|
شركة أكسيوم (AXIOM) تتلاعب بحقوق المواطن ... وحماية المستهلك (( صح النوم )) بسم الله الرحمن الرحيم أحيي الجميع ... السلام عليكم ورحمة الله مشكلتي يا جماعة الخير .. الله يبعد عنكم المشاكل ,, هي مع إحدى شركات الغفله أو سمها إن شئت شركات النصب والدجل والتلاعب بأبسط حق من حقوق المواطن (( حلاله )) و السالفه طالت عماركم .... عندي جهاز جوال تعطل وصار ما يشتغل بدون سابق إنذار (( حاولت بشتى الطرق إصلاحه .. ولكن لا جدوى )) رحت بالجهاز لشركة أكسيوم (( الله لا يجزاهم خير )) لأن ضمان الجهاز من هذه الشركه أستقبلني الموظف وعرض الجهاز على الفني قال عنده مشكله في النظام وهذا عطل فني من المصنع لا يمكن إصلاحه ,,, قلت والحل ... قال : بنرسل جهازك لجده عشان يستبدلونه لك بجهاز جديد قلت للموظف ومتى يجي ,, قال خلال أسبوع .. قلت طيب مافيه بديل مؤقت .. قااااااااااااال .. حاليا الأجهزه البديله منتهيه .. قلت خير إن شاء الله (( فرحان بجهازي الجديد )) .. عطيته رقم جوالي وقال بنرسل لك رساله تستلم الجهاز خلال اسبوع ,, شكرا أخوي أنتظرت عشرة أيام وعاودت الأتصال أنا طبعا ما أحد يدري عني ولا ألقوا للعميل أي بال ,, رد علي أحد الموظفين .. عندي جهاز وهذا رقم فاتورته .. قال هذا يالطيب ما جى من جده ومتى إن شاالله بيجي قال أنتظر أسبوع ... طيب هنا عشرة أيام .. قال الشكوى لله الأمر موب أيدينا وتمر الأيام وكأني أشحذ حلال غيري .. ويمر شهر أي والله شهر ثلاثين يوم ,, وأروح لمركز صيانتهم على طريق العليا وعلى بالي بيجي الفرج وأنا معصب . السيكورتي وين يالطيب ,, أبغى أقابل المدير .. وخير .. قلت لايكون بدخل على أحد الوزراء .. وأدخل على المدير وتم الحوار التالي : خير خوي يقولها طبعا ونفوسه في خشمه وكأنه يتفضل علي بكلامه من فلوسه .. عندي جهاز وصار له شهر معقول هالكلام .. الحين أنا جهازي عطلان والخطأ فني من المصنع .. هل اللي يتحمل تبعات أخطاؤكم العميل وألا شركتكم العامره .. الشئ الثاني اللي أعرفه بحكم تعاملي مع شركات أجهزة جوال مثل الحداد ومشاعل الخليج ,, الجهاز لما يكون فيه عطل وإصلاحه يستغرق أكثر من أربع وعشرين ساعه كسياسه للشركه يوفرون لك بديل مؤقت خدمة للعميل .. الشئ الثاني هذه الشركات لما يكون العطل فني توفر لك بديل خلال ثمان واربعين ساعه السيد المدير: رحت للموظفين .. بعد الشهر أروح لهم . قال يمكن الجهاز جاء .. قلت وهذا ردك كموظف مسؤول هنا تقول هذا الرد وبكل بروود .. أنت تمثل خدمة عميل .. وأنا ما جيتك أشحذ حلال أبوك .. هذا جهازي ودافع فيه فلوسي السيد المدير: راح يصور ورقة الفاتوره بصراحه كلف على نفسه .. وقال أنتظرنا بعد أسبوع .. طيب والشهر اللي فات وين حقوقي فيه أو أقل شئ جهاز مؤقت بديل .. قال لي ما هيب سياسة شركتنا لابو شركتكم لابو من جابكم شركه فاشله وخدمة عملاء فاشلين .. تتلاعبون بحقوق المواطن لي الحين شهر وعشرة ايام .. والله والشركه المشئومه ما فكرت ترفع حتى سماعه تعتذر او تقول جهازك ترى يعتذر عن مجيئك هل أتحمل مسئولية ما حصل مع العلم انها أول مره والله أتعامل مع هذه الشركه كضمان للجهاز .. وبتكون بمشيئة الواحد الأحد آخر مره حاولت ان أجد من جهاتنا الحكوميه من يقف وراء مثل هذه القضايا والتعاملات ,, نسمع عن حماية المستهلك(( على فكره لها دخل بهالمواضيع .. وألا مسئوليتهم تقشير البصل وحل قضية فلسطين)) وين ديرتهم .. لهم مقر .. لهم تليفون .. أحد راح لهم .. وألا المواطن آخر همهم شوروا علي ياجماعة الخير .. هل يصل الحل أن الواحد يأخذ حقه بيده ويتهجم على هذه الشركه عليهم من الله ما يستحقون .. مزيدا من الأستغفال ياشركات النصب على حقوق المواطن السعودي |
اقسم بالله انك جبتها عالجرح .. والله ما حولك احد .. صدقني اكسيوم هاذي من انجس الشركات .. قد صارت لي معها كم من موقف .. والله وتوبة الحين اقربهم .. اجل تسأل عن حماية المستهلك .. تراهم مثل ما قلت وراهم حل قضية فلسطين .. صدقني ما حولك احد .. والله مالك الا الصبر وانتظار الفرج .. تحياتي اخوي .. |
يا عزيزي almunady ما عندك الا حل واحد انه بعد صلاة الفجر انشاء الله تتقبل القبلة وتدعي على من ظلمك لانه في نظري هذا قمة الظلم والاستغفال واحمد ربك انه جهاز جوال في ناس سيارات & بيوت عزيزي حماية المستهلك نايمة في الشهد مو العسل بس لانه لما تتخاطب معه وكل الشركات اللي عليها ملاحظات سيئة في خدمة العملاء تاخذ هدايا منهم بشكل مستمر ودائم ومن وجهة نظري العيب في المستهلك مو كفرد بل كامجموعه لو يتحد كل مواطن في مقاطعة اي شركة تخدع وتظلل المستهلكين ما كان هذا هو حالنا بس في قاعدة عندنا ياشيخ عساك سالم مدري متى يتغير سالم ويصير صارم |
إقتباس:
والله أسمع بها ولا عمري شفت شي من عمايلهـا , اتحدى إذا كان الموضفين فيها يداومون ., الله يعينكـ, من جد شي يقهر .,, |
كلم مقر الشركة الاصلي .. وارفع شكوى .. ولا تنسى سياسة التشهير .. تراها سياستن طيبة .. |
كثرت الشكاوي على هذه الشركه من الناس لو تلاحظون في منتدى سوني اريكسون العربي مسوين حمله مقاطعه لأكسيوم تيليكوم والله شركه فاشله |
البرقيات.. كيف تاخذ حقك من الوكيل .. في أقرب وقت وبدون ما تترجاه.. السلام عليكم ورحمة الله وبركاته نظراً لأني لست صاحب المعرف ولكن ضيف عليه فقد فوجئت به يرسل لي أسئلة كثيرة حول كيفية ارسال برقية للديوان الملكي وشكوى وزارة التجارة والوكيل... الموضوع سهل جداً ومجرب ... 1- روح لوزارة التجارة واشتك عليهم وتأكد إن خطابك تم توريده برقم وتاريخ معين وخذ رقم التوريد والتاريخ ولا تضيعه ولا ترجع لهم ابد ولا تروح لهم ثانية. 2- بعد 7 أيام فقط أرسل برقية للملك عن طريق الرقم 969 ومن هاتف بيتك .. واكتب إنك اشتكيت للوزارة ولا تجاوبوا معك. 3- البرقية كل كلمة بريال يعني لا تكثر قرق .. لا أنت عندك قروش واللي يقرأ البرقيات عنده وقت... نص البرقية للملك يجب أن تكون كالتالي: "خادم الحرمين الشريفين يؤسفنا أن نرفع لمقامكم الكريم الظلم الذي وقع علينا من شركة ........... وكيل سيارات ........ حيث اشترينا منه سيارة جديدة وقد تعطلت عدة مرات حتى ولم نجد لديهم قطع الغيار اللازمة علماً بأننا رفعنا الأمر لوزارة التجارة ولم نجد منهم أي تجاوب .. خادم الحرمين ليس لنا بعد الله إلا أنتم في أخذ حقنا كاملاً من هذه الشركة وأمثالها " ولعلمك ترى ما تحتاج تمدح ولا تردح بالبرقية ... أصلا الملك ما يشوفها ولا يقراها إلا إذا تكررت أكثر من مرة لنفس المشكلة... وعموماً شنبي مهب على رجال إذا ما حلوا مشكلتك بس عشان يفتكون من برقياتك... سألني واحد جربتها ؟ 1- مع الغرفة التجارية وخفضوا رسم تجديد السجل من 900 إلى 300 ريال 2- مع البنك الأهلي استرديت مبلغي بسرعة البرق بعد ما اشتكيتهم مع مؤسسة النقد ملاحظة: لا يمكن تسجن عشان برقية إلا غذا قليت أدبك مع الملك أو ارسلت في أمور ما لك علاقة فيها - مثل ليش ما تفكون الربط بين الريال والدولار - أما مطالباتك بحقوقك فصدقوني سمعت قصص يشيب لها الولدان مثلاً: موظف في أرامكو كل يوم ياخذ طرف غرفة وينام ولا يشتغل... بعد 5 سنوات نوم رفع برقية إن ترقيته متأخرة .. جته الترقية قبل اخوياه اللي يكرفون... بتسكتون على حقكم اسكتوا وخلوا الذيابه تاكلكم ... تبون حقوقكم سووا مثل ما يسوي الرجاجيل وطقوا صدوركم للشكالة... هالكلام منقول من عضو في ساحه العربيه/ساحه السيارات .. اسمه فتى عنيزه وهذا ايميله [email protected] انا ناقل لا اكثر .. بس ياليت تعطينا اخباركـ ...بشرنا وش يصيرلك ،،، |
مع احترامي لك يالغالي والله مادري عن صحة سالفتك ,, انا مع اكسيوم قد بدلو لي جهازي وعطوني جهاز بديل مع ان المشكلة كانت بسيطة وعطوني جهاز بديل ,, وبالنسبة لمشاعل الخليج اللي جالس ترفع فيها قد خرب علي جهاز برضو وعطوني بديل لكن بعد 20 يوم !! اما اكسيوم ما كملت يومين الا والجهاز البديل عندي مع العلم ان جهازي وقتها كان فوق الـ 2500 ريال .. ولعلمك مشاعل الخليج محل الصيانة حقهم 4*6 وزحمه غير طبيعية بعكس اكسيوم ,, عموماً السالفه صايره لي قبل سنة يمكن بعدها تغيرت الإدارة وتغيرت سياستهم !! وبحكم معاملتي مع اغلب الوكلاء بالنسبة لي اكسيوم افضل شركة !! انا ماجيت ارفع فيهم لكن جيت اقولك سالفتي معهم وسالفة ولد خالتي برضو كلهم بدلو لنا اجهزتنا بحدود يومين !! وزي ماقلت لك يمكن تغيرت الإدارة وتغيرت سياسة الشركة ,, عموماً مشكور والإختلاف في وجهة النظر لايفسد للود قضية :smilie47: |
الله يعينك مع هالشركه قد صارت لي مشكله اكبر من مشكلتك وجلس الجهاز 6 شهور !!!!!!! |
صاااااااااااااااااااااااااااااادق انا جهازي قعد عندهم ستة أسابيع الين ما صلحووووووه(فرع بريدة) الله لا يوفقهم والله لو انهم بيصنعون لي جهاز جديد كان امداهم |
هذا الرقم اخذته من واحد من الشباب اشتكى عليهم والظاهر ان الرقم هذا يختص بنوكيا الام ويستقبل شكاوي العملاء ضد وكلاء نوكيا 8008441457 |
يا رجال فوقهم الله سبحانه يسلموووووووووووووووووووووو |
يا رجل جميع الوكلاء الجولات كذابين و حرمية يبغوا الفلوس فقط . |
والله انك صادق يا خوي...! تصدق..,..عندي جهاز مار عليهم أربع مرات في ثلاثة أشهر.....:bigeek: |
ما الك الا رب العالمين يأخذ حقك إدعي عليهم وعلى كل اللي ظلمك والله يعينك على جوال جديد |
| الوقت المعتمد في المنتدى بتوقيت جرينتش +3.
الوقت الان » 01:47 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd