بعد 16 سنة - أعلن تجديد البيعة للزعيم (( الدخول لأصحاب الذاكرة المغبّره فقط ))
 

السلام عليكم


الموضوع هذا فضفضة شايب هلالي

طبعا (شايب) نسبيا, لا أحد يفهم غلط


سباعية الهلال اليوم رجعتني بالذاكرة سنوات وسنوات

مباشرة تذكرت ((سنة أولى هلال))

هالذكريات لها طعم, بس بعد لها غبره

http://upload.wikimedia.org/wikipedi...m_icon.svg.png

رجعت لعام 1413هـ لما فاز الهلال على القادسية 7-1

مباراة علقت في ذاكرتي, لأنها كانت ثاني مباراة لي أشوفها بعد ما أعلنت البيعة للهلال


إذا ما خانتني الذاكرة, الهلال لعب قبلها مباراة قدام الأهلي وفاز 3-2 (وهاذي هي أول مباراة لي كمشجع هلالي)

وأذكر المانشيت العريض على أحد الجرايد -أظنها الرياضية- يقول

الهلال يمطر فناً وأهدافا على الأهلي


وبعد في نفس العام على ما أذكر, الهلال لعب مع النصر وفاز الهلال 3-2

أذكر ماجد عبدالله هو اللي سجل للنصر الهدفين, وأذكر صالح السلومي كان حارس الهلال

http://www.alhilal.com/ar/logos/playerphoto-271.jpg

وأذكر كذلك إن السلومي رد كورة خطيرة للنصر في ذيك المباراة بينما هدفي النصر كانوا من رأسيتين ميتة من ماجد, ما أدري وشلون دخلوا؟؟

وأذكر إني كنت أقول لنفسي "لو كنت حارس كان على الأقل رديت كورتين ماجد اللي بالراس" وإنتهت المباراة 3-1

حلوة مني على أد سني

:d


المهم, يمكن إني قاعد أخرّف, والبعض مو فاهم وش قاعد أقول

لكن هاذي شوية من الغبرة اللي سببتها لي سباعية الهلال اليوم, حبيت أشارككم فيها


تحياتي الفرانسيسكونية

s13s

هلا يابدر

ماشاءالله عليك وين شايب
أجل اللي يوم هالمباراة وهم مشجعين هلاليين من سنين وش يقولون؟ :D
الكورة اللي تتكلم عنها وصدها السلومي كان اللي شاتها خالد الهزاع وحطها في الزاوية الصعبة ولكن السلومي جابها
لكن انت شكلك تبينا نصدق انك شايب.. بدليل انك نسيت أجمل لقطة في المباراة وهي تسحيب سامي في دفاع وحارس النصر (شاكر العليان) ومن سوء حظه لعبها وضربت الكورة في زاوية المرمى الخالي وضاع هدف كان حيكون أجمل هدف في تاريخ سامي الجابر لكن الحمدلله على كل حال والحمدلله إن سامي عوضنا عن هذا الهدف بأهداف

في هالمباراة برضه فيه لقطة طريفة أيضا للمحترف الرهيب موسى نضاو اللي اصيب في كورة واحتسبت فاول.. ولأن مكان الفاول أعجبه وحس إنه ممكن يسجل منه رفض يخرج للعلاج رغم إصابته وشات الفاول بطريقة خرافية وبالفعل سجله وبدال مايجري يحتفل بالهدف خرج يجري وجلس برا الملعب للعلاج :D


مادمت تكلمت عن مباراة الأهلي.. فهي أيضا من مباريات سامي وسجل فيها هدفين أحدهما تسديدة جميلة من خارج المنطقة
وقبل نهاية المباراة أصيب حارس الهلال عبدالله الدعيع بعد اشتراك مهاجم الأهلي موسى مرزوق معه ودخل السلومي للمرمى بعد غياب طويل (هذا الحارس ولو إن الجمهور ماخذين عنه فكرة انه حارس سيء.. إلا أنه كان حارس جيد ويعيبه اهتزاز ثقته بعض الأحيان وتبقى أهم مميزات السلومي هي حبه وولائه الكبير للهلال)
السلومي في مرة من المرات تم تنسيقه من الهلال.. وحينما احتاج الهلال لحراس قاموا بطلب عودته فعاد مباشرة للنادي بدون شروط أو عتب على النادي ولم يتكبر على النادي ولم يساومه

على فكرة.. مباراة القادسية أعتقد انتهت 7-2 وليس 7-1 وسجل فيها سامي خمسة أهداف لوحده وكان قبلها بأقل من أسبوع قد استبعد من تشكيلة المنتخب المسافر لليابان للمشاركة في كأس آسيا 92 بحجة ان سامي مصاب مع أنه سليم الله يحفظه, ويجونك بعض الجهلة بعدين يقولون سامي لاعب واسطة ومفروض على المنتخب :D

ربي يعطيك العافية ويهون عليك الغربة ويرجعك لأهلك وديرتك سالم وغانم ومبروك الفوز على نجران

اقسم بالله يالغالي

اني حاضر ذيك المباراة في الملعب... الهلال والقادسية

ذكرتني فيها الله يذكرك الشهادة

كان الجمهور معصب يومها على عبدالله الشريدة (كان في القادسية ذاك الوقت) لما طرده الحكم بعد مخاشنته لسامي الجابر

الف شكر لك وتقبل كل الحب

خخخخخخخخخخخخ يالبى قلبك .. ونستني مع أني ماذكر الا مباراة النصرررر ..في ذاك الزمان ..

الله يعطيك طوله العمر ان شاء الله

وتشوف السبعات من الهلال لمرمى الخصوم

يعطيك العافيه على الموضوع

فرحت يوم قريت العنوان مغبره ومدري ايش
قلت اخيرا بلقى اشيب مني بس ماش طلع نئبي على شومه ,,,,,,,شايب من جد
تشكرات كثيره ياباشا على هالذكريات الحلوه انتا والمشرف الغالي الي ذكرنا بتفاصيل احلى

عشق تنامى من سنين الطفوله الى المشيب

اما عن نفسي كنت في اولى ابتدائي
ماادري الهلال فاز 7 والا 8 ههههههههههه
اما المباراه الي عالقه في ذاكرتي النهائي الي بين الهلال والنصر في كاس خادم الحرمين الشريفين سنة 1415
الي خسر فيها الهلال بظلم تحكيمي لاكن الحمد لله من يومها والنصر ماينافس على البطولة هههههه

انكشفوا الشيااااااااااب


يا الله حسن الخاتمه يارب



اذكر والله العظيم زوج عمتي اعطاني انا وعياله 50 ريال بمناسبه فوز الهلال على الاهلي

هذيك الايام وخمسين ريال انوااااااااااع الفله

بس كان معنا ولد خالي اهلاوي ياهو توهق

يا الغالي كنت اتوقع انك شايب لكن طلعت انا الشايب

مباراة الامس ذكرتني بفوز الهلال على الرياض 9-0 و كنت احد حضور هذه المباراة عام 1399 هـ و اذكر ان ريفيلينو قام باضاعة الوقت في نهاية المباراة بشوتة قوية للسماء(اعتقد انها وصلت الكشافات خخخخخ) المهم ان الكرة لما وصلت الارض قعدت ترتد عدة مرات (ضاع فيها على الاقل دقيقة) و كانت ظاهرة غريبة علينا في ذاك الوقت !!!!!!!

بالنسبة لمباراة القادسية فهي جديدة نوعا ما علي و الملفت فيها ان الشريدة كان يلعب مع القادسية و عندما طرده الحكم لمخاشنته سامي قام بالاعتداء على الحكم توقفت بسببها المباراة و دخلوا رجال الشرطة ارضية الملعب لحماية الحكم ... الغريب انه لم يصدر تجاه الشريدة اي ايقاف في حين يتلقى لاعبي الهلال على مر التاريخ ايقافات لامور لا ترتقي لما بدر من الشريدة بل لاسباب تافهة (بمن فيهم الشريدة نفسه عندما انتقل الى الهلال). و عندما سألت وليد الفراج (و هو صديق قديم لي اعرف عنه ميوله القدساوية و النصراوية) عن هذه الحادثة و أين العقوبة ؟ و لماذا تكون الايقافات على لاعبي الهلال فقط ؟ لم تتوفر لديه الاجابة و اتفق معي وليد حينها ان الهلال مستهدف و ان هذه رغبة ابو نواف (يقصد فيها الامير فيصل بن فهد رحمه الله) مما يدل على محاربة الرعاية للهلال منذ عشرات الاعوام و الى الان و هو مخطط اصفر يهدف لاستغفال الرعاية على اساس العقوبات لا تصدر استنادا الى الانظمة بل الى امزجة المسؤولين !!!

هذه الحقيقة رضي من رضي و أبى من أبى.

تحية طيبة يا الغالي.

شياب وباقي فيهم ذاكرة ما ينلاموان من كثرة فوز وبطولات الهلال ماشاء الله وعين الحسود فيها عود
يتذكرون فوز وبطولات احسن من بعض الفرق يتذكرون هزايم وحسرات

الله طلعتو شياب خاصه (هلالي ثنياني ) انكشفت وطلعت شايب على الاقل انا صغير صح ان

ذاكرتي تخوني اشوي خاصه في مباريات الدوري والنقاط الثلاث هذه ناسيها اللي اذكرها وانقهرت

فيها كثير على الغش اللي جاء فيها مباراه نهائي 1415 اربع ضربات جزاء ماانحسبت بكيت من

القهر فيها لكن الحمدلله على كل حال . يالله زين تذكرنا مباريات ابو يعقوب وسامي زمان يازعيم.

الحمد لله في شياب مثلي هههههههههههههههههه


عاد انا اذكر مباراة الهلال والنصر لما قام الحكم مثيب الجعيد بطرد ريفيلينو من المباراة

وكتبت الصحافة العالميه مانشيت تناقلته الصحف السعودية

لما كتبوا

الحكم البدوي يطرد ريفو العالمي



الله ياهو زمن


الله يعطيكم ويعطينا طولة العمر يارب والمزيد من البطولات يارب

أنا هنا
عشان أرد على الاتهامات الباطلة اللي تهدف لتشويه صورتي وتخليني شايب :D


ياشباب ترا المباراة اللي نتكلم عنها مو قديمة واجد
كلها 17 سنة بس :d
الله يرزقنا جميعا طول العمر في طاعته ويصلح للجميع النية والذرية

عموما عشان لاتاخذون عني فكرة سيئة:d فأنا وقتها كنت لازلت في المرحلة الابتدائية وأنا إلى اليوم ماتجاوزت الـ27 سنة (الله يعاملنا برحمته وعفوه)
ولكني ولله الحمد أتذكر مباريات الهلال خصوصا في فترة التسعينات وكأنها أقيمت قبل أسبوعين
مباريات الهلال ترتبط في حياة مشجعيه بالذكريات الجميلة.. ولذلك فيصعب نسيانها أو مرورها دون تأثير
مباريات الهلال بالأم واليوم وغدا ان شاءالله تعني مساحة واسعة من الفرح والأمل بمستقبل أجمل ولذلك نعيشها دائما حتى وان انتهت اللحظة فهي باقية في القلوب والعقول :smilie47:

أكثر مازعلني في الموضوع هو اللي يقولون مابنرد عشان ماتنكشف أعمارنا :nono:
بالعكس روعة الهلال هي في الحديث عن تاريخه وليتكم تنفضون غبار الذكريات وتتحفونا بأجمل الأحاديث عن مباريات الهلال
كم أحسد والله كل من لحق على ريفالينيو.. ومن لحق على الثنيان طوال مسيرته.. ومن كان لديهم القدرة على الحضور في الاستاد ضد ناقويا والترجي وجوبيليو فلاتحرمونا على الأقل من الأحاديث عن هذه المباريات


كل الشكر لك بدر مجددا.. ولكل من رد على هذا الموضوع وأتمنى أن نرى مزيدا من الذكريات الزرقاء على صفحات المنتدى