نادي الهلال السعودي - شبكة الزعيم - الموقع الرسمي - سلامااااااااااااااااااات... وش تحس به؟!

اولا هاردلك لي ولكم الهزيمة

مدري وش اقول بس اليوم المباراة ببساطة مانكتبت للهلال والدليل ان التعادل والفوز كلها بركلات الحظ وبمساعدة الجروان.

لكن بصراحة انا ودي أقول سلاااااااااااااااااااااااااااات لردات الفعل اللي حاصلة من البعض بعد المباراة واللي يشوف يقول لنا خمسطعش سنة ماجبنا بطولة وحنا تونا العام مخذين الدوري

تعليقات ومواضيع تحطم ولاتمت للإنتقاد بأي صلة وبعطيكم امثلة

عبدالرحمن بن مساعد ارحل وسكر الباب وراك:to::::: مدري وش يحس به هالشخص يوم ينتقد رئيس مجلس ادارة مامرت ولن تمر على جميع الأندية السعودية بمثلها من حيث الدعم المادي والكفاءة الادارية.

(عبدالرحمن بن مساعد-نواف بن سعد-سامي الجابر-عادل البطي-سامي أبوخضير-عبدالله البرقان-خالد المغيربي)

افلقني ان حصلت اشخاص في الأندية الأخرى بمثل هذي الكفاءات. اسماء لها وزنها في الادارة والتخطيط لكل ماهو مفيد للزعيم وانا بصراحة يكفيني من عبدالرحمن بن مساعد انه ضحى ببعض جمهوره من الأندية الثانية وقبل برئاسة نادي الهلال

الدعيع عميد لاعبين العالم ولا قدر يرد ولا بلنتي!!!!:ap: خييييييييييييييييييييييييييير ياأبو!!! واذا مارد بلنتي تطالبه بالاعتزال؟! الظاهر انك ناسي من هو أقوى خط دفاع بالدوري وناسي وش اسباب قوته بعد توفيق الله واذا كانت ذاكرتك مفوتة كثير ماراح اطلب منك الا انك ترجع لنهائي الدوري العام.

خالد عزيز ليتك مكمل اصابتك ولا سببت ضربة الجزاء؟! وقسم بالله فيه عالم تسمع بالانتقاد! :bx:أجل خالد عزيز أفضل لاعب محور في الملاعب السعودية وكنا وقت تجديد عقده تنتافض من الخوف لايروح نادي ثاني ونقول عنه تسذا؟؟المنتخب يعاني لافقد عزيز وتجي انت يافلتة زمانك تقول له ليتك مستريح.

:clapping:صدق صدق صدق وش تحس به؟:clapping:

سيول..مالك علاقة بالكورة واصلن مايمديك تشوف الباب لأن عيونك صغار!؟

وويلهامسون حرام فيك الاثنين وخمسين مليون ريال واخرتها واحد بقوة وجه يقول للأمير عبدالرحمن بن مساعد جايب لنا محور!!! وعضو اضحكني اضحك الله سنه يقول رادوي منتب بعيد عن ليلو؟!:d صدق انه فاهم كورة

: بالنسبة لسيول هو ماقدم اللي نطمح له حتى الان ولاتنسون بدايات ويلهامسون وترانا مسلمين مايجوز نتشمت على خلقة رب العالمين وبعدين اللاعب اذا ماتوفق مع الهلال مو معناته انه فاشل لأن سيرته تشفع له وهو جاي من دوري قوي وجا بناء على اختيار وتوجيهات المدرب الأكفأ على الاختيار لكن اتمنى انه يكون افضل من كذا في المباريات القادمة واذا ماتوفق فهذه حالة وتحدث عالميا والدليل شفشنكو مع تشيلسي وهنري مع برشلونة

. وويلهامسون امس متر وشبر الملعب يمين يسار دفاع وهجوم وكان افضل لاعبين الفريق وافضل اللاعبين بصفة عامة في المباريات الأخيرة لكن لأنه ضيع بلنتي رجعنا لإسطوانة الخمسين مليون وكننا حنا اللي دافعينها في لاعب كريكت مو لاعب كرة قدم عالمي.

ورادوي كابتن نادي ستيوا بوخارست واللاعب اللي قوم رومانيا وقعدها بسبب انتقاله للهلال واللاعب اللي خلى قنوات رومانيا ونشرات اخبارها تتابع كل تفاصيل نادي الهلال وتشتري حقوق مبارياته ولاعب كان مطلوب من انتر ميلان الايطالي وفي الاخير يجيك واحد ببرودة أعصاب يقول وش يفرق عن ليلو؟؟؟؟؟؟؟؟ لاتلوميني ياصديقي ياللي تقول وش يفرق عن ليلو اذا قلت لك سلامااااااااااااااااااااااااااااااااااااااااااااااااااااااااااات وماتشوف شر:rose:

على الطاير

الهلال يرأسه شخص دفع من جيبه اضعاف مادفعته الشركة الراعية واعضاء الشرف فإن لم تكن هناك كلمة شكرا والله يجزاك خير فالسكوت في هالحالة أفضل من انك تنتقد على غير سنع

الهلال خرج بضربات الحظ من فريق قوي ومازال متصدر الدوري رغم انه حتى الان لم يلعب مباراة واحدة كاملة بجميع عناصره الاساسية فلله درك من زعيم

كهلالي من حقي ان اطالب بجميع البطولات لكن ان لم يكتب الله لها التحقيق فلاألوم الادارة ابدا لأنها هيأت الفريق تهيئ قد يكون أفضل من بعض الاندية العالمية من حيث المعسكرات الخارجية واللاعبين الاجانب والطائرات الخاصة ومكافآت الفوز.

كأس الأمير فيصل ان اتى فهو كأس يضاف للقائمة وان لم يأتي فهناك ماهو أهم وان شاء الله الزعيم قادر على حصاد باقي البطولات

:alzaeem:أعذروني اذا جيت مدرعم شوي وبالتوفيق لي ولكم:alzaeem: