|
الترويج لمنتجاتهم تحت اسم الهلال .قناه الزعيم. تي شرت اصلي . موبايلي عالم من احتيالي !! لا للاستغلال s13s اسعد الله اوقاتكم بكل خير .... المهم عشان مااطول عليكم حبيت بس اشارككم واستمع الى ارائكم .. ياليت الكل يعلق على الموضوع عشان نعرف الحقيقه ولا انا شايف الموضوع بصوره ثانيه ..!! كثرت في الايام الاخيره المواضيع الترويجيه لبعض القنوات او شركات الاتصالات , اهم مافي المواضيع هو تشجيع الجمهور الهلالي بالاشتراك في هذه الشركات وتتم الدعوه للمشاركه تحت مسمى انك هلالي ويجب عليك دعم هذه الشركات سواء اتصالات او قنوات رياضيه ... لكن خلونا عقلانيين وواقعين .. وانا بحاول اني اوضح وجهي نظري . 1 - شركه موبايلي . مئات المواضيع كتبت لدعم هذه الشركه وتحويل الخطوط اليها وانها ارخص من الشركات الاخرى وهذا كلام غير صحيح سعر الدقيقه الان في معظم شركات الاتصالات متقارب وتقترب من 30 الى 35 هلله للخطوط المفوتره . استغرب هذا الدعم وحث الهلاليين على الاشتراك وكانهم يقدمون لنا المزيد من الخدمات او يعاملون جماهير الهلال معامله استثنائيه . كل هذه الميزات من سعر دقائق مخفض بين خطوط الموج الازرق معمول بها في باقه نجمتي للسيدات وباقات اخرى ويمكن باقه نجمتي تمتاز بسعر مخفض للمكالمات من 7 مساء الى 7 صباحا . يعني مشتركين الموج الازرق غير مميزين بشيء خاص بهم نهائيا باستثناء اسم الباقه . باقة الموج الأزرق المفوترة سعر تأسيس الاشتراك 45 ريال سعر اشتراك الباقة الشهري 40 ريال المكالمة لأي شبكة محلية 30 هللة المكالمة بين مشتركي الموج الأزرق 20 هللة يافرحتي بهالباقة ..!! وهذه الاسعار الباقه من موقع موبايلي . بالله وين التمييز او شي واحد يخليك تقتنع كهلالي انك حصلت على شي مميز او عرض منافس بالنسبه للشركات الاخرى المقدمه للخدمه اخر موضوع قريته موتني من الضحك حسيت اننا شعب سهل ينضحك عليه !! هذا رابط الموضوع .. مع كل احترامي لوجهه نظر كاتب الموضوع وعشان ما تتعب نفسك انا بكتب الي جاء في الموضوع . الرابط للتاكيد فقط . بسم الله الرحمن الرحيم السلام عليكم ورحمة الله وبركاته : وصل عدد مشتركي باقة الموج الأزرق في خدمة موبايلي الهلال إلى قرابة الـ 110 ألاف مشترك حيث تبقى 90 ألف مشترك لكي يصل عدد المشتركين إلى 200 ألف مشترك ليحصل الهلال على 10 مليون ريال ضمن الأتفاقية الموقعة بين نادي الهلال و شركة موبايلي . فمبلغ 10 مليون ريال ليس بسيط جدآ فنتمنى أن نشترك في باقة الموج الأزرق لكي يصل عدد المشتركين إلى 200 ألف مشترك ليحصل الزعيم على الـ 10 مليون ريال . يعني والله لو موبايلي شركه ابوي ما اسوق لها بهذه الطريقه واطلب من الناس تشترك على شان وشو ؟؟؟ هذا الي يضحك عشان يعطون الهلال 10 مليون يعني اطلب من الهلاليين يدفعون لموبايلي 105,000,000 ريال عشان موبايلي تتكرم وتتعطف تدفع للهلال 10 مليون وكنها تتمنن علينا كيف يدفعون 105 مليون نبداء بسم الله هات قلم وورقه ولا حاسبه جوالك . ارجع للباقه فوق واسعارها سعر تأسيس 45 ريال سعر اشتراك شهري 40 ريال بفرض ان عدد المشتركين 200 الف وهو العدد المطلوب ليحصل الهلال على 10 مليون ريال من موبايلي نقدر نقول ان كل هلالي مشترك في باقه الموج الازرق يدفع سنويا : ( 40 ريال * 12 شهر اشتراك ) + 45 رسوم تاسيس الباقه =525 ريال هذا بس رسوم اشتراك وتاسيس بدون مكالمات . واذا اخذنا هذا الرقم 525 * 200 الف مشترك = 105,000,000 ريال تدرون ان لو كل هلالي من 200 الف مشترك في الموج الازرق دفع 50 ريال فقط لنادي الهلال . 50 * 200 الف مشترك = 10 مليون ريال ولا يتمننون علينا موبايلي يعني ندفع لموبايلي 525 ريال عشان يعطون الهلال 50 ريال مثل الي شاري بيبسي بريال وشاري معه كاسه بـ 20 ريال ... من جد ذكي !!! في باقه في الاتصالات اسمها زيرو بدون رسوم اشتراك وسعر الدقيه 30 هلله و زيروبلس بدون رسوم اشتراك وسعر الدقيقه 25 هلله . ومو لازم تكون هلالي عشان تشترك فيها حتى لو تشجع الجبلين ممكن تشترك الحين من ضاحك علينا الاتصالات ولا موبايلي .؟؟ طبعا لا هذي ولا هذي احنا الي ضاحكين على انفسنا لان كل شركه تبحث عن مصلحتها واحنا نبحث عن مصلحه موبايلي تحت مسمى اننا هلاليين وموبايلي شركه راعيه للهلال . لكن هذه الرعايه لها مقابل مو مجانا يعني هم ماخذين حقم من الهلال ومستفيدين اكثر من الهلال وكذا ياجمهور الهلال احنا ندفع لشركه موبايلي مبلغ 105 مليون عشان يعطون الهلال بمكرمه منهم 10 مليون بس هذا شي منطقي بالله عليكم . اصلا هم كل همهم نشر اعلاناتهم عن طريق الهلال واتصور هذا يكفي لهم يعني شعار موبايلي على تي شيرت الاعبين وخلف الاعبيين واداريين الهلال عند اجراء المقابلات التلفزيونيه وعلى لوحات الدعايه في الملاعب في مباريات الهلال . اتصور انهم كذا ماخذين حقهم وبزياده بعد . 2 - شبكه ART وقناه الزعيم . ماني مطول في هذا الموضوع لان واضح مثل الشمس . تخيل انت بينك وبين نفس انه في قناه تنقل اقوى دوري في العالم ( الدوري الاسباني ) وتغطيه وتحليل مميز جدا جدا جدا وعلى مدار السنه بمبلغ 150 ريال لله درك ياالجزيره الرياضيه . وتخيل ان الاشتراك في قناه الزعيم فقط يفوق اشتراك الدوري الاسباني كامل بـ 3 اضعاف المبلغ . ويطالبونا بالاشتراك لدعم الزعيم وتاكيد نجاح القناه . المكسب في الاول والاخير لصالح كامل الاتحادي وبدليل انه مادي ويسعى للربح المادي فقط اول مابداء بداء بالهلال مو حب في الهلال ولكن لجماهيريته الي تتعدى جماهير الاتحاد بمراحل . الحمد لله اني مقتدر واقدر ادفع لكن لا ولا ولا .. الله ما شفناه بالعقل عرفناه ؟ الهلال مو مستفيد مثل ما يستفيد صالح كامل الي كانت كل مواضيع المنتدى تطالب بمقاطعه الارتي . لكن دوام الحال من المحال الحين يطالبون بالاشتراك لقناه الزعيم . 3 - شعار الهلال . طبعا ممكن تلاقي اطفال او شيوخ ما يعرفون علم امريكا لكن مستحيل تلقى طفل او شايب ما يعرف شعار الهلال وهذه نعمه تأكد شعبيه هذا النادي . ولكن الهلال رغم هذه الجماهيريه والشعبيه لم يستفد شي , ربي كما خلقتني حاطين حيلهم على عقد موبايلي وبس . ومحلات الرياضه هي المستفيد الاول والاخير من الهلال دخلت احد المحلات الرياضيه وتندمت اني ما القى قسم خاص في نادي الهلال يبيع هذه المنتجات . شعار الهلال في كل شي : 1 - تي شيرت هلالي تقليد من 25 - 40 ريال حسب جوده التقليد 2- كاب ازرق عليه شعار الهلال . 3- وشاح هلالي انواع واشكال . 4 - اكواب بشعار الهلال . 5 - شاره كبتنيه بشعار الهلال . 6 - ربطه للمعصم بشعار الهلال . 7 - ساعه رياضيه الميناء شعار الهلال . 8 - فوطه مقاس كبير بشعار الهلال وارقام الاعبين . 9 - سلسله مفاتيح بشعار الهلال الهلال وش مستفيد من كل هذا ولا شي ... والناس ليه تشتري من هذه المحلات ؟؟؟ لان نادي الهلال ما وفر لهم هذه المنتجات في النادي . اوعدكم اني اصورها وانزلها في موضوع مستقل لان الي شفته شي لايصدق كل شي عليه شعار الهلال كل شي ء بشعار الهلال قرأت ان نادي ريال مدريد استرد كامل قيمه صفقه انتقال الاعب الانجليزي ديفيد بيكهام من مانشيستر الى الريال مدريد عن طريق بيع تي شيرتات ريال مدريد عليها رقم واسم اللاعب بيكهام . هذا الي يسمونه استثمار حقيقي مو 10 مليون يحصل عليها الهلال مقابل ان يدفع الجماهيرالهلاليه 105 مليون لموبايلي . من الي مستثمر الثاني الهلال ولا موبايلي ؟؟ الهلال ولا ارتي ؟؟ ياليت النادي يقدر يشغل القناه دون الحاجه الى الارتي , مو كانت تبث من قبل دون ارتي وتشغيل اي قناه امر سهل ليتكم تشوفون القنوات من وين تبث اقسم بالله من شقه .. ترى الموضوع مو صعب مثل ما يظن الاغلبيه سهل للغايه . وساعتها نشترك حتى اذا بـ 1000ريال لان المبلغ كله بيكون للنادي مو لصالح كامل عضوشرف نادي الاتحاد . وليه نادينا ما يوفر تي شيرت اصلي واكواب وغيرها عليها شعار الهلال . تباع في النادي او اماكن بيع معتمده من النادي والله ندفع واحنا مرتاحين ومظمنين حتى لو غاليه عارف انها بتروح للهلال مو لهندي في محل رياضه . وليه نادينا ما يفتح مجال للجمهور بالتبرع للنادي , يعني ياادفع الالاف عشان اصير عضو شرف واقدر اتبرع للنادي , ولا ما يحق لي اشارك في دعم النادي الي اعشقه .؟؟ او اني ادفع لموبايلي 525 ريال عشان يعطون الهلال 50 ريال منها . لالالا ماني دافع لموبايلي . ياليت يكون في حساب تبرع للنادي او كوبونات تباع في النادي بقيمه متفاوته للتبرعات واظن موعيب ياخذونها من جمهور الهلال احسن من ياخذونها من موبايلي والارتي وكنها صدقه . تحياتي للهلاليين .. هلالي غير !! |
اقول قم بس قم باين انك موظف في الاتصالات وبالنسبه لي عادي تستاهل موبايلي اللي يجيها ((( اللهم ارزقني وارزق مني ))) |
دام في عقليات مثلك ياغاليهم ابشرك يبيقى الوضع على ماهو عليه .. يعني مو متغير شي ؟؟ ولعلمك انا ماني في الاتصالات ولا تهمني موبايلي والاتصالات وزين انا مع الي يقدم لي كعميل العرض الافضل مو الاستغلال الافضل . على العموم مستوى تفكيرك واستنتاجك متوقع اسمعه بس ما توقعت في اول رد . |
انا معك في النقطه التانيه حقت (عارتي) اما موبايلي فموبايلي فالدم يكفي انها وقفة في وجه قناة ابو غبي واعلنت مقاطعتها لعيون الزعيم ويكفي الدعايات الي بكل قناة عن شراكتهم مع الزعيم الهلالي ام الانفصالات لو تبغى خدمة العملاء لازم تجلس نص ساعه عشان يردو عليك انت عارف الانفصالات سرقو مني 147 ولا رجعوها كل يوم يقولو كلمنا بكره بعده .. كيف سرقوني ؟؟؟ اقلك كيف شحنت 100 طلع رصيدي 150 فجاءة القى الرصيد 3 ريال اكلمهم مية مره مافي فايده انا حولت من الانفصالات لموبايلي لعيون الزعيم الله يخلي موبايلي (العقل السليم في تشجيع الزعيم) |
كلامك صح انا الى لان ما فكرت لا اشترك في قناة الزعيم ولا موبايلي ولا اتصالات كله في نصب في نصب معقوله قناة 480 بس نتقل مبارة الهلال لو 200 ريال يمكن اشترك اما 480 لو اليش ما اشترك وانا اتفق معك بخصوص تي شيرت الهلالي انا امس شاريه 25 ريال نفس بلوزة الهلال بالضبط بس الشعاروالفماش يختلف عن الاصلي |
بصراحه موضوع جميل واشكرك على توعيه بعض التعصب الاعمى عند البغض وبصراحه ازيدك ان الشعب السعودي تحكمه العاطفه اكثر من كل شي |
إقتباس:
وحكاية موبايلي عادي بالعكس احنا مرتاحين معها وماقصرت افضل شركة رعت الزعيم ........... |
عزيزي هلالي غير,,, حط هالمعلومة في بالك مافيه اي شركة في العالم بتدخل مشروع شراكة الا تبغى زيادة ارباحها بالشكل الاول الشي الثاني زيادة انتشارها . الشي الثاني انا كنت ابنوم بس يوم قريت ردك وتنقيصك من عقليتي خلاني ارد عليك وابين لك انك مخطي 200% خصوصا في كلامك عن موبايلي والغريب كيف يكون تفكيرك سطحي الى هالدرجة على العموم انا راح ابين لك بس ياليت تجيب قلم ودفتر وتتابع معي اول شي 1- عندك خبر ان موبايلي تدفع للهلال مبلغ 65 مليون ريال كل سنة ولو ان ولا واحد اشترك في باقة الموج الازرق. 2- واصلك العلم اللي يقول عند تحقيق الهلال بطوله محلية ياخذ 5 مليون والبطولة الخارجية 10 مليون . 3- قد سمعت ان الهلال ياخذ نصف دخل موبايلي الهلال اللي تعتبر شي منفصل عن باقة الموج الازرق . طيب اذا بافكر نفس تفكيرك واخليك تحسب معيس حبه حبه عدد مشتركي الموج الازرق الان 110 الف مشترك نقدر نقول ان كل هلالي مشترك في باقه الموج الازرق يدفع سنويا : ( 40 ريال * 12 شهر اشتراك ) + 45 رسوم تاسيس الباقه =525 ريال هذا بس رسوم اشتراك وتاسيس بدون مكالمات . واذا اخذنا هذا الرقم 525 * 110 الف مشترك = 57,750,000 ريال مقدار ماتدفع موبايلي للهلال لو قلنا هالسنة ان شاء الله حققنا بطولتين محليتين وبطوله خارجية البطوله الخارجية = 10.000.000 ريال سعودي البطولة المحلية = 5.000.000 ريال *2 اول شي 65.000.000 ريال + 10.000.000 +10.000.000= 85.000.000ريال سعودي معناه ان موبايلي دافعه اكثر من اللي خذت مع العلم اني ماحسبت مشتركي موبايلي الهلال ولا ذكرت ان موبايلي بعد كل فوز تعطيك 60 دقيقة مكالمة مرئية مجانا ولا حسبت قيمة الدعايات في القنوات ولا الجرايد اللي خلت نادي الهلال في كل مكان أخيرا اتمنى منك تبتعد عن التشكيك واتهاماتك للشعب السعودي انه سهل ينضحك عليه وعادي ترى الواحد يقول اني اخطيت والاختلاف لا يفسد للود قضية |
انا معاك بكل كلمه كتبتها يدك الف شكر انشالله يتعضون انا الحمدلله لآقربت لقناه الزعيم ولآ شي بس ششكلي ابي اشترك لآنو مافيه قنوات مثل العالم تنقل ..! |
كلامك يدل انك رجل استثماري واعي وواقعي حقيقه لانستفيد من الاشتراك في الموج الازرق في كلا الحالتين الزعيم مستفيد سوا اشتركنا او لا الآرتي وعقدها مع النادي جميع الجماهير مؤيده واستبشرت خيراً لكن السعر يخلف الله قيمة الباقه الكامله مع الافلام والمسلسلات هل يعقل اشتراك قناه في السنه يصل الى 900 ريال صراحه قمة السخافه والاستهتار الهلال وقع للقناه مقابل 16 مليون ومع اشتراك بعض الجماهير ( لن اكون منهم ) راح يحصل الهلال مايوازي 10% فقط من الدخل الاحصائيه شبه دقيقه حسب مصادري المتواضعه والعامله في الآرتي سالفة الشعار كل اللي ذكرت صحيح وعين العقل ولايحتاج زياده بررررررررب |
أخوي هلالي غير!! انت الآن إذا كنت هلالي و أحببت خدمة نادي الهلال مع استفادتك أنت شخصياً .. فالأولى أن تشترك في موبايلي لأنها الآن هي الراعي الرسمي للنادي الأزرق و عن طريقها نستطيع دعم النادي بطريقة شبه مضمونة.. و إذا كنت تبحث عن مصلحتك كعميل.. فابحث عنها و اتجه لها.. و البقية لهم عقول يفكرون بها و يعرفون إلى أين يتجهون.. . يجب أن تعلم أن شركة موبايلي لم تأت للاستثمار من باب الهلال إلا لأنها تريد الربح و لذا فشيء طبيعي أن نطالب بتربيح موبايلي من أجل الهلال.. و ليكن في علمك أن موبايلي إن لم تربح عن طريق شراكتها مع الهلال .. فلن يحصل الهلال على أي عقد مشابه لهذا العقد العملاق الجديد.. . و بما أنك قارنت بين الإتصالات و موبايلي.. فلماذا لم تتحدث عن طريقة التعامل مع العملاء.. فأنت تعلم أن موبايلي إذا أخطأت و لو خطأ غير متعمد بعدم إعطائك الدقائق المجانية مثلاً فإنها تعتذر.. بينما الإتصالات في كل سنة تزيد لمعظم المشتركين في سوا مئات الريالات ثم تسحب أرصدتهم الأصلية مع الرصيد الذي أضيف عن طريق الخطأ .. و هو ليس خطأ بل هو طريقة احتيال جربها الكثيرون من بعض الشركات الأخرى خارج المملكة و تعاملت بها سوا معنا داخل المملكة دون أدنى اعتذار أو إعادة للرصيد الحقيقي.. . الشيء الآخر الذي يجب أن تتحدث عنه هو مقدار اختلاس الإتصالات للمشجع الهلالي قبل توقيع الهلال مع موبايلي.. الإتصالات كانت ترعى الهلال بأقل من عشرة ملايين في الموسم و كان عدد المشتركين في جوال الهلال يربو على المئة ألف مشترك.. و للنادي نسبة 25% فقط.. و الشيء الثاني هو استفادة شركة الإتصالات من إعلانات لاعبي الهلال التي كانت مستمرة و بشكل لا يتصوّر رغم زهد المبلغ .. عكس موبايلي التي لم تفعل ما فعلته الإتصالات من استغلال.. . أشياء كثيرة ستعود عليك بعكس ما كنت ترجو فيما لو قارنت بين الإتصالا و موبايلي... فدع المقارنة أفضل..! |
غاليهم اولا انا ماانتقصت من عقليتك عشان ردك او اختلافك معي في الرأي , كلنا اخوان وفي منتدى واحد واختلاف الاراء شي عادي لكن انك تقول اني موظف في الاتصالات وهذا سبب كتابتي هذا شي يخليني انتقصك مع احترامي لك . ثانيا - طريقه حسابك تختلف عن طريقتي انا كنت اتكلم عن الـ 10 مليون الي تمنحها موبايلي للهلال اذا وصل عدد المشتركين لـ 200 الف . اما 65 مليون الي طايرين فيها هذي شركات ثانيه تدفعها قيمه اعلانات تلفزيونيه . بس عندنا هنا نعتبرها شي كبير واذكرك بعد 3 سنوات اذا الله احيانا تشوف انه مبلغ ضعيف ولا يقارن مع نادي بحجم الهلال . على العموم رايك وطريقه حسابك مو بالطريقه او النقطه الي كنت ابغى اوصل لها . انت حسبت البطولات وقيمه العقد وحاجات ثانيه . ودخلت في احتمال تحقيق بطوله او بطولتين ولا تنسى ان نادي الهلال كان بيفسخ العقد مع موبايلي لعدم التزامهم في بعض النقاط . وهذا يدل على انهم يبحثون عن تحقيق مصالحهم عن طريق الهلال ولو كانت الاتصالات السعوديه بديله عن موبايلي كان زاد الوضع سوء لكن الهدف الي ابغى اوصله ان كلا الشركتين تسعى لتحقيق مصالحها عن طريق الهلال وجمهوره وان كانت موبايلي افضل السيئين . تحياتي .. |
توضيحك للأخ غاليهم كأنه رد على ما قلته.. . لكن وددت التوضيح عن أن الشركة لم تأت للاستثمار الرياضي إلا من أجل الربح.. و من الطبيعي أن تربح الشركة.. شيء آخر .. و هو أنك ذكرت أن موبايلي أفضل السيئين.. و هذا يكفينا للبقاء معها في شراكة و دعم الهلال عن طريقها.. و صدقني الشركات الأخرى تدرس عقد الهلال مع موبايلي فإذا لم تربح موبايلي فتأكد تماماً أن الشركات الأخرى ستصرف النظر عن الهلال و سيكون المبلغ المقدم بعد انتهاء عقد موبايلي أقل .. و ربما أقل بكثير.. |
إقتباس:
الي فهمته انت الحين اني مع الاتصالات ( انا ذكرت الاتصالات كمثال لشركه منافسه) انا كل الي ابغى اوضحه ان موبايلي مو شركه خيريه وجات للسعوديه فقط لدعم الهلال ورعايته وتوفير خدمات خاصه لجماهيره بدليل الاسعار والباقات الي ذكرتها لك وتقدمها الاتصالات السعوديه للجميع . واعيد مره ثانيه ان موبايلي تستغل الهلال لتحقيق اهدافها ولو كانت الاتصالات الشركه الراعيه يمكن تسوي اكثر من موبايلي .. ومثل ماقلت انت : و إذا كنت تبحث عن مصلحتك كعميل.. فابحث عنها و اتجه لها.. و البقية لهم عقول يفكرون بها و يعرفون إلى أين يتجهون.. اقولك انا اكيد ابحث عن الافضل لي في كل شي مو بس بين موبايلي والاتصالات وانت اتبع عقلك واتجه مثل ما تحب انا ما غصبت احد ولا سوقت للاتصالات ولا طلبت من احد انه يغير موبايلي مع اني اعتبرها سيئه لكن افضل الموجودين . طيب مالك تعليق على قناه الزعيم ؟؟ ولا بتقولي من حقها تربح مثل موبايلي . وباقي النقاط الي في الموضوع ولا موبايلي هي النقطه الحساسه في الهلال . والله لو الهلال الغى العقد معهم واستبدله بعقد الاتصالات مااظن سمعت هذا الرأي منك كان طبلتوا للاتصالات مثل تطبيلكم لموبايلي . |
الحقيقه انا قريت كلامك فقط عن موبايلي وتوقفت عن القراءة لأني وجدت انه في البداية المعلومة مغلوطة لذلك لم أكمل ... ضمن المعلومات المغلوطة اللي اتوقع انك قاصدها لولا : باقة زيرو اللي في الاتصالات دقيقتها داخل شبكة الجوال 30 هللة وخارجه 35 هللة وترى 5 هللات تفرق في الشهر لاتتهاون فيها وكمثال : 5 هللات × 20 دقيقة يوميا = 1 ريال 1 ريال × 30 يوم في الشهر = 30 ريال لاحظ اني حاسبها على اساس الناس اللي مكالماتها قليلة لكن احسب الناس اللي يكلمون مثلا 60 دقيقه في اليوم بيكون الفرق 90 ريال في الشهر الشي الثاني في باقة زيرو انها لازم تدفع 175 ريال سواء كلمت فيها ولا لا ومن ناحية باقة الموج الازرق استغرب منك انك تذكر مميزاتها وتقول مافيها مميزات مايكفي مثلا بعد كل فوز 60 دقيقه مجانية مايكفي ان الاشتراك 40 ريال بفرق 5 ريال عن الاشتراكات في كل الشركات مايكفي ان الدقيقه داخل الباقه 20 هللة وسعر الدقيقه في خارج الباقة 30 هللة ارخص من زيرو وحقيقة دسك لباقة زيرو داخل موضوعك فيه تعمد للدعاية لهذه الباقة |
| الوقت المعتمد في المنتدى بتوقيت جرينتش +3.
الوقت الان » 10:09 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd