إخواني الأعزاء ،

السلام عليكم .

في الحقيقة يدور في ذهني موضوع لا أعرف كيف ومن أين أبدا به لأن (الطاسه ضايعه) ، وأبحث من خلاله عن (...................) ...؟؟؟؟؟؟

ربــــما ( ســــــــــــــــــــــراب ) ....... ؟؟؟؟؟؟

إذا عرفتوا وش هو علموني تكفون والسبب .......؟؟؟؟؟؟

(الطاسه ضايعه) من كثره اللي نشوفه هالأيام من الأعاجيب التي تحصل في عالم الكره عندنا ،
(الطاسه ضايعه) مما يحدث في ساحتنا الرياضيه والطريقة التي تسير بها الأمور ،
(الطاسه ضايعه) من القرارات (الارتجالية) (المتناقضة) اللي تصدر حسب الأشخاص والظرف والزمان والمكان.
(الطاسه ضايعه) من انحراف ... وإنجراف ... وإختراق ... وإحتراق ... (الإحتراف) .
(الطاسه ضايعه) لأننا فقدنا المفهوم الحقيقي للتنافس الرياضي الشريف .
(الطاسه ضايعه) من الحال والطريقة التي يفكر بها معظم جمهورنا الرياضي ، ونظرتهم للرياضه ومنافساتها.
(الطاسه ضايعه) من الطريقة التي تدار بها بعض منتديات أنديتنا الرياضية ، والحال التي أضحت عليها ؟
(الطاسه ضايعه) لأن كل واحد قام يدلي بدلوه ، وكل من يغني على ليلاه ، وكل من يحوش النار لقريصه و.. و ؟؟؟
(الطاسه ضايعه) من كثرة المنظرين والمطبلين والمزمرين والربابنه ، الذين وضعوا المصلحة العامة في آخر المهام .
(الطاسه ضايعه) لأن ....... , ......... , .......... , حطو على كيفكم ، وانظروا حولكم والله المستعان .

والخبر اللي اليوم بفلوس بكره ببلاش .

الشيء الأكيد والواضح بدون جدال إذا استمر الحال كما هو ، إن مستقبلنا الرياضي مظلم ، وأن مرحلة ما بعد كأس العالم ، ستكون بداية مرحلة السقوط الرياضي لدينا .

المهم إخواني الأعزاء سبق أن كتبت منذ زمن موضوعا أو قصة عن شخصيه (خـيــالـيـــــــــة) قريبة من الواقع ، تمتلك العديد من الصفات المتواجدة في الكثير منا ... وهي قصة المشجع الهلالي الأول ... (عاشق الهلال) أبو فهد ... ؟؟؟

http://alzaeem.com/vb/showthread.php?threadid=20292

هذا الإنسان الذي يعيش ويحيا بهلاله ... وهمومه ... وكل ما يتعلق به ... فهو هلالي حتى النخاع ... يبحث عن كل ما يتعلق بهذا الهلال ... ويتابعه ... المهم أبو فهد انقطعت أخباره ... وأنا أعرف انه إنسان صريح ... وواضح ... و(حقاني) ... و(حكيم) بعد .... كنت (أبحث عنه) ... في خاطري كلام ... أبغى أسأله ... أبي آخذ رايه ... عن بعض الأحداث الرياضية ... وتعبت وأنا أدوره ... حتى لقيته ... أيام عطلة عيد الأضحي المبارك ... أعاده الله علينا وعليكم بالخير واليمن والمسرات ... المهم مثل ما قلت لكم ... لقيت (أبو فهد) ... خارج مدينة الرياض ... حيث (الهواء العليل) ... يدور الجو الربيعي اللطيف ... والظاهر انه منحاش ... وضايق صدره ... من هاللي يصير ... في (ساحتنا الرياضية) ... وقرر انه يبتعد شوي وينسى همومه ... لكن الظاهر إنه يوم شافني ... رجعتها له ... بحديثي معه ... مشكلة (أبو فهد) ... أنه يحب الكوره ... ومتعلق فيها ... ما يقدر يتركها ... المهم في الموضوع ... انه دار بيني وبينه هذا الحوار ... وقررت أكتبه لكم عساه يعجبكم .

واليكم بعض من مقتطفات حواري مع (أبو فهـــد) ؟؟؟

.............................................................................................

السلام عليكم أخوي (أبو فهد) ... وكل عام وأنت بخير ... تصدق ياخوي ... من زمان وأنا أسأل عنك ... وأدور عليك... مالك أثر ... وكل من أسأله ... يقول ما شفته من زمان ... سلامات ياخوي ... وش عندك هجرتنا ... إنقطعت أخبارك ...عسى ماشر ... منقطع عن العالم... عسى ما غيرت هوايتك ... ونسيت الهلال والكوره بعد .

أبو فهد : وعليكم السلام ياخوي ... وكل عام وأنت بخير ... شوي شوي على ... أما مسـألة إني نسيت الهلال والكوره ... أقول ... ياليت تلقالي دواء ... ينسيني إياها وهمومها ... ياخوي إنغثيت منها... ومن هاللي يصير ... الدعوى تجاوزت الحدود .

؟؟؟ : أفا يابو فهد ... شكلك متضايق ... والأمبــــــــــييييييير عندك (ضارب) .

أبو فهد : والله ياخوي وش تبيني أقول لك ... هو فيه عندنا كوره ... وإلا (مطرسه) ... (وبربسه) و (حوسه) ... و (دوسه) ... والله الواحد ما عاد يعرف راسه من رجليه ... من هاللي يصير ... كل شيء يمشي بالمقلوب ... و(الطاسه ضايعه) وأنا أخوك.

؟؟؟ : ليش ياخوي ... وراك متشائم .

أبو فهد : ماهو تشاؤم ... لكن ياخوي ... ناظر حولك وحواليك ... وتعرف قصدي .

؟؟؟ : ما فهمت وش قصدك أخوي ، ممكن توضح لي .

أبو فهد : أنت عاجبك اللي يصير ... رياضتنا ماعاد هيب مثل أول ... ياخوي أنت ما تقرأ الجرايد ... ما تشوف كيف تدار الأمور ... الحقوق المهدرة ... الأمور تمشي بالمقلوب ... وش تبيني أقولك ... عن الإتحاد السعودي وقراراته ... أو ترشيحاته ... تبيني أتكلم عن الرياضه السعوديه ... أو المنتخب ... عن الأنديه ومشاكلها ... أو عن الهلال ... عن أبطال التصريحات ... أو أبطال الترزز والمصالح ... عن الدوري ... أو الجماهير ... عن 30 نسبة % ... أو آرثر ... عن العويران ... أو ماطر ... عن الثنيان ... أو أبو اثنين ... وش تبيني أقول ... وش أخلي .

وتوقف (أبو فهد) قليلا وأطلق زفيرا قويا بطريقه توضح حالة الملل والضجر التي هو عليها ثم تابع يقول ؟؟؟ا

أنت ما تسمع كلام الجماهير في المدرجات ... ما شفت جمهورنا ... وتعاملهم مع المنتخب... وش سووا مع لعيبة المنتخب ... في الرياض ... وجده ... والدمام ... ما تسائلت مع نفسك ... وش وصلهم لكذا ...

ثم تابع قائلا : أنت ما تابعت (المطرسه) اللي صارت في الفضائيات ... وهالنقاد اللي ما أدري من وين جونا ... بعضهم ما معه شهادة إبتدائي ... وصار ناقد ... وهات يا سلخ في المنتخب ... وفي اللاعبين والمدرب ... هذا والمنتخب يفوز ... ويجيب بطولات ... وشلون لو خسر .

أنت ما تشوف المنتديات وما تقرأ ... وش يكتبون (بعض (البزارين) فيها ... كلام الأطفال صار أشد قوه وتأثير ... من اصحاب الفكر وكبار الصحفييم والنقاد ... إذا فيه عندنا نقاد ... تكفى لا توجع قلبي ... تراني منحاش عنها ... ودي أنساها ...ولانيب قادر ... أحد يقدر يترك حبيبته .

؟؟؟ : طيب أخوي (أبو فهد) ... المنتخب وجاب كاس الخليج ... ولعيبته أكثرهم من الهلال ... ولنا الشرف في هالشيء ... ولا علينا من اللي يقولونه الحساد .

أبو فهد : المنتخب ولعيبته ... ما قصروا ... ما أقول عنهم شيء ... إلا الله يكون في عونهم ... ما خلوهم (الأجاويد) ... كل سال سيفه ... ويقطع فيهم ... مثل ما قلت لك ... هذا وهم يفوزون ... وش لون لو خسروا ... خوفتك من هاللي يبربسون في الساحة ... أما الهلال مثل ما عرفناه دايم ... (مأكول مذموم) ... الحسد وأنا أخوك مغطي على الجماعة ... والأمور تمشي بالمقلوب ... لكن يا خوي ترى (العيار اللي ما يصيب يدوش) ... وهلالنا كل يوم ينزف وتوكل حقوقه ... لكن ما عندك أحد ... ؟؟؟

؟؟؟ : وشلون يعني .

أبو فهد : وش أتكلم عنه ... ياخوي الدعوى (تخر) ... مع كل مكان ... ما قلت لك (الطاسه ضايعه) .

؟؟؟ : وضح لى شوي ياخوي لو سمحت

أبو فهد : وش تبيني أقول ... عن الهلال اللي محارب مع كل جهة ... الهلال اللي (مأكول مذموم) ... الهلال اللي محارب من القريبين قبل البعيدين ... الهلال اللي ذبحته الغيره ... الهلال (المستغل) من بعض الناس ... من هواة الطهبله واترزز ... وما وراهم فايده ... أو الهلال اللي حرموه من لعيبته ... ويعطونه إياهم بالقطاره ... أو الهلال اللي يسرقونه بعز النهار... ياخذون لاعبينه ... ويصدرون القرارات ضده ... الهلال اللي ما لقي له نصير ... لا ويسمونه بعد ... (نادي الحكومه) مثل ما يقولون ... علشان يغطون فعايلهم ... الهلال اللي هو تاج رؤوسنا كلنا ... شاء من شاء وأبى من أبى .

؟؟؟ : ولو يابو فهد ... ما قد شفتك على هالحال من قبل ... أظنك تبالغ في هالكلام ... ؟؟؟

أبو فهد : يابن الحلال ... أنا أطلع كل يوم للبر ... أبي أوسع صدري ... وأنسى همومي .

؟؟؟ : ودي أسولف معك في الكوره شوي ... وأنا مثل ما تعرف يابو فهد ... تعجبني آرائك وتحليلاتك ... عندك مانع ... حتى لو ضايقتك شوي زز؟؟؟

أبو فهد : أفا عليك ياخوي ... هو فيه عندنا غير الكوره ... نتكلم فيها ... أنت تعرفني ...مدمن كوره ... ما أقدر أستغني عنها ... حتى لو حاولت ...

؟؟؟ : ودي أسألك عن سالفة (ماطر) ... وعن الـ 30 % ... وعن آرثر ... وعن العويران ... وعن ... ؟؟؟

أبو فهد : اصبر اصبر ياخوي ... كل موضوع يبي له وقت ... وإذا بتحطها في المنتدى ... يبيلك واحد وسيع صدر يقرا لك ... والجماعه أكثرهم ماهم جديين ... ما يدرون باللي حولهم ... أو ما يهمهم ... يبون الضحك والنكت ... ولا حولك أحد ... وبعدين شوي شوي على وأنا أخوك .

؟؟؟ : لا والله يابو فهد ... فيه ناس تكتب مواضيع ... كلمة (ممتازه) قليله في حقها ..؟؟؟

أبو فهد : أنا أقول كثير منهم ... ما قلت كلهم ... والمنتدى ... له قيمته وتأثيره ... لكن الزين يضيع وسط الزحمه ؟؟؟

؟؟؟ : طيب يابو فهد ... خل نبدأ بموضوع ماطر ... وش رايك باللي صاير

أبو فهد : والله ياخوي أنا قريت تحليلك في المنتدى ... وأعجبني لكن فيه بعض الملاحظات .؟

http://alzaeem.com/vb/showthread.php?threadid=48647
؟؟؟ : خير وش الملاحظات

أبوفهد : أنا أشوف ... إن كل ما في الموضوع ... إن النصر يبي ... (يهين) اللاعب ... ويخليه يلعب (غصب عنه) ... ولا يبون يعطونه شيء ... وعلشان كذا ... أعتقد إن (ماطر) ... لاعب (إنتهى) ... ما راح يقدر يعطي ... مع انه لاعب زين ... ومستواه ممتاز ... لكنه مسكين ... لاعب (مقرود) ... ماله حظ ... لو جاه ربع حظ (زليخه).

؟؟؟ : طيب إذا إنتهى عقده ، يقولون يبي يجي للهلال ... والأمير نواف يقول ... الموضوع ما بعد إنتهى ... وننتظر نهاية عقده السنه الجايه... وبعدين لنا مع (النصر) حديث ؟؟؟

أبو فهد : كان غيره أشطر ... هذاك ياخوي لو عندك نظام واضح ... واللي خلى ماطر يوقع على سنه ... ويغير مدة وزمن العقد ... يغير النظام ... على هواه ... أنت نسيت يوم يغير النظام علشان يسجلون المهلل وأنور والغشيان ... وقالوا لتشريفنا خارجيا ... ويوم جاء الهلال بيسجل أحمد خليل ومحمد الدعيع وشلون مرمطوه ... وخلوه يدفع الفلوس مقدم ... والنصر لهالحين ... ما سدد ديونه ... حنا القوانين عندنا تصدر ... حسب الظرف والمزاج ... و(ماطر) ضحيه ... والله يكون في عونه ... لو يتعلم من درس الهريفي ... ويحمد ربه ... ويعتزل الكوره ... أصرف له ... أما الهلال ... أبعد عليه من نجوم السماء ... وعلى فكره ... نصيحه لكل ناشيء ... قبل ما يسجل في النصر ... (يحسبها صح) ... ويشوف مصير لاعبين مثل ... (الهريفي – الغشيان – فؤاد أنور – المهلل – فيكتور – بهجا ... وغيرهم ... وغيرهم .... من أيام الدنيني الله يرحمه ) ... شف يخوي (ماجد عبدالله) ... وش صار لإعتزاله ... يمكن عام 3000 ... هجري بعد ماهوب ميلادي .

؟؟؟ : والله ياخوي كلامك (قوي شوي) ودي توضح أكثر .

أبو فهد : أنت سألتني وأنا قلت رايي ... ويمكن يكون صح ... ويمكن يكون غلط ... (أنا بشر) ... يمكن أخطيء ... ويمكن أصيب ... ولكن (إختلاف الرأي لا يفسد للود قضيه) ... وش تبيني أوضح بعد ... الكتاب يقرأ من العنوان ... نجوم السماء أقرب لماطر من الهلال ... لأن الجماعه حاطينه في راسهم ... وأنت تعرف معنى هالكلام ... صارت المسأله (تحدي) ... حياة أو موت .

؟؟؟ : يعني قصدك النصر يبي يجدد له (4 سنوات) ... ويعطونه مليون وميتين ألف ... علشان ما يروح للهلال .

أبو فهد : أتحدى يعطونه ريال واحد ... أقول لك صارت (تحدي) ... ماطر لاعب (كتبت نهايته) .

؟؟؟ : وش رأيك بتصريح رئيس النصر ... عن استعداده لمساعدة الهلال ... إذا احتاج بعض لاعبيه في البطولة العربية.

أبو فهد : جبتك يا عبد المعين تعين ... لقيتك يا عبدالمعين تنعان ... هم نفعوا ناديهم هالحين ... علشان ينفعون الزعيم ... وفاقد الشيْ لا يعطيه ...إلا إذا كانت المسأله ... انه وده يكحل عيونه ... بشوفة لاعبينه ... متشرفين بلبس الشعار الأزرق ... غاديهم يعرفون طريق البطولات ... ومستحي يقولها ... وعلى كل حال ... هم الكسبانين ... خذ تصاريح ... وطهبله ... , وتصدر صفحات الجرايد والمجلات ... بسبب وبدون سبب ... أما البطولات ... بعيده عنهم ... إلا يمكن بطولات التصاريح ... ياخذون بطولة العالم فيها ... ماهوب المحليه بس .

؟؟؟ : طيب وش رايك في تنازلهم ... عن قضية آرثر ... وبعدين ... الهلال يقيل آرثر ... ويحضر ماتورانا بدلا عنه ؟؟؟

أبو فهد : ياخوي ... هذي طلع معها غبار ... كنت أظن إن الملف أكله الفار ... وأنهم يحلمون فيه لهالحين ... لكن الصراحه مثل مايقولون (إخواننا المصريين) ... (الفار لعب بعبي) ... أظن النصر كسب القضيه ... وما قهرني فيها ... إلا توقيت الإقالة ... اللي يبين النيه المبيته للهلال ... أنت ما قريت تصريح رئيس النصر ... يوم قال ... تأتيني المعلومات من داخل نادي الهلال ...؟؟؟

؟؟؟ : بس الجرايد تقول ... إن آرثر مدرب مفلس أثبت فشله ... ما يعرف يتعامل مع النهائيات ... وإن الهلال تعاقد مع ماتورانا ... لأن آرثر (مدرب عنيد) ... وإن مستوى الهلال هابط...؟؟؟

أبو فهد : هالكلام ... كثر منه ... تبيني أكذب عيوني ... وأصدق الجرايد ... الموضوع مثل ما يقولون ... كلام جرايد... والا مدرب جاء ... ودرب فريق ناقص في كاس الإتحاد ... وحقق معه أكثر نقاط ... وخسر البطوله بالبلنتيات ... وبعدين بدأ الدوري ... وجوه لعيبة المنتخب ... اللي ما تمرنوا معه ... ولعب الدوري فيهم ... وبعضهم ماله نفس يلعب ... وكل يوم يتغيرون لعيبته ... هذا مصاب ... هذا موقف ... وهذا في المنتخب ... ومع كل هذا تصدر الدوري ... بدون خسارة ... هذا ما يحتاج من يدافع عنه ... أنت نسيت وش سوا الموسم الماضي ... مع أنصاف اللاعبين (النصراويين) ... الرجال له تاريخ رياضي يتكلم عنه ... وما هو بحاجة ... المطبلين والمزمرين عندنا ... علشان يقيمونه ... ؟؟؟

وتابع أبو فهد قائلا ؟
أما عن المستوى ... وش مستواه وأنا أخوك ... الهلال خسر من الطائي ... وهم ما لقوا إلا 14 لاعب جاهزين ... من 40 لاعب مسجلين ... وبعدين الإداره تقول إن الحكم هو السبب ... والهلال متصدر الدوري ... والجرايد تشحن اللعيبه على المدرب ... ولعيبة المنتخب يلعبون ... وكأن فوق راسهم ريش ... يبون يلعبون على كيفهم ... يفكرون بكأس العالم ... وحنا صراحه ... معطين كأس العالم ... أكثر من حقه ... كننا بنجيبه ... وهو (مشاركه شرفيه) ... فقط لا غير ...؟؟؟

؟؟؟ : وشلون يعني .

أبو فهد : أنت ما تشوف كل كلمه وكلمه ... قالوا كأس العالم ... ياجماعة الخير خلوكم طبيعيين ... وواقعيين ... واتركوا (الخرط الفاضي) .

؟؟؟ لكن يابو فهد المنتخب لازم يكون مستعد علشان يشرفنا في كأس العالم .

أبو فهد : قصدك وشلون يخلون (الهلال) ... ما يستفيد من لعيبته ... أما مسألة يشرفنا ... يقولون (النصر) شرفنا ... وهو صار الأخير في بطولة الأنديه ... هذا وهم غيروا النظام ... علشان يخلي النصر ... يسرق لعيبة الأنديه الثانيه ... ولا يسدد قيمتهم ... والعذر تشريف الكره السعوديه ... مثل ما يقولون ... أما المنتخب فمجرد وصوله لكأس العالم ... يعتبر شرف ... وإذا كنا نبي نغلب فرنسا والبرازيل ... خلونا مثل (قطر) ... نجنس لاعبين ... علشان ناخذ بطولات ... ياخوي لازم نكون واقعيين ... ونتكلم بصدق .

؟؟؟ : بس يابو فهد هذا واجب وطني .

أبو فهد : عودنا على (واجب وطني) ... ياخوي (مد لحافك على قد رجليك) ... شف ياخوي الناس اللي تحلم بالكاس مثل (البرازيل والأرجنتين وفرنسا وإيطاليا وإنجلترا وألمانيا وغيرهم) ما منعوا اللاعبين من الدوري عندهم ... نجي حنا ... اللي نعرف الكوره ... وبنجيب الكاس ... ونحرم اللاعبين ... ياخوي كلها 3 مباريات ... وبعدين باي باي (كأس العالم) ... وإذا وصلنا للدور الثاني ... خير ياطير ... حنا أول ناس ناصل ... هذا ماهوب طموح .

؟؟؟ : والله يابو فهد ما أدري وش أقول ...

أبو فهد : لا تقول شيء ياخوي ... ترى هالمواضيع (ترفع الضغط) ... وشف بكره (إذا إنتهى الدوري) ... وطارت الطيور بأرزاقها ... شف عمليات ضم اللاعبين الجدد ... اللي مثل ما يقولون (برزوا بالدوري) ...والحاجة لتغيير جلد المنتخب المشارك في كأس العالم ... وش يبي يصير فيها ... وحنا جالسين وساكتين (مثل الإمعـــــات) ... راضين باللي يصير حولنا .

؟؟؟ : كنك يابو فهد بديت (تفر راسي) .

أبو فهد : إن غدا لناظره قريب ... والمويه تكذب الغطاس .

؟؟؟ : ألا على فكره ... وش أخبار مصطفايا وقضيته .

أبو فهد : أخبر أنهم مشكلين لجنه تحقق في موضوعه ، والظاهر إن (الفار) أكل الملف حقه بعد .

؟؟؟: وش فيك يابو فهد كل ما سألتك سؤال قلت الفـــار الفــــار .

أبو فهد : الظاهر أخوي أنك ما تعرف (الجراذي) الموجوده عندنا وأحجامها ، وموديلاتها بعد.

؟؟؟ : بعد الفـــار له موديلات ، والله إنك غريب ياخوي .

أبو فهد : هالأيــام لا تستغرب من شيء ... الفار حقنا ياكل الملفات ... حسب طلبنا ... اللي نبيه ياكله (ياكله) ... واللي نبيه يخليه (يخليه) ... هذا موديل 2002 ... ولو شفت فـــاره لابسه بدله ... أو تسوق سياره من آخر موديل ... لا تستغرب ... العلم تطور وأنا أخوك ... وهالحين عصر الإستنساخ ... كل شيء ممكن ؟؟؟

؟؟؟ : ايوالله الإستنساخ ... ليتهم يستنسخون من (أبو يعقوب) 11 لاعب ... ويمثلون الهلال ... علشان ترجع الجماهير للمدرجات ... وضمن لك ناخذ كاس العالم .

أبو فهد : إلا (أبو يعقوب) ... هذا إستنساخه صعب ... واللي ما لحق عليه ... ما شاف كوره ... أبو يعقوب ... لو يفحطون ليل نهار ... ما جابوا مثله ... هذا فلته زمانه ... الله يستر عليه .

؟؟؟ : إلا وش قصة (أ[و يعقوب) مع الإتحاد الأسيوي ... وليش ما لعب مع الهلال ...؟؟؟

أبو فهد : ما قلت لك ... عندنا (جراذي) تاكل الملفات ... وتنقيها على كيفها ... والا أنت شفت على دائي ... وش سوا في نهايه مباراتهم مع البحرين ... وقارنه باللي سواه يوسف الثنيان ... لا بعد وتصفيات كأس العالم للمنتخبات ... يعني كل من شافها ... وش سووا له ... لعب المباراة اللي عقبها ... وحنا ياغافل لك الله ... أحد تكلم ... أحد قال شيء ... يا خوي ( ما عندك أحد) ...؟؟؟

؟؟؟ : والله يابو فهد بديت (أحتر) و (أتضايق) مثلك والله إنك ما تنلام ... ليتني بعد أنسى الكوره وهمومها مثلك .

إخواني الأعزاء

ما بي أطول عليكم الموضوع ... لأنه مثل ما قال حبيبنا (أبو فهد) يضيق الصدر

أنتظر تعليقاتكم إخواني

والسلام عليكم .

مع تحيات أخوكم : أزرق هلالي ......؟؟؟

في الحقيقة أكثر من رائع وألومك على قلة مواضيعك .

فعلا الطاسه ضايعه ...

الأخوين العزيزين

أبو ريمان
وعبدالله الأحسائي

أشكركما على ردودكما ... والحقيقه أن الشمس لا تحجب بغربال

وأبو فهد ما ينلام ... لكن إذا إستمر الحال ... يمكن نلحقه واحد وراء الثاني ... لأن الدعوى تقهر صحيح ... والطاسة ضايعه

وتقيلوا تحياتي