نادي الهلال السعودي - شبكة الزعيم - الموقع الرسمي - مهم جدا للفاهمين كرويا فقــط !!!

السلام عليكم

موضوعك هجومي من البداية .. نعت أصحاب الفكر الدفاعي أو المتزة بعدم البلوغ كروياً
والمفترض انك تطرح وحهة نظرك بدون تصغير ممن يخالفك .. هذي من فنون الحوار

بداية
الطريقة على الورق ماتحكم إذا المدرب هجومي أو دفاعي
فيه مدربين يلعبون بـ 4-3-3 مع فريق صغيرة وبالتحليل تكون 4-2-1-2-1
والأجنحة أصحاب نزعة دفاعية ويغطون مع الأظهرة فتكون الخطة دفاعيةً بحتة
وفرق ثانية مثل منتخب هولندا يلعب بنفس الطريقة لكنه يعتبر منتخب هجومي
مع ان الطريقة على الورق ( هيّا هيّا ) !!

كوزمين من أول موسم له مع الهلال ماكان يملك إلا مهاجم جاهز واحد بس
الصويلح خيار مفضل له لكنه يلعب في بداية الموسم وبعدين يصاب
وارجع لمباريات الموسمين الماضيين في بدايتها .. كان الصويلح يشارك معه
والموسم الماضي كان هداف الفريق قبل مايصاب
والموسم الي قبله إذا ماخانتني الذاكرة ( منيب متأكد )
لكن إصابته حتمت على كوزمين يعتمد على مهاجم واحد .. و 3 لاعبين وسط مساندين له
ولو كان يبحث عن الدفاع بس .. يقدر يشرك 3 محاور .. ومهاجم واحد واثنين وسط يساندونه بدل 3 !!

الهجمة شلون تبدا ؟
من الحارس إلى الدفاع إلى الوسط إلى الهجوم
إذا .. المنطق يفرض إنك تبدا تقوي فريقك بنفس التسلسل حتى تضمن هجمة سليمة من البداية
وتضمن افتكاك كورة سليم ومحافظة على المرمى
الحراسة مافيها خلاف بوجود الدعيع .. الدفاع كان مشكلة كبيرة حتى مع وجود تفاريس
دفاع الهلال كان ينكشف بسهولة .. تفاريس كان يندفع ويبقى وراه 3 مدافعين سيئين وتصير الكورة خطرة
كوزمين قدر يصنع خط دفاع جديد كلياً
( نامي ، هوساوي ، المرشدي ، الزوري )
الزوري كان لاعب قلب دفاع .. وجا للهلال على هالأساس لكنه غير مركزه للظهير وبرز وتألق ووصل للمنتخب
وصار حالياً أفضل ظهير أيسر في السعودية بدون منازع .. تحسب لكوزمين
مستوى نامي تحسن عن الموسم الماضي وصار جيدجداً في الدفاع .. وجيد هجومياً بعد وصول ويليامسون
هوساوي بعد ماكان الجمهور معارض فكرة الصفقة وسعرها .. صار المدافع السعودي الأول ( مع احترامي لنجم الخليج المرشدي )
المرشدي كان كوزمين مركزعليه في الكرات العالية في التمارين بشكل كبير وقدر يصنع منه مدافع جيد يتحسن من مباراة لآخرى

خط الوسط
في مركز المحور استقدم رادوي .. وهو الصفقة الأنجح في الموسم .. أكثر لاعب يسدد على المرمى في الدوري
أكثر لاعب يمرر تمريرات طولية صحيحة .. أكثر لاعب يمرر تمريرات عالية صحيحة
محور ويخلي المهاجم ينفرد في كل مباراة مرة أو مرتين .. يغطي أي غياب أو ثغرة في الدفاع أو الظهير
قيادي بشكل ممتاز .. يوجه المدافعين .. في مباراة النصر كان المنقذ بعد الله وشفنا كيف يوجه المدافعين في قضية التسلل والرقابة

اختار ويليامسون .. وصبر عليه وأصر عليه وشفنا نتيجة الصبر .. لاعب ماشاء الله تبارك الله
قدرة هائلة في الجهة اليمنى وحماس غير طبيعي ..وهو سبب تحسن مستوى نامي الهجومي
أكثر صانع أهداف هالموسم في الهلال .. وأعطى قوة هجومية على اليمين بعد سنوات من المعاناة مع هالجهة
بالإضافة لأنه صقل الفريدي على الطرف بعد ماكان لاعب عمق مايتحرك للأطراف إطلاقا
صحيح في آخر المباريات كان سيء لكن السبب التخطيط الفاشل من الاتحاد الفاشل وضغط المباريات كل 3 ايام والمعسكرات الطويلة
وهالشي انعكس على خالد عزيز حتى .

ماننسى المواهب الشابة .. سلمان الفرج بعد ماكان لاعب طرف بس صار لاعب طرف ومحور
بندر العنزي عليه شغل كبير وتمرين قوي بحيث يكون محور وصانع ألعاب ووسط أيمن .. صالح الدوسري محور جيّد وكان كوزمين يحاول يوديه لرومانيا ..
عبدالعزيز الدوسري خذ فرصته بداية السنة في الدوري قبل مايصاب
طبعا التايب كان موجود قبل مايجي كوزمين .. لكن تألقه الحقيقي كان مع كوزمين
بعد ماكان بيسيرو يقتله ويلعبه على الطرف الأيمن أكثر .. وكوزمين رجعه للعمق وعطاه حرية أكبر
بعدها شفنا صانع ألعاب لعب أكثر من 70 كرة انفرادية صريحة !!

الهجوم
زي ماقلت في البداية الإصابات لعبت في الصويلح والا كان بيكون أساسي مع ياسر
لاسيما انه سريع جداً ويتحرك على الأطراف بشكل ممتاز ومزعج للدفاع ويقدر يريح اي مهاجم معه ونذكر العنبر والخراشي في الأولمبي

الهلال كان مميز في الدفاع .. مميز في الوسط .. جيد في الوسط المتقدم والهجوم
كان ينقصه اسم في المقدمة يحرك الفريق مع ياسر ( نقاط استفهام وتعجب على مستوى ياسر واصاباته )
العام الماضي كثير من مباريات الدوري بدون ياسر .. ومع ذلك كوزمين متصدر !!
لعب بالصويلح قبل مايصاب .. ولعب بالسعود والعنبر والخراشي .. وشفنا تألق ياسر في مباراة الأهلي والاتحاد .. اتكلم عن تألق حقيقي

في هالموسم .. تحسن الهلال أكثر .. وبعد ماجاب الأجانب الصح
تخلى عن طريقة محور ثابت ومحورين متقدمين يكونون مع الهجمة ( وسط يمين ووسط يسار )
الي هم الغامدي والخثران .. وهذا دليل ان كوزمين مدرب يلعب على امكانياته ( ويفوز )
هذي اسمها ( عظمة مدرب ) .. !!

سبحان الله .. كل التعليق على نهائي الدوري مع الاتحاد في جدة وكأنها الوحيدة لكوزمين ..
( للعلم فيه للهلال 4-5 هجمات مرتدة خطيرة لكن ياسر والفريدي كانوا أنانيين ولا ناولوا لبعض وضيعوا الفوز المبكر )
ياخي فيه 60 مباراة غيرها ليه تخصيص مباراة وحدة بس !!
ليه مانقول مباراة الاتفاق في ولي العهد كانت سهلة وقدر يكتسح الملعب طول وعرض ؟
ليه مانقول النصر ماقدر يهزم الهلال أبداً بوجوده ؟
والشباب ؟
ليه مانشوف انه هزم كل فرق الدوري دون استثناء .. وانه ماخسر طول موسمين في الدوري إلا 3 مباريات !!

أنا ما أدري وشو مقياس الفشل !!
هل اني احصل على ولي العهد في موسمين متتالين
واحصل على الدوري وأتصدر الموسم الثاني حتى إقالتي
يعتبر فشل !!
أجل وش نسمي المدرب الي ماجاب ولا بطولة ؟

عُرف في كرة القدم
( خط الهجوم يكسبك مباراة .. وخط الدفاع يكسبك بطولة )
هذا أمر واقعي .. كوزمين من يوم جا للهلال ماشفنا الهلال متهالك في أي مباراة
مهما كان مضغوط يكون متماسك وقوي جداً
باستثناء مباراة الاتحاد في كأس الملك
ويوجد في أرشيف الشبكة تسجيل فيديو لتصريحه قبل البطولة وهو يقول البطولة ماتهمني !!

مسألة إشراك الشلهوب أو الفريدي تظل ( وجهة نظر ) وماتعطيك أحقية تقول مدرب فاشل
بالعكس رد كوزمين عليك نتائج الفريدي .. صحيح في آخر كم مباراة كانت سيئة لكن من بداية الموسم وهو كويس
ولو لك متابعة في أوروبا .. المدرب يصر على لاعب وهو سيء لأنه يسعى لإعطائه الثقة
شفنا مورينيو مع بالاك وصبره عليه أيام تشلسي .. فيرغسون حالياً مع كريستيانو
هذي وجهات نظر تختلف من شخص لآخر .. مادام إن المدرب يكسب فوجهة نظره صحيحة
ولا يقدر احد يقول انه مخطئ .. لأن النتيجة هي الفيصل !!

إقتباس:

واللي رفعها سبع ونزلها سبع انه مايفهم كووورة واكبر دليل يكون الفريق الخصم متقدم علينا او متعادل يروووح ينزل سول والله من الذكاء الكروي اللي هو فيه

سم طال عمرك ؟؟؟؟؟؟؟؟؟؟؟؟
انت تتابع الهلال :confusedw:

كوزمين طول هالموسم ماتأخر 1-0 أبداً .. ولا صارت ولا مرة في هالموسم
ماخسرنا الا مرة ضد نجران .. وباقي المباريات بين فوز وتعادل
اذكرلي مباراة كنا خسرانين أو متعادلين ونزل سول وخسرنا أو استمر التعادل ؟
مافيه !!
لاتتقول على المدرب شي ماسواه !!

عليك كفارة .. تراك حالف انه مايفهم كورة .. عشان النقطة أعلاه
وأثبت انها غير صحيحة !!

الي يخليني مقتنع برأيي أكثر .. اني إنسان أثق في رأي محلل سعودي واحد بس
( خالد الشنيف )
وتحليله يكون بعد متابعة المباراة من الملعب ..
وهالشي يفرق كثير والي جرب يتابع مباراة من نقطة عالية في الملعب بيفهم وش أقصد
تعرف المدرب الممتاز من السيء
تشوف الانتشار والتحرك والتغيير وأثره على الفريق
تشوف الكروسات ووقفات اللاعبين وفتح الملعب وفتح الثغرات في دفاع الخصم
تشوف الضغط على حامل الكرة وتبادل المراكز والتغطية
الشنيف دائما يقول ( كوزمين أفضل مدربي السعودية ) !!

للتذكير
البرازيل وهي البرازيل ..جلست 24 سنة بدون ماتفوز بكاس العالم
تدرون ليش ؟
لأنها قدمت أجمل كرة قدم في العالم لكن بدون فوز
برازيل 82 وبرازيل 86 .. كل واحد ينافس الثاني على لقب أجمل كرة في العالم
لكن المحصلة ( 0 )
من عام 1970 إلى 1994 .. 24 سنة بالتمام
فازت عام 94 بدون أي متعة .. أضافت النجمة الرابعة بدون متعة
لكنها صارت المنتخب الاول في عدد البطولات !!
فازت بعد ماعرفت ان ( الدفاع ) هو كرة القدم الجديدة !!

أيها المنجل السابح في فسحة الفضاء .. ( سلّم على كوزمين ) ..!
{النمر15}