..: تغييرات كبيرة في نظام دوري أبطال أوروبا :: للنقاش :: :.. - صفحة رقم 2 - نادي الهلال السعودي - شبكة الزعيم

the boss CR7 · #16 07/02/2009, 01:32 AM

مشكوووووور والله ماقصرت............

عاد تبي الحق,,والله انها رهيبه وكويسه,,,يعني الاندية الضعيفة ماراح تتأهل الا انها تقابل اندية مثل اياكس او ايندهوفن او بنفيكا مثلا او من اندية فرنسية..ولو فازت على هالاندية فهم يستاهلون وماراح يكملون في المجموعات

الشي اللي عاجبني فيها مررره نظام دور ال16 بيخلونه في اربع ايام

والله انه قوي مره يعني بنشوف تقريبا كل المباريات المهمه,,مو مثل هالسنه بتفوتنا غصب كم مباراة مهمه

ويعطيك العافية واهم شي الثلاثي الايطالي والانجليزي والاسباني مانقصوا منهم

IL GLADIATOR · #17 07/02/2009, 12:28 PM

مشكور أخوي هلالي موت

على الشرح ونصيحة اذا لك أخوان يختبرون لاتشرح لهم

انا صراحة اتمنى يرجع النظام القديم قبل خمس سنوات دور الستة عشر مجموعات كل اسبوع يلعبون ثلاثاء واربعاء طول الموسم رغم أن فيها ارهاق للفرق

وعلى ماذكر ان فيه قرار كان بيطبق أن البطل اذا ما جاب مركز من أحد المراكز المؤهلة في دوري بلاده يتأهل بدلأ من صاحب اخر مركز

الهلالي 11 · #18 07/02/2009, 06:57 PM

إقتباس


	اللي يشجع تشلسي يغمض والا يطمرالصورة ماله داعي يجي ابو غامد يصيح علينا مهما كان الزم ماعلينا نفسيته قبل الاختبارات :

يا ويلي عليك جملة عن الموضوع كله

<== بلاه ما فهم غيرها

حيا الله ابو حميد

وينك عن الرابطه

بالنسبة للموضوع بصراحه الحين عرفت عنه من موضوعك ... وبصراحه فعلا يقلع ام السخافه بلاتيني ناوي ينافس ابن همام وربعه

سبحان الله قبل فترة مر علي خبر انه يقول رح احط نظام وقواعد عشان اخلي كل الفرق متساوية وكلها لديها فرصة للربح

والحين يو قريت موضوعك قلت والله الرجال صادق

هو يبحث عن ان الرياضة تصير شعبية بكل مكان وتنتشر ويصير فيه فرق جديده له اسم باوروبا ... بس مع احترامي ما حسب للمشاهدين اي حساب

يعني تخيل نهائي التشامبيونز 2012 بين زغرب المدري شسمه والنصر الليشنشتايني

فعلا قرار سخيف كسخافة بلاتيني ... يعني اصلا مع وجود ومشاركة كل هالفرق الكبيرة قاعدين نشوف فرق صغيرة قاعده تثبت نفسها ... ليه قلة الحيا

ما اخبي عليك موضوعك لحسه من جد والله اني استغربت شلون فهمته وترجمته

يعطيك العافية ابو حميد

يسلم راسك · #19 07/02/2009, 07:03 PM

طيب ولايهمك

..

خمسه وعشرين حرف

abo_nasser · #20 08/02/2009, 01:12 AM

قريت الموضوع مرتين وانلحس مخي..

قلت اقرا ردود الاعضاء بلكن افهم شيء بس ما عندك احد..

الخلاصه
احس بلاتيني جاب العيد بدوري الابطال..

تشكراااات مدير..

سلاااااااااااااااااااااااااااام

THE COACH · #21 08/02/2009, 01:53 AM

السلام عليكم

إقتباس


	اللي يشجع تشلسي يغمض والا يطمرالصورة

ياخي تذكرت تيري يوم يزلق الله لايعيد ذيك اللحظة

بالنسبة للموضوع ... أنا أشوفه ماتغير شيء كبير يعني مثلا هالموسم شفنا لقاء شالكة و الأتلتيكو وبالمجموعات شفنا فريق هوار العراقي ممكن هذي تكون صدفة لكن شفنا فريق هوار جابوا نقاط أكثر من البي إس في مثلا

وبعدين لا تنسى إننا حنا كمشاهدين فقط مايهمنا إلا المتعة لكن بلاتيني يهمه المتعة وأيضا تطور الكورة في القارة وإن التطور مايكون محصور بدوريين أو ثلاثة

يمكن بالقريب العاجل مانشوف فيه إضافة للأبطال لكن بعد خمس سنين الكورة بــ الديرة اللي تعبت حلقك

مثلا تكون متطورة .

سؤال بريء يا أبو حميد ... هل فيه أي علاقات غرامية بينك أنت وهالأيقونة

يعطيك العافية على الشرح اللي مهوب زين

.... بالنسبة للوظيفة ترى المنتدى يبيله سباك أشوف السقف ينقط من فوق شف الزاوية اللي هناك فاضية لا وحاطين طاسة عشان الماء <<< خش جو الولد

سلااام

دمـوع · #22 08/02/2009, 07:13 AM

أحمد

.. مره ثانية لا بغيت تشرح امور مثل كذا جيب معك مسطرة و خرائط .. لحست مخنا

انا ما اقول الا الله يعين اللي بيقدم مباريات فيها اندية ما احد يعرفها << جالس افكر الحين من وين بيجبوا معلومات عنهم بس

بيني و بينك هي فيها سلبيات و ايجابيات ..
المش حلو انك تشاهد مباراة ما تعرف عن الفريق الثاني شيء !!
و الحلو انك تعرف ثقافات دول و اسماء ما كنت تعرفها قبل

و يمكن انديتنا العربية بعدها يخطفوا لهم لاعبين من هالاندية الأوربية الفاشلة

بلاتيني مع وجهه مسوي فيها يبي يغير شيء
انا من اول ما عرفت انه منع الاحتفال على الملعب و قرر يكون حمل الكأس بالمنصة و انا غاسل يدي منه .. يقاله يبي يقلد علينا يعني

بس حلو ان المباريات بتكون على اربعة ايام .. مع اني اتوقع ان هالقرار اضر بالإتحادات الأوربية المحلية و لخبط جدولتها << يسمع بالجدولة واجد هالأيام بدوري المحترفين تبعنا

و حلو بعد اننا بنشاهد المباريات زي ما تعرفوا على الجزيرة الرياضية السنة الجاية .. و بنستمتع بتعليق اولاااااااا لاااااااا لااااا

و لا يهون السامج أبو جادة بعد

أبو حميد في سؤال يقرقر بنفسي

.. بيني و بينك / شنو يعني يتقابعون ؟!

دمـوع

اليوفي و بس · #23 08/02/2009, 07:42 AM

أبو حميد لا تتكلم في أمر ما تفقه فيه

و بعدين من تكون علشان تنتقد بلاتيني

________________

أنا يا الدلوخ راح اشرحلكم ماذا يريد بلاتيني

<<< احس اني تفلت

تذكرون قرار 6+5

و إتجاه الإتحاد الأوربي لمنع تدخل أصحاب الأموال في تخريب كرة القدم

هذا القرار ما هو الا بوابة صغيره للاعبي الدول الأقل شئنا في كرة القدم لكي يظهروا على الساحة الأوربية

و لكي يكون لأندية هذه الدول حصه من المال الذي يتواجد بقوه في دوري الأبطال الأوربي

بلاتيني هو رئيس الاتحاد الأوربي لكرة القدم و هو يضم الجميع بما فيهم البوسنه و لشفتينان << يلعن ام اسمهم مو راضي يجي معي

و عليه العمل لخدمة الجميع و ليس فقط ايطاليا و اسبانيا و انجلترا !!

ثم ما هي المشكلة بأن نرى فريقا روسيا أو بلجيكيا أو حتى هنديا << صحصح يابو الشباب وش دخلها بأوروبا

هذه روسيا في أمم أوروبا أبهرت الجميع بفريق لا نعلم نصف أسماء لاعبيه قبل البطولة !!

و زينيت الروسي و سيسكا موسكو مثال على أن الأموال لو صرفت محليا لحققت فريق جيد أيضا و ليس بالضرورة ان يكون الفريق بأكمله من الخارج !!

هدف بلاتيني على المدى البعيد هو التالي /

أن يقلل من حجم الأموال التي تضخ للاعبين و للأندية و التي تتسبب في ديون عملاقة على كرة القدم .

الحد من ظاهرة رجال الأعمال الذين لا يحبون كرة القدم بل يدمرونها بإستخدامهم الأموال في جميع الإتجاهات .

تقارب مستوى باقي الدوريات الأوربية مع البطولات الـ 3 أو الـ 4 الكبرى و هذا لن يحدث اذا كان جميع نجوم تلك البلدان

يغادرونها لأجل المال " و ما يقاس على مستوى الفريق الأول يحدث أيضا على مستوى الصغار "

إعادة الهويه للأنديه فالانتر يجب أن يكون ايطالي و الارسنال انجليزي و هذا أبدا لا يلغي الإحتراف بـ 5 لاعبين يشكلون تقريبا نصف الفريق .

بلاتيني بكل بساطه اذا استمر في عمله سيعيد لنا الوفاء مجددا للقميص و سيجعل كل البطولات الأوربية كبيره

و ليس فقط دوري الأبطال .

فيلسوف · #24 08/02/2009, 09:45 AM

أحمد ياخي حرام عليك وش هالشرح

والله جد عجزت افهم اي نقطة هههههههه

مدري عندي بطئ استيعاب ولا انت جايب العيد ومدخل الحابل بالنابل

واتوقع الثانية هي الاقرب

فهمت من ردود الشباب اكثر من شرحك ههههههههه امزح والله (قلب)

على حسب اللي فهمته اتوقع بلاتيني يبي يدعم أندية بلده للوصول للأدوار النهائية ...

يامال العافية ابوحميد ...

فمان الله

أبوحمد _ Mi · #25 08/02/2009, 09:47 AM

صبحكم الله بالخير

حيالله احمد + موضوعه اللحسة

اللي فهمت يا جماعة ابلخصه بنقاط ..

1- اصحاب المراكز الثلاث الاولى تتاهل مباشرة بالدواري الكبيرة << وهذي واضحة .

2- اصحاب المركز الرابع بالدوريات الكبيرة يبي يلعب مباراة واحدة فقط في التصفيات , وهو نفس الامر المعمول فيه حاليا , يعني الفرق فقط انه بدال ما يلعب الثالث والرابع تصفيا صار الرابع , ولاهوب لاعب الا مباراة وحدة بس , يعني متاهلين بنسبة كبيرة .

3- التصفيات التمهيدية بدال ما تصير مجموعة وحده راح تصير مجموعتين بها الطريقة :
أ/ تصفيات الزلايب , وهي الدوريات المصنفه من 47 الين 16 , وهذولي بيتاهل منهم خمسة لدوري الابطال !! (بعض الفرق تلعب مباراة وتتاهل وبعضها يصل الى اربع مباريات ويتاهل على حسب التصنيف) << هنا النقاش .

ب/ تصفيات القويين

وهي اصحاب التصنيف من 15 الين 1 (طبعا غير اللي متاهلين مباشرة) بحيث ما يتقابل اصحاب التصنيفات الخمسة الاولى مع بعض , بيتاهل منهم خمسة مباشرة والباقي من هالمجموعة دايركت لاحسن بطولة باوروبا

(الويفا كب).

إقتباس


	- مباريات دور الـ 16 بتكون على مدار اربع ايام بالذهاب واربع ايام بالاياب .. الذهاب 16 -17 و 23 -24 فبراير .. الإياب 9-10 و 16-17 مارس .. النهائي راح يكون يوم السبت بتاريخ 22 مايو 2010

هذي النقطة حليوة بصراحة , يعني بدال ما تكون مباريات الذهاب بيومين راح تكون باربع ايام , يعني اللي يشجع الليفر والريال واليوفي والبايرن ما تتعارض المباريات عنده

اللي اشوفه من خلال فهمي ان المتضرر من هالقرار هي الدول اصحاب التصنيف من 6الين 15 , لانهم من زمان يدخلون التصفيات ويبارون فرق زلايب ويتاهلون اما الحين بيقابلون اندية التصنيف الاكبر ..
(سبارتاك , بنفيكا , سبورتنغ لشبونه , اياكس وايندهوفن , رينجرز وسيلتيك , ديناموكييف , اولمبياكوس و بانثيونايكس , سبارتا براغ ) وهالطقة هي اللي تبي تتاثر ..

والله يا جماعة شكل شرحي مثل شرح احمد

L E A D E R _ 9 · #26 08/02/2009, 10:35 AM

^^^

خلاص وصلت

أحمد قريت موضوعك الصباح وبالليل والنتيجة سلبية

لكن مع شرح ابو حمد وصل الموضوع ، لكن أشوف إن الحاجة الحلوة بهذا النظام هو متابعة مباريات الاندية القوية ، بعكس النظام الحالي ماتشوف الامباراة وحده بس .

وبانتظار التجربة .

Madridi · #27 08/02/2009, 11:38 AM

هلا ابو حميد

الطريقة لها ايجابياتها وسلبياتها

ايجابياتها انك راح تشوف اقوى الفرق اللي تتأهل من الدول الكبرى على طول في المجموعات وماله داعي فرق كبرى تلعب التصفيات . بمعنى انه فيه انصاف للدوريات العظمى .

سلبيتها الكبرى انك بتشوف فرق مدري وش تبي تلعب دوري الابطال وفرق تعمل فارق كرينجرز او سيلتيك مثلا لا تجدها في دوري الابطال وطبعا كله عشان يعطي سمعة للدوري الاوربي .

هذا راي بناءا على ما فهمته .

لي رجعة لو وجدت شيء ارد بخصوصه

hilalemooot · #28 08/02/2009, 03:34 PM

الشرهة على اللي يجلس ساعتين يترجم و يحوس ويحلل علشانكم

يا حبيلكم بس .. رد ابو حمد فيه تلخيص وافي لللي ابوصله

ابو حميد توقعت انك بتطلع عذر لـ مسيو بلاتيني خخخخخخخخ

وسام .. يتقابعون يعني يتبارون فيما بينهم هههههههههههههههههههههههه

الزعيم الروقي · #29 08/02/2009, 03:58 PM

يعطيك العافيه على ها الشرح التفصيلي ...

هلالي ويحب الحارثي · #30 08/02/2009, 04:11 PM

والله اني اللحست ومدري وش تقول