بسم الله الرحمن الرحيم





نواف الهلالي يطل عليكم ويمسيكم بالخير





هاردلك للجميع على التعادل وإن شاء الله خيرها بغيرها





وأنا أقول هاردلك لأنه فعلا فريق مثل زعيم آسيا اللي يكسر خشوم


أقوى أندية اليابان والصين في عقر دارهم ما يعتبر تعادله مع الفريق


الأوزبكي ( المتهالك ) شيء جيد !! ولا أنا غلطان




مع إن اللاعبين حاولوا يقدمون شيء لتعويض المباراة السابقة


لكن مع اجتماع عامل الحكم إلى جانب خربطة المدرب


أنا أجد لهم بعض العذر << لا تكفى ازعل عليهم




صحيح يعني الحكم ما شاء الله عليه ذابحته قوة الشخصية


^^^ بقووه والدليل إن اللاعبين ما أحد معبره وأنواع الاحتكاكات


وكل شوي مخاشنة من هالأفغان وكأن الواحد منهم جالس يخبز بمخبزه


مهب في ملعب كوره والحكم هذا ما عنده إلا بس يمد يديه إلى الأمام


ثم يفتحها على مصراعيها يعني كأنه يقول فكوا بعض وتعالوا


واللي يشوفه يحسبه يسوي تمارين الصباح ولا يلعب افتحي يا ورده


وكروت ما فيه كروت .. يعني ما أدري وش فايدة الحكم أجل إذا صار مثل هذا !!




أما المدرب فهو ما أدري وش العلاقة اللي بينه وبين الكوري << يقولون إنه خاطب منهم .. المهم


ما علينا لكن وشلون يصير التايب على الدكه وسيول اللي هو أسوأ اللاعبين


في المباراة الماضية أساسي !! يعني المدرب بدأ بتشكيله غريبه


وتغييراته الأغرب .. يطلع الفريدي وهو أفضل من سيول ويترك سيول يخربط !!


بعدين آخر المباراة يطلع ياسر ولا زال سيول في الملعب


والمشكله كان توه مضيع هجمه انفرادية مثل المباراة اللي راحت .. يعني للأسف


بطولة آسيا ارتبطت بضمير سيول بهالمباراتين لكن ضيع علينا 4 نقاط << عز الله إنه مهفي الذمه


ولا هو معنى إنه سبب البلنتي وهجم هجمه يعني صار مستواه أفضل


لأن الفريق اللي أمامنا أصلا ماهو مقياس .. فريق منتهي وعطيناه أكبر من حجمه




لكن على العموم المدرب الحمد لله وراح ويا ليت ياخذ نسيبه معه


ويالله يا شباب : مين مين يسبق مين .. سـول ولا كـتـالـيـن


للمطار طبعا



وبهذي المناسبة أقول مبروك عليكم المدرب الجديد


وأعتقد إن الإداره وفقت في الاختيار .. يعني مدرب له تاريخ كبير


وشخصيه قووويه << وهذا اللي نبي .. وأنا بصراحه كنت خايف من شيء واحد



كنت خايف الإدارة يجيبون واحد من المدربين الشيبان !! بس الحمد لله


لأنه لو إنهم سووها فقل على البطولة السلام .. لأن الشيبان


هذولا يا أما إنه يكون له تاريخ كبير فما يهمه فاز معك ولا ما فاز


بعكس الشاب اللي يبي يثبت وجوده ويصنع لنفسه تاريخ


ولا ما له تاريخ يعني شايب + بدون تاريخ = فاشل وسلم لي على أديموس


وغير كذا الشيبان هذولاء روسهم يابسه يعني إذا حط براسه


إن اللاعب هذا ما يعرف يلعب خلاص ما يعرف يلعب ولا يمكن حتى


يعطيه فرصه .. وإذا أعجبه لاعب ولو هو كديش يخليه ينشب لنا


يسنتر كل مباراة



لكن الشكر لله أولا والشكر للإدارة ثانيا وإن شاء الله يتم التوقيع مع ( تيقانا ) على خير




أما مستوى اللاعبين أمس عموما فمن وجهة نظري إنه دون المتوسط


والكوره كانت طايره يعني فيه تسرع من اللاعبين وعدم تركيز وهذا يخلي الكوره تنقطع بسررعه



وبصراااحة ينقصنا لاعب قاائد في منتصف الملعب ينظم الوسط ويهدي شوي


ويضبط إيقاع اللعب .. آآآآه وينك يابو يعقوب




وبالنسبة لضربة الجزاء .. يا ليت يكون فيه لاعب مخصص لضربات الجزاء


يتدرب عليها دائما .. يعني البلنتي أمس بغى يصده إلا شوي ! في المقابل


لو كان فيه لاعب متخصص ويسدد في الزاوية اللي فوق صعب على الحارس يصدها


وبهذا نكون ضمنا 90% من ضربات الجزاء << ورا ما تجي تشوت أحسن



* * * *



تعال جاي يابو دعيع : والله طلعاتك من تالي وأنا أخوك ما هيب اللي أنت تبي


تكفى ركز يابو عبد العزيز ترى غلطة الشاطر بعشرة !!



هوساوي قلتها وأعيدها من مباراة لمباراة تثبت إنك كبيير كبيير


والمستوى من عالي إلى أعلى .. فـ إلى الأماام يا بطل وفالك المدافع


الآسيوي رقم واحد !!



المرشدي - الزوري - نامي : ما زال لديكم الكثير لكن مستوياتكم متذبذبه


أتمنى منكم التركيز في المباريات القادمة للرجوع إلى المستويات الرائعة


والثبات عليها !!



عزيز ورادوي : إبداع دائم ما شاء الله وأقوى ثنائي


دائما .. لكن ملاحظة فيه مسافة بينكم وبين المدافعين تتيح للخصم


التسديد على مرمى الدعيع وشفنا كم كوره خطره في المباراة


فأرجوا منكم الانتباه إلى هذه النقطة وبالتوفيق !!



ويلي .. الفريدي .. ياسر : لا زلنا نطالبكم بالعودة إلى مستوياتكم الرائعة


فـ عد لنا ياسر << على وزن عد لنا سالم << وللي ما يعرفها : هذا يقولك


كان فيه واحد قروي اسمه سالم .. راح يبي يسافر وودع أهله بحراره وهو بالطريق


إلى المطار لقى لوحة مكتوب عليها : عد لنا سالما !! فعاد سالم إلى أهله وهو يبكي





طيب يا جماعة .. نطلع من المباراة شوي ..


كلنا طبعا شاهدنا مقال ( عميدهم ) الأخير واللي تكلم فيه على الهيئة ورجال الدين


بكل بجاحه وأنا شفت ردود النصراويين بمنتداهم واستغربت بصراحه ما أدري بعض


الردود شكلهم ما قروا اللي كاتب أو إنهم قروه وتغافلوا عنه أو إنهم موافقينه على ما قال


لكن حتى ما نعمهم كلهم فالحق يقال إن بعضهم ردوا عليه بردود طيبه تدل الحمد لله إنه


ما زال الناس فيهم خير ..


أما ما قال الدويش في نقطة معرض الكتاب فأنا بنفسي زرت معرض الكتاب في اليوم قبل


الأخير اللي هو الخميس الماضي .. والله ما شفت الهيئة أصلا .. ما شفت والله إلا هالغزلان


اللي يسرحن ويمرحن حتى إني والله كنت أكلم واحد من الشباب فسألته وين الهيئة


عن هذولاء !! يعني بعض البنات الله يصلحهن ما أدري داخلات معرض كتاب ولا رايحات حفلة


لكن أنا أجزم إن نصف اللي بالمعرض ما لهم بالكتب ولا بالقراءة شيء .. اللهم كعادة الشعب السعودي


شافوا زحمة وجايين يشوفون وش السالفة والله من اللقافة اللي عندنا بعد


أما الدويش هذا فأنا ما أظن إلا يوم إنه قعد يلف ويدور بيوم من الأيام جو الهيئة و ( تلّوه ) بالجمس ورا


وكأني به وهو يصرخ : دعوني أنا عميد الكتاب .. دعوني أنا العميد الكذاب << ياسلام ياسلام


^^^ تحس على هالجملة كأنك قاعد تقرا رواية





المهم نرجع للزعيم .. الآن بقي للهلال عدة مباريات واللاعبين مطالبين بالفوز في جميع هذه


المباريات سواء اللي على أرضنا أو اللي خارج أرضنا وكلكم شفتوا مستوى سابا وبختاكور


أما الأهلي الإماراتي فهزمه بختاكور على أرضه !! يعني من ( المنطق ) إننا نفوز في جميع


المباريات القادمة فـ المنافسين الأقوياء ما بعد وصلناهم !!




وعلى طاري ( المنطق ) << الكلمه هذي إلى الحين ما يدرون وش معناها لكن أول من


طرح السؤال عن معنى هذي الكلمة هي ( أبله عرفت ) في مدرسة المشاغبين !!


وأفضل إجابة حتى الآن هي إجابة سعيد صالح في نفس المدرسة يوم قال :


إن المنطق هو : إنه يجي واحد ويطق واحد ثاني فـ يصير الثاني هذا ( منطق )






نتمنى التوفيق للزعيم في قادم المباريات .. وفاله البطولة إن شاء الله .. أما بختاكور فـ فاله الـ قفلة









قفلة :


هلالنا للفن .. وفـالـه ذهـب وإنـجـاز .:. وفريقهم لـ ( الفرن ) .. فيه ( الخبزه ) إنجازه

خل الفن للي دوم .. ما غيره بفناً فاز .:. ولا الخبز قد قالوا .. عـط الـخـبـز خـبـازه