد احس مايسوى تعبي

\

/
يعطيك العافية والله يرزقك وحده تحب الطبخ
والله يرزقني واحد مايحب الاكل

/
/
/

هلا والله القحماني ..

والله امي هالايــام مدري شفيها تبيني اتعلم اطبخ ..
المشكله مو بالطبخ ..المشكله بالانسانه اللي بتطبخ كسوله وزوله
وش ورانـا لاحقين ع الطبخ والمسؤوليه
الحين اجازه بس سهر ونوم

طبعا هالشي مايمنع انا ندخل المطبخ ونجرب حضنا
انا اختي ماكانت تعرف تطبخ لكن يـوم تزوجت بدت شوي شوي تتعلم
لين صارت الحين ماشالله عليها
تنافس امي بالطبخ

يعني مو شرط ان ماكانت تطبخ في بيت اهلها ماتطبخ ببيت زوجـــها ..
الوحده لين راحت بيت زوجها تتسنع غصب
هناكـ لا مجال للدلع بهالامور

رجال = كبسه

اما الشغاله مثل ماقالت هنونو
بعدين اذا صار عندنا عيال وصارت البيت شغله كثير ..
هنا بجيب الشغاله ..

الله يعطيك العافيه القحماني على هالطله الحلوة

ربطـه و شبـاصه
شكرا على المداخله .. مع اني معترض على تغسيل الرجال للصحون لكن يالله تظل وجهة نظرك
تحياتي وتقديري اختي
لين شيخه الزين
عين العقل اختي سطرين عن مجلدات الف شكر على المرور .. تحياتي وتقديري
ProudToBeSaudi
اتفق معك ياسيدي ان التربية والأم بالذات هي السبب لانها ماتحاول تعد بنتها لأن تكون
زوجه صالحه وناجحه فتتزوج وحده تلقاها عندها استعداد تدخل المطبخ بس ماتعرف وهذي
بيني وبينك تنرحم بس اللي تعرف وتكذب تقول انا ماعرف هنا المشكلة ..

الأمبراطور
الف شكر على المرور يالغالي .. نورت الموضوع والله يسمع منك يلغالي تحياتي وتقديري
متابعة بجنون
ماشاء الله رد مميز وكبير الف شكر اختي على المرور .. تحياتي وتقديري
شـــذى
الظاهر اني افكر اسوي مطعم .. شكر على الرد والله يحفظ امك بالفعل هذه التوجيهات هي
ماتحتاج اليه كل بنت مقبله على الزواج نصائح في محلها .. الف شكر على المرور .. تحياتي
وتقديري
ماجد مقبل
هلا والله حبي .. نورت الموضوع يالغالي .. وبعدين اثاريك مجرم وانا مادري صار بتتعشا وتخليها
ههههههههههه اصلا بتدق عليك وتقول جبلي عشا معاك .. وماسويت شيء لكن جبلها لوزين وعصير
قلها المطاعم كلها مقفله
رجل من عالم آخر
شكلك متعقد من المصادر بالجمهور .. حياك يالغالي ونورت الموضوع ..
مواصل من عام 1413هـ
حياك مواصل وزين رجعت يوزرك زي ماكان .. مشكلة اذا البنات مايدلون المطابخ وزي ماقلت
كل شغلهم كيكات وحلويات .. عموما انا مع اقامة دورات تأهلية للمقبلين على الزواج تكون
بمثابة دورات لمعرفة حقوق كل واحد منهم على الثاني وكذلك تكون دوره ثقافية لعلها تكون سبب
في تفادي العديد من المشكلات الزوجيه .
بالنسبة للكروش النسائية .. هذي مالها حل ياتلقى وحده دبه ياوحده نحيفه مره .. الرياضه مهمه
والكبسات لها دور .. والحلويات بعد اللي ياكلونها ليل ونهار ..
الهاديو
وخر هناك ماني براد عليك خخخخخخخخخ نورت الموضوع واتفق معك كثيرا بأن الأسلوب
السنع سيجعل المرأه تدخل ولو تدريجيا .. منور ياقلبي الموضوع ..
الضحى
نورت الموضوع وكلامك في غاية الاهمية من الجميل ان تقرا كل بنت ردك .. وكم نتمنى
ان نرى امهات يحرصن على اعداد بناتهن الاعداد النموذجي للحياة الزوجية ..
رائدة الزعيم
هلابك رائده منوره الموضوع والله يستر لايصير وضعي نفس وضع ولد خالك وتلاقيني بالمطبخ
ماسك الصابون وشغال بالصحون تنظيف خخخخ .. نورت الموضوع

نـــــــ15ــــــمر
كانك تقرا افكار موضوعي القادم .. نورت الموضوع يالغالي

اليوم صحيت بدري وفتحت النت وتكيت هنا اتصفح آخر مستجدات الزعيم

الا وام العيال جايه تسألني ..وش اللي مصحيك بدري !!!!...
من الرهبه بغيت اتغطى بالبطانيه وانام بس انها قد عرفت اني صاحي فما عاد ينفع التمثيل خخخخ

المهم ...
انا ما افطرت ولا تقهويت قهوة الصبح ....
قالت اسوي لك قهوه ... قلت لها بكيفك اذا بتسوين يا ام شذا فانتي كريمه وانا استاهل واذا ما بتسوين فانا مُقدر النوم اللي في عيونك

ما قصرت راحت وصلحت لي قهوه وحليب وشاهي وجات ....

خلصنا من القهوه والتمر والحليب والعلوم ذي ...
قالت اسوي لك فطور ..؟
قلت انا ... والله يا ام شذا ما ودي اتعبك...روحي نامي خلاص انا بدبر عمري
راحت وضنيت اني بجلس من غير فطور ...

ولكن ام شذا راحت المطبخ وصلحت لي هذاك الفطور اللي يحبه القلب ... وفاجئتني بدخولها علي والسفره والصحن معها

فانا اشوف ان لكل شخص ولكل زوجين طريقه في المعامله فيما بينهم
وهم اكثر الناس معرفه بطريقة تعاملهم مع بعضهم بالشكل اللي يخلي حياتهم حلوه

انا مستحيل اجبرها على فعل اشياء تخصني
ولكني اعرف جيداً كيف اتعامل معها وكيف اخليها تلبي رغباتي بنفسيه مرتاحه

سؤال للرجال فقط : هل تتقبل رفض زوجتك دخول المطبخ لأسباب غير مقنعه .. أجب بنعم أو لا مع بيان الحلول التي ستتخذها في حال كانت اجابتك لا والتعليل اذا كانت اجابتك نعم

الجواب اكيد لا الواحد (خاصةاللي جرب العزوبية) مايفكر بالزواج الا عشان يرجع يلقى الاكل جاهز مايجلس يتنظر الديلفري

وبالنسبه للحلول مع اني ان شاء ماانا مواجه مثل هالامر (اتوقع الوالدة الله يطول عمرها تعرف تختار) فالحل هو زوجة ثانية سورية وخل الرفلا ماتدخل المطبخ