اخبار مقالب المشرفين وغيرهم ... اخيرا : جبت لكم الفضايح ... كل واحد طلع على حقيقته @@ - نادي الهلال السعودي - شبكة الزعيم

الهلالي 11 · #1 11/05/2008, 12:54 PM

السلام عليكم

هلا وغلا ... وغلا وهلا

اليوم موضوعي يبغاله روقان ... يعني جب شوية تسالي وانسدح

اللي صار اني حبيت اسوي قلق بالمنتدى ... كذا كيفي

المهم ارسلت رسايل خاصة للمشرفين ... والاستشاريين ... وكم حبة عضو مندي

الرسالة عبارة عن مقلب ... وان فيه بيننا مشكلة ... وحبيت انهي العلاقة معه

القهر ان اغلب عناصر الخبرة بالمنتدى حجرولي

عارفين اني لعاب

بس اصلا انا غبي ... كان فيه فكرة ثانية وهونت عنها

بس انا ناويهم والايام جايه

طبعا سبب هذا الموضوع والفضايح اني مقهور ...

ليش المشرفين عادي يحطون صور واجد بالتوقيع والاعضاء بس صورتين

لا والفيسات الصغير يحسبونها صورة بعد

عشا كذا قررت ابدا حملة الدفاع عن حقوق الاعضاء

نبدا ... ونشوف وش اللي صار بالخاص

@@@@@@@@@@@@@@@@@@@!@@@

نبدأ اول شي بالمشرف : (( نيسـ 10 ـتلروي ))

نيستلروي هذا كلنا مخدوعين فيه

انا كنت بسوي فيه المقلب على اساس انه ما يحب الاضواء ...
وقلبه مرهف وما يعرف حركات النص كم وبيمشي عليه ...

بس طلع موب بسيط ويعرف كل شي ويسوي نفسه نايم وام يشوف

عموما عنده هواية بيع قفول ...
كان رح يترك المدرسة عشانها ... بس اصحابه اقنعوه ياجل الموضوع ...

الحين ما شاء الله عنده اكبر محلات بيع القفول بالجملة

وتاثير هالنشاط التجاري واضح على المواضيع المخالفة

اترككم مع اللي صار :

ارسلت له :

إقتباس


	هلا ابراهيم ... بصراحة انا كنت متوقع انك هادئ ... ومنت راعي مشاكل ... بس الظاهر اني مخدوع فيك زي باقي الاعضاء ... على اي اساس مطلع عني كل هالكلام ... وانت ما تعرف الا اسمي ويمكن نسيته !! عموما لو واحد اللي وصلي الكلام يمكن اقول كذاب ... بس ثلاثة كلهم يقولون لي نفس الكلام عموما ... يعطيك العافية ... الظاهر كثر ما تقفل مواضيع ... صار عندك خبرة بتقفيل العلاقات بس ابشر بترتاح مني ... يوزري هذا منت شايفه ... ويمكن اخربها واخلي الادارة تشطبه سلام ... وعلى نياتكم ترزقون

إقتباس

طبعا انا ارسلت له كنت منتظر يراعي مشاعري ...
بس طلع سفاح وبايع ام الدنيا

شوفو وش رد :

إقتباس


	يا قدمك .. النـّاس وصلوا القمر وإنت إلى الحين في هالمقلب .. دوّر غيري ..

قايلكم الرجال موب بسيط ... فاتح فرع للمحل بالقمر والناس باقي تستثمر بالارض

انا قلت يمكن الرجال معصب ... اخلاقه سياحية هاليومين ... منتظر احد يخربها معه ...

ارسلت له رسالة ثانية عشان استعطف ما تبقى من مشاعر لديه :

إقتباس


	ما ادري اسميها زود ثقة ... والا وقاحة !! يعني فوق ما انت غلطان ... مسوي تمون وكميرا خفية !! لمعلوماتك بس ... انت واللي كان معك يحش فيني وصلني العلم ... واللي يقهر بالموضوع ... اني ارسلت لكم الثنين ونفس الرد انتم متوقعين اني استهبل ... بس الايام هي اللي بتبين كل شي ... وحط في بالك ... انا انتقامي صعب تتوقع مداه وصدقني ... طردي من الشبكة بيكون على يدك ... خلاص ما بقى شي اتعب عشانه ... بخربها ... وانصحك اليومين الجايات تسنتر بالمنتدى ... عشان اول موضوع مخالف لي تحذفه وتطردني ... ولمصلحتك تحذفه قبل ما يقراه احد اوكي ابراهيم ... صدقني بنكد عليك فرحتك ببطولة المان بكره خل الثقة تنفعك يا مشرف

اللي صار اني كنت منتظر خير منه وجاء الرد :

إقتباس


	حتـّى الآن ما زلت مُصرّ بأنـّه مقلب ومسرحيـّه .. ولا يـُلدغ المؤمن من جـُحر ٍ مرّتين ..

عرفت وقتها ان الرجال ماكل مقلب قبل كذا

غسلت يدي منه وقلت ندور غيره

كل التحية والحب والاحترام والتقدير لابو خليل

@@@@@@@@@@@@@@@@@@@@@@

جا دور المشرف (( أسيــ الزعيم ــر ))

برضو نعطيكم نبذه عن هالرجال

هذا لعاب من يومه ... ما عنده لف ودوران ... بايع الدنيا براس المال

ابوه كان يوصله لباب الفصل عشان يضمن انه ما ينحاش ...

يرجع يلقاه قاعد ورى الدركسون ويقول والله ما تسوق

عبدالله ارسلت له هالرسالة :

إقتباس


	السلام عليكم ... افا عبدالله ما شاء الله طلعت شخصية ودكتور ونفسي الحين من طلعة كورة وحدة عرفت من انا وعرفت شخصيتي طيب ليش ما ارسلت لي على الخاص وقلت لي يا عبدالرحمن فكنا عادي ترى روحي رياضية ... اذا انت شايف اني غثيث قولي في وجهي بس موب توصل لدرجة انك توصل كلام عني ... ويا ليت الكلام اللي تقوله موجود فيني عموما ... كويس انك تكتشف معدن الواحد وانت قاعد على النت ومرتاح لو سمحت ... خلاص انسى هاليوزر !! لانك بترتاح مني ومن مشاركاتي

طبعا انا قايلكم انه لعاب من يومه شوفو وش رد

:

إقتباس


	بالله عليك هذا مقلب نهاية الموسم يعني

انا قلت يمكن الرجال عقل ... خلني ارسل مرة ثانية واكبر الموضوع براسه :

إقتباس


	مسوي تمون بعد !! يعني والله شين وقوي عين مشكلة اللي يضربك ... بعدين يجيك مفلوق و يسوي نفسه بريء... بيني وبينك شي عشان تسوي كل هذا فيني عموما لي ولك رب ... هو اللي يعلم بكل شي نهاية الموسم هذي للبطولات ... موب لناس تقدرهم ويقدرونك

طبعا بعد الهياط هذا ... توقعت انه يشك ويلمح للموضوع ...

بس قايلكم بايع الدنيا كله بكوم حديد ما تردون ... شوفو الجرأة والثقة :

إقتباس


	لا وفيه مثل مصري .. يئتل الئتيل ويمشي بجنازتوه

إقتباس


	يا شيخ فكني من هالمقالب منيب رايق لها والله شف غيري

طبعا ترجمة المثل المصري ... انه ذبحني ومسنتر اول واحد عند الجنازة

بعد هالرسالة غسلت يدي منه بعد ... وقلت هالرجال ماش واثق من نفسه ندور غيره

@@@@@@@@@@@@@@@@@@@@@@@@@@@

رحت للغالي مشرفنا (( S U L A I M A N ))

سليمان هذا رسمي ... انيق ... برستيج ... شخصية قيادية هادئة وناجحة

لو يصير حرب ... وتفاجأتو ان سليمان بيشارك فيها ...

توقعو انه يجيكم شايل الار بي جي ومرسم بثوب وشماغ

بس هو اكثر واحد طلع اخلاق

ارسلت له الرساله هذي :

إقتباس


	السلام عليكم !! سليمان ... معقولة يا شيخ والله يوم التقيت فيك ... شفت انك رجال عاقل وهادئ... وعندك شخصية قيادية لكن شلون انت عرفت كل هالاشياء عني ما ادري ...!! عموما ... كنت تقدر تخلص الموضوع كله برسالة خاصة ... لكن الموضوع يوصلني عن طريق اعضاء مالهم بالشبكة كم شهر انا للاسف كنت متعشم فيك خير ... لكن الظاهر ان المظاهر تخدع الواحد كثير اصلا من عرفت انك برشلوني وانا غاسل يدي ... خل برشلونه والاعضاء اللي كنت معهم ينفعوك ... لا وما ادري شلون صدقو الكلام اللي قلته بس بعطيك نصيحة ... اذا جيت تتكلم عن واحد ... تاكد ان اللي معك ما يعرفونه فريقك خسر اربعة ... وانت خسرت واحد

طبعا انا استغليت ضعف مستوى برشلونه هالموسم بالضغط عليه

الرجال رد علي يقول :

إقتباس


	هلا ومرحبا .. حياك الله حبيبي .. تو ماتنور الخاص عندي ورده أول شي اذكر الله وصل على النبي .. اللهم صلي وسلم عليه .. ثاني شي أنا خلال اسبوعين مادخلت الزعيم الا كذا مره .. مشاغل ووجع راس .. ثالث شي أنا والله يشهد على كلامي ما أدري وش تتكلم عنه ولا أدري من الي نقل لك كلام ولا أدري عن أي شي .. أصلا يوزر الهلالي 11 ماجاء على لساني بتاتا من عرفتك .. الا بكل خير .. واحد من شيئين .. يا انك مشبه بالاسم وكنت تقصد شخص ثاني .. أو ان الي نقل لك الكلام شخص حاقد علي شخصيا وحب يسوي بلبله .. واذا كان كذا فـ انا متأكد انه نقل نفس هالكلام لأشخاص آخرين اتمنى يراسلوني على الخاص علشان أبين لهم اللبس .. ياليت تقول لي الكلام الي وصلك يالغالي وتبين لي الصوره الغير واضحه الي رسمتها بمخي يالغالي ورده بالانتظار ..

قايلكم شخصية قيادية ... عرف ان فيه واحد قايلي ...

لا وعارف ان نفس هالشخص قايل لناس غيري

يا حبي لك يا سليمان

طبعا احرجني برده واخلاقه

موب زي بعض الناس ... اللي شوتني للقمر ... واللي باعني باول شارع

طبعا تجاهلت رسالته ... واحرجني زود يوم يرسلي مرة ثانية انتظر ردك

قلت مالها داعي ... شكل الرجال ضميره أنبه ... وعلمته بالقصة كلها

طبعا كان وده يجلدني ... وقال كلام لو بالقناة السعودية شفروه

@@@@@@@@@@@@@@@@@@@@@@@@@@

بقى أخر مشرف واكيد هو (( hilalemooot ))

هالمشرف فيه شوي من صفات سليمان ...

هادي ... رسمي ... بس داهية

فيرغسون مأثر عليه كثير

طبعا لانه مانشستراوي ... ماني قايلكم وش كان يسوي بالمدرسة

لانه ولد عز ... ومن الابتدائي بمدارس مختلطة ... واللي يدرسونه حريم

الافضل نلتزم الصمت بمثل هالمواقف

المهم ارسلت له هالرسالة :

إقتباس


	السلام عليكم ... افا احمد ما شاء الله طلعت شخصية ودكتور ونفسي الحين من طلعة كورة وحدة عرفت من انا وعرفت شخصيتي طيب ليش ما ارسلت لي على الخاص وقلت لي يا عبدالرحمن فكنا عادي ترى روحي رياضية ... اذا انت شايف اني غثيث قولي في وجهي بس موب توصل لدرجة انك توصل كلام عني ... ويا ليت الكلام اللي تقوله موجود فيني عموما ... كويس انك تكتشف معدن الواحد وانت قاعد على النت ومرتاح لو سمحت ... خلاص انسى هاليوزر !!

انا قلت يمكن الرجال يشك ان وحده من خوياته ايام المدرسة قالت لي شي

بس اخونا بالله طلع مطنش ام الشعب ... علاقاته واجد ما فرقت معه على واحد

إقتباس


	قديمة كان غيرك اشطر

طبعا واضح من رده ان في غيري لاعب عليه

والظاهر ان المقلب اللي اكله قبلي برضو من ايام الدراسة

عشان كذا ... ولان المنتدى يمنع الاختلاط ... انا بستر على الرجال

ارسلت له رسالة ثانية ... حاولت اشككه بنفسه

رد علي :

إقتباس


	حشيت فيك يا كبرها شكلك ما تعرفني زين عموما الله يسامحك .. وخل العذال ينفعونك عموما عيب تقول لواحد وقح وانت منت متأكد حتى لو كان مزح بعدين خل البطولة تجي اول بعدين يصير خير

طبعا والله انت بالقلب يبو حميد

وانا الوقح

يا شيخ انا اكيد ما اعرفك زين ... انت قمة بالاخلاق

علمتني شلون الواحد يحس نفسه وقح

والبطولة جاية جاية ان شاء الله لا يهمونك تشيلسي

@@@@@@@@@@@@@@@@@@@@@@@@@@

المشرفين خلصو ... واستلمت الغالي (( skroo ))

العضو الاستشاري هذا محبوب من كثير من الناس

ردوده ... تواجده ... اخلاقه ... يجبرك انك تصفق له

بس وين ... لازم يوصله من الطيب نصيب

ارسلت له هالرسالة :

إقتباس


	السلام عليكم ... هلا اخوي ناصر ... بصراحة اخر شي كنت متوقع ان انا صورتي عندك كذا !! عاد والله ردودك بالمنتدى ... وردودك بمواضيعي ... ما كنت احس ان فيه اي شي او مشكلة بيننا !! بالعكس كانت ردودك حلوة وترفع من معنوياتي لكن اتفاجأ ان رايك فيني زي اللي وصلني !! موب ضروري تعرف وش وصلني ومن مين لانك انت عارف وش صار ... بس اللي زعلني انك توصلي بردودك اني كويس ... ومن وراي اكتشف انك ما تداني يوزري عموما فرصة سعيدة ... وشي حلو تكتشف كل واحد على حقيقته من غير ما تتكلف بشي الله يوفق الجميع ... ويعطي كل واحد على قد نيته

طبعا انا كنت متوقع انه يقولي العب بعيد

لان اغلب عناصر الخبرة بالمنتدى غاسلين يديهم مني بكل انواع المنظفات

بس الرجال رد علي بهالرسالة :

إقتباس


	وعليكم السلام ورحمة الله وبركاته انا معجب جدا بردود بعض الاعضاء ومن ضمنهم الهلالي 11 اللي اسمه عبدالرحمن واليوم الظهر اخذت لفة في مشاركاته لاني معجب فيها وشفت له موضوع عن الصور وموضوع عن الشغالة ورديت عليه ما ادري وش المشكلة اللي بيننا لاني ما اعرف عنك شي الا ان اسمك عبدالرحمن وتشجع مانشستر والله ما سبق وتناقشت مع اي شخص عنك الا مرتين بخصوص الافضليات وما جبت طاريك الا بكل خير واذا وصلك كلام عني فالله يجزا الله ناقله خير وهذا رجال يمشي بالنميمه يقول سيدنا الامام الاحنف بن قيس رحمه الله ( ذو الوجهين لا يكون عند الله وجيها ( وانا االلي اقوله بوجهك هو اللي اقوله من وراك " هذا اذا جبت طاريك لاني ما اذكر اني جبته الا مرة وحده " خلاصة الكلام : انا ما ادري وش الهدف من هالرسالة , لكن زي ما قلت لك ما اذكر اني جبت طاريك الا مرة وحده وما قلت فيها الا كل خير لكن مسألة اني امشي ورا الناس واقعد اسبهم في غيابهم وامدحهم في وجييههم فماهي عادتي ولا تربيت على كذا وماا دري منهو اللي نقل الكلام ولا ادري وش قصته ولا علاقته بالموضوع لكن ماراح ادعي عليه وابكتفي ان الله يهديه ويجزاه خير واذا بتصدق كلامي بكيفك واذا تبغاني احلف لك ان ربي يحرم وجهي عن الجنة اذا انا قايل عنك كلام ردي او دمار فما عندي مشكلة انتظر ردك شكرا لك وفرصة سعيده

طبعا لو تلاحظون انه معجب فيني

بس والله احرجني مررررة برده ... ولا اراديا اعترفت له

يوم اعترفت له ... رد علي وقال انه كان شاك انه مقلب ...

وخششني بالحلف وكلام الدين ... عشان استسلم واعترف

ويقول انه ماكل مقلب قبل هذا في منتدى ثاني وتطورت الامور

عموما رسالته الثانية قلت له نزيع

قال لا

هو فضل ان الرسالة الثانية تكون بيننا وانا رجال اقدر الخصوصيات

@@@@@@@@@@@@@@@@@@@@@@@@@@

نجي للعضو الاستشاري الثاني : (( هلالـــ الجنوب ـــي ))

هالعضو يملك جسم رياضي .. ما شاء الله

خاف من الحسد يوم لعبنا كورة ... وقال انا بحكم ...

كان واضح تحيزه وغشه ضد الفريق الانجليزي ...

انا قلت ما لك الا الانتقام منه بهالطريقة

ارسلت له :

إقتباس


	هلا والله ابو غامد وش دعوى بصراحة انا من يوم طلعة الكورة وانا حاس انك ما تدانيني وتاكد من هالشي يوم صرت حكم ... وبديت تستفزني بقراراتك لكن انك توصل كلام عني لبعض الاعضاء هذي ما توقعتها يعني معقولة تستغل ان فيه اعضاء ما جو وتقولهم عني هالكلام اللي قلته اللي راح عن بالك ... ان كان فيه واحد منهم علاقتي معه قوية هو بلغني كل شي ... وبصراحة ما توقعتها منك ... كنت شايف انك طيب وهادئ ... بس فعلا المظاهر خداعة عموما انا ما حبيتك بعد لكن انا احسن منك خليتها بقلبي وما تكلمت عنك قدام احد الى لقاء قريب ... الظاهر اني بسجل بيوزر ثاني عشان الغي الصورة اللي رسمتها عني

[/font]

كنت متوقع يعترف فعلا انه كان غشاش ... ويخربها معي لاني كنت اهاوش يوم المباراة

بس الرجال بكل برود ... رد علي بكلمة وحدة ... كلمة تدل على كل الغبار اللي جاء للرياض

إقتباس


	قديمة

تخيلو ... هواش وقلق ... وهو يكرشني بكلمة وحدة ... عادي ازعل ... اتسطر ... المهم يكرشني

انا قلت وراه وراه والزمن طويل ... ما يأست وارسلت له :

إقتباس


	الحين هذا اقوى شي عندك ... قديمة !! يعني من اول ما شفتك والعلاقة بيننا متوترة ... وفوق كذا غلطت علي وما قلت شي ... ويوم جيت اصارحك وانهي الموضوع عشان ما يكبر تقولي قديمة !! عموما انت والل كان معك وقت ما حشيتو فيني ثنينكم ... ارسلت له ... وسوى نفسه انه ذكي وكميرا خفية تفاجأت من ردودكم وتعاملكم معي بسخرية بس ... حقي باخذه بيدي ... واللي وصلي الكلام اللي صار ... هو نفسه بخليه يوصلك وش اللي براسي

قلت حلو ... بمكن يقلب المواضيع براسه ...

يتذكر اي واحد كان قاعد معه وحشو بناس ... يمكن يمشي الموضوع

بس للاسف جاء رد ثاني منه :

إقتباس


	قديمة للمرة الثانية .. اسأل حقين طلاب البرمجة عن ذي .. String S ; while(S=="الهلالي 11") } system.out.print("قديمة") {

بعد هالرد ... تمنيت اني اكتفيت بقديمة ...

الرجال خششني بمعادلات برمجة ... وارسلي فايروس ونكبني فيه

طبعا الى الحين ما ادري وش المعادلة اللي كتبها ...

لكن الظاهر انها ... اطلع من مخي

بس احتياط يعني لا يصير يسبني وانا مدري ...

حاب اقوله ... بتنجلد يا الدب

@@@@@@@@@@@@@@@@@@@@@@@@@@@@@@@@@@@@

طبعا بعد هذول اخترت ثلاث اعضاء

الاول : (( توتيCOM ))

الثاني: (( استـــــكوزا ))

الثالث : (( هلال هيوستن52 ))

@@@@@@@@@@@@@@@@@@@@@@@@@@@@@@@@@@@@

العضو ... (( توتيCOM ))

اخترته ... لان من خلالي متابعتي له اتضح انه مهايطي

قلت خلني اخش فيه باسلوب هياط ... عشان تصير حرب البسوس بالمنتدى ...

طبعا اعتذر منه مقدما ... لان والله ما بيننا اي علاقة سابقة

لكن حبيت اختاره ... لان من زمان ما احد هايط علي

ارسلت له :

إقتباس


	السلام عليكم ... اخوي ... انا ما اعرفك شخصيا ... لكن يوزرك مالوف عندي ... من خلال منتدى العالمية ومتاكد انك ما تعرفني اللي نفسي اعرفه ... على اي اساس تسوي فيني كذا يعني توصل كلام عني ما قلنا شي تطلعني نصاب ... عشان تضبط علاقاتك مع المشرفين ... برضو ساكت وما تكلمت لكن ... يوصل الموضوع اني ماني مضبوط ... لا ومرسلك رسالة خاصة ما ادري من وين اخترعتها عموما هذا وجهي اذا شفت اسمك باي موضوع ودخلته ... خل اسلوبك هذا ينفعك والحمد لله ما تكلفت الا حق اشتراك النت ... وانا قاعد ومرتاح ... عرفت معادن الناس ... انت رجال ... قابلني ... يا اخي قولي انت غثيث خلاص ما عاد بشارك بالمنتدى خلك تستانس انت واللي يفكرون مثلك

طبعا وبحكم شخصية العضو الهياطية ... كنت متوقع رد جامد منه ..

والرجال ما قصر ... رد علي يقول :

إقتباس


	خخخخخخخخخخخخخخخخخخخخخخخ

إقتباس


	سـلامـات .. يا بـوووو وش الطـلعـة .. ذي .. ؟؟ !! اولاً : مثل ما قلت انت ما اعرفك ولا تعرفني .. ولا ادري بأي شئ تقـولهـ من جد لحست مخي ثانياً : شكلك غلطت بالرساله .. لأن الكـلام اللي تقـوله اول مره يمر علي وغير كـذا .. مو انا اللي ابلغ المشرفين حتى لو غلط علي الشخص اعرف اتفاهم معه شغلة التبليغ عن مشاركة او كذا شغلة ( بزارين ) .. ولله الحمد علاقتي في المنتدى مع الكل عال العال .. واذا اخطينا عليك بدون قصد من ناحية رد او موضوع ( فأعتذر لك ) ورده اما السالفة اللي انت كاتبها اعيد واكرر ( شكلك غلطان تبي ترسل لواحد ثاني ) تحياتي لكـ ورده

لو تلاحظون الى الحين ماسك اعصابه

انا قلت ما ينفع كذا ... لازم نولع زيادة ...

ارسلت له مرة ثانية :

إقتباس


	انت شايفني غبي والا حول الظاهر الناس اللي وصلت لهم كلام عني لاعبين عليك وقالو لك اني دلخ طيب انت ما عرفت انهم يستدرجونك عشان تطلع اللي بقلبك علي عموما خلاص ... كل واحد يسوي اللي يريح ضميره ... انا اللي علي سويته ... وانت خل الفتنة تنفعك

طبعا الرجال حس ان الموضوع بدأ يطلع عن سيطرته

قال يا ولد خلني اضمن حقي قبل لا هو يخربها ...

إقتباس


	يا بوو اخلاقك .. انت ملعوب عليك !! اي ناس واي خراط انت اللي بادي بالرسايل .. وتقول ناس !!!!!!! انت في واحد لاعب عليك انا ما اعرفك إلا بسـلامتكـ .. الفتنة ..!!؟؟ شف من اللي بدا بالرسايل ( معناتها انت اللي واصل لك كلام مو انا ) اللي وصل لك كلام .. غلطان و نصاب وانت للأسف مشيت معه تأكد ودقق في الموضوع .. شف من اللي بدا في المراسلة انت اللي بديت معناتها انت عندك شئ بس مدري وشهو ؟؟ على العموم ترى انا ماشي معك بأخلاق .. وهذي عادتي اتمنى تعدل اسلوبكـ .. لأن ما بدر مني شئ حتى يكون اسلوبكـ كذا ســلاآآآآم ورده

الحين بدا يخربها ... واعلن الحرب بطريقة غير مباشرة ...

زي اللي يقول ... يا تهجد ... والا بكب العشا كله

طبعا انا احتراما للموضوع ...

لاني داري اني لو كملت رسايل كل القسم الخاص بالعضو بيتشفر

كل الحب والاعتذار لك اخوي

مجرد تغيير جو المنتدى

@@@@@@@@@@@@@@@@@@@@@@@@@@@@@

العضو الثاني ...

(( استـــــكوزا ))

هالعضو انا اخترته لانه جديد على العالمية

وتعرفون ...قلت لازم اخربها معه من اولها عشان يبدع بالعالمية بعدين

زي كيف طلاب اولى ابتدائي ...

اول ما يجون للمدرسة ... طلاب سادس تلقاهم ينفخون انهم اكبر ناس ...

واغلبهم مسجل بجماعة النظام ...

اذا اجا الولد يدخل الفصل يقولون له ... ممنوع تدخل الفصل بنعالك

هو مسكين يصدق ... ويجي من ثاني يوم شايل النعال بالشنطه

ارسلت له هالرسالة :

إقتباس


	هلا استكوزا !! اخوي تسمحلي اسالك .. انت من وين تعرفني ؟؟ مالك شهر بالعالمية امداك عرفت من انا ... لا وسويت علاقات مع المشلرفين على حسابي !! ياخي 300,000 عضو .. ما لقيت الا انا تقول عني كذا عموما خل اللي سويته ينفعك ... انت مستانس صار لك اسم بالعالمية ... وطلع اسمك بالافضليات ... بس لو بتستمر على اسلوبك هذا ... صدقني بيجي العضو اللي ياخذ حقي سلام ... والحمد لله عرفت من انت من اولها

طبعا الرجال اخلاق ويستاهل كل خير ...

رد علي يقول :

إقتباس


	هلا اخوي مساء الخير والله انا ماني عرف عن وشه تتكلم لكن اذا غلط عليك انا اسف وهذا الايميل اذا فيه حاجه

يا ويل قلبي ... بالله عطوه افضل عضو مكرر

على طول اعتذر واعطاني ايميله عشان يحل المشكلة

تعلمو يا بعض الناس ...

استكوزا ... اعتذر منك يا غالي ... بس القرعة طلعت عليك

اتمنى تقبل هالمزحة بصدر رحب

@@@@@@@@@@@@@@@@@@@@@@@@@@@@@

العضو الاخير :

(( هلال هيوستن52 ))

هالعضو ... كنت الاحظ الجدية التامة في ردوده

ما عمري شفته يذب ... يمزح ... يستهبل

قلت خلني اشوف وش بيكون ردة فعله

ارسلت له هالرسالة :

إقتباس


	هلا اخوي ... انا ما صار بيني وبينك اي شي ... على اي اساس توصل للمشرفين كلام عني من وين تعرفني ... وين شفتني !! عموما يكفيني اللي عرفته عنك ... وبالله لا عاد تجيب سيرتي عند احد ... يكفي ان يوزري صار بالبلاك ليست من وراك انبسط ... بس زي ما سويت فيني ... بيجي اليوم اللي عضو يسوي فيك نفس الشي انا يكفيني اني وانا مرتاح على النت عرفت كل واحد على حقيقته

طبعا الرجال الى وقت كتابة هالموضوع ما رد

كنت ناوي انتظره ... لكن جد لان طلع شي بيشغلني ...

قلت ما لي الا انزل الموضوع الحين

اخوي هلال هيوستن ... مجرد مقلب عشان اشوف ضحكتك

والله استانس اذا شفت الناس مبسوطة وما تشيل هم شي

======================================

الموضوع انتهى .... عارف انه طويل وقلق

الهدف من الموضوع ... تغير جو على اخر الموسم ...

اللي فريقه فايز ... ينبسط مرتين ... واللي خسران ينسى الموسم

وبرضو عشان اوصلكم ان المشرفين بشر عادي زينا زيهم

والله قلوبهم طيبة ... وكلهم يحبون الخير للاعضاء

تحياتي للجميع ... انتظر ردودكم ... تعليقاتكم ...

من العضو اللي كان ودكم ياكل المقلب

ولا تنسون موضوع المظاهرة بخصوص التواقيع

تحياتي لكم جميعا

اسف على الاطالة والازعاج

الهلالي 11 · #2 11/05/2008, 01:09 PM

الاعضاء اللي دخلو بالبداية ...

اعتذر على سوء التنسيق اللي اول شي ... استغربت الخرابيط الللي طلعت !!

تم التعديل ... اتمنالكم قراءة ممتعة ... ادخلو الصفحة مرة ثانية ...

hilalemooot · #3 11/05/2008, 01:25 PM

.
.

هلا الدحمي

اول شي علشان نوضح الصورة ترى حتى حنا بالمشرفين بالتواقيع مسموح لنا حد معين .. بس فيه طرق ثانية نخلي التوقيع يطول شوي مابي اعلمكم وشهي

بالنسبة للمقلب الفكرة حلوووة .. بس ترى ماقد صارت معي كل الموضوع اني شفتها بس وين مدري

ترى الخبرة تلعب دور بمثل هالاشياء

فرجاءاً حاول مرتن اخرى

الله يوسع صدرك بالعافية .. من خلال هالموضوع إكتشفت إن توتي كوم إنسان عصبي ماينتحارش

يعطيك العافية عبدالرحمن

.
.

نيسـ 10 ـتلروي · #4 11/05/2008, 01:34 PM

روووووعه الفكرهـ .. أو المقلب ..

وكان من المُـمكن تكون أفضل وأمتع لو إنـّها مشت على الجميع ..

والله إنـّي أحمد ربـّي وأشكرهـ إنـّي مآكله من قبل وعارف الطـّبخة .. وإلا كان علووووووم ..

عافاك الله يالدّحمي .. ورده

وبإنتظار مُفاجآتك القادمه .. والله يستر ..

X.ALONSO · #5 11/05/2008, 01:39 PM

اخ عبدالرحمن يعطيك العافيه

والله موضوع يوسع الصدر ومشرفين منتدى الزعيم مميزين

الحمد لله انك نزلت هذا الموضوع الحين لاني ماقد اكلت مقلب

وان شاء الله يكون هذا درس

تقبل مروري وتحياتي لك .....

ورده

أبــو غــامــد · #6 11/05/2008, 01:44 PM

قديمة

..

عبدالرحمن .. أنا قد شفت المقلب اللي صار في إبراهيم ( أبو قفل )

عشان كذا عرفت يكون المقلب .. موب علي .. لازم يكون عندك خبرة عشان تعرف هالأمور

أقول عبدالرحمن .. وش صار على الخدامة ماتت ولا لا ؟

الغرناطي · #7 11/05/2008, 01:48 PM

عبد الرحمن ,, أعترف لكــ كنت اكره يوووز بالنسبه لي , اكتشفت انك انسااان اخر

..... موضوع يستحق الأفضليه ......

شكرا

zammamwek · #8 11/05/2008, 01:52 PM

ههههههههههههههههههههههههههههه
الشياطييين شياطيين على اسمهم مافييه امل تجرهم
أما ناصر هههههههههههههههههههههههههههههه
صراحة اسلوب
اما الروماي : أحس انه بيمسك ويقطعك قطعة قطعة علطول مافيييه تفاهم
والله خليتنا نضحك مع ان مالي نفس ,,تعرف الحسم اليوم

إقتباس


	بعدين خل البطولة تجي اول بعدين يصير خير

بدييييييييييييت أخااااااااااااااااااااااااااااااااااااف يادب
الله يستر
أجل عيب تقول لأحد ياوقح هههههههههههههههههههههههههههه
ان شاء الله نبارك لكل مانشيستراوي
(برهووم&احمد&الدحمي)

الهلالي 11 · #9 11/05/2008, 01:57 PM

لي رجعة ... لاني والله مشغول ومستعجل ...

لكن حبيت اوقف عند رد اخوي الموسيقار توتي ...

وش دعوى يا غالي

ان كانك تكرهني كذا بس من الله اوكي

بس اذا كنت غلط عليك بشي اعتذر والله ... وما اذكر ان صار بيننا سوء فهم

عموما يا غالي ... لو كنت اشك 1 % انك تكرهني ... كان اخترتك من بين الاعضاء وسويت فيك المقلب ...

لان اذا سويت بواحد مقلب وما تدري انه يكرهمك ... تعطي اكشن للموضوع

لي رجعة

ابو غامد ... جاي تسال السؤال هنا

... لا لا ما ماتت عايشة وتتنفس

بس بالله علمني وش جملة البرمجة اللي سبيتني فيها

ذيــب الانــتر · #10 11/05/2008, 01:57 PM

خخخخخخخخخـ الله يعافيك عبدالرحمن

لو انك مسوي المقلب فيني بـ صدق على طول !

ازين شي حقت توتي كووم !

الله يعافيك مره اخرى !

world sport · #11 11/05/2008, 02:01 PM

والله لو انك مرسل لي

كان خليتك تسلم على اليوزر

الف تحية

لك يالغالي

وموضوع ممتع

إقتباس


	ابوه كان يوصله لباب الفصل عشان يضمن انه ما ينحاش ... يرجع يلقاه قاعد ورى الدركسون ويقول والله ما تسوق

ههههههههههه

[ رحــال ] · #12 11/05/2008, 02:15 PM

[ و عليكــم السلام و رحمة الله و بركاته ]

وسـع الله صدرك مثل ما وسعت صـدورنا ,,

اذكر بداياتي للنت في منتدى سووّها لي
و ما صدقت خبر و انواع الشك ,,

و اعتقد أغلبية اللي عرفـوا انه مقلب قد مر فيهم
و أكلوها أكل

إلا وش قصـتك مع المدارس ,, كل عضو لازم تدخـل فيه طلاب مدرسة

أكتشفـت أشياء جديدة عن بعض الناس اللي كانوا غامضين بالنسبة لي ,, و زاد احترامي
للكـل ,, ورده
[ الهلالي 11 ] ألف شكر لك على هالمـوضوع ولا تقطع عن المواضيع الحلوة ,,

J o S e · #13 11/05/2008, 02:15 PM

هلا و الله بالدحمي

<<<أمون ولا

<<<أمزح

بصراحة مقالب ملعوبة لكن الله يهديك مالقيت إلا أهل الخبرة تلعب عليهم

يعني اكد بيقول لك قديمة وبيعمم على باقي إخوياه ان عبدالرحمن مسوي مقلب بايخ ! ! !

بصراحة أزين شيء سويته في الموضوع إنك ما شبكت خط مع توتيcom [/COLOR]لأن قبل 5 أيام تقريبا

ماكل إنذار و مخربها يعني طلعت عاقل ولعبتها صح و ماعجبني إلا واقعية إستكوزا

رجال هادئ

هلال هيوستن52 فعلا ما يحب يرد وواقعي جدا أتمنى ما يسحب على الموضوع ويعطبنا ذبة واحدة فقط للتحلية

عبد الرحمن

عافاك ربي وننتظر جديدك في التهبيل بإخواننا المشرفين ورده

سليمان الناصر · #14 11/05/2008, 02:18 PM

ههههههههههههه حلوه المقالب ومشرفينا الله يخليهم ذيابه ماتمشي عليهم

وحلوه منك الهلالي 11 يومت تقول ل s u l a i m a n

ولا عشانك برشلوني هههههه ويوم تتقوله فريقك خسر اربعه وانت خسرت واحد <<<هذي ماتطلع الا من واحد ذهين وذكي

يالهلالي 11 ومشكوور ثانيا ..

العسيماوي · #15 11/05/2008, 02:27 PM

مقلب رهيب دحومي تسلم عليه

تسجيل اعجاب واستمتاع بالموضوع وكل مواضيعكـ

وياليت ماتحرمناش من طلعاتك

لكـ