اخواني اعضاء شبكة الزعيم الكرام


السلام عليكم ورحمة الله وبركاتة


كيف حالكم شخباركم



اخواني الظاهر اكثر الاعضاء شافو البرنامج (( عطفاً على السؤال )) على القناة الاخبارية السعوديه يوم الجمعة اللي فات

كانو يتكلمون عن التوظيف وماذا تريد من الاجمتاع <<----- عاد والله اني نسيت الاجتماع حق ايش

بس الوكاد انه حق توظيف الشباب

طبعأ من بداية البرنامج الى نهايته وانا احاول اتصل عليهم يطلع يا مشغوول يا مايردون

والظاهر ان اللي يكلمونهم من نفس الاستديو ( والله اعلم )

على العموم ماجتني فرصه افضفض عن طريق هذا البرنامج

فقلت افضفض هنا


اخواني في البرنامج تكلمو عن مكتب العمل

واللي قهرني كثير انهم يقولون مكتب العمل مايقصرون


ياناس والله مكتب العمل كأنه زي حماية المستهلك وربي نايمين

والا تدرون عن شغله

والله مره في مكتب العمل اللي بالرياض رحت لاربع شركات في يوم واحد

عاد تعرفون انتم زحمة الرياض
وكل شركه اروحلها يرجعوني يقولون مافيه وظايف

والقهر ايش انك تتوظف عن طريق مكتب العمل وتصبر على الذل اللي يجيك من الهندي والا الفلبيني والا المصري والا الاردني ..... الخ

وفي اخر شي اذا بغيت تشتكيهم ( اللي هم الشركة ) على مكتب العمل راح تتمرمط اقل شي 6 شهور لين يحلون مشكلتك

يعني مكتب العمل ماعندك احد من وزيرهم الى القهوجي حقهم

انا لي سبع سنين مجربهم

نرجع للوظايف الحكوميه


اولا كم عدد سكان المملكة ؟؟؟


انا اللي سمعته ان عدد سكان المملكة وصل 21 مليون ( ماشاء الله )

طيب تعالو نحسب

لنفرض مثلاً ان النساء يصل عددهم 8 مليون ( لا تحسبوني نسيت وظايفهن لا برجع لهن بعد شوي )

كم بقي من سكان المملكه ؟

13 مليون

طيب خلونا نقول ان عدد طلاب المملكة من صف اول ابتدائي الى الثالث ثانوي يقدر عددهم 5 مليون


كم بقي من سكان المملكة ؟

8 مليون

طيب خلونا نقول ان عدد الاطفال الرضع الى سن السادسه يقدر عددهم 1 مليون

كم بقي من سكان المملكة ؟

7 مليون ( طولتها صح ؟)

(طبعاً المتقاعدين خارج الحسابات )


بالعقل ياناس 7 مليون ماتكفيهم وزارات وجميع القطاعات الحكوميه من مدنية وعسكريه ؟؟


يعني هناك فيه مشكلة

كيف نحل هذي المشكلة

انا اشتغلت فتره في بنك في احدى الاكتتابات لمده 15 يوم

كانت تجينا استمارات الاكتتاب واحنا ندخلها لجهاز الحاسب الالي

طبعاً جميع البنوك مربووطه مع الاحوال المدنيه

اول ماندخل رقم السجل المدني يطلع لنا بينات صاحب هذا السجل

طيب هذا اكتتب قبل في شركه ج ( مثلاً ) وعدد افراد اسرته 3

زوج وحده من بناته

طبعا الزوج سجلت البنت معاه في دفتر العائله

ولما طرح سهم شركة م للأكتتاب اكتتب الاب عن طريق جهاز الصراف الالي

ولما اتى الزوج ليكتتب لها يرفض الجهاز بحجه ان هذا السجل مكتتب مسبقأ


بتقولون ليش انا كتبت هالسالفه كلها

اقولكم ليش


اولا لما نربط جميع الدوائر الحكوميه مع الاحوال المدنيه حتى المدارس تربط مع الاحوال

راح نعرف كم فيه موظف وكم فيه طالب وكم فيه عاطل وكل هذي بضغطة زر واحده من الاحوال المدنيه

بدال مايعينون ناس يدورون على بيوت الناس ويقولون لهم كم عدد عيالكم

ياناس ترى العلم تطور واحنا للحين مكانك راوح

دولتنا تعتبر من اغنى الدول في العالم وللحين احنا بورقه وقلم

صدقوني اذا طبق هذا النظام راح يكتشفون الاعيب كثيره ووظائف المعينون عليها وهميين لحساب شخص ما (والله اعلم)



---------------------------------------------

اما بالنسبه للنصف الثاني

حبايبنا

بناتنا

امهاتنا , خواتنا , زوجاتنا , بناتنا


الكل يعرف حديث الرسول صلى الله عليه وسلم


( لا يخلو رجل بأمراة الا كان الشيطان ثالثهما )


واحنا دولة اسلاميه معروفه

واحنا واجهه الاسلام لدى الغرب

واحنا قدوه المسلمين


ونرى الاختلاط لدينا بكثره


دولتنا مو ناقصها شي


انا اقترح ( وان شاء الله كلامي هذا يقراه واحد واصل مع اني ما اتوقع )

تفتح مستشفيات حكوميه نسائية , والمستشفيات السابقة تكون رجاليه بالكامل

الطاقم كامل نسائي

من دكتورات من ممرضات من إداريات من حارسات

من مميزات هذا الاقتراح

1. اقبال اكثر الفتيات على العمل الطبي اكثر بكثير من السابق لحكم عدم الاختلاط

2. عدم اختلاط نسائنا في المستشفيات

3. فتح فرص توظيف كثيره للنساء سواء في مجال الحراسه او مجال الطب والتمريض او مجال الاداره


الاقتراح الثاني انشاء مجمعات نسائيه

وتقوم الدولة بتأجير هذه المحلات على تاجرات سعوديات

اولا تستفيد الدولة بالمدخول المادي من تأجير هذه المحلات

فتح فرص عمل للفتيات كبائعات في هذا المجمع وكذلك كحارسات في هذا المجمع

الفائده الاولى والاخيره من هذين الاقتراحين عدم اختلاط الرجال بالنساء


ان شاء الله اني اكون قد وفيت وكفيت في هذا الموضوع

واللي عنده اي اعتراض على موضوعي يرد علي ويناقشني


انا لا اريد الشكر انا اريد الدعاء لي بالتوظيف

الله يوفقكم جميعاُ

والله مااكلها الا الشعب السعودي اللي ماعنده واسطه



الحال من بعضه والله يكون في عوننا

الله يوفققك ويوظفك ويزوجك واللي تبي

وفكرتك روعه والله لو يفتحوون مستشفيات للنساء مستقل افضل والله تعبنا <<<<متعقده من مواعيدها

مشكور أحس إنك منقههر

يعطيك العافيه على الموضوع

و اللي تدعي الله يرزق الجميع إن شاء الله

كلامك سليــــــــــــــــــم
فعلا شبابنا يرحمون من تخرجين من 5_7 سنوات وملاقين وضايف زي الناس الى متى؟؟؟

ذا باست والله انك صادز

وش ذا القهررررررر

إقتباس الرسالة الأصلية كتبت بواسطة the bast وعليكم السلام ورحمة الله وبركاته ...! والله شبح الخريجين هو الوظايف ..! الله يعيننا ويعينهم ..

كلام سليم يالغالي

بس تبيني احلف لك ان اللي معاه الكفائة او الابتدائية فرص العمل بالنسبه له كبيرة ومتوفره

اكثر اللي اعرفهم انا متعنيين في وظائف حكوميه ( مدنية او عسكريه ) بشهاده سادس او الكفائة

واما حقين الثانويه او الدبلوم ( حلاتي ) او الجامعة على قولة المثل

انطر يا ...... لين يجيك الربيع

حتى الواحد اذا كان عنده طموح وهو صغير انا انصحه انه اذا انتهى من الكفائة يروح يدور وظيفة بلا طموح بلا خرابيط

اخي the bast شكراً على مرورك

--------------------------------

اخواني

ياقاهرهم ياهلال & دلوعة الامارات & بنت فهد & راكان _20_ & سفير الزعامة & بنت عبدالله

شكراً لكم على المرور

انا لي 4 سنوات ابحث عن عمل دخت ما عندي واسطة العسكرية يقولون مو طويل والشركات دوختني مافيه فايدة اخر مرة رحت مكتب العمل قبل سنة

كنت مقدم بشركة وقالولي الشركة رح مكتب العمل رحت مكتب العمل قالي انت مقدم قبل سنتين....؟؟؟؟؟؟عطيتة الاوراق قالي راح نسحب طلب التقديم اللي اللي موجود عندنا بعتبار انك حصلت على وظيفة قلت ماشي والشركه اللي خلصت معها الأجراات قالو على أتصال والا اليوم لا حس ولا خبر اللي عنده وااااااسطة هو الي مرتاااح وعايش.......؟؟؟؟

يعطيك العافيه على الموضوع الرائع

هلالي البجاديه ....... موضوعك غصب الواحد يشكرك عليه حتى وانت طالب مااحد يشكرك ...

وربي يوفقك وان شالله نلقى لك موضوع بااقرب وقت انك توظفت وظيفه مرموقه ومريحه وقريبه من بيتك

نقاطتك واقتراحات جميله وسهله .... وانصحك واصل البحث ترى الفرص مازالت موجوده رغم القله

المشـكلهـ هذي يعاني منها اكـثر الشبابـ .

مشكلهـ واللهـ .

حنا عندنا الواسطـات استولتـ ع ـلى كل شي .

الح ـين حتى الهندي ماتلقاهـ الا بواسطهـ < ^_^

اللهـ يخ ـلف ع ـلينا بس .

هـلالي البجاديهـ .

قل أمين .

اللهـ يوظفكـ ويوظف كل من يبـي وظيفهـ وانا مع ـكم ^_^

اللهـ يع ـطيكـ الف عافيهـ

لاهنت


هلاليهـ