خلنا واقعيين، إن فزنا على النصر، هل هذا شيء مستغرب أو يستحق الإشادة؟
طيب إن خسرنا، هل بتقول "الظروف ما خدمتنا" ... ؟
هل معطيات ما قبل مباراة أمس كانت تقول أن الفريق بيفوز؟ وإلا "الظروف" ما يندرى عنها إلا مع صافرة الحكم؟
ترى ما فيه أسهل من أنك تحاول تجريد من تحاوره من أي مصداقية بأنك تقول "شكلك مندس"، صدقني ما في أسهل منها، خصوصاً إذا ما كنت تمتلك أي رد مقنع، لكن قبل أن تطلب من الناس أن يكونون صادقين معك، لازم تكون صادق مع نفسك.
أنت تقول "بالتوفيق للزعيم في الآسيوية وكأس الملك"، وأنا معك هنا ولا نملك إلا الدعاء، لكن خلنا نمسك الآسيوية لأنها هي المهمة، عطفاً على آداء الفريق في كل المباريات الماضية، هل تتوقع أنه بينافس على الآسيوية؟
المسألة سهلة، مثل سهولة 1+1=2، وما تحتاج اجترار كلام مثل "قبل المباراة كونوا مع الفريق، وبعد المباراة التمسوا له العذر إن خسر، وطبلوا له إن فاز، بغض النظر عن الآداء".
إذا بتكلمني عن التاريخ، فما يحتاج أذكرك شلون كان الزعيم أول، وكيف وصل به الحال الآن لدرجة أنه ما صار يطمح بأكثر من هدف، وما يحتاج آخذك لبعيد، السنة اللي راحت قارن بين أداءنا قدام الشباب (واللي ما تقدر تقول أنه ضعيف، لأنه وقف وقفة للاتحاد) وبين أداءنا قدامهم هالسنة.
كم مرة احتجت إلى مدافع عشان يحسمها لك لما ضاقت بك السبل؟
ثم بذمتك، فريقنا أمس قدر يحرج الاتحاد؟
خلني من ومضات الابداع الفردي اللي شفناها من كم لاعب، السؤال هو: هل قدرت تبني هجمة تقدر تصنع منها هدف؟
أنا معك، في هالفترة الواحد ما له عزاء إلا أنه يكرر مثل هالكلام "رغم الظروف قدرنا نحرجهم"، لكن وش فايدة ذا وأنا قاعد أرمي بتاريخ وبطولات عرض الحائط؟
ثم لا جينا للصدق، ترا الأهلي يوم نباريه في جدة ما كان بذيك القوة عشان تقول لي الكبار يبانون قدام الكبار، وأكثر من كورة اضطر النجعي يمسكها على أكثر من دفعة، ومحد عطى الراهب وجه إلا أنت يوم قمت ترجع تدافع بدون أي داعي!
يعني بذمتك، لو الكورة اللي اصطدمت بيد رادوي احتسبت بلنتي، بتقول لي "شكلك تعتقد أن الراهب أبدع قدام الهلال" ... ؟
روقونا يا ناس وبسكم تطبيل ...
ويا "هواي أزرق" بنطلع من الآسيوية إذا استمر الوضع مثل ما هو عليه، وبأذكرك بهالشيء بعدين ... وأرجو وقتها أنك ما تقول "والله الظروف ضدنا، لكن أحرجناهم".
الوضع المتطور
