كل عام وانتم بخير تقبل الله منا ومنكم ان شاء الله ...
@@@@@
طبعاً عذراً للتأخير .. واسف ان الاجابة ابيض واسود (( يعني بدون الالوان)) .. لان الحبر اللي بالمنتدى خلصه محمد أبو لما
@@@@@
هلا والله بالاستاذ / جمجمة الهلال
س1/ إلا تعتقد أن جمهور الهلال الآن أصبح أحزاب فمنهم من يشجع الثنيان وبعضهم سامي والآخر التمياط ؟ إلى ماذا تعزو هذه الحزبية.؟ وماذا ترد عليهم ؟؟
((حزبية)) لا أرى الحزبية التي تسأل عنها أو على الإقل لا يصل الأمر الى هذا الحد، اتفق معك ان من جمهور الهلال من يفضل الثنيان على سامي ويفضل نواف على الثنيان أو العكس، ولكنها تظل في الاخير وجهة نظر لا أكثر.
ولا يوجد والحمد لله من الهلاليين من يكره يوسف من أجل سامي أو العكس ، وأن وجد فهي حالة أو اثنتين والشاذ لا حكم له
..
وقبل الانتهاء من الاجابة على هذا السؤال أقول لك ( نواف وسامي ويوسف) يمتلكون شعبية جارفة .. وسجل حافل من الانجازات الفردية وعلى مستوى النادي والمنتخب ، بل ان انجازاتهم تتجاوز بالكم والنوع بطولات اندية عريقة تأسست قبل أن يولد أي منهم ، وتواجدهم في نادي واحد قد يوحي بتواجد جماهير ثنيانية فقط أو تمياطية أو جابرية ,, ولكن الحقيقة تقول أن الجميع يعشق الهلال أولاً .. وإذكرك بفهد الغشيان فرغم تعلق الجماهير الهلالية به وبموهبته منذ أن كان في ناشئ وشباب الهلال الا انه برحيله لم نسمع هلالي قال انا تركت الهلال أو بطلت تشجيع .. الهلال أولاً والبقية تأتي ..
@@@@@@@@
س2/ هل تذكر المباراة التي بعدها زاد عندك الإعجاب بسامي ؟ مباراة قديمة طبعا..
الهلال والرائد وانتهت 1-1 في كأس الاتحاد موسم 1413هـ .. المباراة هذي عالقة بذهني بسبب ان سامي كان مع المنتخب الاول اللي كان يستعد لكأس اسيا 92م .. وكان سامي من ضمن الاسماء التي ستغادر الى اليابان للمشاركة بالبطولة ... وفي يوم السفر الى طوكيو تم ابعاد سامي وضم ناصر القحطاني مهاجم الروضة !! بحجة الاصابة !!!
عاد سامي الى الهلال ولعب مباشرة مباراة الرائد وكان واضح على سامي رغبة في تقديم شئ واثبات للجماهير الهلالية ان ابعاده عن المنتخب لم يكن بسبب اصابة أو مستوى فني .. وسجل سجل سامي هدف رائع واحتفل سامي بالهدف طويلاً امام الدرجة الثانية ثم الدرجة الاولى .. بعد تلك المباراة بدأت اشعر بتعاطف كبير مع سامي بالذات .. ويوم بعد يوم تزداد الحروب ضد سامي وتزداد ابداعاته ونجوميته وانجازاته .. حتى اصبح قائد للصقور الخضر واصبح واجب على كل رياضي عاقل ان يقف احتراماً له .
@@@@@@@
س3/ في رأيك :
ماهي أفضل مباراة لعبها سامي ؟
والله كثيرة يا جمجمة !!! .. وش اختار وش اخلي.. !!!!
والله أصعب سؤال بدون مبالغة .. الحين يمر بذهن عشرات المباريات !!
عموما على مستوى المنتخب مباراة انجلترا في ملعب الصائغ ..
على مستوى النادي الهلال مباراة ضد العربي الكويتي في البطولة العربية بالرياض سجل سامي في مرمى سمير سعيد هاتريك .. وأجمل ما في المباراة أن سامي لعب في خط الهجوم لوحده بعد طرد احمد بهجا الدقيقة 10 الشوط الاول .. بعد اللقاء اذكر تصريح للشيخ خالد اليوسف الصباح قال فيه ( مواجهة خط هجوم متكامل عناصرياً أهون من مواجهة سامي الجابر لوحده ) .. المباراة هذي أهلت الهلال للدور الثاني من البطولة وفاز الهلال بكاسها وسامي بجائزة الهداف وأفضل لاعب .
أسمح لي هناك مباراة من أروع المباريات لسامي ولكن ليست ذات اهمية كانت في الدوري موسم 1412هـ ضد النصر انتهت 1-1 سجل للهلال سامي وللنصر سعود الحمالي ,, المباراة في رمضان ووقتها فعل سامي العجب في دفاع النصر ,,
وأسوء مباراة لعبها سامي ؟
مباراة ضد الطائي يتذكرها الجميع كان حظ سامي في تلك المباراة عاثر ، واضاع اكثر من ضربة جزاء !!
@@@@@@@@
س4/ في الوضع الحالي للهلال ماهي التشكيلة المثالية برأيك ؟ مع الدوليين أكيد .
بتواجد النجوم يصعب على أي مدرب ان يختار توليفة ترضي الجميع .. لكن بالنسبة لي أعتقد التشكيلة الانسب حالياً كالتالي:
الدعيع ( الله لا يخلينا )
الدفاع :
الدوخي ( اخيراً بدأ يعود الدوخي اللي نعرفه ) – شريدة ( ألعب لو هو مصاب لاني أرتاح له كثير – خليل ( افضل من سليمان من وجهة نظري) – المطيري ( مافية غيره لان النزهان مركزه الان حر .. حرام تربطه في مركز معين )
الوسط :
توليو ( مسكت ) – الغامدي ( لانه توقع تمريرة سامي في مبارة النصر في كأس المؤسس معناه لاعب ذكي يقدر يقرأ افكار سامي داخل الملعب ) – التمياط ( من غير ليه
) – سامي ( علشان اذا ضيع فرصة ينزل راسه ويشوف جزمته ويرفع ضغط الشرقي
)
الهجوم :
الجمعان ( لانه مجنون هاللاعب بس الله يهبطه قل آمين ) – أدمليسون .
طبعاً الثنيان (أكبر لاعب ) والشلهوب ( اصغر لاعب ) و العلي حسين .. راح يكونون أهم الاورق على دكة الاحتياط ..
والاهم من التشكيلة والنجوم يكون مدير الفريق (أبو محمد) فهد المصيبيح
..
س5/ لماذا مواضيعك تقتصر على المجال الرياضي ؟ فأنت ماشاء الله عليك لديك اسلوب رائع في طرح المواضيع فياليت تشاركنا بموضوع في المنتدى العام ؟
تقتصر على المجال الرياضي بسبب أهتمامي بالرياضة .. وأحياناً لا أكتب بسبب انشغالي رغم وجود احداث وقضايا تستحق الطرق .. لذا مت توفر الوقت كتبت بالرياضة فقط ولا وقت لغيرها ..
دعوتك مقبولة .. وبإذن الله قريباً تشاهد لي مشاركة بالمجلس العام بس عاد انتم لا تخلونا بمنتدى الجمهور (( صارت السالفة عزايم ))
: D
@@@@@@@@
س6/ لو كنت رئيس للهلال لمدة دقيقة ؟ وش تبي تسوي بهالدقيقة ؟؟
الحمد لله انك قلت دقيقة بس .. ولا قلت نص ساعة أو اربع عشرين ساعة .. لاني نفس اللي ابسويه بدقيقة ابسويه لو قلت اربع وعشرين ساعة ..
عموماً .. ابجلس في مكتب رئيس النادي وأقول ( 60- 59 – 58 -57 -56 - ......... 2-1) .. الين تخلص الستين ثانية وبعدين أودعهم
..
الله يهديك الحين اصحاب سمو وأمراء يستلمون أربع سنين ويطلعون ما غيروا شئ مجرد مدرب جاي مدرب رايح .. ولاعب اجنبي جاي لاعب اجنبي رايح .. ووعود لنجوم الفريق بمقدمات عقود والنتيجة (ركبة) يحبها قلبك !!! وانت جاي تعطيني دقيقة وتبي أسوي شئ !!
تدري وش خايف انا منه لو صرت رئيس لمدة دقيقة !؟
اخاف يجيب الهلال بطولة واصير وجة السعد والرئيس الذهبي !!! ويقعد الجمهور يصيح ( أرجع يأبو هيا طالبينك لا تترك النادي ) !!
@@@@@@
س7/ وش يمثل لك كلا من :
الكسر بالزلفي : والله بحيرة الكسر تذكرني ببحيرات فيكتوريا في باريس (( أمحق ثقافة )) وش جاب بحيرات فكتوريا لباريس ..
..
عموما يمكن البعض ما يعرف الكسر في الزلفي .. وانا ودي اقول هي مكان في النفود يجتمع فيها السيل وتتكون بحيرة يصل طولها الى 10 كيلو متر .. طبعاً لا أحد يروح الحين ترى ما فية شئ ما جاء مطر يسوي هالسنة ..
وعلى طاري الكسر ياجمجمة .. أذكر مرة من السنين >=== ما يمديك على ظرف الزمان هذا
.. كان الهلال يلعب مباراة مع الرائد ببريدة اعتقد موسم 1413هـ .. المهم المباراة غير متلفزة
وقررنا انا ومجموعة من الاصدقاء السفر الى بريدة لحضور المباراة .. الله يجريك صرت انا المرشد السياحي لهم (( الله يعينهم)) .. وقلت البرنامج كالتالي نمشي من الرياض مساء الخميس بحكم ان اللقاء عصر الجمعة .. و(نمرح) يعني ننام في الزلفي .. و بعد الغداء نتوجه الى بريدة .. ونحضر المباراة وحنا مريحين بدل من اننا نجي من الرياض على الملعب مباشرة (( أي والله اللي يسمعني يقول نضاو وسامي لازم نريح قبل المباراة
.. راس مالها ندق (بليلة) الين الواحد ما يقدر يتنفس وندخل الملعب )) .. المهم الشباب وافقوا على المقترح اللي قدمته .. وقالوا تم .. سهران يوم الخميس بالرياض وآخر الليل مشينا لزلفونيا طبعاً عن طريق ( interstate 9 north )
.. وصلنا ونمنا .. من الساعة تسع الصبح الشباب صحصحوا !!!! غريبة !!!! يوم جمعة ويقومون الساعة تسع !!! المهم هم طبعاً ( متمدنين ) ما يرتحون بالنومة الا بسرايرهم !! الله يخلف الظاهر يخذون السراير للبر اذا كشتوا !! ..
طبعاً .. انا قلت لهم لو اني داري اننا بنقوم من تسع كان نمنا بالرياض ومشينا من هناك !! وبحكم اني المرشد السياحي كان لازم اتصرف بسرعة علشان ما احسسهم بالملل وهم بالزلفي .. قلت شوفوا نبي نروح للكسر .. ساعتين واذا جت الساعة احدعش رجعنا للزلفي وصلنا الجمعة وتغدينا ومشينا ,,, قالوا تم ودنا نشوف الكسر اللي تطلع صورة بالجزيرة والرياض ..
رحنا الكسر .. وانا السواق .. المهم كنا نسولف ووش زيننا .. وفجأة ونحن على ضفاف الكسر .. (هلشت) السيارة .. بالعرابي غرزنا بطين !!! يا سااااتر .. تعال عاد شف الشباب انواع الانتقادات للمرشد السياحي !!!!! وينزلون وكل واحد رافع (طرف) ثوبه بيده !! كأنه يبي يقطع شارع فيه موية !!!! ما يدرون ان الدعوى طين وغراز .. اللي صار وانا اخوك جاء نشمي معه طرمبة هواء رفع السيارة وطلعها والا لو الدعوة على اللي رفعوا طرف ثيابهم كان ما لحقنا على مباراة الهلال والفريق الطاجيكي اللي قبل امس
... ورحنا للديرة بعد ما خلصت الصلاة وبدال الغداء قعدنا قدام مغسلة الملابس وعطينا (رفيق ) الملابس يخلصها مستعجل .. وغسلنا الملابس مستعجل ومشينا لبريدة ووصلنا أول ربع ساعة من المباراة وأمحق مرشد سياحي !!!
أسف على هالمشوار بس يوم قلت الكسر جددت الذكريات
كوفي عنان :
تصدق عاد انا ديني ودين السياسة والامم المتحدة وغثاها .. ولمعلوميتك انا ما عرفت كوفي عنان الا بعد ما قلده بشير غنيم في طاش ما طاش ..
وجبة بروستد :
البرستد في حياتي أهم من كوفي عنان .. واسأل أبو ناصر
المرأة :
ما راح اقول لك نصف المجتمع ... الا ثلاث ارباع المجتمع .. وأكبر النعم (الزوجة الصالحة) ،، والله يصلح ذريتك وتذكر كلامي
ددسن غمارتين :
يعتمد اذا كاش أو تقسيط ..!! حدد واعطيك الاجابة أما لو ابفصل راح اتعب ويطول الجواب .. واعتقد يكفي جواب الكسر
مكرونة اندومي :
والله ما عمري اكلتها (( يحسبها ممنوعة ))
مشهد لأفغاني يقض جدار :
!!!!!!!! ما أدري .. من وين جبت هالسؤال ؟؟
@@@@@@@@@
س8/ آية من القرآن الكريم لايمكن أن تنساها ؟
آية الكرسي ..
@@@@@@@@@
س9/ لو كنت كلا من وش تبي تسوي :
رئيس النصر
: أستمر على هبالي لانه هو سبب شهرتي وشعبيتي
..
مسئول ببلدية الزلفي :
استعجل في انهاء اعمال الصيانة اللي بطلعة (ام الذر) باسرع وقت
إمام مسجد :
اتقرب من سكان الحي واكون صداقات معهم .
مخرج بالتلفزيون :
استقيل على طول
.. الله واكبر من زين هالتلفزيون .. طبعاً اقصد التلفزيون السعودي .
سواق طيارة :
اتأكد اذا عندي رحلة لامريكا ان ما معي قرآن ولا كتاب لادعية المأثورة علشان ما يقولون ارهابي ..
تاجر عقارات :
اسأل نفسي متى ابطل نصب وكذب لعيون الـ 2.5 % ..
انا عطيتك تسع اسئلة تدري ليه ؟ قلي ليه ؟
انت بالسؤال هذا صرت معطني عشر اسئلة !!!!! يعني ما عادت تسعة يا أبو الجماجم ..
: D
@@@@@@@@@@@@@@
عاصوف .. هلا ومسهلا اخوي عاصوف .. وإليك الاجابة على استفساراتك ..
س1/ بماانك كنت مغطي تجربة سامي الإحترافية في انجلترا هل تعتقد أن سامي استفاد من هالتجربة وهل تظن أن اللاعبين السعوديين يمكن ينجحو في الإحتراف الخارجي؟
نعم سامي استفاد جداً من الاحتراف .. وفي أكثر من مناسبة لقاء وحوار تلفزيوني وصحفي سمعت وقرأت عن رأي سامي في الفوائد التي جناها من الاحتراف واجدها حقيقية وملموسة ..
نجاح اللاعب السعودي ممكن .. ولكن عدد قليل جداً .. فالاحتراف يحتاج الى عقلية متفتحة وناضجة .. واعتقد ان نواف التمياط هو اكثر اللاعب ملائمة للاحتراف بالخارج ان شاء الله ..
س2/كم عمرك ؟ وإذا كنت في الجامعة وش تخصصك؟ و وش موترك ؟
28 سنة ... في الجامعة درست الاقتصاد .. موتري فورد
س3/ في مرة من المرات قريت موضوع (للهلالي محمد) قال فيه ان (الهلالي محمد) هو يا( قاهرهم ياسامي) فهل هذا صحيح؟
الصحيح انني معجب كثيراً بكتابات الهلالي محمد وبأسلوبه المقنع .. ولكن بسبب انقطاعي فترة عن المنتديات كتب البعض ان ياقاهرهم ياسامي غير اسمه الى الهلالي محمد .. ولكن هذا غير صحيح وانا لا اكتب بغير هذا اليوزر (ياقاهرهم ياسامي) ..
س4/ما سبب قلة كتاباتك في المنتدى بالرغم أن ماتكتبه يحقق ارقام قياسية في عدد الدخول له؟
الوقت لا أكثر هو السبب .. متى ما توفر الوقت والفكرة كتبت مباشرة .. ولكن أحياناً لا اجد الوقت الكافي لإضافة أي موضوع أو رد ..
@@@@@@
m-shlhoob
شكرا لمشاعرك الطيبة ..
@@@@@@@@@@@@@@@@@@2
لي عودة مع بقية الاسئلة
و رغم شهادات كبار لاعبي الهلال ؟؟ 
الوضع المتطور
