الـحـرمـــــــــــــــــــــان - صفحة رقم 5 - نادي الهلال السعودي - شبكة الزعيم

BLUE-STAR · #1 19/07/2008, 09:55 PM

بدآيه رآئعه ومشوقه آبو ريمآن..

بس والله يالبنات بياكلون تبن بالروايه دآم بعض الردود كذا وحنآ بأول الطريق

بنتظآر الجزء الثآني ..!

مانشستراوي16 · #2 19/07/2008, 10:07 PM

مشكووووووووور على الموضوع وننتظر جدييييييييدك

الهنوووف · #3 20/07/2008, 01:06 AM

عودة

إقتباس


	أخوك / عبدالرحمن "

بوح حزين
ذهبت بي بعيدا
دعتني اعيش تلك اللحظات التي قد اكتب مثل تلك الرساله لاختي الوحيده

انتقال من نحب لحياه اخرى شعور ممزوج بفرح وحزن
سبحان الله عشرين سنه تعيشون سوا طفوله مراهقه تصبحون على بعض
وبلحظه ينتقلون لحياه اخرى

مو على كيفهم

بس يالله هذي سنه الحياه

ولكن مثل تلك الرسايل الافضل الاحتفاظ بهاا ومانقدمها للمقصود
حلو نبين لهم ان حنا مبسوطين لهم ومانضيق صدورهم

وندعي لهم

::::>>مسكت خط

\
/
جزء جميل ظهرت فيه ملامح الاخووه

مانحس بقيمتهم الا لما يبعدون عنـا

شكرا لك ابوريمان

الهنوووف

كانت

هنا
ورحلت

الغدير الازرق · #4 19/07/2008, 10:55 PM

بدااااية موفقة أبو ريمان ,,
وااااصل وانا من المتابعين

بانتظار الجزء الثاني ,,

abu_riman · #5 20/07/2008, 12:29 AM

@@ الجزء الثاني @@

حنين بعد ما ركبت و قفلت باب السيارة : " أووف زحمة ! "

عبدالرحمن : " ما شاء الله جبت غرضك بسرعة "

حنين : " والله لو مو مرتبطة بموعد المشغل كان ودي إني منزلتك معي و مسحبتك شوي ! "

عبدالرحمن : " والله لو ما أدري إنك مستعجلة كان ما جبتك أصلاً !! بعدين اصبري شوي لين نوصل للبيت بعدين خربيها ، ترى المشوار ما بعد خلص "

حنين : " شكراً طال عمرك ! ما ودك توديني المشغل ؟! "

عبدالرحمن : " كنك كنك يعني أخذت وجه ؟! ترى مو أكيد بس كنك !! ليه ما تروحين مع السواق ؟! "

حنين : " يا ثقل دمه يمشي على بيض و أنا بعد المشغل بارجع و أتجهز شكلي باتأخر "

عبدالرحمن : " إن شاء الله برنسيسه ! أنت تامرين طال عمرك أوديك ليه ما أوديك . متى بتروحين ؟! "

حنين : " شوي بس باطلع غرفتي و بانزل "

عبدالرحمن : " بانزل عند أمي شوي لحد ما تجهزين "

حنين : " أوكي ، ثواني و نازلة لك "

عبدالرحمن : " هلا يمه "

أم عبدالرحمن : " هلا أبوي ، عساكم خلصتوا شغلكم ! "

عبدالرحمن : " خلصنا السوق و باقي المشغل "

أم عبدالرحمن : " إييييه و أنا أمك ! أيامنا ما نعرف هالخرابيط "

عبدالرحمن : " و مع كذا كانت أيامكم أجمل ببساطتها و تلقائيتها "

أم عبدالرحمن : " الله يعين و أنا أمك ، المهم جب أختك للزواج لأني باروح مع السواق لو انتظرتها تأخرت على أختي "

حنين : " يالله عبدالرحمن الله يخليك تأخرنا "

أم عبدالرحمن : " باسم الله عليكم ، لا تسرعون "

عبدالرحمن : " إن شاء الله يمه "

عبدالرحمن : " شكل خالتي متكلفة الله يعينها "

حنين : " إي والله عبدالرحمن خالتي مرة متكلفة ، بس يحق لها بنتها الوحيدة ، بعدين لا تنسى فوق إنها صديقتي الخاصة أختي من الرضاعة و ضروري يصير زواجها متميز "

عبدالرحمن : " يا سلام ! عشانها أختك من الرضاعة يصير زواجها متميز !
هذا أنت بكبرك بنتنا الوحيدة و زواجك على الصامت "

حنين : " لا تستهبل ! بعدين هي رغبة مشتركة مني و منه "

عبدالرحمن : " إذا تبين الجد عاد والله إنكم عاقلين ، وتكاليف الزواج تقدرون تصرفونها في شي تستفيدون منه لحالكم ، و أهم شيء الله يوفق "

حنين : " يعني ودك تاخذ وحدة مثلي ؟ "

عبدالرحمن : " أقول أها بس عن اللكاعة و انزلي لا تتأخرين "

حنين : " لو تروح تقضي لك مشوار و ترجع أحسن لك من الانتظار ، أخاف تمل "

عبدالرحمن : " مو مشكلة ، أهم شيء إذا خلصت و قبل ما تنزلين اطلبيني على الجوال "

حنين : " أوكي ، صار "

عبدالرحمن : " انتبهي لنفسك "

نزلت حنين و تابعتها بناظري و بعد ما دخلت للمشغل أخذت ورقة و كتبت :

" الله لا يحرمني منك حنين .
صدق بافقدك بعد زواجك ، بافقد دلعك و إزعاجك ، بافقد شقاوتك و مو بس أنا !
البيت و أمي ، كلنا بنفقدك يا ( روح ) البيت و ( حياته ) .

بافقد جلستك على طاولة مكتبي مقابلتني لما أجلس على الكرسي أقرأ أو أكتب ، بعد اليوم ما في أحد يقدر يشتت تفكيري ! لأنك أنت الوحيدة اللي تقدرين .

بافقد رفعة الضغط ، بافقد دخلاتك لغرفتي و قلبك لها فوق تحت و تفتيشك الدوري لغرفتي و جهازي ..
بعد اليوم ما راح أفقد شيء من كتاباتي و أوراقي ..

بافقد أوراقك اللي إذا جيت متأخر بعد ما تنومين أحصلها على باب غرفتي مكتوب عليها
( تصبح على خير ، اشتقت لك ، ليه تتأخر )

و أحلى شيء حنين لما تكتبين لي ( تلقاني في غرفتي انتظرك ، ما راح أنوم قبل أشوفك )
و لما أجي لغرفتك ألقاك نايمة ، مثل الملاك نايمة !
والله كنت أحس وقتها بالذنب.

غاليتي حنين ..
أنا آسف إذا قصرت بحقك يوم ، أنا آسف لو كنت بيوم أخ غير مثالي .

أخوك / عبدالرحمن "

اتصال من حنين أجبرني على التوقيع و إبعاد الورقة .

ركبت حنين السيارة و كانت تعتقد إني خلصت لي مشوار و من دون ما تحس حنين لما نزلت من السيارة كانت الورقة في حقيبتها .

حنين و هي تنزل من السيارة : " بابدل ملابسي و أنزل دقايق بس "

عبدالرحمن : " بسرعة لا تتأخرين تتضايق أمي ، صار لها وقت رايحة "

شعرت بالرضى عن نفسي بعد الورقة التي كتبتها ، كلام في خاطري من زمان و ارتحت يوم كتبته .

أسيرة الزعيم · #6 20/07/2008, 12:53 AM

فقط أشعلت فتيل ذكريات مضى عليها من العمر 3 سنوات .

abu_riman · #7 20/07/2008, 01:20 AM

هلا بأسيرة و الهنوف ،،،

السؤال اللي طرأ على بالي بعد تعليقاتكم !!

إذا قرر شخص يتزوج ، الأفضل له يختار بنت علاقتها قوية بأهلها أو بنت علاقتها عادية ؟!

أسيرة ودك أتأسف لك ؟!
طيب إذا تأسفت لك و إنا ما زلنا بالجزء الثاني وش أسوي في الأجزاء الأخيرة ؟!

لميس الهلالية · #8 20/07/2008, 01:56 AM

إقتباس

الرسالة الأصلية كتبت بواسطة abu_riman


	إذا قرر شخص يتزوج ، الأفضل له يختار بنت علاقتها قوية بأهلها أو بنت علاقتها عادية ؟!

برأيي أخلاق البنت غالباً تتحدد من خلال علاقتها بأهلها
يعني اللي مرتبطة بأهلها و أهلها مرتبطين فيها على أغلب الظن إنها مسالمة و مو مشكلجية

هذا إقتراحي في الموضوع

وبعدين ترى أنا من معارضين تنزيل الأجزاء بسرعة ,,, أسيرة و الهنوف قدروا إن فيه ناس ما يفتحون النت إلا بالمناسبات

الهنوووف · #9 20/07/2008, 02:28 AM

إقتباس

الرسالة الأصلية كتبت بواسطة abu_riman


	هلا بأسيرة و الهنوف ،،، السؤال اللي طرأ على بالي بعد تعليقاتكم !! إذا قرر شخص يتزوج ، الأفضل له يختار بنت علاقتها قوية بأهلها أو بنت علاقتها عادية ؟! أسيرة ودك أتأسف لك ؟! طيب إذا تأسفت لك و إنا ما زلنا بالجزء الثاني وش أسوي في الأجزاء الأخيرة ؟!

برائي الي علاقتها قويه افضل
لاننا مانحس بالشي الا لما نعرف انه غالي ونسعى له
اما لو حسينا ان قيمته عاديه بنستهين فيه شوي

لما يدرك الزوج ان زوجته غاليه على اهلها وعلاقتها قوية فيهم
اتوقع بيسعى لها وحتى يوضح لاهلها انهم اعطوها للشخص الي يستاهلها

مثال بسيط
لما يعطيك شخص امانه عباره عن ساعتين
وحده من الساعات هالشخص يقدرها وتعني له كثير وغاليه عليه
والثانيه عاديه
اتوقع بتحاول تحافظ على الساعه الاولى اكثر

اولا ..لانك حاس بغلاتها عند صاحبها
وثانيا.. كتقدير للشخص انه وثق فيك وسلمك شي ثمين وغالي عليه

اتمنى وضحت الفكره

وايضا
الشخص القريب لاهله مره ويحبونه يصير قلق في بعض الاحيان
لان بعضهم صعب عليهم يتقبلون ان هالشخص اخذ شي غالي عليهم
ويصيرون يكرهونه

ويغارون منه

لميس الهلاليه
اعقلي ياوخيتي

انتي اقري على مهلك وخلينا على راحتنا لاتخربين علينا

بس اخالفك برايك
ان البنت المسالمه هي القريبه لاهلها
اتوقع نوعيه العلاقه تحددها الاسره نفسها بصرف النظر عن طبيعه البنت
يعني حنا دائما نقول
هالاسره علاقتهم قويه
نادر مانقول هالاخت علاقتها قويه باهلها والثانيه عاديه الا نادر جدا
لان الاساس الام والولد هم الي يحددون طبيعه العلاقه

ابوريمان
اعتذرر على كثرة التواجد

الهنوووف

كانت

هنا

ورحلت

عريب عبدالله · #10 21/07/2008, 02:50 AM

بدأت تتحدد معالم الرواية

لفت نظري الرسالة وجمال العلاقة الأخوية اللي من المفترض تكون بكل بيت

برغم من أني ما أفضل الأجزاء المتسلسلة لكن مضطرة أتابع

لأن الرواية مختلفة عن الكتابات الأخرى

لازلت أرى أن الجزئين عبارة عن مقدمة

لكن مقدمة جيدة بإنتظار المزيد

إقتباس

الرسالة الأصلية كتبت بواسطة abu_riman


	إذا قرر شخص يتزوج ، الأفضل له يختار بنت علاقتها قوية بأهلها أو بنت علاقتها عادية ؟!

أحس السؤال واسع شوي ويحتمل عدة إجابات

أنا أشوف اللي مافية خير لأله مافيه خير للناس

ولكن على حسب الأهل بمعنى

إذا كانت قوة العلاقة تجعل البنت أو الشاب لو أخذنا السؤال من الجهه الأخرى
تقف مع أهلها حتى بالغلط أحس أنه صعبه

لكن إذا كانت قوة العلاقة بقوة شخصية قادرة على التمييز بين الصواب والخطاء أمر جميل

أما البنت ذات العلاقة العادية ممكن يكون العيب ماهو ناتج عنها

كأن تكون الأسرة مفككه لكن البنت جيدة

عموماً الأسرة القوية المتماسكة أفضل
لأن البنت بتتأثر بحياتها السابقة وتنزلها على الأسرة الجديدة
قوة علاقتها بأهلها بتجعل علاقتها بزوجها وأهله أقوى لأنها تربت على هذا الشي

هذي وجهة نظر قابلة للصواب والخطاء

بالحب والإشراق

مَاهِينُورْ · #11 21/07/2008, 03:08 AM

..

مرحباً بأستاذنا أبو ريمان ورده.

رائعة رائعة

والأروع أن البطلة

اسمها حنين

..
..
تسجيل حضور فقط

..
سأبقى متابعة ..
شكراً مفكرنا ورده ورده ورده..
..

أسيرة الزعيم · #12 24/07/2008, 02:19 AM

إقتباس

الرسالة الأصلية كتبت بواسطة دبــل كيــك


	الـحـرمـااان .. مـعـاانـاااة ... يـجـسـدهـااا الـقـدر .. لـتـرتـمـي وتـجـثـم عـلـى صـدوورنـااا .. فنـجـد فـي الـدمـع مـلـجـأاً .. ومـخـرجـاً ..

يقول عبدالله الفيصل :
مشينا فوق درب السهد والآلام ولأحزان
حيارى في خضم التيه ماترسي مراسينا

تباشير السعادة عن نظرنا لفها النسيان
وفوق اهدابنا ماتت من الحسرة امانينا

و ماذا بعد الحرمان ؟!
و ماذا بعد الدمع الذي ( يحاول ) أن يكون الملجأ والمخرج ؟!
ربما( قوة ) مصدرها ذلك الألم وتلك المعاناة !

لن نستعجل .. الاجابة حتماً ستكون بين أسطر هذه الرواية !

هنا فرصة لنبارك للسكب قبوله في جامعة البترول ،،
دعواتنا لك بالتوفيق دوماً

~SaKaB · #13 24/07/2008, 02:47 PM

حنين مو متعودة تطلع كثير عن أهلها .. أو ما تعودت تتعرف على ناس كثير ..
يمكن يكون هذا سبب

واصل السرد

عبد الرحمن

إقتباس

الرسالة الأصلية كتبت بواسطة أسيرة الزعيم


	هنا فرصة لنبارك للسكب قبوله في جامعة البترول ،، دعواتنا لك بالتوفيق دوماً

الله يبارك فيك أختي أسيرة

الحمد لله هانت

سكب الهلال

Dr.Sara · #14 20/07/2008, 02:16 AM

يا الله ..

جزئين ولا أروع .. و لكــــن الجزء الثاني حمل في طياته شيء حزين جـــداً

احياناً يتمنى المرء واحد من أثنين : إما أن يفقد مشاعرهـ قبل لحظات كهذهـ

أو يستمتع بـ لحنها الحزين .. والذكريات تُقطعه..

* * *

وبالنسبة لسؤالكـ ::

إقتباس


	برأيي أخلاق البنت غالباً تتحدد من خلال علاقتها بأهلها يعني اللي مرتبطة بأهلها و أهلها مرتبطين فيها على أغلب الظن إنها مسالمة و مو مشكلجية هذا إقتراحي في الموضوع وبعدين ترى أنا من معارضين تنزيل الأجزاء بسرعة ,,, أسيرة و الهنوف قدروا إن فيه ناس ما يفتحون النت إلا بالمناسبات

نفس الرأي ..

* * *

شكراً ابو ريمان وبإنتظار القادم من الحرمان << اعوذ بالله منه ..

وشكراً مرة أخرى أنك جمعتنا بمن كنا ننتظر وجودهم دائماً كأختي "لميس الهلالية"

,,

عسيريه · #15 20/07/2008, 02:38 AM

.

.

حلوه هالمشاعر بين الأخت وأخوها

من جد تحسها مشاعر مبنيه
على أساس وليس على أوهام

إقتباس


	بافقد أوراقك اللي إذا جيت متأخر بعد ما تنومين أحصلها على باب غرفتي مكتوب عليها ( تصبح على خير ، اشتقت لك ، ليه تتأخر ) و أحلى شيء حنين لما تكتبين لي ( تلقاني في غرفتي انتظرك ، ما راح أنوم قبل أشوفك )

سبحان الله الأوراق تواصل عجيب بين الأخوان

أستخدمها يومياً لـ أختي يا أعلقها عند الباب أو على المرايه

لأني عارفه اختي اول شي تطالع فيه المرايه

جزء حلوو وطويل نوعا ما

بدينا نخش جو ونتعلق أكثر بالقصه

الله يعطيك العافيه يبو ريمان , مبدع والله

مع التحيه