<< الموضوع فيساته من الي على جنب الباقي اذا طلعتها علق الجهاز وجته *نفاظه مرتين عشان كذا فيساتي محدوده





السلام عليكم ورحمة الله وبركاته

اخواني الي بيعرسون والي في نيتهم بيعرسون بس الظروف اقوى والي بيعرسون والظروف معهم بس مالله كتب

واخواتي الي تزوجو والي مرو بنص تجربة زواجه والي مابعد شمو ريحة خطبه

تعالو هنا عارفه هالمواضيع تعجبكم << طالعه منها



طبعن تعرفون الولد عايش حياته من يومه طفل لين يوصل لحدود العشرين وهو مايفكر بيوم يلبس فيه ثوب ابيض *يلق ولا دعاية تايد مع بشت اسود وشماغ والترسيم شي ووجهه توه متشرب درج كريمات التركي يحيى كله << رحت ملح



واتوقع انه مايفكر انه يتزوج يعني بس تفكير لاحظو الا بعد العشرين




بعكسنا احنى البنات

يعني الغالبيه من جنسنا الرقيق وهـ بس
اذكر من يومي *بصوه وانا اذا جاء مسلسل فيه زفه وعرس استحيت
ابي اعرف وش دخلني مدري الله لا يبلانا صدق الحياء بلوه

واغلب البنات بعد << مو كلهم تاكلوني الحين
لما تشوف عروسه بزفتها تتخيل نفسها مكانها وفي يوم زواجها يومها هي بس هي العروسه يعني مافيه عروستين بس هي العروسه لحالها

وطلي بالابيض طلي << عشت جوي



<<< آآهـ امنيتي طلتي تصير بستايل بسيييييييييط بعيد عن بهرجتنا وحوستنا الي لو مانسويها مايعتبرونها عروس

نرجع لموضوعنا

احس اني طولت !

المهم ان قبل هذا كله اول شي بعد مايقرر الشاب المصون الزواج يبدا ينشر اخواته في ارض الله الواسعه ويبدون يشغلون راداراتهم في كل مكان بلا استثناء

هذا اذا كان الولد مافيه وحده بباله

وبعدها يجي الشي الي بيكون موضوعنا


بعد مايختارون وحده عاجبتهم ويكلمون اهلها وتقريبن تصير الموافقه 80% تجي الشوفه الي تحدد الموافقه الاكيد او لا

الشوفه ماجت كذا عباطه او قل سنع
واكيد ما فضلها الرسول الا لخير فيها واحرى بانهم يتوافقون

وهذي ادلة جواز النظر الى المخطوبه :

عن المغيرة بن شعبة أنَّه خطب امرأة، فقال النبي صلى الله عليه وسلم :"‏ انظر إليها فإنه أحرى أن يؤدم بينكما " رواه الخمسة إلا أبا داود ؛ وعن أبى هريرة قال " خطب رجل امرأة فقال النبي صلى الله عليه وسلمانظر إليها فإنَّ في أعين الأنصار شيئا )‏ رواه أحمد والنسائى.

وعن جابر قال: سمعت النبي صلى الله عليه وسلم يقول: (إذاخطب أحدكم المرأة فقدر أن يرى منها بعض ما يدعوه إلى نكاحها فليفعل)‏ رواه أحمد وأبو داود .
وعن موسى بن عبد الله عن أبى حميد أو حميدة قال : قال رسول الله صلى الله عليه وسلم :إذا خطب أحدكم امرأة فلا جناح عليه أنينظر منها إذا كان إنما ينظر إليها لخطبة وإن كانت لا تعلم )‏ رواه أحمد.

وعن محمد بن سلمة قال: سمعت رسول الله صلى الله عليه وسلم يقول : (إذا ألقى الله عز وجل في قلب امرىء خطبة امرأة فلا بأس أن ينظر إليها )‏ رواه أحمد وابن ماجه .‏

وهذه الأحاديث كلها رواها الإمام الشوكاني، وقد قال بعد ما بين صحة سندها وذكر أحاديث أخرى في هذا الباب وأحاديث الباب: فيها دليل على أنه لا بأس بنظر الرجل إلى المرأة التي يريد أن يتزوج بها، والأمر المذكور في حديث أبى هريرة وحديث المغيرة وحديث جابر للإباحة بقرينة قوله في حديث أبى حميد( فلا جناح عليه)‏ وفى حديث محمد بن سلمة(فلا بأس)‏ وإلى ذلك ذهب جمهور العلماء.






ومن يحددون موعد الشوفه وتشوف البنت * تدّهر في نفسها زياده على دهرتها قبل

على هالطاري قبل اسبوع كلمتني بنت خالتو وقالت انها انخطبت ومدري ايش عاد هي يا عمري عليها ماتعرف لعاداتنا زين وكذا لانها تربية برا

المهم انها كلمتني الساعه خمسه العصر تقول بعد المغرب شوفتي
ويييين انا جتني ام الركب شلون هي قلتلها وش تسوين الحين قالت جالسه
وقسم لحظتها بغيت * اكرفنها
خير يا عمتي اقولها تحممتي تقول لا لازم ! جايه بوصخ الجامعه يا انسه

المهم يالله عطيتها محاضره وتحركت شوي
بس اهلها ليش ماقالو لها الا في نفس اليوم قال ايش قال عشان ما تتضايق


نرجع لحديثنا


في الشوفه ترتب البنت المجلس بنفسها يعني تراني سنعه وبتزوج








ويكتمون المجلس والبيت كله بالبخور الزين

والبنت ما تتعطر طبعن عشان كذا يعوضون بالبخور تقول مشهد ساحر في مسلسل








ويجي الولد طال عمره طاق الزين وعلى سنقت عشره






وتجي الانسه بالعصير






وتقدمه له وتتكرفس وتطيح ويبين الخافي والمختفي وبعدها يتزوجها بس عشان يبلشها بالطيحه وانتي ماتزوجتك الا عشانك طحتي



اقول بلا حركات افلام مصاريه ماعد فيه عصير الحين زين تدخل البنت برجلينها تبونها تدخل بعصير







اممممم خلصت الي عندي ..


جاء دوركم الحين يا اخواني واخواتي ..


قد مريتو بتجربة شوفه شرعيه او لا شرعيه

كيف كانت تجربتكم !

وش سويت ذاك اليوم وانتي يا بنوته وش سويتي وايش لبستي

<< وهقتنا باللبس مو كل شي ينفع

واذا عندكم شي بتتكلمون عنه المجال مفتوح لكم تنورونا


<< هذا الموضوع بمناسبة موسم الخطب والملكات ان شاء الله ينفعكم




وان شاء الله ما اكون طولت عليكم << هذا الي خايفه منه تراني الحين مقتصده بالكلام ولا فيه ببالي اشياء اكثر

* نفاظه = يعني صار يسكر ويولع كانه ينتفظ يعني يهتز
* يلق = يلمع اي يبرق كالنجم
* بصوه = صغيره جدا
* تدهر = تشتغل بذمه وضمير وحماس
* اكرفنها = اضربها