|
اشتر تذكره منصه و احصل على مرمطه مجاناً !! " اتمنى الدخول من الجميع" بسم الله الرحمن الرحيم اتمنى عدم حذف الموضوع لكي يعرف الجماهير الوضع الي صاير و توصل السالفه لاداره الهلال لتدارك الموضوع :) بتكلم لكم عن سالفتي ،، انا كنت رايح للنادي اشتري ١٧ تذكره للمنصه ! وواجهت هذي المشكله الي جالس اقولها لكم ،، لعل و عسى نشوف حل للمرمطه و الذل الي صار يوم الاحد ! يا جماعه احد كان موجود يوم الاحد كان بنادي الهلال و شاف المهزله الي صارت !! صراحه انا اول مره اشوف هالحركه تصير !! يمرمطون الجماهير من الساعه 5 لييين الساعه 8 !! وكل شوي يقولون لهم التذاكر بتنزل الحين ،، وما نزلوها إلا 8 !! خلوا هذي لان حركه بيع التذاكر كان حلوه و مرتبه ،، الشباب صفوا طابور و انتهي الموضوع لكن المصيبه ! الي يبي تذاكر المنصه !!!!!! يا عالم مدري هل الدرجه العاديه افضل من المنصه يوم انهم يسوون الحركه هذي !! طبعاً قبل ما ندخل النادي كنا رايحين للاستاد بعدها للملز ،، لاني قايل للعيال لا تقربون النادي و بلاويه !! ولكن ما صارت تنباع إلا بالنادي و اضطريت اروح ! دخلت النادي الساعه 7 تقريباً ،، زحمه و قلق و حوسه و التذاكر كل شوي يقولون 10 دقايق و نازله شوي يقولون تبي منصه ؟! موب من هنا من البوابه الشماليه ! تروح للشماليه .. تبي منصه ؟ موب هنا من البوابه الرئيسيه ! و رايحين جايين ،، بالاخير لقيت لي سيكورتي يعرف سيكورتي :D جالس عند الاداره اخرتها !! ابي منصه اتمصلح مع سيكورتيه !!! pb093 يقول لي عط خويي الفلوس و يجيبها لك ! و بالاخير يرجع لي يقول ما نزلت يزوعونها على الي يبون !! المهم وصلت الساعه 9 ،، والجماهير خذت تذاكرها و مشت ،، واحنا يا حقين المنصه !!! قدرت ادخل للنادي و اوصل لباب الاداره و لقيت مرجان :) الي طبعاً كل يمدحه بأسلوبه الوسخ و التعامل الحلو ،، اقصد الوصخ ! جلسنا من 9 لييين 10 ننتظر الاخوان ينزلون بالتذاكر ! فجأه ينزل لنا واحد يقول مافيه تذاكر !! وقلت له ما يصير احنا هنا من الساعه ٧ و غيري من الساعه ٥ و اخرتها مافيه وش هالتعامل !!!!! و قال لي انتظر بشوف ،، صار الرجال يبي يصرفنا عشان يقدرون يوزعون التذاكر على راحتهم !! وكل شوي يقولون اصبروا 10 دقايق ! لين وصلت الساعه 11 و ينزل لك الاخوان بعد ما هلكنا و متنا برد و يجلسون بالمكتب ،، و يالله كل واحد يدخل لحاله المكتب !! هههههههههههه جالسين نختبر ولا تبيع تذاكر يا فهد !! :D والشباب تحسروا رص و قلق ! دخلت عنده و قلت ابي 17 تذكره و اتفل بوجهي ان شفتني بالنادي !! ،، و اخذت تذاكري الاخوان جالسين فوق يختمون و يوزعون ،، هذي لفلان هو طالب 10 تذاكر هذي لعلان يبي 20 تذكره ! و بالاخير ،، انت يالي تدفع فلوس ما تلقى مكان زين و تضطر انك تحجز كرسي على الاطراف و الغبنه تنق لهم 5100 ريال ،، و غيرك ما يدفع لهم ولا هلله و مكان زين :) !!! ولا بعد تاخذ بقايا تذاكرهم (يعني الشي الزايد ولا الاماكن الي ما يبونها) !!!!!!! وكل شوي ناقز واحد قصير خال يقاله سالم ،، ابي بكت كامل تذاكر ،، ابي 20 تذكره و يعطونه !! عشانه لفلان و علان :) العكس صحييييح جداً هناك في نادي النصر ،، شباب من المغرب قاصين المنصه و جالسين مع طلال الرشيد و يصورون مع الاعبين احنا مانبي لا نصور ولا شي نبي ناخذ تذاكرنا و نمشي و ذلونا !! للملعوميه ،، اول مره تصير لي هالحركه ! و الاشخاص الي كانوا فوق و مرمطونا اعرفهم بالاسماء انا دايم احضر مباريات بالمنصه لكن ما قد واجهت حركه سخيفه كذا !! لكن الي شفتهم بالنادي يقولون دايم تصير كذا بالنادي !! لكم الموضوع و احكموا !! |
انا مثلك تمام مرمطوني .. ميب حاله هذي اضطريت اروح لنادي النصر اقص تذكرة المنصه الله يكون بالعون |
اتمنى من كل واحد واجهته هالمشكله يقول لنا الي صار له حتى ما يُقال اني كاذب او متبلي على الهلال !!! |
إقتباس:
مير احمد ربك انك خذت اول ماجيتهم قالوا مافيه مخلصه وامسك الباب |
شوف كلامك صحيح والاخوان اللى يقولن الغاز ما قد جربو ها المرمطه وعدين والله لو تكتب مجلدات ما احد راح يرد عليك وألعن من كذا اذا دخلت المنصه بالملعب انسى تجلس بكانك ومعروف لمن محجوزه عشره كراسى جنب بعض وتنتهى المباراة ولا احد جلس فيها . بس احسن شى ضبطلك واسطه وترتاح مثلى ما عاد تتعب نفسك |
الله يعينك في المباريات الجااااااااااااااااااااايه |
الموضوع لفيه الغاز ولا شي الموضوع كان واضح الرجال يقول الشباب في النادي كل شوي يقولون بنزل التذاكرر اشوي ولطعوهم يقصد ان التذاكرررر ياخذونها حقين الواسطات الي مايدفعووون ولا ريال وهوووو جاي يدفع دراهم ويالله يلقى كررسي الا على الاطراف ويجي المنصه متاخررر هذا قصده .... صاحب الموضوع مادام انت تتخسررر من جيبك المبلغ الي ذكرررتته وكل هل المهزله الي ذكرتها في النادي والله لووو اني منك مادخل المنصه .............. تحياتي لك موضوع المفررروض يصل الى الاداره وتكفى ارسل موضوعك باسماء الاشخاص واررسلها على الايميل الي مخصصه الامير عبدالرحمن بن مساعد وارررسله له المشكله كامله |
غرييييييييييييبة والله!!!! بس تحمل الله يثيبك...! كل هذا علشان الزعييييييييييم...! |
لا تروح للمنصة او لا تروح للملعب ههههههههههه لو الكل يسوي كذا عرفوا يقدرون الجمهور |
شف يالحبيب أنا تمرمطت من يوم السبت وأنا أدور تذاكر المنصة وكنت أبي 6 تذاكر ومترت شوارع الرياض تمتير من الاستاد للملز ومن الملز للنادي ومن النادي للاستاد ومن الاستاد للملز وهكذا كان برنامجي طوال يوم الأحد قبل المباراة بــ 24 ساعه وباتصالاتي مع أشخاص بالاتحاد السعودي وخصوصا في ملعب الملز علمت أن التذاكر قيد التختيم وسترسل للنادي مساءا وتحديدا بعد الساعه التاسعه وكان أحد زملاءي ساكن في العريجا ذهب للنادي في تمام الساعه العاشرة وكان الزحام شديدا وقالوا لهم المسؤولين " السكيورتي " لايوجد تذاكر لهذا اليوم عليكم بالتوجه للملعب غدا صباحا " يوم المباراة " ولكن صاحبي فضل الجلوس مع عدد قليل من الجماهير واتجه إلى ياسر الطلاسي اللذي تعاون معهم وأعطاهم تذاكر للمنصة وكان هذا مابعد الساعه الـ 11 مساءا .. والجميع ذكر بأن سبب التأخير يعود إلى خوفهم من السوق السوداء |
والله انا اشتريت انا واحد تذكرتين من الملز منصه وفي احسن مكان |
المباراة النهائيه اشتر من نادي الشباب وانا اخوكـ اريحلكـ صح ماعلمتنا كم سعر المنصه في المبارة النهائيه .. |
ليش إلا المنصة؟!! كان فيها مميزات علمنا الله يجزاك خير... |
ياخوي في عيال امراء يبون يحضرون تبيهم يعطونك 17 ومايبقى لعيال الامراء شي فكر بالعقل لامنهم عطوك ولا بقى شي هم الي بينكرشون مو انت بعد ماوزعوا على الي طالبين من الناس الهاي هاي راحوا يبيعون الي بقى منها لك وللي يبي |
اذا هذا حالهم من جد مشكله اخوي دايم البطانه السفليه كذا |
| الوقت المعتمد في المنتدى بتوقيت جرينتش +3.
الوقت الان » 11:05 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd