إليكم قصتي لعبت الدنيا فيني
 

أخواني أعضاء منتدى الزعيم السلام عليكم ورحمه الله وبركاته والله ماكان ودي أنشر هذه القصص ولكن هناك من أتهمني بأني أريد وظيفة على مكيف وبراد الشاى بأشارة أصبع سبحان الله كيف وصل تفكيرنا لهذا الحد واحد له 10سنوات عاطل ويتشرط أخوانه يطلبونة أبسط مقومات الحياة ويتشرط والله العظيم إن كل اللي أذكره لاحقا صحيح ولدي مايثبت ذلك0000

تخرجت 1419 وقدمت على جامعة الملك سعود ولا أنقبلت وتوسط لي واحد على ماأظن إن لقبة الاخير السيف والله ماوفق وبعدين قدمت بجامعة الإمام محمد بن سعود الاسلامية ولاأنقبلت ورحت لدكتور لقبة البشر والله ماأراد بعدين قدمت بجامعة الملك عبدالعزيز والله ماوفقني (هذا وأنا علي ضغط إني أترك البيت اللي أنا مسوؤل عنه بعد الله 5 بنات و3 عيال ووالدتي ) المهم رجعت لهم ودورت شغل مالقيت ووالدتي تضغط علي أن البيت لارحت ماأحد فيه غيرك ولقيت شغل بمكتب خدمات معقب لدى أحد قرايبي 000 المهم أشتغلت وكان المكتب يعاني من كثر السرقات قبل ماأجي والكذب المهم حسنت علاقاتي بالمراجعين وجعلت الصدق شعاري وأشتغلت من أحسن شي وأروح وارجع وأراجع على سيارتي المهم كل مادخلت فلوس أنتظر اليوم آخذ الفلوس هاااه بكره هاااه الاسبوع الجاي بعدين أكلمهم ويقولون الاسبوع الجاي وبعدين يعطوني نصف المبلغ وكل ماأخذت مبلغ أصرفه ولله الحمد على أهلي ولا عمري فكرت أسافر ولا أروح لإي محل 00المهم جاني صاحب المكتب وقال نبغي نطلع بأسمك تأشيرات ونبيعها 00
قلتله أبغي أسأل حلال ولا حرام
قال يرجال ماعليك فيهم
قلت لازم اسأل 000 المهم رحت لأحد المشايخ وسألته قال حرام وشكرته ورحت لصاحب المكتب قلتله معليش هذا الشي حرام قال خير إنشاء الله المهم جاء واحد من عياله يشتغل معنى ورجع النصب والاحتيال والتزوير وصار يأخذ حقه أول بأول وانا وصلت المتأخرات لحدود والله العظيم 18000 ريال 000
تخيلوا قلت لولدتي واخواني أبغي اروح المكتب آخذ فلوسي واوديكم السوق تأخذون أعراض للعيد(هذا الكلام قبل العيد بثلاث أيام )المهم رحت مالقيت صاحب المكتب لقيت الاجنبي المسؤول بعده قلتله حنى بوقت عيد وأبغي جزء من فلوسي عشان أهلي قال كلم صاحب المكتب 000 كلمته قال طيب وشوي والاجنبي جايب الظرف 00الحمد لله وفيه الف ريال تخيلوا من 18000 ريال آخذ 1000 ريال المهم رحت وتسلفت وديت أمي وأخواني السوق (السلف 300 ريال ) المهم جلست بالمكتب سنتين وبعدين وإنا أفك واحد من دروج المكتب ولا فيه جواز سفر (وكانت المفاجأة) العامل بأسمي سبحان الله كيف صارت هذى 00المهم رحت الجوازات وطلعت برنت وصار العمال لهم سنة داخلين السعودية ومجددين سنة ثانية (8 عمال ) المهم منا ومنا وطلعت إن الرجال بايع التاشيرات ب104000 ريال عل واحد باكستاني المهم رحتله وكان المكتب عنده مليان قلتله من طلع العمال بأسمي قال مدري قلت فلان يقول أشتراها منك قال بعدين نتفاهم قلت أنا ماتفاهم مع حراميه ومزورين ياااك0000 المهم قلت عطني حقي قال مالك شي عندي قلت له بينك وبين ربك إذا كنت تعرف ربك أصلا (المهم علمت والدتي بالقصه وقالت هذا خا000 وعيب اللي سواه لكن أطلبك ياولدي ماتشتكي عشاني قلتلها خلاص يشيل العمال عن أسمي ويعطيني حقي وليومكم هذا بس لجل عين تكرم مدينة (إمي )
0000لكن أبقولكم شي والله كنت ادعي عليه حتى بصلاة الفجر وبعدين رحت وسامحته من نفسي لان سبحان الله الرجال تفركشت حياته كلها وبيته وانا أقول الله يوفقه ويستر عليه وعلى كل مسلم 0000

المهم سنتين ثانية وأنا افر وبعدين قدمت على أحد البنوك وشغلوني عندهم متدرب أعمال مصرفية بخطاب من مدير عام البنك المهم والله 6 أشهر وأنا كر وفر من صراف لخدمات عملاء آخر شي ودوني للمستودع قالوا عندنا تحديث بيانات ونبغي نعيد ترتيب المستودع وهو مسؤوليتك 000 قلت أزهلوه والله العظيم يمكن شهر كامل اخرج من البيت 8 صباحا وأرجع 9 باليل وكنت استمر فترة الظهر هذا كله ب2500 ريال المهم بعد ماسويت حدود 51000 رقم حساب قالوا توكل على الله مافيه الان وظائف المهم اعطوني خطاب والله يرفع الراس ومسكت الباب المهم من تقديم لتقديم وبعد يمكن سنه ونصف إلا إداره البنك تتصل قالوا روح للفرع الرئيسئ حقنا رحت وقابلت المدير قال عطني ملفك اعطيته إياه وبعد أسبوع يتصل قال تعال ورحت قال يالله داوم عندنا لين يجي العقد حقك (الدنيا ذاك اليوم ماتسعني ) المهم داومت قال يالله فيه مكينه جديدة للايداع لازم تقف عندها تعلم الناس عليها قلت طيب المهم من الصبح للظهر ومن العصر لآخر الليل لانها اوقات تتعطل ولازم أنتظر المهندس لين يصلحها المهم 3 شهور وأنا على هالحال كل بعد اسبوع أسبوعين أسأل عن العقد يقولون انتظر شوي 00
0المهم أكتشفت أني شغال على حساب شركة تبع البنك قلت خير كذبه ومشت على

المهم ناداني المدير قال ياخوي والله انك شرف لنا انك تشتغل معنا وأنا ابغي أكلم الادارة عشان ينهون اوراقك ويرسمونك عندي بالفرع قلت جزاك الله خير المهم مافيه شي ماعرفتلة حتى والله أن الموظفين كنت أتحداهم بالفرق بالصندوق ودائم انتصر عليهم والحمد لله المهم قالوا تعال (نفس الطريقة الاولى)فية هالملفات لازم نرحلها للادارة وبترتيب قلت أبشروا (المضطر يركب الصعاب ) المهم هذا الكلام برمضان وكنت اداوم الصبح وأكمل لين قبل المغرب وبعدين أرجع دوام الليل لين ينتهي الدوام وأنا ترتيب )المهم بعد ماخلصت جاني أتصال من الادارة قالوا دوامك انتهى معنا وانت ماإجتزت المقابلة والاختبار ومع السلامه (والله العظيم ماسويت إختبار ولا مقابله )كلمت المدير قال عطني الرقم اللي كلمك قلت هذا هو وهذا اسمه كلمه قال ياأخي واحد فينا كذاب ياأنا ياأنت الرجال هذا له عندي أربع أشهر كيف راح وسواء أختبار وهو ماغاب ولا يوم (للمعلوميه الادارة ممكن مسافة 400 ك عن الفرع

000 أتحداكم تجيبون أوراق أنه أختبر والرجال على مسؤوليتي أنا مدير فرع وأتحمل مايجي منه قالوا معليش المهم كل شوي مرسلين موضف لين وصلوا لاربع موظفين (حضارم)المهم اتصلوا على الشركه قالوا روح للفرع الثاني وداوم هناك قلت أبشروا ورحت عند أصحابي الاولين قال المدير ابرف اوراقك يرسمونك عندي قلت خير بعدين طلبني مدير المنطقة ورحت وقال ياأخي أنا سألت عنك ونعم الموظف وأبغي أرسمك بالبنك قلت جزاك الله خير المهم جاء موظف جديد ورجعه المدير قال أنا عندي واحد ينتظر أوراقة المهم زعلوا على المدير ونقلوه المهم قالوا فيه شركه تبع البنك تشتغل فيها قلت أكيد رحت دورة وإلا الشركة تبع بطاقات الائتمان والدورة كلها وربي يقولون لازم تقنعون العميل بشرعية البطاقات المهم رجعت لاحد المشايخ وقلتله الموضوع كذا وكذا قال هذا رباء الفضل واعطاني درس وقال لاتستمر معهم وتركتهم المهم المدير الاول رجال طيب ونقل لاحد البنوك الجديدة ويوم دريت وهو يتصل قال مرني بالفرع وجيب ملفك ومريته واعطيته الملف قال إنشاء الله غير إجيبك عندي وإلى الان وأنا أنتظر
00000000

أمانه عليكم من يقراها يدعيلي بالرزق والتوفيق والصحه والعافية أناو أخواني المسلمين وأقسم بالله نشرت هالقصص عشان مااحد يقول هذا كسلان ولا مايدور شغل ولا يتشرط وتقبلوا تحياتي وربي يحفظكم ويستر عليكم دنيا وآخره

اخوي وش قسمك انت ؟؟؟

يمكن اقدر اساعدك ..

الله يفتح لك ابواب الرزق..

ياأخوي الدنيا بلووووو والله لو قريت موضوعي الاول ان لي عن أهلي شهرين تعرف أني ضيف ثقيل عند ناس والنت حقهم والله عمري بحياتي ماملكت كمبيوتر وآخر الليل ادخل بعد ماأصلي الوتر والي وراه سجن مايعرف للنوم طعم وانا اقولك قول الله لايبلانا وكل ماقلته ترآى متقبله من أخو لي وعزيز

الحلا مبتليها الله يجزاك خير وماقصرتي مشكورة والله يحفظك ويستر عليك

اخوي العطاء ..!!


بعد ماقريت قصتك .. ارجع واقول الله يفرجها عليك ان شاءالله ..!!


لكن ياغالي بما انك .. تعول اسرة .. وانسان شاب ... وتملك مؤهل دراسي ...!!
ليش ( ماتسجل بالحرس الوطني .. او الجيش او اي قطاع عسكري ؟؟؟ )

مستحيل يردونك خصوصا انه كل كم شهر تحصل وظاف بالالاف في العسكريه ..!!
وكذا راح تضمن مستقبلك ومستقبل اهلك ... لاصرت عسكري ويمكن
تترقى وتوصل لمراتب كبيرة وتنبسط وتصير حياتك افضل مماتتمنى ..!!



ولا تجلس تذل نفسك عند اصحاب الشركات وغيرهم الذين لاهم لهم سوا جمع الاموال
بأي طريقه كانت .. وبعد .. ان يطفش منك ويسد حاجته ( بيقضبك الباب ) ..!!

رح للعسكريه .. صدقني وماراح تندم وفوق ذلك ( يكفيك شرف انك عسكري ) تخدم
وطنك .. وحقوقك مضمونه اولا بأول .. لك ولعيالك اللي بعدك سيأتون ..!!




والله اني اعرف ناااس كثير وبعضهم اقارب لي .. كانوا حالتهم حاااله .. واوضاعهم
الماديه .. صعبه .. والله وسجلوا بالعسكريه .. اللي بالحرس واللي بالجيش .. واللي
توظف بالجوازات وغيرها من القطاعات الحكومية ..!! .. وشوووف الحين كيف حالتهم
.. والله انهم عايشين ومرتاااحين ... احلى راحـــه ..!!






اعتقد ان هالحل هو افضل حل لك من وجهة نظري ..!!

الله يعينك ياخوي ومو انت لوحدك لاتكدر خاطرك
انا مثلك درت كل مكان من وزارة وشركه وبنك ولين الحين مرتبعه في البيت لان ماعندي واسطه وياكثر الوعود اللي ماوراها الا الحكي بس يمكن تكون اصعب مني حال لانك رجال
والاصعب بلدك مالك مستقبل فيه
الله يوفقك ويكتب لك خير
اختك:عطر الصمت

الله يرزقك إن شاء الله يارب و يستر عليك

وصدقني يا الغالي إذا أنت ما ساعدت نفسك

لا تنتظر شي من أحد و الله ما راح أحد يفيدك

الله يفرجهاعليك ....

أخوي العطاء ماقول إلا الله يفرج همك وكربتك
الرزق من عند الله واللي كاتبه لك بيصير ,,

أخوي العطاء أكثر من الأستغفار والصلاة عالنبي
فإنها تفرج الهموم .. اسأل الله أن يرزقك وأن لايحوجك
لغيره ,,

الله يفرجها عليك أخوي وعلى كل مسلم ومضطر......

اول شئ أخوي نصيحه مني ,,وأكيد إنك تسويها لكن واظب عليها وأكثر منها....اللي هي الإستغفار..والدعااااء....ولن يخيب الله رجائك.....والله أعلم بنيتك في الصرف على أهلك ووالدتك وإنشاءالله يعطيك أكثر مما تطلب.............

الشئ الثاني....

مثل ماقالوا الإخوان...قدم على العسكريه بجميع فروعها..والله تنفعك وتسد حاجتك..ورواتبها جيده..واللي فيها والله عايشين أحسن مايكون.....

أما إذا عندك ظروف ولاتقدر فالله يرزقك بالوظيفه والراتب اللي يعوضونك عن تعب كل سنينك..........