بصراحة

المنتخب السعودي غير مقنع وجميع الفرق التي واجهها متهالكه ابتداء من قطر ثم اليمن والامارات والكويت

قبل ما يرد احد على كلامي ودي أسأل سؤال

لو لعبنا ضد اليابان بهذا المستوى وش تتوقعون النتيجة ؟؟

كل مبارياتنا نلعب بربع مستوى

اليوم فوز المنتخب على الكويت كان بسبب ضعف وتهالك مستوى الكويت

واعتقد الاختبار الحقيقي في البطولة امام عمان يوم السبت

تكتيك ما حولك احد ولخبطة واجتهاد والجوهر فقط نجح في حفظ تمركز المدافعين والمحاور والباقي اجتهاد

مستوى اللاعبين متذبذب في وسط المباراة وتلاقي اللاعب يلعب صح اول عشر دقايق ثم يحوس ويباصي غلط ويتمركز غلط ويتداخل مع زملاء في المراكز وبعدها يتحسن عشر دقايق الشوط الثاني ويرجع يحوس

وبعض اللاعبين لا من شاف ولامن دري طول المباراة وكانه غايب ومو موجود وبصراحة مالك معاذ في علامة استفهام على مستواه

وياسر متذبذب والي الان مارجع مستواه والزوري متذبذب وعبدة عطيف مدري وش طلباته في هالبطولة ومستواه نازل

اما الفريدي فهذا حالة خاصة وغريبة والظاهر صدق نفسة انه يوسف ثنيان زمانه بالله هذا لاعب اول سنه ينشهر

غرور وتعالي بالملعب ومشاكل ويترك لك الملعب بطول ويحشر نفسة في مكان ضيق واكثر لاعب يوطي الكور هذي اخر احصائية شفتها له بس الي الان يحتفظ بميزة وحده وهي انه من كره وحده يسوي كل المطلوب منه في المباراة

لكن على الوجه الاخر انا اشوف وليد عبدالله جيد جداً والمرشدي وهوساوي رجعونا لأيام مدافعين زمان ونسونا بربسة تكر والنتشري وابدعو يعطيهم العافية

شهيل رائع جداً ونشيط ويأدي ادوارة بشكل مميز جداً

خالد عزيز ملك في مملكته وخلوه هذا اللاعب له الامر والحكم في منطقته واروع لاعب سعودي في 2008

احمد عطيف قدم مجهود خرافي مع الكويت ويستحق التميز مع تيسير الجاسم وانا مازلت اقول ان احمد عطيف وتيسير الجاسم واحمد الموسى وخالد عزيز من افضل اللاعبين للتكتيكيين في المملكة

المنتخب امام الكويت كن ماودهم يلعبون يعني اكثر من كورة عيني عينك اللاعب جنبك ومنفرد عطه الكورة ما ادري ماودهم يعطون الكورة ولا اللاعب يمر زميلة جنبة وهو واقف لا يفتح ولا ينطلق ولا يلحق الخصم بعد انقطاع الكورة

بس كل ما جت الكورة عند النص تحس انه لعب حواري يعني منتخبنا منقسم الي فريق نص تكتيكي في الدفاع ونص حواري واجتهاد

هذا رأيي واعذروني بس في النهاية والخلاصة ان المنتخب يلعب بفوضى بسبب المدرب ولازم على الاتحاد السعودي ان يحضر مدرب يجيد التعامل مع المنتخبات المتطور او المتذبذبة المستوى ولا يروحون يجيبون مدرب عالمي يحسب منتخبك انجلترا ويجبرهم على تكتيك فوق امكانياتهم او اقل من امكانياتهم مثل ما سوى كارلوس البرتو في كأس العالم 98م

لا تقولون لي جوبو اللاعب فلان ولا فلتان المنتخب يحتاج مدرب قوي

وآسف على الاطالة