هلا وغلا بالقلب الازرق شمس المنتدى التي لاتغيب (( مع انها غايبه هاليومين وماندري وش الاسباب)) المهم انا مابي اطول عليك واببدأ اطرح عليك اسئلتي بسم الله الرحمن الرحيم:

س1_ وش رايك فيني (( سؤال محرج جدا بس نبي الصراحه مانبي مجامله))؟؟؟؟؟؟؟؟؟؟؟؟

س2_ وش رايك في نفسك(( سؤال محرج جدا بس نبي الصراحه مانبي مجامله ( هههههه) ))

س3_ هل تتفق ان اسامه بن لادن ارهابي ام انه يطبق الدين الاسلامي الحنيف؟؟؟؟؟ وهل تتوقع انه مات ولا لازال حي؟؟؟؟؟ (( هالسؤال له مغزى في نفسي وامنى تجاوب عليه))

ولك تحياتي الخالصه اووووووووه نسيت اقولك وش رايك بكاس العالم هذي ومين برايك افضل لاعب ووش رايك بروستو حارس تركيا لانه معجبني جدا وفي رأيي انه افضل من كان؟؟؟؟؟؟

وشكرا

قبل أي شيء احب راح تسال نفسك مين مثل القمر وانا اقولك؟؟؟؟؟؟؟؟؟؟؟؟؟؟
هي وحده من المتصفحين للمنتدى بعدافتتاحه بشهر لاكن انشغالي بدراسه كان السبب في تاجيلي
لفكره التسجيل في عضويه المنتدى...........
جـــــــهز حالك (( القلب الأزرق )) فانا بامطرك باسئله الله يكون بعونك



1- كيف علمت عن منتدى الزعيم و هل أحد نصحك بالتسجيل ؟؟
2- ماهو سبب تسميتك بهذا الأسم ؟
3- مارأيك في أعضاء هذا المنتدى الرائع <== طبعا الزعيم ؟
4- جميع اعضاء هذا المنتدى مبدعين ولكن هل يوجد عضو تجاوز حدود الابداع ومن يكون؟ اذا مافيها احراج
5- - لاعب هلالي تحبه غير ثلاثي الازرق ( يوسف/ سامي/ نواف ) ... ؟؟
6- - اين تحب ان تقضي اجازه الصيف هذي السنه؟
7- رساله مهمه لمن ترسلها وماذا تقول فيها؟
8- ماهي اكلتك المفضله ؟؟
9- كيف تصف كل من : الصداقه - المحبه - السهر - كاس العالم
10- كم مرة تدخل المنتدى في اليوم وما هو اول قســـم تحرص على رؤيته وفي اعتقادك ما هو القسم الاكثر تمييزا في المنتدى؟.
رســـالة توجهها لعضو من اعضاء منتدى الزعيم وتقول له فيها من طول الغيبات جاب الغـــنايم ... وافتقدناك ولكتاباتك؟
11- سؤال اخير هذه الالقاب اريد منك تطبيقها على اعضاء المنتدى
زعيم المنتدى
عميد المنتدى
قمر المنتدى
الجندي المجهول
مبدع المنتدى اكيد كثيرين لكن اميزهم
فاكهة المنتدى
عضو مظلوم
عضو خلف الكواليس
عضو نشيط جداً
عضو مهضوم حقه
عضو حاضر ولكنه غائب
عضو يعمل بصمت
وآخر لا يحب الأضواء
عضو جذاب
عضو تقرأ له دائماً
عضو معحب فيه وما هو سبب الاعجاب
عضو مشاغب وآخر مشاكس
12- عضو لزقة (اكيد انا)


وختاما اعتذري لك عن طول الاسئلة لكن مازال هناك الكثير اود طرحه عليك كونك من الشخصيات الريادية في المنتدى لكن وكما يقال لكل مقام مقال واتمنى ان لا اكون قد اثقلت عليك لكـــــــن تحمل ......................


تحياتي لك

أنا مثل اختي مثل القمر راح تسأل منهي الماسه الزرقاء

المهم نبدأ في الأسئله بس الله يعينك طويله

لقد ترددت كثيرا في طرح أسئلة عليك..... برأيك لماذا؟

لو كانت لك رحلة إلى القمر فمن تأخذه رفيقا لك؟

إذا كنت في رحلة الخيال فمن هو أكثر شخص يسيطر على خيالك؟

ما ردك على دعاة تحرير سفور المرأة ودعاة الموضة والتبرج؟

أيهما أكثرمن وجهة نظرك:::
أضرار التلفاز أو منافعه...
أضرار النت أو منافعه...
أضرار الجوال أو منافعه...

أين تجد الحب العفيف؟

ماهي الطريقة المثلى من وجهة نظرك لتكسب حب الناس؟

لو كان هنالك شخص عزيز عليك وهو الذي رباك في صغرك وتوفي وشعرت بشوق كبير له ماذا تفعل؟

رأيك فيما يلي
النفاق
الأمل
الأم
الأب
دمج الرئاسة مع وزراة المعارف

عذرا على الأسئلة الطويله ولك الحق أن تجاوب أو ( تطنش)
شكرا لك

يا هلا والله بالقلب الآزرق ..

أبي امحط لك كم سؤال وبرجع لك بعدين
<--- ناوي شر

س/ وش أسباب أنقطاعك عن المجلس العام خلال الفتره الماضية ؟؟ ( بتقول كأس العالم أقولك المباريات بالنهار )
س/وش المنتدى اللي تحس انك تبدع فيه أكثر من غيره ؟؟
س / رشُحت لتكون مشرف على أحد المنتديات أي منتدى تختار ؟؟
س/ وش أول قرار تصدره بعد ما تمسك الإشراف ؟؟

هذا السؤال من سيرفر الزعيم
يلاحظ عليك اعتمادك على اضافة الالوان على موضوعك .. يعني تراك خلصت بويتنا ولا بقى شئ للأعضاء
لا هذا السؤال الجد ..
أعتمادك على اضافة الالوان لماذا ؟؟؟

تقبل تحياتي ,.,


اذا ما رديت على الاسئلة أعرف من يخليك ترد عليها ;)

[c]بسم الله الرحمن الرحيم
[/c]
حــــــــبيبي
عــــ الهلالي ــارف


1/ السؤال التقليدي عرفنا بنفسك ( البطاقه الشخصيه ) ...؟

الأسم/ عبدالله صالح عبدالله ..
السن / 21 عام ولله الحمد ..
المهنه / طالب في كلية المعلمين بالدمام ( يعني مع شلة المدرسين ) بس حلوة المهنة طالب ;)
التخصص / حاسب آلي ..
الحالة / عزابي ولله الحمد ;)
شيء ثاني طال عمرك ;) ....



2/ طموح القلب الازرق داخل شبكه الزعيم وخارجها ...؟؟؟

طموحي داخل الشبكة أن تبقاء المحبة والأخوه بيني وبين أحبابي وأخواني الأعضاء كماهي وأن نكون كما نحن أسرة واحدة متكاتفه يجمعنا شيء واحد وهو حب الهلال ...
أما طموحي خارج الشبكة هو رضى الله سبحانه والوالدين عليّ ...



3/ بكل صدق وحقيقه انا تشرفت بمعرفتك عن طريق الشبكه ...
لكن هناك من يحاول ان يقطع الطريق بيني وبينك ...
وجه له كم ( لكمه ) بدون ضرب اي وجه له كلمه ...؟؟؟؟

بدري عليه .. وصدقني كلنا أخوان وحبايب ومافيه أحد بيفكر كذا ;)
<<=== أنواااااع الرسميات



4/ وضح موهبه القلب الازرق والى اين يذهب به الطريق ...؟؟؟

الموهبه نعمة من الله وصعبة أني أحدد شيء أنا موهوب فيه ، وهذي الشبكة موجودة ونحن نتعلم منكم ومن مواهبكم لنصبح موهوبين زي الموهوب




5/ لو قالوا لك انك راح نشوتك بوز من الشبكه ولازم تاخذ معك ثلاثه ياليت توضح لنا منهم ... مع ذكر الاسباب ..؟؟؟

نشوتك بوز ؟؟ قووية ذي !! ;) بس خلنا نجاوب ...
الغانم ، عشان أفككم من شره .. أبو هيا ، نذالة بس عشان ماتقرون مواضيعة .. الغريب ، عاد الغريب مع الشوته بيتشقق كرتونه



/6 كون كلمه من اربعه حروف توضح معني كلمه الصداقه ...
لكن اختار غير : وفاء ...؟؟؟

تنفع ( أخوه ) !! طيب ( صفاء ) وإلا أقلك ليه أتعب نفسي ( صديق ) ...

&&.. حياك أخوي عارف وصدقني أنا اللي أسعد بوجودك حبيبي ... مع ألف سلامة يالغالي ،،،


[c] [/c]


أخـــتي
الـمـمـلـكـة


س1 : وش يقرب لك عارف الهلالي ؟؟؟؟

أخوي عارف شخص عزيز عليّ وأكثر من أخ تعرفت ، عليه أيام تغطيتنا لمعسكر الهلال بالشرقية ، وأنا سعيد جداً على معرفتي بشخص بأخلاق أخوي عارف ...



س2 : ماهو أبرز موضوع شدك من مواضيعي ؟؟؟؟


والله مواضيعك كلها مميزة ورائعه ويمكن اللي في بالي الحين موضوع قصيدك في الميزان للمواهب الشعريه ...



س 3 : إذا كنت متابعاً للساحة الشعبية .. من هو الشاعر أو الشاعرة .. الذي تشعر بأنه لا يكتب ( لا تكتب ) الشعر ؟؟


أعذريني والله ما عندي خلفيه عن هالموضوع

&&.. يعطيكي العافيه على مشاركتك الجميلة ...

حــبيبي
حـبـي تـيـمـاوي


1) قلي بالله عليك وش رائيك في رسالة الجوال اليوم ?

يووووو .. عاد ترسل لواحد جواله إستقبال بس يموت قهر بعد الرسالة ذي ;)..



2) قلي لو تتعنطف وتتكرمن ماذا كنت تفعل بالعزيزية انت والمواهب قبل اسبوع بعد العشاء ?

نشتري خس وجزر وجرجير .. وش مودينا يعني طلعه وعشا وفله ;) بس ترى ما نعرف اللي في بالك ..



3) انت وين غاطس هالايام بعد الاختبارت مالك شوفه ?

والله غاطسين في منتدى المونديال .. زي منت شايف .. بس أبشر من الحين أبسنتر عندك وبأغثك في مجلسكـ(ـم) العام ..



4) بعد خرروج الارجنتين من كاس العالم ماضاق صدرك مثلي ?

إي والله .. من جد أنقهرت بس خلاص وش تسوي لعبت إنقلترا صح وقفلت ملعبها في وجيه الأرجنتينين ولا ننسا السويد بعد والأرجنتين هم اللي ضيعوها من إيديهم للأسف



5) الموهوب اعطاك موعد وطنشك كيف ترد الموقف له ?

ما فيها كلام !! أردله الموقف بمثله ;)

&&.. بس هذي أسئلتك ؟ إيه هين أنشوف بقيت أسئلتك زي ماتقول .. وحياك والله أخوي حاتم تحياتي لك يالغالي ،،،


[c] [/c]


الـغـالي
الــــحــــكــــم


- على ماذا يدل توقعات الجماهير السعوديه بان البطولة المانيا رغم ان الفريق المقابل البرازيل..؟؟

والله يالغالي اللي نشاهده أن هناك أغلبيه كبيرة في الجماهير العربية والسعودية تؤازر وتشجع المنتخب البرازيلي وخصوصاً ضد المانيا .. وما أعتقد أن هناك إلا القلّة يتوقعون ألمانيا تحرز اللقب



-هل حاولت يوم من الايام اختراع شي معين.. ماهو هذا الشي ولماذا لم تخترعه؟؟؟

إختراع !! لا والله ماحصل لي الشرف .. وبالنسبة لمحاولة ماأذكر بس أوعدك أني أفكر في الموضوع ;)..



اذا كنت متزوج وش الشي اللي ودك تقوله للي ناوي يتزوج او نصيحه تمنيت ان احد نصحك فيها قبل ما تتزوج؟؟

وإذا كنت ما تزوجت ؟؟
لا تشيل همّ ، النصايح واجد ، رح للخبرة في هالمنتدى وإلا أقول رح لعارف بعد ما يجرب تراه توه طازة ..

&&.. يعطيك العافيه أخوي الحكم على مداخلتك المميزة في الموضوع تحياتي لك يالغالي ،،


[c] [/c]


أحلى كرتون في الدنيا
الـــــغـــــريــب


1- لماذا اخترت هذا الاسم مع أن القلب يكون أزرق إذا كان راعيه يكوح تتن ؟!!


يكوح .. شف إذا قصدك سبب أختياري للأسم فصدقني أني أحس أنه فعلاً أزرق طبعاً من حب الزعيم ;) وإذا أنت تفسر غير كذ فأنا ما عرفك ..




رسالة البرنامج: لا يسمح التكرار للداجين ( الله يرجك )

كراتينك قديمة ..



من الذي يأتي بعدي كأفضل كاتب في المنتدى ؟!!

جدتي ... ولو؟! هذا أكيد عاصوف ;)..

&&.. يعطيك العافيه يالغالي ووسع صدرك علينا ;) وصدقني أني أعزك تحياتي لك يالغالي ،،

اهلين ابو العبد ;) ;)

ماودي احوس افكارك شكلك قاعد ترد

والاسئله كتير كتير

ابرجع لك =====> اسمعهم يقولونها

سلام ,,, بس ما ادري لقيتوا الرجال اللي تدورون عليه بالشرقي ( ت )

;)

تحياتي لك اخوي القلب الأزرق

ويعطيك العافية على المجهود الكبير اللي بذلته في تحليل وتقديم مباريات كأس العالم،،،

والله الأخوان ما قصروا ما خلوا سؤال ما سألوه بس عندي كم سؤال

1- فريقك المفضل في ايطاليا ====> اكيد اليوفي

2-اصعب موقف تعرضت له خلال تحليلك لمباريات كأس العالم

3- ايش رايك في الظلم اللي تعرض له الازوري

4- فيه واحد من اعضاء اللجنه الإخباريه لكأس العالم طلب اغنية مغنية المونديال ANASTACIA وكان متنكر بيوزر قناة كأس العالم
تتوقع مين يكون

5- تقبل تحياتي

يعطيك العافية على الجهود في منتدى كأس العالم واللجنة الاخبارية .. وكم كنا نتمنى ان يتواصل المونديال حتى لا ننحرم من التغطية المتميزة .. لكن ما قصرتوا ..

- السؤال الأول /

كيف تقيم كلا من :

- مونديال كأس العالم 2002

- مشاركة المنتخب وما الأسباب في المستوى الذي رسم اكثر من علامة استفهام ؟؟؟

- اللجنة الاخبارية للمونديال وعملها وهل وصل عمل اللجنة الى ما كنت تطمح اليه ؟؟

- الاقلام النسائية في المنتدى ؟؟


السؤال الثاني :

- في ظل الظروف الحالية كيف ترى حظوظ الزعيم في مباراة الذهاب في السوبر الآسيوي وهل يمكن ان يحقق اللقب وسط الظروف الحالية ؟؟

السؤال الثالث /

من خلال نظرة سريعة حول المنتديات

- تجد قلم رائع تتابع مواضيعه باستمرار ؟؟ وآخر تتوقع له البروز ؟؟

- قلم مؤهل للدخول لعالم الصحافة في المجلس العام وفي المنتديات الرياضية بشكل عام ؟؟؟

[c]


هلا وغلا

لا اوصيكم شباب الله الله بالاسئلة الاحترافية

اخوي القلب الازرق

عملنا سويا و كنا قلب واحد في تغطيتنا لكاس العالم

فالف الف شكر لتعاونكم مع الجميع

السؤال الاول

فيه لقاء مباشر مع سامي الجابر ولك ثلاثة اسئله تسال ابو عبدالله فيهم

ياترى ماهي هذه الاسئلة الثلاثة

السؤال الثاني

بيت شعر دائما على لسانك


شكرا لسعة صدرك

تحياتي

[/c]

الـعزيز الـغالي
عــــاصــــوف


س1) بما إنك أحد الداجين المؤسسين لحزب الكاريكتير فهل أنت ارهابي؟ من هو الارهابي؟و ما هو تعريف الارهاب؟

الأرهاب في المنتديات هو الخوف من شخص أو مجموعة أشخاص وعدم التنبؤ بماقد يفعلونه بين اللحظة والأخرى ( يعني تجلس على أعصابك ويدك على قلبك من هذا الإرهابي ) لا يجيب فيك العيد ;) وإذا أنتوا يالمعارضين تشوفوننا ( فريق الكاريكاتيرات ) إرهابيين ?! ( في ظل ظروفكم المتقلبه ) فأنا أعترف ... ;)



س2)هناك إشاعات تقول إنك تحولت للقلب البردقاني ؟

هههههههه عندي سؤال واحد بس؟؟ منهوا اللي طلع هالأشاعة ؟ ( وش فيك تضحك ) أهم شيء أنك فهمت قصدي ;)



س3) قد تهاوشت أنت و ولد جيرانكم على من يوقف موتره تحت الشجرة؟

أبشرك إحنا متطورين شوي ( لسى في أخلاق ) إللي يسبق ( يلبق ).. على قولت ولد الجوف ;)



س4) يوم إنك بزر وش يدلعونك: عبودي ولا عبيّد و لا عبادي ?

أنا صراحة ما أعرف الدلع ولا دلعونا زيكم ;) ياعصوفي



س5)دخلت بيتك ولقيت زوجتك متلحفه في الصالة .. وبغيت تمزح معها قربت من عندها وسحبت اللحاف بقوة .. ولكن ياللهول طلعت الشغالة
لو صار معك هالموقف بصراحه وش تبي تسوي

بصرّف أمها وأنفخ في وجهها وأقووول روحي جيبي مويه ...;)



س6) يومك في الابتدائية تروح للمدرسة على رجليك ولا على أقدامك

الحين هذي أختيارات .. والله ما أذكر يالغالي بس الظاهر عليهم الثنتين ..;)

&&.. حياك والله يا عصوف .. نوّرت الموضوع يالغالي ،،


[c][/c]

أخــــــوي
حــبي سـامي


وش رايك في سامي الجابر ؟

أبوعبدالله؟ شهادتي فيه مجروحة .. لمالهذا الشخص معزة في قلبي ،،



بوش ؟ وبن لادن ؟

ماعرفهم



وش رايك في شبكة الزعيم؟

مهما أقلك وأحكيلك عنها لن أوفيها حقها .. فهذه الشبكة لها مكانه عزيزة جداً في قلبي وهي وكما هو معروف أنها ( زعيمة الشبكات ) بلا منازع ...

&&.. يعطيك العافيه حبيبي على مشاركتك الجميلة تقبل تحياتي ،،


[c][/c]

عــزيزي وحبيبي
أبو سـلـيـمـان


من هو حيدر ؟ ومن هو حسام ؟

هو فيه أحد ما يعرف حيدر أما حسام والله مادري أسمعك تسولف فيه أنت والبارق ذاك اليوم .. بس لا تعلمون حبي تيماوي ;)

&&.. تحياتي .. وأرق أشواقي .. لك يالغالي .. ،،


[c][/c]

عـــمّـــري
كــايــدهــم

@ من هو افضل كاتب بعدي .. وما تلاحظ ان الغريب يتميلح ؟

وإحنا ما صدقنا وخلصنا من فلسفة الغريب تجي أنت .. أحسن واحد يكتب فيكم ألاثنين حبي تيماوي <<== لاحظ مافيه بعده أحد موووتوا قهر أنت وياه



@وش نصيحتك للي ناوين يتزوجون ؟

يكشخون كشخت الموهوب يوم راح يستقبل لاعيبة الهلال .. وبعدين تراني مثلك عزابي !! وإلا تبيني أنصحهم وأجيب فيهم العيد



@ لو خيروك بين فنيلة مصطفى ادريس ولا محمد نور ... وش تخـتار ?

ههههههههههه لا مابي فنايل

&&.. يعطيك العافيه حبيبي وألف شكر لك على مشاركتك الجميلة ( وش فيك مقهور ) صدقني حروف المشاركة هذي أنتهت وإلا كان قلتلك اللي في خاطرك ;) .. علعموم تقبل تحياتي ونبي نشوفك قريب مع ألف سلامة ،،،

[c]الأخ الكريم .. القلب الأزرق
تحية طيبة ...
يعطيك العافية على تعاونك الكبير مع جميع اعضاء اللجنة الاخبارية في تغطية احداث كأس العالم والشكر لك لجهودك ..

نبدأ مع الاسئلة :

* التشاؤم والتفاؤل أين يقعان في شخصيتك ؟؟

* سؤال لم تجد له إجابة حتى الآن ؟؟

* سؤال تخاف أن تطرحه على نفسك ؟؟ ولماذا ؟؟

* اين يجد القلب الأزرق نفسه ؟؟

* منتديات الزعيم كيف تراها وكيف تتمناها ؟؟

* كيف وصل القلب الأزرق لشبكة الزعيم وهل لنا ان نعرف الموضوع الأول لك في الشبكة وفي اي منتدى ؟؟؟

وبالتوفيق للجميع [/c]

حـــــبيبي
abu3ziz


*وين كانت بداياتك في الشبكه المعطاء شبكه الزعيم ,, يعني في اي منتدى ؟

بكل تأكيد منتدى الجمهور الهلالي أولاً بالإضافة إلى منتدى الرياضة العالميه ...



* كم ساعه تقريبا تقعد على النت يوميا ؟

من ثلاث إلى خمس ساعات تقريباً إذا ماهي أكثر ...



* بما انك من سكان الشرقيه ,, هل تحب البحر ,, اذا كان الجواب نعم متى تحب تكون انت والبحر في تبادل خواطر ؟

لا .. صدقني مافيه شيء يشدني للبحر ( وأنا الوحيد في العائلة كذا ) ماحب لا البحر ولا طلعات البحر .. طبيعة فيني !!



* بعد خروج البرتغال والارجنتين ,, السؤال هو وش كانت اول لحظات اطلاق الحكم عن خروج هالفريقين ؟

الأستغراب والدهشة والقههههر !!



* ماهو سر هذه الكلمه ( يالداجججج ) وليه تكتبها بهذه الطريقه هل هي حركه فنيه ام ماذا ؟؟

ما علينا من حركة الكلمة المهم ليه أكتبها لك وبعدين اللي يشوف داجين لازم يسوي حركات فنية زيهم ;)

&&.. تحياتي لك يالغالي .. والله أني سعدت بمشاركتك وبكلامك الرائع اللي ياليت أستاهل نصفه يعطيك العافيه أنت والله لا يحرمنا منك ،،،


[c][/c]
أخـــــوي
Fc BaRcElOnA


زرت الكويت ؟ حلوه ؟

الحقيقة لم يحصلي شرف زيارتها إلى الآن .. وأن شاء الله في القريب القادم أزور هذه الدوله الشقيقة ،،

&&.. الشـــكر لك أخوي تقبل تحياتي ،،،


[c][/c]
أحلى صوت في الدنيا
الـصـوت الـهـلالي


س1/ من هو أول من تعرفت عليه من خلال شبكة الزعيم ؟

أول من تعرفت عليه ياطويل العمر هو حبيبي وأخوي هلالي الجوف الله يخليه لنا ذخر ..



س2/ لو كنت مكان يوسف الثنيان وهو يشوف مباراة السعودية وألمانيا وش كان قلت على ناصر الجوهر ولاعبين المنتخب في تلك المباراة ؟

أباقول أحـــسسسسسسسسسسســـن .. لا تصدق .. بس وش تبيه يقول مسكين

&&.. يعطيك العافيه أخوي ثامر على مشاركتك التي أسعدتني حقيقة تقبل تحياتي وأشواقي ،،،

أفااااااااا .... عظيم ..

يا أخوي سألتك عشر أسئلة بس ماراحوا..

ولذك ننحاول نعيد البعض ..

1- لو واحد اتصل عليك وقال لك لقيت رقمك مكتوب على خمسمية ريال مرمية بالأرض.. وش بيكون ردك عليه..؟؟؟؟

2- لو واحد دايم ترسل له رسايل بالجوال.. وهو معطيك أشكل.. وش موقفك تجاهه..

3- واحد قال لك إنه بيروح عزيمة ولزم عليك تروح معه وإشترطت إنه يكون حدك الساعة 11 ولكن راحت عليكم ولا رجعتوا إلا حدود الساعة 2 أو 2.30 .. ولا اعتذر منك ولا شيء.. وش بتسوي له..

4- ما أكثر ما يعجبك..وما يزعجك في شبكة الزعيم بشكل عام ومنتدى المجلس العام بشكل خاص..؟؟؟

5- هل صحيح أن شبكة الزعيم تعرفت من خلالها بأشخاص لو تفحط ما تعرفت عليهم أبدا.. مثلي..

6- ماذا يعني لك كل من ..

المطر - البحر - الهلال - القهوة - الكامري ( ولها لونين ) - سيكل ستطعش..


الله ما ودي أطول ولكن لو جاء بخاطري شيء بجيك على طول ..

وبالتوفيق أخوي ..


أخوك / البارق

اخوي القلب الازرق اذا جت فاتورة التلفون ومسك ابوك ومشطك بلخيزرانه وش يكون شعورك؟؟؟
(ملاحظه)
اذا كنت انت اللي تدفع الفاتوره فسلمني على الراتب ؟

2- ماهي اخر مره صطحت الكوره على الجيران وهل رجعوها لك ولا شقوها؟؟؟

3- وهل فعلا ان مادونا تقربلك ولا تشابه اسامي ؟

وشاكر على على اهتمامك اخوك الرايق....