نادي الهلال السعودي - شبكة الزعيم - الموقع الرسمي - توست بأنواع كثيرة . . هدية لإخواني المغتربين بالخارج . .برمضان

بسم الله الرحمن الرحيم . .

حيث إنني قريبا بإذن الله سأكون في عداد المبتعثين حبيت أني أساعدكم في الأكل هناك وأنا أعلم إنكم في معاناة الله يعينكم كلها خمس أو 6 سنوات وترجعون إن شاء الله وتتزوجون وتستقرون وتصيرون من احسن الناس . . والله الله بالصلاة ومخافة الله لا اوصيكم كن مع الله يكن معك . .

(((((((توست بالتونة))))) . .

بصل وطماط مقطعاة صغير صغير (هنود) ومعها شوية بهارات أحمسها مع زيت طبعا لين يتغير لون البصل للأصفر أو خلها شوي عقبها حط التونة وخلها قطع صغيرة . . وأحمس دعواك بعدها جب فلفل حار قطع صغيرة وأحمسها معه وقلب فيها شوي لين تحس أنها خلاص . .

جب التوست وحط فيه شوية ما يونيز وأسكب الخلطة وسكرها وحمها بآلة التوست (شوي)بس لا تخليها تطول للي عنده آلة وكلها وأحمد ربك (ولاتنسى تسمي )

(((((((( توست بالجبن والبيض ))))))))

سولك بيض مسلوق بحسب حاجتك مع موية وملح طبعا معروف البيض المسلوق بعد ما تستوي قشرها وقطع البيضة شرايح جب الجبنة المعروفة الشرايح اللي تنحط مع الهامبرجر مربعات وحطها بشريحة التوست حبة وحدة من الجبن وحط عليها البيض المقشر سكرها وخلها بالتوست لين مرة تزين طلعها وأستمتع ( ولا تنسى تسمي ) ويفضل معها عصير برتقال ولا توت ولا شاهي للخرمانين . .

(((((((توست بالبيض والجبنة المالحة )))))))

يا اخوان هذي أكله حلوة جب لك بيض مسلوق زي ما قلنا بحسب الحاجة وإذا أستوت قشرها وقطعها شرايح وجب حقت التوست وادهنها بالجبنة وكثر شوي وحط فوقها البيض المسلوق وحط فوق البيض المسلوق خيار إذا كنت تبيه إختياري يعني (ولا تحطها بالآلة ) أضبطها بس عشان ما تتسايح وكلها ولا تنسى تسمي بس ! . .

(((((( توست بالبطاطس والحمسة :upset:))))))

جب لك بطاطس مقلي دواوير بس خله عريض إذا قطعته و أقليه بالزيت وبعد ما ينتهي صفيه من الزيت وخله على جنب وجب بصل وطماط وفلفل حار وبهارات وأحمسهن وخلهن قطع صغار وبعد ما تخلص الحمسة جب مايونيز وأدهن فيه التوست وحط عليه شوي من الحمسة وفوقها بطاطس وسكرها وحمها بالآلة . . وهذي قليل اللي يحبذها بس للتغيير . .

(((((توست باللبنة والورقيات )))))

جب لك لبنة وخس وجبن شرايح . .وخليهن على جنب دخل الخبز التوست في آلة التحميص او بمعنى أصح خلهن في آلة التوست الخبزتين بدونما يكون فيه شيء وخله لك وقت شوي لين يحمر الخبز وعقبها طلعه أمسك شريحة الخبز (وأملطها باللبنة وحط فوقها الخس وعقبها جبن الشرايح وأستمتع بس بشرط الخس يكون سخيف وصغير عشان ما يخرب الطعم . .والأكلة هاذي مع الشاهي والقهوة حلو بالمرة . .ولاتنسى تسمي . .

عالعموم فيه انواع من التوست معروفة مثل توست بالجبن والبيض أي واحد يسويهن .. وفيه أشياء صعبة بتكلف عليك المقادير فيها . .

ويعلم الله سبحانه وتعالى أنهن من صنعي أنا وانا اللي اعرفهن يعني ما علمني عليهن احد أبد . .

والحمد لله على النعمة أولا وآخرا واللي يمر على هالموضوع يدعيلي وجزاه الله ألف خير . .