صليفيق ومن سيربح المليون !! - نادي الهلال السعودي - شبكة الزعيم

هــاوي ســاره · #1 30/11/2007, 02:00 PM

السنامو عنيتوم

تسيفكوم؟ إن سالله تيبين

انا كاتب القصه من امس ..وناوي انزلها امس..بس يوم جلست على طاولة الكمبيوتر ..ما لقيت الكيبورد...!! دخت وأنا أدورها ..سمعت صوت هواش تحت ..نزلت عند اخواني لقيت اخوي ماخذ الكيبورد ويفلق فيها اخوي سامي....طبعا سامي هذا راسه مب رأس آدمي..رأسه كأنه حنفيّه..

يوم ضربت الكيبورد براسه طلع صوت صدى ..طن ..

والكيبورد تكسّرت ..وزر الإنتر ناشب بجبهة سامي ..قلت راحت الكيبورد

واليوم اشتريت كيبورد واول شي سويته اني نزلت الموضوع

والحين أترككم مع مصاله من مصالاتي المعتادهـ ..

صليفيق

إنسان طموح..ويعول أسرته المكوّنه من /

صعفق / ملقوف وفيه حب للفضول بشكل مب طبيعي

صفوق/ لا يهمكم اسمه..تراهـ خكري مررررررهـ

فلحاء / أختهم مبزوطه مره ..ودايما مشاكل ..تدرس آخر سنه في الثانويه..مخطوبه ومتملكه وعرسها قريب

خزنه/ أمهم ..عجوز مولّيه..

و3 بزران..الي هم / طحيمر وصويلح ومصطفى ..مصطفى هذا مسمّينه على اسم المقاول المصري الي بنى بيتهم

*************************

رجع صليفيق من الدوام..

دخل البيت ..قعد ينادي ...صفوق..صعفق

طلع له صفوق لابس برمودا وردي ..قال له / بونسوا خيّي ..شو بدّك هنيّا عم تصيّح وزعاقك عم يوجع آذاني

قال له صليفيق..

لعن أبو هالسيقان..عبد ولابس لي برمودا وردي؟؟ ومسوّي فيها لبناني بعد!!

خذ هالدونات لك وانت واخوانك ولا يكثر..شاريها لكم من الخبّاز

اجتمعوا صفوق والبزارين على الدونات..

بدت الحرب الأهليّه..الواحد ياخذ وحده من الدونات ويحط الف وحده بحضنه ..

وصفوق قاعد يسوّي لصويلح سكوكه بالشوكليت الي على الدونات..

صليفيق قعد يناظر فيهم..ويقول في نفسه..

وش هالعالم ذي!!!

سالهم؟؟

وين صعفق ؟؟ وين فلحا؟

قالوا له / صعفق بالمطبخ يركب الغاز..وفلحاء بالحوش..

دخل صليفيق المطبخ..لقى صعفق وأمّه ..صعفق قاعد يشتغل بأنبوبة الغاز..ويقول لأمه..ادعي لي يمه ..قالت أمه / الله يفتحها بوجهك يا وليدي

ول يا ذا العجيّز ما تعرف تدعي أبد

صعفق كان لاف على راسه شاشه ..سأله صليفيق..وش السالفه ؟ وش فيه راسكـ ؟؟

قال اليوم طالع من المدرسه..شفت ناس متجمعين ويصيحون..12 , 12 , 12 ..قعدت أركض ودخلت مع الزحمه لين دخلت داخل ..طلع لي واحد بعجرهـ وفلقني ..وقعدوا يضحكون ويقولون 13 , 13 , 13

ضحك صليفيق..وقال / أنت لو تخلّي لقافتك ذي ..تصير أحسن واحد..المهم..رح ترا فيه دونات عند الديناصورات..كل معهم..هذا اذا بقّوا لك شيء

طلع صليفيق للسطح يدوّر اخته..

لقى أخته جالسه وصافقتها الشمس..وماسكه بيدها دودهـ !!

انهبل.. سألها/ سلامات؟ وش تحسين فيه!!وش تبين بالدوده؟

قالت اليوم قريت الجريدهـ ..

مكتوب فيها ..

الجلوس بالشمس دقائق معدودهـ مفيد للبشره..وأنا الحين جالسه بالشمس ومعي دوده

وان شاء الله تزين بشرتي..

صليفيق قعد يحب يدهـ ويقول / الحمد لله على العقل بس..من وين تزين بشرتك انت ووجهك هذا الي كله حبوب كأنه بيتزا بالخضار..

أقول ترا فيه دونات تحت..روحي لا يخلصونها عنكـ ..

سألته..دونات!!

وشي ذي؟؟

فرقه غربيّه؟

قال صليفيق/ اقول لا يكثر..أنا المخدّه مرسله لي كول مي..بطس أرقد.. وصحّيني اذا جا ( من سيربح المليون )ونزل عشان ينام...

*************************

صحى صليفيق من النوم.. لقى الوقت متأخر..والبرنامج بادي له ربع ساعه..

ارتفع ضغطه وراح لغرفة أخته..فتح الباب عليها

كانت نايمه على بطنها ورافعه رجولها فوق ولابسه ثوب أحمر وعليه رسمات فراشات بأخضر وطالع من تحته سروال خط البلدهـ لونه برتقالي ومخطط بأصفر..

وحاطّه السبيكر وتسولف مع خطيبها ..

خطيبها يسألها..

فلّوحتي..فديتك وش لابسه ؟؟

قالت له / لابسة فروهـ ..

انا بنت أبوي ..وش دخلك وش اانا لابسه؟؟

قال لها من جد قليبي وش لابسه ..وش فيك معصبه..أنا خطيبكـ ..خلي عندك شويّة رومنسيه

استحت البنت وقالت :لابسه برمودا أبيض ..وبدي أحمر عليه رسمات قلوب ..

التفتت شافت أخوها..قفلت الجوال بسرعه..

صاح عليها اخوها..ليه ما صحّيتيني للبرنامج؟؟ جالسه تسولفين مع الكمخه أبو ضروس!!

مدري وش معجبك فيه..!!الحين ورا ما تقولين له يصلّح ضروسه!!

ردت فلحاء/هو يبي يروح للمستشفى عشان يركّب تقويم

صليفيق/ تقويم!!!ما يقدرون يركّبون له تقويم..إذا بيركبون تقويم بيحطون له جنط ولا شبك !!طسي سوّي لي شاهي يالله!!

وراح يركض للغرفه عشان يتابع البرنامج..

جلس مقابل التلفزيون..وقعد يتابع..

دخل عليه صعفق وقال له ..مبروووووووووووووكـ

ألف مبروك يا اخوي

صليفيق/ ا لله يبارك فيك ..بس وش السـالفه؟؟

صعفق/ ما قريت الايميل؟؟ انا مرسل لك ايميل ..

صليفيق/ ايميل؟ لا ما قريته..وش فيه؟

صعفق/ ما راح اقول لك ..رح افتح الايميل وشف ..

صليفيق راح وفتح ايميله لقى رساله من اخوهـ كاتب فيها / مبروووووووووك ترا قبلوك وراح تشارك في من سيربح المليون..حبيت أبارك لك ..واذا ما وصلك ايميلي هذا ..دق علي جوال

انهبل صليفيق..طار من الفرحه ..

راح يركض ويصيح في البيت ...راح اشارك في البرنامج..هيه ..هيه..أخيرا راح أشوف قرداح جورجي..هيه ..هيه

جاهـ صعفق وقال لا أوصّيك..لا تنسانا من الجائزة اذا فزت فيها

قال له صليفيق/ أنت بس خل عنك اللقافه ..اعقل ولا تدخّل بالي ما لك دخل فيه ..وأعطيك نص مليون

قال صعفق / طيب والنص الثاني لمين

قال اقول لك لا تتدخل وقصم انك كمخه

*************************

سافر صليفيق عشان يحضر البرنامج..

ويوم دخل على جورج قرداحي وهو يبوس كتفه انهبل من زود الفرحه يحسبه الملك..

قال له جورج..حياك الله معانا ..وش اسمكـ اخوي؟

قال / أنا أول حرف من اسمي صليفيق

:

التفت جورج للجمهور وقال لهم / اضحكوا..تكفون اضحكوا ..والتفت لـصليفيق..مسوّي تنكت أنت وجهك ..جاوب ولا يكثر

بدت الأسئله ..

جاوب صليفيق على الأسئله حتى وصل سؤال الـ 250 ألف..

السؤال يقول / لماذا سمّيت قناة السويس بهذا الإسم؟

احتار صليفيق ..قال له جورج..لسّه باقي لك الاتصال بصديق ..اتصل بأي أحد يمكن يفيدكـ ..

قعد يفكّر..قال ما لي إلا أخوي صفوق..إن شاء الله يفيدني..

صليفيق دق دقه وسكر متعود على التطفيرهـ ..

دق مره ثانيه ورد عليه صفوق..

صليفيق/ الو ..ألو ..الصوت واضح؟

صفوق/ ايه ..الصوت يهبّل

صليفيق / بسرعه وأنا اخوك ما فيه وقت ..انا في المسابقه الحين ..واذا جاوبت آخذ 250000 ..السؤال هو / لماذا سمّيت قناة السويس بهذا الإسم؟

صفوق / اممممم ..يمكن لأن السفن اذا جت عندها تمشي بسويس بسويس

صليفيق/ الشرهه على الي يدق عليك أنت ووجهكـ ..

طلع صليفيق من البرنامج

صح انه ما فاز..لكنه كان فرحان مررررررهـ ..لأنه حقق حلمه أخيرا ..وشارك في البرنامج..

بقلمي / هـاوي ســارهـ

ما يستفاد من القصه

اللقافه شينه واسألوا فلقة صعفق

اذا كنت عبد لا تلبس برمودا وردي

لا تخلّي أمك تدعي لك وأنت تركّب الغاز

بلد الوليد · #2 30/11/2007, 02:09 PM

هههههههههههههههههههههههههههههههههههههههه
ماشاء الله عندك موهبة والله

انا ما موتني ضحك الله بسويس بسويس يلعن شكله خبل صفوق

والله الاسم ما ركب ابد ابد

تدري عاد من بديت اقرا الموضوع وانا احسبك تقصد شاعر المليون والله

بعدين حرام عليك تذكرنا بالهلالي ابو ساره

اخيرا ,, الله فله

خليفة سامي · #3 30/11/2007, 05:03 PM

يعطيك العافيه على الموضوع الحلو واللله انك منسم ...اهم شي صعفق مهب قصمنجي ابد

القيصر رهيب · #4 30/11/2007, 05:14 PM

ههههههههه

أضحكتاني والله

:

أجل تمشي السفن بسويس بسويس

باسكن روبنز · #5 30/11/2007, 05:18 PM

هههههههههههه

خطييييييييييييييييير

والله جد ضحكت من قلب

SA.99.MI · #6 30/11/2007, 05:24 PM

إبدااااع

قصم أنك موهووووب

إقتباس


	انا كاتب القصه من امس ..وناوي انزلها امس..بس يوم جلست على طاولة الكمبيوتر ..ما لقيت الكيبورد...!! دخت وأنا أدورها ..سمعت صوت هواش تحت ..نزلت عند اخواني لقيت اخوي ماخذ الكيبورد ويفلق فيها اخوي سامي....طبعا سامي هذا راسه مب رأس آدمي..رأسه كأنه حنفيّه.. يوم ضربت الكيبورد براسه طلع صوت صدى ..طن .. والكيبورد تكسّرت ..وزر الإنتر ناشب بجبهة سامي ..قلت راحت الكيبورد واليوم اشتريت كيبورد واول شي سويته اني نزلت الموضوع

حبيت أسأل هذا صدز صار ولا تبع القصة :>

إقتباس


	...اهم شي صعفق مهب قصمنجي ابد<!-- / message --><!-- sig -->

وش قصدك ؟؟

"هلاليه أنا " · #7 30/11/2007, 06:08 PM

هههههههههههههههههههههههههه

بصراحه قصه روعه

ما شاء الله عليك موهووب

ملـــــ الهلال ــــك · #8 30/11/2007, 06:33 PM

والله كلهممسوسين < أتحداك تقرها ..

أموت ع الوردي وأنا أخيكـ .

أحسبها شاعر المليون .؟

م-ص-س · #9 30/11/2007, 07:18 PM

هههههههههههههههههههههههههههههههه
اخوه صفوق مهوووووي

يعطيك الف عافيه
ينتظرك مستقبل بكتابة القصة القصيرة

هــاوي ســاره · #10 30/11/2007, 08:15 PM

إقتباس


	هههههههههههههههههههههههههههههههههههههههه ماشاء الله عندك موهبة والله انا ما موتني ضحك الله بسويس بسويس يلعن شكله خبل صفوق والله الاسم ما ركب ابد ابد تدري عاد من بديت اقرا الموضوع وانا احسبك تقصد شاعر المليون والله بعدين حرام عليك تذكرنا بالهلالي ابو ساره

هلا وغلا فيك اخوي

صفوق ماخوذ من المصدر صفق يصفق صفقا

تسلم على مروركـ

لاعدمناكـ يالغالي

ولدالسلطانيه · #11 30/11/2007, 08:25 PM

ههههههههههههههههههههههه
مشكوررررررررررررررررر
وماقصرررررررررررررررت

هــاوي ســاره · #12 01/12/2007, 11:32 PM

يعطيكم العافيه حبايبي

مشكورين وما قصرتوا