حــبــل الــكـذب قـصـيــر ..! - صفحة رقم 2 - نادي الهلال السعودي - شبكة الزعيم

Queen of Hearts · #1 06/02/2009, 07:59 PM

الموضوع بالصميم

الصراحه كلنا نعاني من بعض البنات الي نعرفهم اما بالكليه او صديقات ... يعني كلهم يكذبون ولا بعضهم كذبهم من ابوريالين

بعضهم والله تدرين انه كذب بس تخشين معاه تقولين فلم روعه بس تحترين الجزء الثاني من قوة الشلخ الي فيه

لدرجة ان وحده من البنات اعرفها والله تكذب وتكذب وكلنا ندري بس نعطيها على جوها .. اذكر يوم ما كملت كذبتها قابلناها بعد الاجازه .. اول سالفة قالتها اكمل لكم سالفتي ذيك

.... يالله ما تنسى .. تقول كذبتها وتصدقها مشكله والله

ولي عوده لموضوعك اقرا بعض القصص المضحكه ...

عوافي خيتو ...

Hictar · #2 06/02/2009, 01:07 AM

وأنا خالتس عندنا واحد بالدوام ( شايب منتهي ) رجله والقبر
أول ما عرفته كنت أحترمه لسنه ، وأسمع شئٍ عظيم
فيه أمور أعديها ، وفيه أمور صعب للغايه
مثال بسيط من أحاديثه ، يقول فيها :
كان فيه سعودي متواجد بمصر ، وبآخر الليل طلعوا له 4 رجاجيل
وطقوه ورضوه رض وسرقوا اللي معه
طبعاً السعودي ما سكت
دبّر له ( رشاش ) <---- ( الرجاء ملاحظه إنه شراء رشاش من مصر )
وقام يدور على العصابه اللي سرقته
ولقاهم ( ونفضهم بالرشاش أربعتهم ) <--- ( مع ملاحظه إن السعودي عنده حس أمني وأكتشف تواجد العصابه بين 12 مليون بالقاهرة ) !!!.
بعد إرتكاب الجريمة النكراء ( السعودي إنحاش ورجع للمملكة )
الأمن المصري أكتشف الجريمة ، وإكتشف الفاعل
وطالبوا الحكومة السعودية بتسليم ( القاتل )
والحكومة السعوديه رفضت ( بداعي إن السعودي أخذ حقه بيده ) !!.
______________
وأنا أسمع السالفه هذي كان صوت المعلق الرياضي ( فارس عوض ) يرن في أذني ويقول ( يا ربي رباااااااااااااااااااااااااه )
بكل جمله يقولها أرد عليه وأقوله ( جميل - جميل - رائع )

بالبداية إحترمت الشايب ، لكن بعدها صعب - صعب أعدي له أيه سالفه !!.
بس حالياً ما عاد يفتح معي أيه سالفه ، من كثر من حشرته حشر
بكل سالفه يقولها ( أحجّر له فيها )
وصرت ما أنفع له

____________________
أنا أعترف إني أكذب بس بإستهبال ، وبعطيك مثال
لما أشوف واحد أصغر مني بالعمر ، أجلس أتريق عليه وأقوله :
زمن ، من أول كنا نسافر على رجولنا وعلى النياق
وننام الظهريه بعزل القوايل بدون مكيفات
وأنتوا يا عيال هالوقت كل شئ موفر لكم

يرد علي ويقولي : إيه إسلم ، أكيد أكيد مصدقكك كمل

أقوله إنت قبل 26 سنه كنت مولود ؟
يرد علي : لا
أقوله خلاص ما تقدر تكذبني

لأن التطور كله جاء بعد ولادتك بثلاث أيام

أنا أكبر منه ومن حقي أكذب عليه

تميــــ100ــه · #3 06/02/2009, 02:58 AM

مواقفكم تفطس من الضحك خصوصا الي مسوي المنقذ

ولا صديق مواصل عاد هذاك متمرس من الكذب قصص دراميه

ولقاهم ( ونفضهم بالرشاش أربعتهم ) <---

انا بالنسبه لي مستحيل اقول للي يكذب على انت كذا قسم بالله ينرحم لو اقوله

بس الي يبط سبدي الي البنت لمى تكذب بسالفه بعدين ترجع تقولها بسالفه غير الاولى

لانها نست السالفه الاولى ودي اقولها ماحد الله على هالشقاء والتأليف وش تستفيدين

فيه مثل يقول ( على ضعيف الذاكر الا يكذب ابدا )

بالمتوسط كان لي صديقه كذااابه مررره مثلا تقول الزبايل حقتنا من ذهب

ولا مره قالت ان ولد عمي توفى وجا الملك فهد يعزينا وجا بعد بساعه الوليد بن طلال وجلسنا نطل عليهم وانهم متهاوشين مع بعض ولا يحبون بعض ويوم شاف الملك فهد الوليد قام بسرعه وطلع

>>ياكبرها عن الله

عاد الحين اذا شافتني بالجامعه تصدد يقالها ماتعرفني تخاف اذكرها بالماضي المرير

موضوع خطنطر

فجر الرياض · #4 06/02/2009, 04:08 AM

هلا وغلا بـ الشانزليزيه

مبرووووك العطله والله يفرحك بنجاحك يارب

طيب مدامنا معطلين وش رايك نتمشى هنا

ودي اقهر اللي ودهم يكشخون بتنوره سوداء

والحين اكيد جالسين يذاكرون

ياحبي لك اثور

ماعلينا نرجع للموضوع

ياربيه ذي حالتها صعبه اجل منصة هليوكوبتر بالبيت

بالله يالشانز ماضحكتي في وجها

بجد ماتترقع بكل الجهات

والله اللي كذا ماتدرين كيف تتصرفين تسلكين والا تستنكرين

مع ان الاستنكار اثناء حديثها واضح في وجهك

يعني وش رايك باللي 24 بطيارتهم الخاصه

يعني مايجلسون ابد هنا كل دقيقه مسافرين

هذي وش تردين عليها اها طيب اووكي يعني تسليك

تجيك من بكره بسالفة هالطياره الخاصه

ارحمينا يابنت الناس شلون كل شوي تسافرون وانتي ماغبتي عن وجيهنا

بغض النظر طبعاً عن الطياره الخاصه

يعني توضحين لها بشتى الطرق انك مو قادره تصدقين وهي مستمره

مادونا نقولها في وجها خلاص خلاص كذب ترى مو مغفلين لهالدرجه والله اكتفينا باللي تقولينه عشان ماتنجرح والا تتفشل

الله يهديها

بجد بعض الاعمار تستغربين منهم هذي الصفه يعني وصلت لهالعمر وانت تكذب عادي عندك والله مشكله

سوري كثرت حكي

يعطيك العافيه الشانزعالموضوع الحلووو والاسلوب الاحلى

بيبسي وسنكرس · #5 06/02/2009, 08:14 AM

وعليكم السلام ورحمة الله وبركاته..

الكذب عندك وعندنا خير..

انا اتحمل كل الناس الا الكذاب يوووه.. وحتى والله ما اعرف اجاملهم.. اذا هزيت راسي يا جودي

كانت معي وحدة بأولى ثانوي سافرت برا عند خوالها غير سعوديين وتقول اني انا وبنات خوالي رحنا بالليل وسرقنا سيارة بالحارة وشغلوها بالاسلاك ومشوا به

وصديقة بنت عمي يوم انهم بالابتدائي تقول بالخميس والجمعة يخيمون بلندن << خيام ولندن وشلون تجي

ومعي الحين بالكلية وحدة والله اذا اقبلت ودي اترك الجلسة كله واقوم

من نصباته القيمة.. وحده من معارفه سلقت المكرونه بعلبة بلاستيك .. معليش حتى البزارين يعرفون ان البلاسيتك مايحط عالنار

موضوعتس ميه ميه تكلمتي عن ناس ما اواطنهم..

الشانزليزيه.. الله يعطيك العافية

أختك,,

أوَار · #6 06/02/2009, 10:44 AM

.

قال عليه الصلاةُ والسلام :
( إن الكذب يهديٍ إلى الفجور، وإن الفجور يهْدي إلى النّار وإن الرجلَ ليكذبٌ حتى يٌكتب عند اللهٍ كذاباً )

الكذبّ صِفةَُ ذميمة ..
نسأل الله العفو والعافيه

موضوع جميل جداً
شوشو بارك الله فيِك

Al Suwalih 9 · #7 06/02/2009, 07:29 PM

وش بقيتي لعميد الكذابين؟

اتمنى زي ما قال الصخرة

اما اللي تقول كل اثنين تروح لندن ومساري

والي جواد صديق ولد عمها

من حلاته هالجواد ال***

وخير ياطير

ياسر القحطاني كان يلعب معنا كورة ببراحة في العقربية ايام كنت بثاني ثانوي وهو اظنه بالمتوسط

اختي زميلتها بالمدرسة اخت يوسف الثنيان

اجل ما بقى الا حثالة تقول لي جواد

LBa your heart · #8 06/02/2009, 07:54 PM

وعليكم السلام <- مدري انتي سلمتي ولالا

اول ماشفت العنوان تذكرت خوينا الله يهديه ..

كذااااب كذااااااااااااب كذااااااااااااااااااب (اكبر تسذوب )

والله كل ماقابلته يسدح لي كذبه انا وانا حتى كل ماقابلت الشله اسألهم اقول وش اخر كذبة لخوينا

كل ماجبنا طاري موضوع دخل عرض وقال انا سويت زي كذا

اذكر مره دخل علينا بالاستراحه وابو الشباب كان مجنتل مو من عادته طبعاً

قلت من وين جاي قال والله توني جالس مع بنتين بالفورسيزن يلعننن يومك يالنصاب

ولا مره كنا جالسين بالمخططات ونسولف سوالف سياسيه ومرت دورية من بعييد قال اسكتوا ترى الدوريات تسمع من بعييد

شايفنا بزران

بتعب لو اذكر لكم سوالفه ومالها داعي يمكن يدخل الزعيم بالغلط ويشوف ردي

لو احلف انه باليوم يكذب خمس كذبات

بس هالايام كل ماسولف لنا قلنا انت كذاب نعطيه كااااش

بس ماينفع معه

هو رجال وكريم ومايقصر ويحب يساعد الشله بأي شي ولا يقول لا

لكن عيبه الوحيد الكذب

الشانزليزيه · #9 08/02/2009, 02:21 PM

,’

ياهلا بالكل

أوووف كلكم مليانين من داخلكم على الكذابين

حسيت إني القط الذي علق الجرس <

,’
اعذروني لو معي وقت رديت عليكم

بس للأسف وقتي غبي

الصخرة

أنطونيو

الدهينة

المـشـاغـب

سنتياجو هلالي

دمي أزرق وأحب الأبيض

sowaid

هامور البورصة

محامية

برنسيسة الهلال

M!ss 7ub

كل الحياة

ماجد مقبل

hilali -arsenali

مواصل من عام 1413

تميــــ100ــه

فجر الرياض

{..هلا بفجر

تبين نتمشى نتمشى ماعندي مانع

معطلين وقاضين ماعندنا شيء

بس عشان نقهر بعض الناس

حتى إنتي بعد غاثتك بالتنورة السوداء فت فت

يالييييييل ذا المبزرة ولا لا يافجر

ياحبيلها هالبنت

الله يوفقها ويوفق الجميع ..}

بيبسي وسنكرس

القناصة الهلالية

Al Suwalih 9

Lba your heart

فديتني هلاليه

,’

شكرا لكم

ĐЯ.3βǪǪĐ · #10 08/02/2009, 03:11 PM

موضوعك جا ع الجرح

و خليتيني ارجع لايام ثالث ثانوي

لان كان عندنا واحد محترف جايبينه من ايطاليا <<< انتقال نهائي

يقول انه طاق 7 رجال مباحث

عشان يفك خويه

طلع للكويت و اتعرف على وحدة معها همر اصفر

و يوم اعجبه عطته له

نقول له وينه طيب ,,, يقول صدمت فيه و بعته

بس تراك خذيتي ذنب الولد

انحشر حشر امس

ذكرتيني بسوابقه

و مشكورة مرة ثانية

عقد الياسمين · #11 09/02/2009, 11:14 PM

"يوم كنت صغيرة.. كنت ما أمشي خطوة الا بكذبة

"
المهم مرة كذبت كذبتن العالم ما صدقوها وراحوا عند اختي الغير شقيقة عاد ذي اختي ما تواطني تحب تسوي لي مشاكل

ما صدقت خبر يوم قالوا لها سالفتي

قالت لااااااااا ذي خررررررررراطة

عاد جو لمي وانا اتمشى بين المروج والبساتين في المدرسة والقوا القبض علي

مسويين السي آي ايه على غفلة

قلت لهم هيه هيه ايش على بالكم يا بابا !! روحوا بس مالكم خص فيني اكذب على كيفي

ولا تفوتك النظرات من فوق لتحت كن هم الكذابين مب انا

بس الصراحة الصراحة ذلووووووني ع هالكذبة والله كل ما قلت شيء قالوا لاااااا كذااااااابة لحد يصدق

تعبت وأنا أحاول الـترميم

عاد تبين الصدق بعدها كرهت شيء أسمه كذب خصوصاً مع البنات ..قلت هين بيروحون لذيك الخبلة وعاد ذيك ما يحتاج تقل كني شوكة بلحمها

حتى لو كنت صادقة بتقول "لاااااااااا كذااااااااابة"

(

)

من جد ( حبل الكذب قصير )

مشكورة شانزليزيه وتصدقين عاد .. والله أنك خراطة منتي بـ شانزليزيه

ع بالك بنصدقك

عاد اسمعي حتى ما اطلع كذابة بروح لصحباتي بالويكند واقولهم "والله اني كنت بالشانزليزيه هاليومين"

ومبروك العطلة حبيبتي ..