أيه ( هلاااااااااااااااالي ) وأبخش بعينك !!
 

لي صديق مقدّم بوزارة الداخلية ومن طلاّب أمريكا .. وتراي أقدر أقول السالفة بدون ما أقول لكم إنه من طلاب أمريكا وبدون ما أعلمكم إنه ضابط !! ولا يتغير أي شي بالقصة بس تعرفون ( كلن يهايط هالوقت) .. قلت يا ولد وأنا وش زودي !! المهم بحياتي كلها ما قد شفت كبر جرمه وجسمه !! لدرجة كل ما جاء يترقى ويبي يعلقون له رتبة .. جابو كرسي بجنب سيقانه ورقوا لم كتوفه ولبسوه أياها !!

وأذكر مرة من المرات رايحين أنا وأياه لم مباراة وهو متسند على الشبك اللي بين الجمهور والملعب و جوه ثلاث عساكر بغوا يفرشونه يحسبونه يحاول يطب لأن راسه أرفع من الشبك !! وفهمناهم إن يدينه طوال شد بلد .. وأشوى خلوّه !!
المهم تواعدنا أنا وأياه يمرنـّي بمباراة أم صلال الأخيرة ونروح للملعب !! يوم جت الساعة 4 ونص إلا ويدق جوالي .. وأناظر .. إلا هذا ( الكوالا يتصل بك ) مخزنه الكوالا لأن كلهم يدينهم طوال !!


لقطت شماغي وعقالي .. وطلعت !! إلا والله هاللي متكـّي بالـ(إيكو) !! وأناظر وأفرّك عيوني !! يوم شفته تسذا دريت إن الهلال يبي ينهزم !!
قلت له غربك الله من غرابيله وشلون دخلت !! وأثره فعلا من البطن وأنت طالع يعني صدره ويدينه والكتوف و راسه طالعات مع الدريشة صايرن تسنه رسمة كاركتير !! لا ومن زين الطبايع جايبن معه ولده .. عاد ذاك (مشروع كوالا صغيّر) .. قلت حسبي الله عليكم وين هو به أركب !! عاد هو و ولده مالين الغمارة .. قالوا لي : تصرّف !! المهم وأنا أغمض وأسميّ و أطب معهم !!


قال يا ابن الحلال الطريق زحمة وحوسة قلت نجي على سيارة الولد أخف و أصغر !! قلت الحين ذا كله شاري له إيكو !! ذا المفروض تشتري له (بليزر قديم ) وإلا ذاك الجمس (البرازيلي) وتبلطّ له الغمارة وتحط بها كنب يالله تكفيه !! أما إيكو اسمح لي !! إلا تسان نظامك تلفيق في تلفيق تسنك تغيرات الحسيني فهذا شي راجع لك !!


-------------------------------



السلام عليكم ورحمة الله وبركاته .. هلا والله ومرحبا بهالوجيه السفرة !! قبل كل شي ودي أقول لكم : والله يا أنا مشتاق لكم وبي خرمة لكم بشكل ما تتخيلونه ويا حبي لقلوبكم !! وشكر خاص لكل من سأل أو وصّل رسالة .. أو تواصل معي في غيابي ..


وما أقول إلا يالله لك الحمد والشكر بس على هالأجواء اللي يالله من فضلك !! لا ويقولون كان الآباء والأجداد يقدمون إلى مكة للحج والعمرة ممتطين جمالهم و إبلهم !! فأحب أقول لهم تسان في أم جمالهم وإبلهم خير .. خلوها تعتمر وإلا تحج بهالحر !! أول مرة أحس إن شحمة أذني باقي شوي وتلمس كتفي !!


و ترانا بلحالنا اللي ما عندنا إلا ثلاث فصول :/
( صيف ، يكتم خشمك الين تتسفط ملامحك ) !!
ثم ( فصل العج ) !!
ثم (شتاء ، ما يمديك تحس إنك آدمي وعندكم مطر إلا هو قاضي ) !!
ثم (فصل العج مرة ثانية ) !!
أما مسألة (ربيع وخريف وتساقط أوراق الشجر ) فهذي مش خشتك !!


فتخيل إنك مع هالأجواء اللي تدبل التسبد .. و مشخص بـ(إيكو) و نعالك حاطهن بدرج الإستمارة لأن مالك محل !! ورايحن تبي تحظر مباراة الزعيم اللي عن طريقها نحقق (جزء) من طموحاتنا !!
يالله تلقى موقف !!
وتشيل هم الطلعة قبل تدخل !!
و تدري إن ( سول بيلعب أساسي وبالتشكيلة ) !!
وتدري إن أم صلال بيلعبون بطريقة (11-0-0) مابقى إلا (ابن فطيس والشبرمي) مالعبوهم أظهره !!

وتدخل وتتفاجيء إننا مصرّين على طريقة (5-4-1) و تقول يا ابن الحلال المدربين أبخص !!
و ولد خويّك غث أمكم !! (أبي موية) (أبي موية) !! اللي يشوفه يقول ضايعين بالربع الخالي مهوب تسننا بإستاد الملك فهد !! وبراطمك شهب من هالسموم والحر !! ومعرّق اللي يشوفك يقول لاعب محور بدال عزيز !! و تخيل تأخذ المباراة فعلا مسارها السلبي .. وتنتهي بضربات الحظ وتودع البطولة ؟ و المباراة بأرضك وبين جمهورك !! و قدام فريق متواضع ولا يقارن برديفك !!

-------------------------------

وش ردة الفعل المتوقعة منك ؟
ومن الجمهور الهلالي ؟
ومن صانع القرار في البيت الهلالي؟


هل سارعنا وعجلنــّا البحث عن كبش فداء لنحمله (كامل المسؤولية) ؟
هل إنقسمنا لأحزاب وجماعات !! وطبقنا مبدأ : شفتوا !! وقايلن لكم !! وبدأت تصفية الحسابات الشخصية !!
هل سلكنا أيسر الطرق وأسهلها .. ولزقنــّاها بظهر (التحكيم) !!
هل لجأنا للقرارات الارتجالية الموبوءة التي طالما عانى منها وسطنا الرياضي حينما يُلجأ لها بدعوى الحزم وفرض السلطة والجبروت !!
هل كممنــّا أفواه جماهيرنا لتفريغ غيظهم السيكولوجي الطبيعي جدا .. طالما لم يرتكبوا محظورا !!


وهنا سر (زعامتنا ) جيلا بعد جيل !! وكابر ٌ يورثـّه لكابر !! وهنا حد السيف الذي لا يقبل نقاشاً ولا يصبو لتبرير !! فـ نحن بشر و مخلوقات لا تملك قوى خارقة !! يصّرفها القدر والقضاء الربـــّاني فتجثو خانعة منقادة لبارئها بكل طمأنينة ورضا !! إن انتصرنا فتوفيق ٌ وإلهام وإن خبت نارنا فقبول ٌ وإذعان !! وإن خللا ً فنهوض ٌ وإصلاح !!
لا ندسّ رؤوسنا بالتراب (صاغرين) !! وحاشى (الزعيم) ذلا !!
و لا نكابر ( مختالين مزهويّن ) !! وحاشى (الزعيم) كبرا ً !!
ولا نتوارى (خجلين مرجفين ) !! وحاشى (الزعيم) وجلا !!
بل ( صاعقات برق ٍ ) تقض مضاجعكم !! و ( راجمات رعد ) تأذي آذانكم !!
إن أوُصد باب ٌ ، فقد سلكنا قبلها ألف باب ٍ ولنا في الغد ِ أبواب !!
سيشفى ( الزعيم ) وسيحقن أعينكم ( ماءا أزرقا ) لا تطبـبـّه يد ُ (التاريخ) !!
و لا يغرنكم هدوء عواصفنا .. فستتلوها ( أعاصير ٌ تجتث مكائدكم ) !!


-------------------------------


هلالي وأبخش بعينك !!


يا حليلهم !! بمجرد إضاعة ضربة الجزاء الأخيرة وخروجنا من آسيا !! خرجت (ضبـانهم) و (عقاربهم) و ( ديبانهم) من جحورها - عقربا عقربا !! وضبا ً ضبا ً مستبشرين بكبوة (زعيمهم) !! ومتضاحكين فرحين يقرعون طبول أقلامهم و يرقصوا على تفاهات أحلامهم !!
و ( الحدأة ) تغازل (غرابا ً لم يردعه كبر سنه وشيب ظهره ) !! والببغاوات تردد نعيقهم وفحيحهم !! والكل قد خلع عباءة حياءه ، التي كانت تواري سوءة فكره و نتانة لفظه !!
وفتات العفن تلتقطه مناقير (صيصانهم) !! صوصا ً يركل صوصا ً يتسابقون لمائدة ( الإسفاف ) و طاولة (التمادي) !!
تشمئز الأنوف والآذان من نشاز حناجرهم !! وقذارة أقوالهم !!

وما دروا إننا (نتربع على عرش ٍ نحن له زعيم) سيطول ليلهم حتى يدركوا (قمته) !! و ستخور قواهم حتى يبلغوا (غايته) !! و سيهلكوا ولم تلفح أعمدة عظمته عيونهم الغابرة !!
فـ هناك بون ٌ يصعب ردمه !! وفجوة يستحيل رتقها !!

هلا مغّاط ..

وينك يا رجل .. انت ما تطلع الا بالمشاكل :D أمزح :D

المهم يالغالي .. هذي ضريبة إنك زعيم ..
ما دمت زعيم لازم تحصّل على كل بطولة وحتى لو تطلع من بطولة ودية تأكد إن الجميع بيتشمّت ..

أما لو جينا لواقع الهلال فالهلال هذا الموسم مرّت عليه ظروف الجميع يعرفها ..

ودائماً خروجنا من البطولات يكون بظروف لم يرتب لها ..

اللي أبغى أوصل له ليش كإدارة ولاعبين وجمهور إننا نهيأ أنفسنا قبل بداية كل موسم للظروف اللي يمكن تصير ..

لا تقول لي نجيب مدرب إحتياطي لأني متوقع مثل هالكلام من كل من تكلمت معه ..

ولكن اللي أقصده إن أقوى ظرف مرّ علينا هو إبعاد كوزمين ..

وكوزمين كان ناجح مع الفريق لأنه يعرف الــ 11 لاعباً الأساسيين ويعرف يوظّف اللاعبين الباقيين بشكل عجيب ..

وعلشان توظف البقية من اللاعبين لازم يكون عندك مدرب متمرس ويعرفهم وعاشرهم علشان يعرف يوظفهم صح ..

جبنا ليكنز ولا عرف يتصرف لأن لاعبي الهلال الإحتياطيين خصوصاً لهم أسرار لا يعرفها إلا كوزمين .. والحسيني مدرب لياقة لا نلومه أبداً ..

الفكرة بإختصار إذا أنت تبغى تستمر بزعامتك لازم يكون عندك بالدكّة خمسة نجوم على الأقل لهم ثقلهم الفني ..

ياخي بالفترة الذهبية للهلال أذكر مرة كان إحتياط الهلال فيه الثنيان وسامي والغشيان

وغير كذا لازم يكون الهلال ما يعتمد على مدرب وهالشيء ما يتحقق الا إذا كان عندك ناس بالفريق مستوياتهم عالية جداً وعددهم أكثر من 22 لاعب ..

أدري إني جالس أسولف على هالفجر بس خذ اللي تبيه واللي ما تبيه أرميه بالبحر :D

شكراً مغاط ولا تحرمنا كتاباتك

صراحـه كلام واقعـــــــــــي 100% وانا جربتـه

واللـه أن فرحـة النصراويين بخروجنا من بطولة هم ( يحلمون ) يشاركون فيـها حتى لو بالقرعـه .. أكثر من فرحتـهم بفريقهم



..

كلام في غايـة الروعه ولو أني ماقريتـه زين توخـرت على الدوام .. بقراهـ وراجع لك يا بطل .

نعم نفتخر وبقوة بهلاليتنا حتى لو يهبط الهلال

لكن لا نرضى بالواقع الحالي أبداً


مقال جميل وتعبير رائع


أتمنى أن تذكر رأيك بخصوص الفريق وماهي مشكلته...

احلى شي بموضوعك الصوص تلاحق بعضها وشحمة اذنك وصلت كتفك هههههه
قسم موتني ضحك

يعطيك العافيه مغاط جعلنا ماننحرم من كتاباتك وقصصك المرحه
‏ على فكره من كثر ماوصفت الرجال تخيلته غوريلا حشى هذا مو بشر هع

اختكم ميمي

مع الزعيم في السراء والضرااااء

يا خوي ارحم خفة الدم ..
شوي شوي تكفى
اخاف تطير علينا

من طول الغيبات جاب الغنايم


هلابك اخوي مغاط بعد الغيبه وهاردلك على الهزيمه

وبصراحه موضووعك رائع جدا كباقي مواضيعك الرائعه ماشاء الله عليك




شاكر لك على الموضوع وانا بصراحه من المعجبين والمتابعين لمواضيعك

فلا تبخل علينا بمواضيعك الزينه ولا تطيل الغيبه مره ثانيه

تحياتي لك..

:d:d:d
على الجرح..
وهذي ضريبة الزعامه..

أنا عن نفسي دابلن تسبدي كمن صوص :s2:
ودك من يمصّع أرقابهم ..

ماجالهم حس الا بآخر مباراة لزعيمهم ..


مغـــــــاط :smilie47:..

الله يوسّع صدرك بالإيمان وطاعة الرحمن
مثل ماوسّعت صدري :rose:

وتدري إن أم صلال بيلعبون بطريقة (11-0-0) مابقى إلا (ابن فطيس والشبرمي) مالعبوهم أظهره !!</B>
ههههههههههههههههههههههههه

أنا أشهد مافيهم واحد قال بهاجم ههه ..

الله يصبحك بالخير على موضوعك الرايق وياليت أقول ياليت نشوف منك مواضيع آخرى

لان كتاباتك تحكي واقع يومنا التعيس للاسف !.
تقبل تحياتي ..

ههههههههههههههههههههههههههههههههههههههههههههههههههههههه والله كلامك مافهمت منه شيء