|
يووووووووووووووووووووهـ حلو انه ماكلمها لأن اعصابهـ هو مو على بعضها :yes: أحسن انهـ أجل الكلام .. ابو ريمان لاتتأخر علينا وربي متحمسهـ تراي :d |
أبو ريمان .. اعذرني ع الانبراش و الدخول المفاجئ ولكن في ملاحظه قبل اقول رأي في الجزأين الاخيرين .. الملاحظه ياطويل العمر , اني اكتشفت أنه مو انا بس اللي عندي اخطاء املائيه . إقتباس:
وينك يابو عبدالله تشوف الناس يخطئون بالكتابه مو انا بس :d نرجع لمحور حديثنا .. :) اعتقد ان كلام نجلاء منطقي جداً , حنين تعودت على أن يكون عبدالرحمن فقط لها . ولا ألوم نجلاء وبالعكس اعتقد انها بتصرفها تعمر ولا تهدم :) دمتم بخير |
^ ^ ^ لا تكلمني إذا سجلت معنا نجلاء في المنتدى قل لها ، هي الغلطانة :D |
. إذا كان عبدالرحمن مقتنع بمياسم كزوجه له فالفروض يقنع حنين او هي تقنعه ليه ما تبيه يتزوجها لان سببها ابد مو مقنع اتوقع فيه اسباب ثانيه بس ما تبي تقولها له و مثل ما قالت نجلاء تعامل عبدالرحمن هو اللي وصل حنين و خلاها تحس انه لها بلحاله فطبيعي ما تبيه يتزوج لانها ما تبي تفقده و اتمنى كلام نجلاء يجيب فائده بحنين .. ننتظر الـ يتبع القادم ورده |
السلام عليكم ورحمة الله وبركاته صراحه متابعه من زمان بس الظروف ماتخليني أرد متحمسه مررره وقهرتني هالحنين بعني لا قالتلنا سبب رفضها لزواجها ولا خلت أخوها يتهنى حتى أمهم أقلقتها والسبب حنينوه وأقول لنجلاء سيري للأمااام المفروض ماتستنى حنين وتروح تقول لعبد الرحمن السبب << عصبت أخوي ابو ريمان ... إذا ما عليك كلافه ... يعني وبعد إذنك ... وإذا مانكون ضيقنا عليك ... لااا تتأخر إلحق علينا بالتكمله. والله يعطيك العافيه ويقويك على تكملة الأجزاء. تقبل مروري |
أمي تقول : حنين و الهنوف معهم حق . و هذه الأمور لو ما أثرت في بداية الزواج فتأثيرها أمر أكيد بعد فترة .. و دام اقتناعه بالبنت ناتج عن السوالف اللي سمعها عنها .. هذا يعني انه لم يصل لمرحلة التعلق بها .. لذلك إنهاء الموضوع قبل بدايته أفضل .. أفكر جدياً في جعل جدتي ضيفة الاستديو التحليلي في الجزء القادم :d |
رأيي من رأي نجلاء .. وقاهرني هـ الولد عبدالرحمن ! :upset: المهم لقيت قصة أسمها "عادي بن عادي العادي" , عجبتني وحبيت انقلها لكم.. بعد السموحه منك ابو ريمان ..: { عادي بن عادي العادي يحكي أن هناك شخصا يدعى عادي بن عادي العادي ... ولد بشكل عادي من أب عادي وأم عادية ... وكانت ولادته في يوم عادي ... ودرس بمدرسة عادية .... انتقل من مرحلة إلى مرحلة بشكل عادي ... ثم انتقل إلى المرحلة الجامعية بشكل عادي ... وتخرج أيضا بشكل عادي ..... وتوظف وظيفة عادية كأي موظف عادي ... ثم تزوج من امرأة عادية وأنجب أطفال عاديين .... وكان أبا عاديا وربى أطفاله بشكل عادي ثم زوجهم بشكل عادي ..... ثم أصبح جدا عاديا لأحفاد عاديين .... وأخيراااااا ..... رحل عن الدنيا بشكل عادي ... فكم من الناس جاؤوا إلى الدنيا ورحلوا عنها بشكل عادي... } |
وأخيراً فرغت نفسي وقريتها من أولها لآخرها :stoned: إقتباس:
لكن ماذا حدث بين حنين وسعود ؟ ,, هل هو نتاج فترة الملكة القصيرة !! , الزواجات السريعة لم تعد تنفع :no: فلا بد من أن يتعرفا على بعض اكثر فترة الملكة سواء عن طريق المكالمات أو الزيارات, منها يكون توتر الفتاة في ليلة زواجها أقل وتكون في راحة نفسية أفضل ,, وكذلك حتى يرون مدى انسجام طريقة التفكير لكليهما .. فالزواج ليس أمراً سهلاً .. بل كل حياتهما القادمة مرتبطة فيه . ولكن ان ينهي عبدالرحمن علاقة اخته بسعود بهذه الطريقة السريعة فليست هي المثلى !! , كان الأجدى أن يفاتحها ويعرف منها ما حدث ! . وأن يستشيروا أخصائية طب أسرة .. فربما كان السبب نفسي أكثر من أنه عدم توافق او انسجام . وقد يكون زواج حنين وموافقتها على طلب أهل زوجها بإسراع الزواج ماهو إلا هرباً ! , ولكن من ماذا ! .. أما بالنسبة لمياسم فأنا أوافق ما قالته الهنوف ووالدة اسيرة .. فأظن بان التوافق الإجتماعي مهم جداً في الزواج , حتى لا يشعر احدهم بأنه أقل من الآخر ! , وإن كان الآخر لا يحسسه بشيء !!! , ولكنني أعتقد بأن هنالك سبباً آخر كان خلف رفض حنين لزواج اخيها من مياسم وإن كان مرتبطاً بطريقة غير مباشرة بالسبب الذي ذكرته نجلاء ! , لم تحدثنا عن اخوة مياسم ! :stoned: أبو ريمان .. عجّل علينا ببقية الأجزاء s60s.. لكن قبل ذلك هل الأجزاء موجودة لديك كاملة ! .. ام أنك ما زلت تكتبها وتطرح ما تنتهي منه ! إن كان الخيار الثاني هو الواقع .. فمن الأفضل لنا أن لا نخوض كثيراً في تحليل الأحداث والتنبأ بالتوقعات حتى لا تتأثر أحداث الرواية بما نقول , |
.. s76s تحيه لصديقتي وموافقتي بالاراء ( والده اسيره ):smilie47::d باقه وردة لكـ بالبدايه توقعت ان السبب ان مياسم فيها شي مرض او شي >>لاعمرك تحسين :d اوافق الماسه اذا الروايه مو كامله خلنا نسكت شوي ومانحلل علشان ماتخرب:d فـ اذا استمر الحال هكذا فــ عائله اسيره حفظهم الله سيتولون كتابه بقيه الاجزاء:d \ / بالانتظارررر مانزلت اليوم شي :yes: الهنوووف كانت هنا ورحلت |
إقتباس:
أنا بزواج بنت خالي لأننا مقربين جداً من بعض ماوقفت دموعي لأني أكثر وحدة تعرفها وحاسة في إحساسها هذا مايعني أني ما أحبها لكن لأني أحبها كثير وكانت مثل حنين مضغوط عليها شوي وأنا اللي أقنعتها مشكلة الأهل مايتفهمون رهبة الموقف وشايفين السالفه عادي كل اللي تحتاجة البنت أحد يسمعها بدون ما يوجهها لأنها ما تحتاج توجيه بس تحتاج أحد يسمعها ويسمع مخاوفها ويفهمها عشان يخف الضغط عليها من رهبة الموقف حنين ماتبي تفقد صديقتها لو أهل مياسم رفضوا أخوها وماتبي تزعل أخوها لما تقول له عن اللي صار إحترامها لصديقتها هو اللي خلاها تتغاضى عن كلمات أمها لكن ماتبي أخوها ينجرح مثلها وماتبي تقول له لأن الموقف صعب موقف حنين معقول جداً وأتفق معها نجلا ء زودتها مع حنين شوي المفروض ما كلمتها بهالطريقة لأن حنين بتكون مبسوطة لو تزوج أخوها من مياسم لأنهم أكثر أثنين تحبهم لكن فيه أطراف أخرى ممكن تخليها تفقد واحد منهم بالحب والإشراق |
نظراً لتكرار السؤال ، الرواية تقريباً موجودة من زمان و يمكن اللي يصير ( تحديث ) للسيناريو . يعني اشتغلوا تحليل على راحتكم :D ما راح يتغير شيء ، في البداية و بعد قراءتي لبعض التحليلات فكرت أغير لكن في الأخير فضلت أخليها مثل ما هي ، لأني لو صرت أغير مع كل تحليل يمكن في الأخير تطلع قصة ثانية مختلفة نهائياً . الماسة تتوقع إن مياسم بيكون لها ((( جزء ))) من الرواية ؟! مياسم !! ودي أحكي لكم كيف بيكون وضعها لكن ما أبي أحرق الرواية عليكم . الله أعلم !! يكون لها جزء أو أكثر أو أقل ! إلى هاللحظة مياسم ما تدري عن اللي يصير !! الدنيا مقلوبة فوق تحت عبدالرحمن / حنين / نجلاء و هي ما تدري عن شيء :) نتابع و نشوف !! تابع معنا أبو عبدالله :D أسيرة هذا كلام أمك أو جدتك ؟! إذا كلام أمك ليه تجيبين جدتك ؟! جيبي أمك . عموماً في كل الحالتين اللي راح يقابلهم في الاستديو أبو عبدالله للتقليل من أثر الفارق السني :D فاقدينك أبو ناصر ، أتمنى أنكم استمتعتم بقصة عادي بن عادي العادي . شكراً لكم . |
أتـمـنـى الـتـعـجـيـل فـي الـجـزء الـتـاالـي .. حـنـيـن حـسـااسـة .. وهـذا الـنـوع عـنـد اسـتـشـااارتـه يـكـوون رااايـه عـاااطـفـي بـعـيـد عـن الـعـقـلااانـيـة .. الاا اذاا فـيـه سـبـب مـقـنـع .. مـع ان شـووفـة الـنـفـس من ام مـيـاااسـم مـبـرر قـوي .. عبدالـرحـمـن فـي مـوقـف يـتـطلـب حـكـمـة ورويـة .. بـعـيـد عـن اي انـفـعـااال .. الـخـلااااصـة .. عـجـل علـيـنـااا ... داام هـي مـكـتـووبـة مـن اول .. والااا كـلـمـت الـعـنـااا يـسـرب مـااا تـبـقـى مـن أجـزااء :d مـتـااابـع .. |
^ ^ ^ عاد هو الله يسلمه له سوابق مع بعض الناس ( وجه معصب ) |
. . حنين حسآسه بقوه . موقف نجلاء أعجبني أحسها تتكلم بواقعيه مو الكل بيعامل حنين مثل مايعاملها عبد الرحمن ! بـ إنتظآر البقيه ورده مع التحيه |
@@ الجزء الثاني عشر @@ حنين / نجلاء / مياسم !! أحس رأسي بينفجر ! مياسم .. ما أدري ليه أحس إن خاطري في هالبنت ، يوم عن يوم أحسها أقرب و أحس إني أتعلق فيها أكثر و أكثر صرت أستعرض موقفها يوم زواج حنين ، كلام حنين عنها !! طيب ليه أنا لما فكر فيها غصب عني أبتسم ؟! ليه أنسى الدنيا و همومها ؟! ليه الحين أنا نسيت كل شيء و الابتسامة على وجهي ؟! ليه ؟! رجعت لحنين و نجلاء .. باصلي ركعتين أستخير الله للمرة الأخيرة و إذا صحيت يصير خير .. صحيت من النوم و طلعت للدوام و أنا أحاول أبعد أي أفكار بخصوص الموضوع عني . رجعت بعد الدوام ، حصلت أمي و حنين على السفرة و بعد سلام كل يوم إلا أنه ظاهر علي تشتت أفكاري ، جلسنا حول السفرة نأكل و خلال فترة صمت .. عبدالرحمن : " يمه أنا قلت لك عن البنت اللي في خاطري " لاحظت إن حنين رفعت رأسها و ناظرتني نظرة سريعة و رجعت تناظر أكلها . أم عبدالرحمن : " إيه و أنا أمك ، بس ما قلت لي عنها ؟! " عبدالرحمن : " مياسم يمه ، البنت اللي في خاطري مياسم " حنين اللي كنت أتابعها أبي أاعرف ردة فعلها أبداً ما رفعت رأسها . أم عبدالرحمن تسأل باستنكار : " مياسم ؟! بس مياسم من متى و إنا نعرفها ، ليه الحين بس جت على بالك و صرت تفكر فيها ؟! " عبدالرحمن : " يمه ! البنت فيها شيء ؟! فيها عيب ؟! " أم عبدالرحمن : " أبد ما فيها عيب و أنا أمك و الله يستر عليها ، بس سمعت إن أمها فيها شوفة نفس شوي " عبدالرحمن : " - من مين سمعت يمه ؟! - حنين ! هذا هو نفس السبب اللي مخليك أنت بعد ترفضين ؟! - لا تخلوني في موقف محرج ، إذا يهمكم ولدكم أبي أعرف وش اللي صاير بالضبط ؟! - البنت خاشة مزاجي و خاطري فيها فخلوني أعرف كل شيء من الحين أفضل " أخيراً تكلمت حنين : " - وش تبي تعرف ؟! القصة و ما فيها إن أم البنت تشوفنا أقل منها مستوى ! - إذا ما عندك مشكلة في هالشيء توكل على الله ، بس اللي أعرفه عنك إنك حساس و ممكن أي كلمة تأثر فيك ، باختصار هذا اللي مخوفني عليك " عبدالرحمن : " كيف يعني تشوفنا أقل ؟َ! مادياً ؟! اجتماعياً ؟! " حنين : " مادياً عبدالرحمن " عبدالرحمن : " و أبوها ؟! نفس النظرة ؟! " حنين : " لا ، أبوها إنسان محترم جداً و مياسم متعلقة فيه أكثر و دايم تتحفظ على تصرفات أمها " عبدالرحمن : " طيب كويس ، معناته إن البنت تعرف الصح من الغلط " حنين : " مهما كان عبدالرحمن ، بتكون شخص غير مرحب فيك ، و أنت ألف وحدة تتمناك و ما في شيء يحدك على كذا و الله يرزقك اللي تسعدك ، و مياسم الله يرزقها اللي أفضل منك بعد " عبدالرحمن : " آمين ، الله يوفقنا و إياها " حنين : " عبدالرحمن أنت أكثر شخص تعرف نفسك ، إذا هذا ما يهمك توكل على الله و اخطبها ، لكن إذا بكره كل ساعة و الثانية بتتعب و بتفسر كل تصرف للبنت إنه شوفة نفس تراك بتظلمها قبل ما تظلم نفسك ، بعد كذا حتى لو أخذت مياسم و لا قدر الله ما حصل توفيق أنا ما راح ألوم نفسي لأني سويت اللي علي " عبدالرحمن : " ليه ما تكلمت من أول ؟! " حنين : " من أول يعني متى ؟! أنا ما كنت أبي أحكي في أحد ! و مياسم تعز علي ما أبي أحكي عن أمها كذا ، و لو كنت دارية إنك متعلق كثير كان حكيت ، لكن توقعتها اسم مثل أي اسم و يكفي أقول لك ما تصلح ! بالله عليك كم اسم فكرتَ فيه و لما قلت لك ما تصلح صرفت النظر نهائياً ؟! وش معنى مياسم لما قلت لك عنها ما تصلح ما صرفت النظر ؟!" تركت الطاولة ، طلعت غرفتي و كنت أمشي مشية الخسران !! كلام حنين فاجأني ، لأنه فعلاً صحيح ، بعدين حنين اليوم تحكي بعقل و ثقة ! كأننا تبادلنا الأدوار !! بس أحياناً الواحد إذا صار خاطره في الشيء يشوف الصح غلط و الغلط صح !! الله يهديك يا مياسم ! أنت من وين طلعت لي ؟! |
| الوقت المعتمد في المنتدى بتوقيت جرينتش +3.
الوقت الان » 03:25 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd