[ الجمهور الهلالي.. لا يعجبكم العجب.. ولا الصيام برجب .. ] - نادي الهلال السعودي - شبكة الزعيم

b.a.z · #1 10/05/2009, 10:18 AM

السلام عليكم ورحمة الله وبركاته
أكتب موضوعي هذا والله من الحرقة إللي أشوف من بعض الجمهور الهلالي إللي قام يتكلم على اللاعبين بسبب أو

بدون سبب .. ألتمس منكم العذر سوف يكون كلامي عامي أسهل وأحسن طريقة للتواصل بها

أنا اشوف هالأيام كثر الكلام عن اللاعب الكبير والعظيم والأستاذ والفيلسوف والموهوب والشخص المهذب والمحترم

حامل الرقم 10 محمد الشلهوب الذي صال وجال بالمسطحات الخضراء الذي قام يسحب باللاعبين واللي جعل المدربين

يحتارون كيف يوقفون خطورة هاللاعب المهوب.. أنا والله فرحت كثير يوم شارك اللاعب بمبارة الأخيرة ويا سابا باتري

لأني من الناس إللي أستمتع بلعب محمد الشلهوب ودائما مايكون هو لاعب الحسم والدليل مباراة النصر الذهاب من

هو صاحب تسديدة الفوال هو محمد إللي جا ويلي وكملها بالمرمى.. هذا وهو كان بعيد عن المباريات وحساسيتها أجل

لو ماخذ فرصتة الكاملة من بداية الموسم كان الشهلوب بيطلع في قمة الروعة ويتشكل لنا بطراز اللاعب الكبير ويرجع

لنا الشهلوب إللي من ثلاث مواسم يوم طلع الاتحاد من ربع النهائي إللي خطف الكورة من أحمد الدوخي وسجل

الهدف.. إللي يتكلم عن الشلهوب ويطالب بتنسيقه أنا أقوله والله ماتفهم ولا تعرف بالكورة شي لأن محمد الشلهوب..

الحسيني تكلم عنه كلاعب كبير وأيضا كوزمين تكلم عنه كلاعب كبير ولكن تكتيك كوزمين لا يتوافق مع محمد وقال

كوزمين أن الشلهوب يحتاجه كل مدرب.. أيضا الشلهوب يومه مع باكيتا وش سوا بالأندية الكل كان يردد محمد الشلهوب

بكل بمبارة.. اليوم البعض يطالب برحيله والله كفو ياجمهور الزعيم تخليتوا عن اللاعب بكل سهولة تخيل لو ينحط

محمد على قائمة الانتقال تدري وش راح يصير والله جميع الأندية تطلب وده للظفر بخدمات اللاعب الممتمع بأدائه..

يامن تطالب برحيل محمد الشلهوب أرجع إلى إنجازات اللاعب وشف وش سوى للنادي ومن كان له يد العون بعد الله في

أغلب البطولات سوف تجد وراءها محمد الشلهوب..

بس غالبية الجمهور الهلالي جالس على الموقع ولا يفهم بالكورة وحطوا له موقع لتواصل مع نجوم الزعيم وجلس يكتب

والله شيلوا هاللاعب وجيبوا هاللاعب وإذا قلت له تعال للمعلب قال أنا فاضي لهم زين مني أني أشوفها على التلفزيون

ولا إذا جا صار عالة على اللعيبة من جد ياجلس يلعن ولا طلع مبكر ولا احترم مشاعر اللاعبين.. تراهم بشر مثل ماأنت

بشر يحسون ويتألمون مثلك لا تحسب أنهم جايين من كوكب ثاني غير كوكبنا..

وأنا أتمنى أن محمد الشلهوب يلعب بمبارة الهلال والشباب الجاية وأتمنى من الحسيني يخليه يشارك من بداية

المباراة حتى لو خسرنا فدا موطى رجلينه بس حاس أنه راح يكون له كلمة وراح يسوي في وليد عبدالله العجايب مثل

ماسوى في سعيد الحربي وخلاه يحلم فيه كل ليله لما شالوه وودوه إلى الحزم..

يا من تطالب برحيل محمد وتقول أنه ماعاد راح ينفع الفريق أنا أقولك بعد أنت ماراح تنفع الزعيم وأنت ناوي على خراب

النادي بس الحمدالله أن فيه الإداري الكبير سامي الجابر ويعرف إمكانيات محمد الشلهوب ولا لو القرار بيد الجمهور كان ضعنا من زمان..

وأنا أطالب من المشرفين إللي يتكلمون على محمد الشلهوب ويطالبون برحيله يحذفونه على طول من الموقع

والله أحبك يا محمد الشلهوب في الله.. والله أحبك وربي يشهد على ذلك

وتقبلوا موضوعي بخيره وشره.. وإللي ماعجبه موضوعي مهوب لازم يرد وإللي يشاركني الرأي فله جزيل شكري