نادي الهلال السعودي - شبكة الزعيم - الموقع الرسمي - قصيدة: الله يتمم فرحنا ليل الاثنين ( قولو امين)

هذه قصيده جديده وهي مشاركة مني وتشجيع للزعيم وايضا سارفق قصيده سبق ان نشرتها لعلها تساهم ولو بالقليل لزعيمنا والله الموفق:

الله يتمم فرحنا ليل الاثنين
عقب التعب والجهد نبغي الاشاده
قوم تحادونا من يسار ويمين
وعيا الزعيم الا إينول السياده
العام درس وذالسنه صار درسين
اخذوا العبر يلي تبون الرياده
ترا البطوله عشقها للسلاطين
ومن جادبه حظه يشوف اعتماده
زعيمنا يا عشق كل الملايين
يوم ان عشق الغير يبغى شهاده
يا ملجمن اخطام كل المعادين
سفير من غيرك سفير إلبلاده
والله يتمم فرحنا ليل الاثنين
عبدك رجاك ولاتخيب مراده

القصيده الثانيه وقدسبق نشرها وهي بعنوان الله خلقنا توم ويا البطولات

يا ربعنا ترا الدعاوي سلامه
الله خلقنا توم ويا البطولات
تعريفنا "مكتوب" فيه الزعامه
ومشيدين بالصحف والمجلات
سجلنا حافل وشوفوا العلامه
مخازن النادي بها شهود واثبات
بعض العرب يفرح بجو الكتامه
والعاقل اللي ما بحث ستر الاموات
فإن جاك خبل ما يثمن كلامه
خله يولي ماعلي النقص شرهات
عرض عن اللي ما بوجه شهامه
شات وتثغي يا جماعه علي شات
وكم ناقد يفرض عليك احترامه
يختار في مضمون قوله عبارات
واللي يبي العليا يترجم كلامه
مع العمل بإخلاص يجني الملذات
يا مير يلي فيك سر الامامه
لاتلفت لهروج إبها تفاهات
ماقل دل وزبدة القول شامه
قد قالها راكان قبلي بالابيات
من قيده الياس شاف الندامه
والرابح اللي ينجز الفعل بسكات
ترا العمل يحتاج باس وصرامه
بالعزم والتدبير تلقى الاشادات
اشوف بعض الناس فيهم غشامه
والبعض يدس السم وسط المقالات
حنا نبي كل يعرف إلتزامه
مجهودكم مخبور وقت المهمات
يا الله ماغيرك وامر بالكرامه
يا الواحد المعبود يا خالق الذات
تهدي قلوب قد كستها غمامه
ومالي ومال إمطاردين الاشاعات
جمهورنا يا عشق راعي الوشامه
يا مضرب الامثال بين الوكالات
انتم كما مايح طويل مقامه
وشموخكم عدا جبال السراوات
الخصم لامن جض ماله ملامه
حضوركم يرهب قلوب صخيفات
البيت إبليا ساس مسهل هدامه
والشيخ مع ربعه يذب الطويلات
وكل عقب ذا اليوم يحفظ مقامه
تكاتفوا يا أهل العقول الفهيمات
خلوا مريض النفس يفرك ابهامه
وإقروا عليه الفاتحه والتحيات
وختامها ترا الدعاوي سلامه
الله خلقنا توم ويا البطولات