متى كانت اخر ( طقه ) تعرضت لها من امك او ابوك - نادي الهلال السعودي - شبكة الزعيم

الـمـشـاغـب · #11 31/10/2007, 04:35 AM

هلا والله أبو طلال

ياخوي وراك ما علقت على ردي في موضوعك السابق .. ترى عدلت ردي وطولته عشانك وجع

أنا آخر علقة أكلتها من أبوي الله يحفظه ويطول عمره ويرزقني بره ..

كانت بداية دخولي الجامعة ... كان أبوي بالشرقية ورحنا له في بيت عمي ..

المهم أذن المغرب ونزل هو يصلي وقال لنا قبل يطلع انزلوا صلوا .. وحنا تأخرنا شوي لين جات الإقامة..

المهم .. نزلنا صلينا المغرب بالمسجد وطلعت أنا أول واحد عشان ألحق على المسلسل الله لا يذكره بالخير ..!!

رجع ابوي والعيال .. وشافني مسنتر قدام التلفزيون .. وحسبني ما صليت .. قلت له والله صليت .. قال كذاب ما شفتك..

قلت وربي أني مصلي واسأل العيال .. قالوا العيال اي والله صلى .. قال طيب ليه ما شفتك بالمسجد؟

قلت أصلي لربي مو لك عشان تشوفني ... قلتها والله ما أقصد أقل أدبي بس مدري وشلون طلعت

ما دريت إلا والله بذاك الكف خلاني أشوف الدنيا ظلمى وتولع شرار

وسحبت نفسي مبرطم أبطلع من البيت علبالي أنه بيراضيني

.. إلا وبيالة الشاهي في ظهري والعيال يهدون فيه

وعلى طوووووووووول أنحااااااااش

الوالد دايم يصدقني ولو كذبت عليه يمشيها .. بس مدري هذاك اليوم كان معصب والظاهر ما لقى يحط حرته إلا فيني

المهم ما رجعت إلا الساعة 10 بالليل بغيت أروح الجامعة بس ما رضيت أروح وأخلي أبوي وهو مسافر بكرة

رجعت مع اني ما كنت أرد على اتصاله .. وقعدت وجاني هو وعمي يراضوني والعبرة أذكرها ما قدرت أمسكها

باسني أبوي وهو يعتذر كني ورع صغير وقمت حبيت على راسه ...!! وانتهى الفيلم الهندي على خير

بس من جد ما أنسى هالموقف أبد ... مع أنه أليم بس والله يمووون الوالد الله يطول لي بعمره