مساكم الله بالخير
بدخل بالموضوع دوغري ( على قولة اخواننا المصريين )
ياجماعة الخير اللاعب الكوري جاي يتمرن عندنا ويكتسب خبرات فقط ومو جاي عشان يفيد الفريق ابدا
أنا لاحظته اول مباراه كان متعالي شوي ، بس بعدها قام يتحرك ويحاول يثبت نفسه بس للأسف اللاعب من جنبها ولا عنده ماعند جدتي .
انا ماني متحامل على اللاعب بالعكس اول شي قلت يمكن اللاعب متوقف فتره وماعنده لياقه وهي اللي تمنعه من تقديم ماعنده بس بعد كم مباراه صار عندي قناعة ان هاللاعب فقير فنياً .
لاحد يجي ويقول لي ان اللاعب مابعد يتأقلم مع الفريق وماني عارف ايش
اللاعب ماعنده الأساسيات اللي المفترض تكون عند لاعب كرة قدم فضلاً عن أنه يكوون مهاجم .
استلام وتسليم الكره سئ ، المحافظه على الكره معدوم حيث انه من السهل قطع الكره منه ،ولايقدر يحافظ أساساً على كورته ، أضف الى ذلك أن اللاعب مايدل الباب ولايدري وينه ، اول مره اشوف مهاجم تمر عليه اكثر من مباراه حتى ولا يحاول يسدد على المرمى ماغير يدربي راسه بالارض الين تنقطع منه الكوره
والله مااقول هالكلام الا اني محترق على نادي زي الهلال ملايين تصرف عليه وبالنهاية يغيب لاعب او لاعبين ويتأثر الفريق كله بهالشكل يعني يغيب ياسر تغيب الفاعليه الهجوميه لدى الفريق .
واسمحولي لاتجيبون لي طاري العنبر اللي لولا الله ثم دعاء والدته ماطق كوره في نادي كبير زي الهلال .
شبيه الريح او اي أحد كان له يد في هالصفقه نقول له يفداك الف لاعب تراك اجتهدت وماقصرت وليس لكل مجتهد نصيب .
بصراحة اخاف الهلال يتعاقد في الفتره القادمه مع حارس مرمى ، ياعالم الهلال محتاج مهاجم بمعنى الكلمه يكون مع ياسر واذا غاب ياسر يكون مكانه ويشيل الهجوم بنفسه بالاضافه الى مهاجم محلي كدعم للخط اللي الواحد يرتجي يجيب اهداف من خلاله ، ساعات الهلال يلعب بعدم وجود ياسر وتحس انه ماسك اللعب بس لو عطيته اضعاف الوقت اللي يلعب فيه ممكن تظل النتيجه كما هي عليه بدون اهداف !
اعذروني على النقد المباشر بس وربي ماغير حب في الهلال فقط .
أنا مسجل لي فتره بس للأسف لسه جايني التفعيل من كم يوم و مشجع للهلال منذ أكثر من 25 سنه يعني لاحد يقول مندس ومن هالكلام بس عشاني انتقد
تحيتي لجميع العقلاء
الوضع المتطور
