مواقفي مع نهائيات الهلال .. ( عطسة في وجه التاريخ) - صفحة رقم 7 - نادي الهلال السعودي - شبكة الزعيم

مغاط · #1 07/03/2008, 02:47 PM

إقتباس

الرسالة الأصلية كتبت بواسطة يورو


	مغاط يامنتهي .. كويس اني قريت موضوعك .. والله ان اعصابي بدت تدهر حتى والله مانمت زين .. المهم ذكرتني في اول مباراة حضرتها للزعيم ,, تصدق انها قديمة مره بس طبعا وقتها كنت بزر او( جذع ) على قولتهم !! المهم كانت مبارة الهلال مع العربي الكويتي عام 1406 وكانت اول بطولة خارجية للهلال طبعا انا بالقوه ملزق نفسي بواحد من خوالي بروح معه للملعب واخيرا خذني معه بعد حب الخشوم والطلبات و كان موت برد و اول مره احضر للملعب والملعب مليان ومطر .. جاب القول سعد مبارك وبعدها مدري وين خالي ومدري وين انا فيه لاني منبهر كنت اول مره اشوف النعيمة على الطبيعة ولا ادري عن المباراة طبعا ضاعت نعالي الله يعزكم من الخرشه ( برد ونعال ) ماتجي مره بس عادي كانت ذيك الايام مافيها شي محد ينقد !!! وخالي مدري وينه وانا ادور في المدرجات ادوره وما لقيته وادور بعد المباراة حافي حول الملعب اشوف وين الرجال !!! وانا بقى دقيقه واعيط بس انت خابر عيب عند الناس تصيح !! على الاقل صد منا ولا منا واظهر الي في خاطرك !! مالقيت الرجال الا بعد ماراحوا العالم وفي المواقف بلحاله يحتريني !؟ وهاتك ياسب وهاتك يالعن وينكد علي متعة شوفة النعيمة على الطبيعه !!<---- رايح يشوف النعيمة واكملها في البيت وامرض تعرف حافي ومطر وبرد وادور لي ساعتين !! والله مدري هو زكام ولا مغص ولا انفلونزا المهم بغيت اموت لمدة سبوع كامل وانا مصخن ! بس عادي لعيون الهلال والنعيمة كله يهون !! طبعا بعدها وانا جالس بأي مكان وفيه خالي صرت اكره احد يجيب طاري لمباراة .. صار الادمي يفشلني في كل مكان اول مايجي طاري يلتفت علي ويسب وبعد كذا يأشر علي ويبدأ يسرد القصه لخوياه بقولته الشهيرة : شفتوا ذا البزر ان راح مره ثانيه معي للملعب انا منيب رجال !!! ضاع علي في الملعب بزر بليس وضيع نعاله وصجتني امه وراك تضيع ولدي و و و و و الخ .. بيني وبينك بعدها صرت اروح بلحالي مع عيال الحارة ومنة الله ولامنة ذا الخال ..! واذا شافني الى الان يلتفت علي ويقول تذكر يوم تضيع في الملعب يابزر !!! اقوله ترى شياب حنا احترمني الحين وش بزر يقول لااقصد انك فشلتنا وقتها <--- يعني رقعها المهم الله يوسع صدرك بالعافيه وذكرتني بس بها السالفه وحبيت امحط بها بموضوعك وافضفض شوي لاني بكل صراحه ( اكره خالي من ذاك اليوم ولاتحرجني تقول وش سوالك بالسيارة بعد ماجيته بالمواقف وهو يحتريني ) <------ واضح انه متلفخ بمان الله مغاط و الله يوسع صدرك بالعافيه والله انك خليتني اضحك وانا ودي اسوي رسمي عشان المباراة الليله اتمنى نبارك لك الليلة

ههههههههههههههههههه
ههههههههههههههههههه
رد ولا أروع !!
يا حبي لك أنت وخالك

جعله للكسر .. <<-- تحس انه أمك !!
اكتشفت ان صخنتك ميب انفلونزا ولا هيب مغص ..
أنا قد لخني الوالد بـ "مخمس" .. يوم شيعوا راسي .. لقوا فيه طبعة فص !! <<-- دايرني بطراق والخاتم لزق بالجمجمة ..
فالظاهر انك منتب بعيد

سالفتك ذكرتني بنهائي كأس الملك 1409 اللي فاز الهلال 3 صفر قدام النصر ..
و كنت محلق صفر .. ولابس طاقية

والطاقية ناشبه .. أنس تفكها يا شيخ .. إلا الين تدور بها .. مثل (القلاويز)

وكنت طاق نعال زبيريات (اللي بهن ودتس) .. طبعا هذي الموضة ذاك الوقت

ورايح للملعب .. كنت أموت في شي اسمه حسين الحبشي ..
المهم انه شبكها !!
فبدوا العالم يرجمّون عقلهم !! ونعالهم من الفرحة !!
وأناظر نعالي !! عندي انهن يسون (فورد بقراطيسها) فشينه اضحي بهن

وأدور شي رخيص اذبه مع العالم !!
قلت يا ولد (ذب الطاقية ) !!
وأحاول فيها !! ابفكها !! ويمين ويسار !!
سنتروا النصر وانا ما بعد طلعت نصها

المهم شوي يوم جاب التخيفي الثاني !!
ما عاد قدرت امسك نفسي !!
وأنا أرجمّ الزبيريات !!
واقعد اصارخ .. يوم حسيت ان كن (لوزي) انطلقن من مكانهن !!
يوم ارتعت !!
أبشجع مع العالم !! ابصارخ !! ماش صوتي انعدم !!
والحمد لله ويفوز الهلال 3 صفر ..
وارجع للبيت حافي !!
وصوتي .. تحس ان الحنجره ضاربه شوط !!
وصلعتي طالعن نصها !!
يوم دخلت عليهم في الصالة !!
قالوا وينك انت وطاقيتك ؟!
قلت لهم : آآآححححأأأ؛؛؛؛؛؛ححح ـب <<-- يعني كنت في الملعب بس صوتي رايح

لكن زي ما قلت كل شي يهون لعيون الزعيم .. تحياتي لك .. يا بعدي ورد أثرى الموضوع ..

al7alal · #2 07/03/2008, 02:19 PM

الله يعطيك العافيه اخوي

دايم مميز بطرحك الرائع

والله يعطيك العافيه وان شاء الله الزعيم الهلالي اليوم يفرح كل جمهوره

هلالي9 البوكا جونيور · #3 07/03/2008, 02:26 PM

ههههههههههههههههههههههههههههههههههههههههههههههههههههههههه
الله يرجك
مشكوور على الموضوع الرائع . , . ,

الله يوفق الهلال بكره ويجيب البطوله

هلالي صريح 00 · #4 07/03/2008, 02:27 PM

من المعطياااات وتحليلي انك بالقصيــــم << مسوووووي ذكـــي

اجل ماشاء الله انت شيخنا دامكـ 1415 تحضــر

<< كان وقتهاااا في ثاني ابتدائـي

الظــاهـرة · #5 07/03/2008, 02:53 PM

الغـــالي .. مغاط

قلم يجبرك أن تقرأ كل حرف يخطه هنا .. ولا أظن علامات الترقيم إلا لها نصيب من الأهتمام .. فمخزونك اللغوي ثري بفصيحه قبل عاميه والذي ينزف بريقه من بين تلك السطور .. إلا أن المتلقي لن يشعر بتلك الملكة اللغوية التي انتقت ما سما من المطروح في الطرقات .. رغم قدرتها على ملامسة السفوح ..!!

كثير من يطرح بنقاء ولغة رفيعة .. والأقل من يلامس مشاعر المتلقي يثير تساؤلاته .. والنادر من ينفث الحرف يغير في الاتجاهات ليتبع منهجه المتأثرون .. ولا أراك إلا من ترك بصمة سوف تلاحظ أثرها بعد برهة لن تطول .. ولكن هل تستمر في أنتقاء الموضوع .. فالفكرة يجب أن تكون من علية القوم والطرح يمر على كل طيف ..!!

مغاط ..

ليعذرني ( ميشيل ) أن أعيد صياغة تعريف ( ذروة الأبداع ) ليكون : رؤية ما لم يكن موجود بالأصل كما يفعل مغاط .

الظــاهـرة

داااني · #6 07/03/2008, 02:51 PM

إلا يوم جت ذيك الكندرة السوداء اللي تمشي سبع الاف !! والله يا جماعة أني اشوفها وهي تطير في الهواء !! وكل مالها تكبر !! وأنا اللي انزّل راسي باخر سرعتي وتنطبع الكندرة بوجه واحد من العيال ويزعل علي طول المباراة .. قلت يخوك وأنا اللي ذابها ؟!

هذا أحلى موقف .....

.. مسوي بضيع السالفة !! قلت لهم : كم النتيجة ؟

أحلى تصريفة ....هههههههههههههههههههههههه

أحلى موضوع مر عليه في منتدى الزعيم من عرفته

الله يبسطك مثل ما وسعت صدري الحين وأنا قرأت الموضوع بعد صلاة الجمعة وأنت تعرف الأخلاق كيف ...؟
توك قاعد من النوم وجوعان لكن موضوعك كااااااااااااااااان رائع

الله يحفظك من كل شر وجعلك ظخر للمواقف والتوقيف >>>> مسوي مرور هههههههههههههه

شاطيء الزعيم · #7 07/03/2008, 03:11 PM

انا مستغرب من الهمجية في ملاعبنا
كنادر وكولا ووووووووووووووووووووووو............على كذه البيت افضل

الزعيم007 · #8 07/03/2008, 03:50 PM

الله يعطيك العافيه . . . والله اني متوتر من الحين عشان مباراة بكره بس موضوعك

كأنه دكتور نفسي احس اني مبسوط الان وابشرّك ما في توتر من الضحك . . . احس اني صرت متفائل

مشكوور على الموضوع الرائع . , . ,

الله يوفق الزعيم اليوم ويجيب البطوله . ،’،’

والله انت راعيها ياااخوي

انت وينك من زمان ؟؟

كايد

سفيرة بنات الزعيم · #9 07/03/2008, 03:59 PM

والله حلوه مواقفك
ليتك تنزلها على اجزاء

ويارب تنزل موقف مباراه اليوم والهلال فايز

آآآمين

bar code911 · #10 07/03/2008, 04:03 PM

موهبه يامغاط
ماشاء الله تبارك الله
كل مواضيعك مميزه وواضح انك تتعب فيها
حتى تظهر بأجمل وأبهى صوره لعيون محبيك
تقبل تحياتي وان شاء الله غداً بعد المباراة نبارك لبعض ومعنا بقية الأحباب
قل آمين 0

أوه ياهلالي · #11 07/03/2008, 04:10 PM

هههههههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههههههه

كذا التهيئة النفسية ولا بلاش والله أنك وسعة صدري الله يسعدك قول آمين

ألحين أروح الملعب وأنا مرتاح وإنشاء الله نفرح الليلة بالكأس

قناص سدير20 · #12 07/03/2008, 04:32 PM

شاكر لك اخوي على الموضوع الروعة

وشرايك تروح للملعب علشان تصير لك قصص حلوه

و اكتبها بعد المباراة و انت فرحان بالفوز ان شاء الله

القناصــ 20 · #13 07/03/2008, 05:25 PM

هههههههههههههههههههههااااااااااااااااي
الله يوسع صدرك مثل ماوسعت صدرنا

الســـ الازرق ــــهم · #14 07/03/2008, 06:10 PM

ههههههههههه
والله انك نكته يامغاط
0000000
انا قاعد بالصاااله اناضر المحمول واضحك
ضحك موطبيعي وخواني يقلون وشفيك؟؟؟؟
قلنا وشقاعد تقرى وسع صدورنا معك 000

ODi _ 3ODi · #15 07/03/2008, 06:33 PM

مبدع .. وكاتب ساخر من الدرجة الرفيعه ..

وسعت صدري مثل ماوسعت صدر الكثيرين ..
نأمل منك فقط مواصلة هذا الإبداع .. وتبني الفكرة على المجتمع الرياضي بموضوع اسبوعي ساخر وتصبح كاتب في زعيمة الصحف السعودية !!
بالتوفيق ..