جمهور الهلال قبل كل مباراة "والله نوريهم، بنكتسحهم، وخلهم يشوفون منهو الزعيم".
بعد المباراة "يا جمهور المقاهي، أصلاً ياسر بغى الكرت لأنه ضاق صدره لأنكم ما حضرتم، وإلا كان يقدر يسجل، ثم لحد يجيب طاري اللعيبة ولا الإدارة ولا الجهاز الفني".

مادري لمتى نضحك على أنفسنا، الهلال يعاني من بداية الموسم، حتى بوجود كوزمن وأكثر من مباراة تثبت هالشيء، منها مباراتين أمام الشباب، لكن اللي كان ممشينا هالموسم هو كوزمن، مع أني واثق أنه حتى بوجوده فوزنا بالدوري صعب إذا كنا بنلعب بسذاجة قدام الشباب والاتحاد وهالفرق.

أنا مادري وين المشكلة بالضبط، لكن من اللي أشوفه، واضح أن طريقة لعب الفريق الحالية ما توديه لمكان ... سول يرفعها لياسر، لكن ما توصل، يلحقها التايب، اللي بدوره يرفعها، لكن ما توصل ... وهكذا اقعد دور عن ياسر، وخل خصمك يسجل عليك أشكال وأنواع.

والله لو أجيب تيس، وسألته عن الطريقة الوحيدة اللي ممكن نوقف فيها الهلال، بيقول "امسك مهاجمهم الوحيد!".

وبخصوص استقبلنا للعديد من الأهداف بعد كوزمن فهي مو المشكلة، فان دار سار من بعد 14 مباراة نظيفة، بدأ يستقبل مادري كم، يعني باختصار "لما فك ما صك"، زي الدعيع يعني ... لكن الفرق أن ما عندهم مشكلة بالتهديف زي مشكلتنا.

وحنا ممكن نسجل لو أننا ما نقعد نتفلسف، لكن اللي يقهر أننا حتى لو سجلنا، أقص ايدي لو استمرينا بالهجوم!

نسويها قدام فرق المؤخرة حتى بالدوري، يمكن الاستثناء هي مباراة الأهلي الإماراتي في الآسيوية، لكن فيما عدا هذا أسلوبنا ما يوكل عيش ولنا وجه نطالب بآسيوية ودوري وكاس.

إصابات، لا دكة زي الناس، لعيبة يتفلسفون ويدورون الطرد، خطة عقيمة، إدارة حتى لما تفوز على خصومها تقعد تقول "الظروف خدمتنا" (وارجعوا للي قاله عبد الرحمن بن مساعد يوم سألوه عن مباراتنا الأخيرة في الآسيوية).