رحلتي إلى الشيخ صالح كامل لطلب العلم ..!! - نادي الهلال السعودي - شبكة الزعيم

الـمـشـاغـب · #1 11/04/2008, 06:19 PM

بسم الله الرحمن الرحيم
السلام عليكم ورحمة الله وبركاته
وبعد:

اللي اتصاله دايل أب يا ليت يشرّف الحتة ويطس لأني راعي طويلة وجايز أطول في حكايتي

.. أما اللي اتصاله دي إس إل فحياه الله وبياه وفي الجنة لقيانا ولقياه إن شاء الله مولانا ومولاه ..!!

سالفتي سالفة .. وحكايتي حكاية .. يمكن تدخل العقل ويمكن ما تدخل .. يعتمد هذا على طبيعة العقل المستقبل لحكايتي الخنفشارية ..!!

قسمت الرحلة إلى ثلاثة فصول .. فاللي مستعجل أو يبي الزبدة من الموضوع بدون كلام زايد .. يروح للفصل الثالث أريح له أو يشوف ما يستفاد بالأسفل ..!

--------------------------

الفصل الأول :

" مناسبة الرحلة وطلب العلم "

في ليلة من ليالي الرياض الممطرة كنت أتفرج وأقلب في هالقنوات الماجنة

وأدور عن شي يفيدني في حياتي الدنيوية .. لحد ما وصلت لقناة art أفلام .. وقفت شوي برهة من الزمن أشوف وش السالفة حتى سالت سعابيلي من المشهد اللي قاعد أشوفه .. يا إلهي وش ذا؟

مشهد خليع ما أقدر أوصفه .. كنت قبل المشهد قاعد على الكنبة وماد رجليني على الطاولة رجل فوق رجل ومتمدد من الملل .. وبعد ما شفت هالمشهد الساخن بدأت بالتعرق من هول ما أطالع ولصقت خشتي بالشاشة ..

المشهد لأول مرة أشوفه بحياتي .. تخيلوا معي الممثل يجي يقعد جنب الممثلة قدام العالم ويمسك يدها وما عنده في أطلق شنب

.. لا وبعد قسم بالله يبوس يدها ..!!

أي نعم يبووس يدها يا جماعة ما أكذب عليكم ..!!

اسمحوا لي .. من الحين أقول لكم لا أحد يرسل لي بالخاص المقطع موب عندي ..!

المهم .. فيما كنت أنا أتفرج عليه وهو يبوس يدها – أستغفر الله- .. كان ضميري يأنبني وشلون أتفرج على هالمشهد الخليع

.. لكن للأسف الشيطان كان أقوى مني فما قدرت أصرف نظري عن هالقناة ..

لكن فجأة حدث ما لم يحدث بالحسبان

.. دخلت علي أمي -الله يطول بعمرها – تبي مني شغلة معينة .. من الربكة حصلت دربكة مني بغيت أغير القناة قبل ما تشوفني الوالدة وأنا أناظر هالمشاهد الساخنة

.. من الربكة ما عرفت أغير .. ضغطت الزر بسرعة للقناة اللي بعدها

.. كنت أدري أن القناة اللي بعدها هي قناة art أخرى بس قلت في نفسي شي أهون من شي والله يستر ..!!

على طول قالت الماما : وش قاعد تشوف أنت؟

.. طبعاَ كانت الماما ماخذة مقلب فيني أني طيب وأخوي الثاني هو الداشر ..
ناظرت في القناة اللي أنا حطيتها وأشرت عليها وقلت : أطالع ذا ؟

من حسن حظي ان القناة اللي قلبت عليها كان فيها برنامج للشيخ صالح كامل وكان يتكلم عن الذنوب وأثرها في زيادة الأسعار – شكل أبو محيي ناوي يزيد أسعار الـ آرتي وبدأ يلمح لهالموضوع من بدري -

شافت الوالدة القناة ودمعت عينها وقالت : مع أني ما ارتحت لهالخشة إلا أن كلامه صحيح الله يرحمنا برحمته ..

ثم أكملت : الله يبارك فيك يا وليدي خلك كذا تتبع أهل الدين والتقوى وانتبه من رفاق السوء لا يدشرونك

حسيت بالارتياح بعد الورطة وقلت : لا يمه لا توصين حريص .. أنا دايم أحب الخير وأهل الخير .. ولو تدرين هذا الشيخ يقولون أنه ماخذ جايزة نوبل لخدمة الاسلام في أرجاء باكستان الشقيقة ..

انبسطت أمي وقالت : ما شاء الله .. مع أني عجزت أفهم كلامك الأخير بس فهمت منك أنه عالم مهوب سهل ..!
هنا دخل أخوي النشبة .. خفت أنه يعرف صالح كامل ويفضحني قدام الوالدة ..!

ما لقيت غير أني أتغدى به قبل يتعشى بي .. قلت : يمه أنا أحب الخير وأهله .. بس لما أشوف خشة أخوي الداشر ذا أحس أن الشياطين تتجمع حولي مدري ليه؟

تنرفز أخوي وقال : من اللي قاعد يتكلم؟ لا تكون المشاغب آل الشيخ وأنا مدري؟ تراك سربوت ملحط لا أقوم أفقع خشتك ..

ردت عليه الوالدة : لا لا .. اخوك المشاغب خير منك .. شفه ما يتفرج غير على أهل العلم وبرامجهم الدينية ..

كملت كلامها أنا : ايه يمه والله أنك صادقة

.. تصدقين أنا بس لو تتحسن ظروفي كان رحلت في طلب العلم؟

أخوي طرطع من تمثيلي لأنه عارف حقيقتي زين .. لكنه سكت وقعد يناظر بخبث في الشيخ صالح كامل .. وقال جملة واحدة بس : طيب .. يصير خير يالمشاغب ..!!

ما عرفت وش يقصد بكلامه .. بس شعرت بروح الانتصار .. ورحت للخلود للنوم ..!!

في اليوم الثاني :

أمي تصحيني : المشاغب .. قم يا وليدي عندي لك خبر بيفرحك ..

أنا : هلا يمه .. خير بشريني ؟ الوليد سددنا الدين اللي عليه؟

أمي : يا بثرك لا جيت تستخف دمك ..

أنا : طيب يمه وش هالخبر اللي تصحيني عشانه؟
أمي : قم بالأول وافطر .. ثم تعال للاجتماع اللي مسوينه لك أنا وأخوك ..
قمت وغسلت وجهي وتجهزت للفطور وأنا في راسي آلاف الأسئلة وعلامات الاستفهام ..

أخوي وش دخله بالاجتماع؟ أعرف أخوي أنا ما يدخل في موضوع لي إلا ويكيد لي فيه .. يا رب استر بس ..!

نزلت أفطر وأناظر كل شوي بوجه أخوي وأمي .. الوالدة تبتسم وهي فرحانة فأقول في نفسي الحمد لله أكيد خير ..

لكن لما أشوف وجه أخوي وأشوف في ابتسامته خبث ومكيدة أقول والله أني رحت في خرايطها ..!!

خلصت فطوري بسرعة ورحت لمقر الاجتماع وأنا أدعي أن ربي يسترها معي ..!
أول ما دخلت إلا وأمي تقول : ربي حقق لك أمنيتك يا وليدي؟

فرحت وقلت : هاه أكيد شوق وأهلها وافقوا يزوجوني اياها ؟

قال أخوي : حامض على بوزك .. ناظرت وجهك بالمراية أنت؟ حتى هيا الشعيبي لو ندفع لها مليون ما تقبل فيك .!

قلت : أجل وش السالفة يالداشر ؟ خلصوني أنا مستعجل عندي موعد مع ماجد مقبل

..!
قالت أمي : يا ولدي الخبر أهم من شوق وماجد مقبل .. المفاجأة أن أخوك حقق لك أمنيتك ونسق لك موعد مع الشيخ اللي أمس ..!
أنا انلحست : لحظة .. لحظة .. خلوني أستوعب؟ وشو ؟ .. شيخ؟ .. أمنية .. أمس .. نوبل ... وشو؟!!!

قال أخوي بكل خبث : مو أنت ودك تطلب العلم؟ أنا أخوك الداشر حبيبك ضبطت أمورك وجهزت لك موعد مع الشيخ صالح كامل اللي أمس تشوف برنامجه ..!!

بدون شعور قمت من مكاني وأزنط أخوي وأمسكه من تلابيبه

.. مسكتني الوالدة وفرقتنا وقالت : أكيد يا وليدي مستانس أن أمنيتك أخيراً تحققت .. بس موب كذا تعبر عن فرحتك وتخنق أخوك ..!!

ما قدرت أقول شي وقعدت أبكي على نفسي ..

قال أخوي : يمه خليه يعبر .. خليه يبكي ويخنقني حلاله .. أنا كلي فداه أهم شي رديت له شي بسيط من جمايله علي ..

الحين ذولي من جدهم بيودوني مشوار للشيخ صالح كامل؟!!

صالح كامل ما غيره؟؟ ليه كذا يا أخوي؟ هين هين أوريك ..!!

الفصل الثاني :

""الرحلة إلى مكتب الشيخ صالح كامل""

تجهزت للرحلة وودعت أمي وأخوي .. ولما طلعت أبركب السيارة رفض أخوي .. قال : ما يصلح تروح تطلب العلم بالساهل؟ لازم تقتدي بالأئمة السابقين .. وأنا جهزت لك كل ما تحتاجه في السفر .. والا لا يمّه؟!!

قالت أمي : وأنت صادق يا ولدي .. كل ما تعب أخوك أكثر كل ما حصل أجر أكبر ..!

استسلمت للأمر الواقع .. قلت يالله أجل توكلنا على الله ..!!

أخذت أغراضي من دفاتر وأقلام حبر وهندسة وكراسة رسم وألوان

.. وتوجهت للحمار اللي مجهزة لي أخوي ..!
ركبت الحمار واتجهت قاصداً استيديوهات آرتي ..!!
أتعبني هالحمار في الطريق .. كل ما مر على مزرعة وشاف له حمارة فيها يوقف عندها يستعرض جماله ويتميلح قدامها

.. لعنبوا غيرك يا الحمار امش.. معانا خط طويل .. يكفي أني صابر عليك وأنت لا مكيف ولا مسجلة ..!!

تعبت من هالحمار وقررت أستغني عنه .. وقفته عند مزرعة بقر ما فيها ولا حمارة << نذالة بس

وبعته لراعي المزرعة بثمن بخس .. يستاهل الحمار خل تميلحه ينفعه ..!

مشيت لين وصلت للشارع وأخذت لي ليموزين وطلبت منه يوديني لاستديوهات آرتي ..
وصلت للاستيديو .. وهناك قابلت الأستاذ وليد الفراج .. سلمت عليه وعرفته على نفسي بأني مشجع هلالي مشترك بجميع قنوات الآرتي وعندي قناة خربانة وأبي أقابل الشيخ صالح كامل عشان يصلحها أو يخصم لي قيمتها ..

مدري وش فيه وليد الفراج كنّه سفهني وما رد علي كنها قافلة معه .. شوي إلا والحرس من كل حدب وصوب يراكضون صوبي ..

صحت لهم قبل يوصلوني : والله العظيم ما أعرف النمشان ولا أعرف ولا سكيورتي يشتغل بالاستاد ..!

ما نفع معهم صياحي .. كفخوني وصفقوني وشالوني برا الأستديو ..!!

قعدت ممدد على الأرض نص ساعة لين جاء ولد الشيخ صالح .. واسمه محيي الدين صالح .. شافني ممدد وأكسر الخاطر .. عرفت أنه بيرثي لحالي فرفعت صوتي بالونّة .. أونّ أونّ أبيه يرحمني ويدخلني عند أبوه ..

اقترب مني محيي الدين وكأني بديت أكسر خاطره ..

من زود اللعانة اللي فيني كملتها وأنا أونّ : مو مهم أعيش .. أهم شي الشيخ صالح كامل وولده محيي يكونون بخير .. نموت نموت ويحيى الشيخ صالح .. نموت نموت ويحيى الشيخ صالح ..! << فيلم هندي

رفع راسي محيي الدين .. وبدأ يلقّني الشهادة ..!!

بعدها أيقنت أن صفة الدلاخة صفة وراثية ..!

فتحت نص عيني اليمين وأنا ما أزال أمثل عليه وقلت : لا موش مومكن .. اللي قدامي محيي الدين نفسه؟

الحين أقدر أموت وأنا مرتاح البال؟

قال محيي : قل لا إله إلا الله .. لا تموت وأنت كذا ..

رديت عليه : لا إله إلا الله محمد رسول الله .. لكن أمنيتي الأخيرة أشوف أبوك حبيب قلبي عشان أموت وأنا مطمن أن الدنيا بتكون بخير بعدي ..!
قال محيي : أبشر ولا يهمك .. بأحقق أمنيتك الحين .. << حليله مصدق الحبيب ..!

أمرهم محيي أن يشيلوني بسرعة ويودوني فوق عند الشيخ صالح كامل ..

وهم شايليني فوق كأنهم شايلين جنازة .. شفت في طريقي وليد الفراج وهو يناظرني بحقد .. ابتسمت وغمزت له ..!

الفصل الثالث:

" المواجهة في مكتب الشيخ صالح كامل "

وصلنا مكتب الشيخ صالح كامل .. ورموني السكيورتية على أقرب كرسي ..!!
أكثر ما لفت نظري أول ما دخلنا المكتب هو كثرة التماثيل عن الضفادع

.. بغيت أسأل الشيخ صالح عنها بس قلت مالها داعي أسدح الميانة من بدايتها ..!

اقترب مني الشيخ صالح كامل وولده محيي وهم خايفين علي وأنا أحتضر أمامهم .. حتى أني سمعت أن الشيخ صالح قال لولده : خلني أسوي له تنفس صناعي لين يوصل الإسعاف ..

أول ما سمعت طاري التنفس الصناعي فتحت عيوني وقمت لا شعورياً ..

ناظروا فيني مستغربين هالصحة اللي جاتني فجأة ..!! قمت أصرف وأقول : الله أكبر يا شيخ .. سبحان من أعطاك هذه الكرامة شفتك وراحت كل الآلام ..!!

استانس الشيخ صالح وطلب من ولده محيي يروح عشان يجيب المصورين عشان يطلعني في برنامجه الديني ..!

طلع محيي وما بقى إلا أنا والشيخ صالح كامل ..!
بادرته قائلاً : يا شيخ صالح .. أنا اسمي المشاغب جيتك من أقصى الدنيا عشان أستفيد من علمك وأسألك عدة أسئلة ينتظرها الملايين من عشاق الرياضة السعودية وبالأخص جماهير نادي الهلال السعودي ..! ورده

تغير وجه الشيخ صالح لكنه قال : توقعت أنك جاي عشان تشوفني بس .. لكن ما هي مشكلة .. أنتا اسأل وأنا أجيب إن شاء الله ..!

قلت : يا شيخ قنوات الآرتي الرياضية تعتبر الأغلى بين مثيلاتها من القنوات الرياضية الأخرى ؟ وش السبب؟
قال : شوف يا ابني .. احنا نوفر للمشاهد أفضل الدوريات العربية والأوربية وطبعاً نخسر فيها كتير .. واحنا قناة ربحية بالدرجة الأولى مش معقول نعطي اشتراكات رمزية ونخسر عشان الناس اللي ما معاها فلوس ..!

قلت : لا يا شيخ محد قال لكم تخسرون.. لكن ليش مثلاً ما تخلون الربح اللي تاخذونه أقل وتوفرون على الناس اللي ودها تشوف المباريات وما معها فلوس ؟

قال : والله يا أبو شغب احنا ما ضربناهم على اياديهم .. واللي ما معوش ما يلزموش ..!

حسيت أنه سدح الميانة يوم ناداني أبوشغب قلت خلني أسدح أم الميانة أنا بعد ..

قلت له : طيب يا صلوحي

وش تقول في الفيلم الوسخ اللي أنا شفته قبل يومين؟ يوم الممثل يبوس يد الممثلة؟ مو عيب؟ مو حرام انت ووجهك؟ << سدح الميانة بقووة الأخ

قال : شوف يا حبيبي .. الكلام هادا كتير اللي يقولوه .. الناس التانية بتدس السم في الدسم .. أما أنا لا .. أدس الدسم في السم ..!

قاطعته : لحظة .. قبل شوي تبي تسوي تنفس صناعي .. والحين تقول يا حبيبي .. أنت وش تبي بالضبط؟ اهجد يا أبوكامل لا تخليني أغير الصورة اللي ماخذها عنك ..!!

يالله الحين كمل ووضح اللي تبي تقوله ..

قال : طيب ياللي مش حبيبي .. أنا أقصد أن القنوات التانية كتير من قنواتها فيها مجون وجنس فاضح .. وعشان تصرف الناس عن مشاهدة القنوات التانية لازم تحط بعض مشاهد البوس في قنواتك عشان الناس ما تروح تشوف القنوات الوسخة التانية .. وبكدا أنا أدس الدسم في السم .. وأعمل أخف الضررين ..!

قلت : خلاص الله يرحم أمك .. خلنا في الرياضة أحسن .. أخاف تلحس مخي كلامك .. لو أنك قسيس ما أستبعد تغسل مخي وأرجع لأمي وأنا معلق الصليب – أستغفر الله -

.. خلنا بالرياضةأبرك واترك الدين لأهله ..!

ضحك وقال : ها ها هااااا .. الله يرجك يا أبو شغب دمك خفيف .. ما عندك نكتة جديدة طيب؟

رجعت للأسئلة الرياضية قبل ما يستخف الرجال أو أنا اللي ينلحس مخي ..

سألته وقلت : طيب يا صلوحي ليش قنواتك تكتم أصوات جماهير الهلال في المباريات الجماهيرية خصوصاً .. وتظهر أصوات جماهير الأندية الأخرى وخصوصاً الاتحادية؟ أتحداك تجاوب ..!!

جاوب وقال : ما فيش أحد ينكر أنو جماهير الهلال لا تقارن في كثرتها وحضورها .. ولكنها قليلة التفاعل بشهادة رئيسكم والكتير من جماهيركم نفسها ..
احنا ما ننكر اننا نحاول نحل هادي المشكلة لكن ليتكم تحلون مشكلتكم في الأول بعدين فكروا في غيركم .. لو جماهيركم كانت تتفاعل بشكل كبير كان طلعت اصواتكم غصب عن المخرج والقناة ..

حسيت من كلامه شي من الصحة وقلت : معك حق ولكن هذا ما يبرئكم من خطأكم .. خصوصاً أن أخطاءكم على الهلال وجماهيره تتكرر ,, ولا ننسى قطع مباراة الهلال لدقائق لاعلان خبر وصول لاعب النصر دينيلسون ..!
ابتسمت بعد ما أكملت السؤال لأني حجرت له هالمرة ..!

قال : بالنسبة لدينيلسون .. فهو لاعب عالمي وكان الخبر مهم وحبينا نسبق القنوات الأخرى .. وعموماً احنا اعتذرنا للهلال وجماهيره .. ومو عيب أنك تخطي العيب أنك تكرر الخطأ ,,

قلت : صحيح العيب أنك تكرر الخطأ وهذا اللي قاعدة تسويه قنوات الآرتي .. ويمكن تخسرون جماهير الهلال لو قامت بحملة مقاطعة ..

قال : شوف يا بعد قلبي .. كل الجماهير الرياضية وكتير من رؤساء الأندية اشتكوا من الآرتي وهددوا بالمقاطعة .. وهذا دليل على أننا نعمل بحياد وإلا ما كانت كل الأندية غير راضية عن عملنا .. كل نادي وكل جمهور يبغانا نطبل له .. ينبسط إذا قلنا كلام في صالحه .. ويزعل إذا قلنا حقيقة ضد مصالحه ..!

قلت : هالكلام يمكن يمشي علي لو كان اللي يزعلنا محلل أو مقدم أو مذيع .. لكن خبير تحكيمي مثل فودة واللي أغلب تحليلاته دائماً تكون ضد الهلال .. هنا اسمح لي ما أقدر أقول أن ما فيه تحيز ..!

قال : فودة محلل تحكيمي وهو يحلل حسب خبرته التحكيمية السابقة ويفهم أكتر مني ومنك ..!

رديت عليه : يفهم أكثر مني ومنك أوكي .. لكن كثير من تحليلاته يشذ فيها عن باقي المحللين اللي يجمعون على خلاف ما يقول فودة ..!! وبعد ما أنسى مواجهة التويجري معه بعد مباراة الهلال والأهلي .. قبل المواجهة ذكر أن الأهلي تضرر والهلال استفاد .. وبعد مواجهة التويجري له بطلب من ادارة نادي الهلال اعترف أن الهلال تضرر من التحكيم في المباراة ..!! بالله يا صالح كامل قل لي ليه تغيرت نظرة فودة لقرارات الحكم بعد المواجهة؟ يعني لازم بعد كل مباراة للهلال يحضر أحد من إدارة الهلال مع فودة عشان ياخذ الهلال حقه؟

ما لقى صالح كامل غير يقول : هو يقوم بعمله ولازم نحترم رأيه مهما كان ..!!

حسيت أني ثقلت على الشيخ صالح وحبيت أختم أسئلتي بهالسؤال: آخر سؤال يا صلوحي .. مباراة الهلال والاتحاد في ختام الدوري .. من تتوقع يفوز وماذا تقول لجماهير الهلال؟ ورده

قال : أتوقع اللي يلعب صح هو اللي يفوز <<< لا تكفى يالحيادي

أما بالنسبة لكلمتي لجماهير الهلال فأحب أقول : أن الآرتي منكم وإليكم .. أنتم في حاجتها وهي في حاجتكم ..
حضوركم في الملاعب بكثافة هو اللي يخلي الآرتي تحسب لكم ألف حساب .. وأي انتقادات منكم نتقبلها بصدر رحب .. آخر ما نفكر فيه هو خسارة جماهير بحجم جماهير الزعيم ..!!

قلت له : لا يكثر يا شيخ

.. جماهير الزعيم تعرف متى تحضر بدون أي دعوة .. وبتشوف إن شاء الله في جدة كيف جماهير الزعيم تزف فريقها لمنصة التتويج وحمل الكأس الغالية ..!!

في هاللحظة يدخل محيي الدين ومعاه المصور .. ويقولون : جاهزين للتصوير ..!!

أقوم من الكرسي وأطلع من الباب ولا كأن فيه أحد موجود .. محيي والمصور يناظرون في الشيخ صالح كامل وهو مبرطم ويناظر تحت يبون منه أي تفسير ولا يرد عليهم ..!!

أغادر الاستديو بكل شموخ الهلالي وعزة نفسه .. وأوقف ليموزين وأرجع لمزرعة البقر اللي بعت حماري المغازلجي فيها .. وأشتريه من جديد وأركب وأرجع إلى دياري ..!

وصلت البيت واستقبلني أخي .. احتضنته ثم عطيته ركبة في البطن وضربة كوع في الظهر حتى طاح بالأرض ..

ثم سلمت على أمي – الله يحفظها – وسألتني عن نتيجة طلب العلم ..!
قلت لها : " يوم الأحد .. يوم الأحد يكرم الهلال أو يهان " ..!!

ما يستفاد من الرحلة :

1 – كثر الناس اللي يتكلمون في الدين بغير علم .. فالحذر من أخذ الدين من غير أهله ..!
2- الزمن هذا زمن الاستغلال وشفط فلوس الأوادم .. احرص على أن تروح فلوسك في طريقها الصحيح ..
3- جماهير الهلال مستهدفة مثلها مثل فريق الهلال .. لا أقول أنها مؤامرة .. ولكن المعطيات تشير إلى هذا الاستهداف ..!
4- الحضور الكثيف والتفاعل في المدرجات هو من يجبر الآخرين على احترام هذه الجماهير والإشادة بها .. فعلينا كجماهير الزعيم أن نكون مثالاً يحتذى ونجبر الجميع على الاعتراف بفاعليتنا ..!
5- أحياناً لا تأتي الحقوق إلا بالمطالبة الملحة بها .. لذا يجب علينا حين تسلب حقوقنا كجماهير أن نوحد كلمتنا ونوصل كلمتنا للمسؤلين .. وألا نكتفي بالانتقاد في المنتديات فقط ..!
6 – لا يحق لك انتقاد الفريق أو اللاعبين إلا إذا امتلكت حق النقد .. وهذا الحق لا يأتيك إلا بالحضور للملعب والمساندة الفعالة .. وإلا فأنت مشجع سلبي وجودك كعدمك ..!!
7- بعض الناس قليل خاتمة مثلي أنا

.. محيي الدين ساعدني وبعد ما حصلت مرادي سحبت عليه سيفون ولا كأني أعرفه

خلصنا من الرحلة الطويلة .. إن غثيتكم فالحمد لله .. وإن ما غثيتكم فالخيرة فيما اختاره الله ..

الموضوع والله جاء بعد طلب من شخص عزيز علي أن أكتب في منتدى الجمهور .. ما عرفت وش أكتب .. قلت أخربط عليكم شوي .. وأطلب منكم الحضور للملعب يا أهل الغربية ..!!

واعذروني على الفضاوة الزايدة

تحياتي لأجمل ذكرياتي ورده

ع.ف.ط · #2 11/04/2008, 06:35 PM

حجززززززززز
الى ان اقراه صح
ويكفي ان فيه الشيخ صالح

زعيم رجال المع · #3 11/04/2008, 06:35 PM

شكراااااااااااااااااااااااااااا لك
ولي عوده

من زمااان · #4 11/04/2008, 06:38 PM

كلام عسل
وبصراحه حققت مبتغاك بطريقه اكثر من رائعه
الف شكر لك

skroo · #5 11/04/2008, 06:50 PM

السلام عليكم

طريقة ايصال المعلومة لنا مرررة رائعه وممتازه ورده

لكن طولت شوي وياليت تقص كم مشهد من المشاهد الزايده

لاني وصلت لين نص المكتب ونزلت وقريت اول فائدتين وجيت ارد

لايطول الموضوع علشان ما ينفرون الناس منه

ماقصرت ونصيحة : ياليتك منقح المووضوع عن بعض العيارات مثل ضفدع وغيرها لانها غيبة وشكرا لك ورده

MIDNIGHT · #6 11/04/2008, 06:51 PM

هههههههههههههههههههههههههههههههههههههههههههههههههههههههههههههههههه

خطييييييييييييييييييييييييير بقوة بقوة

الى الامام يا بطل

هلاليexpert · #7 11/04/2008, 06:54 PM

موضوعك رائع وبصراحه خشيت جو احس انك جالس تألفه من العام

F I N A L · #8 11/04/2008, 06:56 PM

والله إنك صاحب طويله من جد ,,,

تسجيل دخوووول ..

ونكمل الرد بعد القراءهـ ...
_______________

إقتباس


	1 – كثر الناس اللي يتكلمون في الدين بغير علم .. فالحذر من أخذ الدين من غير أهله ..!

في آخر الزمانيتكلم الرويبضهـ كما قال الرسول صلى الله عليهـ وسلم .

قلمكـ رائع كالعــادهـ << ما جبت شيء جديد ^_^

العاقل المفتون · #9 11/04/2008, 07:01 PM

اسلوب رااائع وايصال للمعلومة بشكل جيد وممتع..

اتمنى من الجماهير الهلالية عدم اعطاء فرصة لمدراء القنوات والمخرجين بانهم "يتعلثون" بأخطاءهم...

لذا نرجوا من الجماهير الحظور والمؤازرة..

وانا عندي انك ماتحظر افضل من انك تحظر ولا تؤازر يعني"وجودك زي عدمك"

سجل اعجابي بقلمك..

شين بس اخلاق · #10 11/04/2008, 07:04 PM

والله مبدع وراااااااااااااااائع

واسلوبك في الطرح شدني حتى الاخير

مشالله عليك مشالله عليك

أنطونيـو · #11 11/04/2008, 07:07 PM

قصة ظريفه تحكى واقع كاتبه الظريف <<<<<< اقول لايكثر

الله يعطيك العافيه والله انك رهييييب

@أبوعبدالرحمن@ · #12 11/04/2008, 07:12 PM

ياأخي ماشاءالله عليك أنت لحست بمخي وهبلتني وهذي أخرتها,لكن ليتك معطي الشيخ طالح

بكس بوجهه

ومشكور على هذا الابداع

algohmani · #13 11/04/2008, 07:12 PM

عشرين مره وانا طالع فوق شككتني بروحي قلت يمكن داخل بالغلط المجلس العام .. واخر شيء تقول غثيتكم ولا ماغثيتكم ..... ههه وتحمد الله على الغثاوه بعد ... ياحبي لك ...

اخوي المبدع في كل مكان صاحب الإطلالة الجميلة ( المشاغب )

قنوات الإبتذال عند صالح كامل كثيرة وللأسف انك وانت رايح لقنوات رياضية تطب طبه يقالها مش حتقدر تغمض عنيك
بس وش نقول ... الله يغفرلنا عشانن شوف مباريات نشترك بقنوات مبتذله والعياذ بالله ...

بالتوفيق للهلال وبالنسبة كانك منت بحاضر للقاء فالمباراة منقوله على الرياضية السعوديه وخل عنك اي ارتي اللي بتذبحك بفاصل طوله عشر دقائق وماباقي الا المباراةيفصلونها ويقطعونها عشان يجيبو اعلانات لا وعندك سبورت 5 و6 تحس انها تكملة عدد ليلونهار وهي مقفله ...

الهلال مستهد ف من الاعلام بشكل كامل وان كنت اصنف اعلام صالح هو القائد والاكثر فاعليه والسبب وجوود الاتحادي المعروف وابن الشيخ البار بالاتحاد قبل بر ابوه ...

في نقطة اثرتها حول التحليل وللامانه ان النقل التلفزيوني يوازي الحضور نعم انا لما اشوف مباراة من التلفزيون قد لا ستطيع تسجيل ملاحظات حركيه دقيقه للاعب ولكن الاختلاف ليس كبير والدليل ان هناك مدربين لا يحضر اي مباراة لفريق منافس له ومع ذلك تجد قرائته للتكتيك اكثر من ممتازه

جمهور الهلال في جده وتوصياتك هي محل اهتمام وبإذن الله بنكون قد المسئوليه وسترى جمهور فعال وليس جمهور موجود وحاط على جبهته مشغول ممنوع الإزعاج ...

دعواتي الخاصة للوالده بطولت العمر والله يحفظها لكم ...

اخوك المدمن لكتاباتك : ابو عبدالله

لاحد يشك اني انا اللي دعيته للكتابه انا بريء من الموضوع بس ودي اخش عرض واقول انا بس ماشاء الله عليك جاي ومعاك واحد من اللي مسنترين بالمجلس العام ولا يطلعون ...

هلال صعب المنال · #14 11/04/2008, 07:16 PM

والله اني خشيت جو

تصلح كاتب سيناريو

مشكووووووووووووووووووووووووووووووووووووووور

ايمن بوط · #15 11/04/2008, 07:18 PM

حلووووووووووو بس طوووووووووويل ومشكوووووووووووووووووور على الفوائد