1- متى اشتريت أول جهاز حاسب آلي ؟
والله مشكلتي ذاكرتي ضعيفة ..
لكن اذكر انه كان برمضان شريته قبل الفطور ، ومن بعد الفطور لين اذن الفجر .. وانا عليه استغفر الله بس
يمكن هالكلام قبل 5 سنوات أو 4 .. اذكر اني جبت شهادتي و وشافها الوالد ، قال آمر وانا أطامر ..
2- متى كانت بداياتك على النت وكيف ؟
بدايتي في عالم العنترنت .. قبل يمكن 7 سنوات
اخبر أول ما اكتشفوا النت في السعودية ، وهو عندي .. حتى الظاهر انا اللي مكتشفه بالصدفة ..
أما كيف !! .. والله ما اذكر زين ،
بس تعرف أول ما طلع النت ، كان في صجة وضجة عنه ..
ومن زود اللقافة ، اشتركت العائلة الكريمة بالـ نت ..
3- ماهي المواقع المفضلة لك غير الزعيم ؟
غير الزعيم .. اكيد موقع الجامعة < كثرلي منها ..
لا شف .. عندك موقع سامي الجابر
وصراحة ما في شي يحمسني على دخول النت ، إلا الزعيم .. يؤبرني هيك موقع ..
4- ماهي الخدمة المتوفرة لديك .. ديل أب , دي إس إل , فضائي ؟ ومتى توفرت لديك ؟
DSL .. وتوفرت تقريباً قبل 6 شهور ،
داري إني قديم ، بس سالفتها سالفة ..
لا تحسبون انها تأخير من الاتصالات ، لا بالعكس بسرعة .. لكن سالفة ثانية بعدين اقولكم
5- كم معدل دخولك على النت يومياً ؟
من يوم ما ركبت الـDSL .. والنت والماسنجر مفتوحين 24 ساعة ، يعني سواء كنت بالبيت او برا البيت ..
لكن معدل دخولي على النت .. يعني يعتمد على حسب
مثلاً بالاجازات .. احياناً اسهر عليه لحدود الـ 5 ساعات المتواصلة ،
اما الأيام العادية .. يمكن ادخل ساعتين الى ثلاث ساعات يومياً ، واحياناً اكثر من ذلك ..
يعني مافي وقت معيّن .. على حسب اليوم
6- موقف ظريف .. حصل لك من خلال الانترنت ؟
اخيراً ..
هالسؤال هذا .. دايم اشوفه في مقابلات الانترنت ،
وانا انتظر احد يسألني هالسؤال ..
بس مع ذلك .. تصدقون ما عندي اجابة
لأن الذاكرة ضعيفة ، يمكن مرت مواقف مضحكة لكن سرعان ما تتبخر من ذاكرتي الـ بطلة ..
لكن اذكر من أول .. تخبرون ايام الطفولة
لما كنت فرحان انه عندي انترنت وماسنجر ..
كان حلمي .. كيف اسرق ايميل ، ابي اسوي قوي واسرق ايميلات خلق الله ، ..
وأي واحد ينفخ علي .. ودي اقوم اسرق ايميله عشان مرة ثانية يعرف مين يكلم ..
بديت أبحث عن مواضيع سرقة الإيميل ، ..
كان فيه مواضيع لكن تحتاج لشخص متمكن في الانترنت ، وشخص له خبرة في هذا العالم ..
مالكم بالطويلة .. الزبدة اني عرفت كيف اسرق الايميل بس بطريقة بسيطة وسهلة ، وتحتاج ان خصمك يكون " دلخ " ..
وجربتها ، وقدرت اسرق يمكن 6 ايميلات ..
لكن تبون الصراحة يستاهلون ، ..
عاد خلاص بعدين كبر راسي ، وخروا عني ..
أنا أقوى واحد ، واللي بيسوي قوي باسرق ايميله ..
المهم جا ذاك اليوم .. اللي قمت اهايط على واحد وقلت له خلك عاقل ولا ترى سرقت ايميلك بكل بساطة ..
شوي والا الاخ الحبيب يقولي :
يا خوي تراك أقلقتنا .. مسوي الحين بطل ؟
ياخي مب هذا رقمك السري ******* ؟
انا وجهي صار كذا
و كذا
..
طبعاً حاولت اسوي عاقل ، وقلت له خلاص والله ما اتعودها والوجه من الوجه ابيض تكفى ، لكن الرجال كان يبي يعطيني درس ، وسرق ايميلي بكل بساطة .. وقالي بالنهاية : خلاص ترى غيرت رقمك السري الحين ، ودّع ايميلك وفمان الله ..
لكن الحمد لله قدرت استرجع الايميل ..
راسلت إدارة هوتميل .. والحمد لله مشت الأمور تمام
بس من بعدها .. وانا حالي بحال نفسي
..
lll.lll أسئلة بخصوص المنتدى lll.lll
1- كيف عرفت موقع الزعيم ؟ وكيف بدأت فيه ؟ وما الذي شدك إليه ؟
كنت اسمع فيه ، مااذكر مين دلّني عليه ..
يمكن قريت عنه بإحدى الجرائد ، أو شخص قالي عنه ..مااذكر بالضبط
بدأت في قبل 6 سنوات من الآن ..
طبعاً شدني للشبكة .. كـ متابع هلالي
كنت حريص على اني ادخل المنتدى واشوف آخر الأخبار واشارك الاعضاء بآرائي وفلسفتي الخاصة ..
والشبكة تعتبر منبر لكل الهلاليين .. هذا اللي شدني بصراحة ..
2- متى أصبحت مشرفاً لللمنتدى ؟ وهل توليت منصباً غير هذا من قبل ؟
صرت مشرف .. يمكن قبل 3 سنوات ..
كنت قبلها ، عضو في اللجنة الإعلامية بالشبكة واستمريت لمدة عام .. بعدين صرت مشرف ..
كنت في منتدى الكابتن يوسف الثنيان قبل ما اجي الشبكة ،
كنت عضو في اللجنة الاعلامية وبعدين مشرف اللجنة .. وبعدين مشرف الرياضة العالمية ، لكن ما استمريت معهم ..
وجتني دعوة من هلالي الجوف ( الله يذكره بالخير ) اللي وقتها كان مشرف في العالمية ..
و دعاني للانضمام للجنة الإعلامية بالشبكة ، واستمريت تقريباً سنة ونص وبعدين صرت مشرف ..
وأشرفت في منتدى رياضي آخر لفترة بسيطة ..
3- أنت كمشرف لمنتدى الرياضة العربية والعالمية , هل تجد صعوبات في تنفيذ مهامك كمشرف ؟
لا الحمد لله لا اجد صعوبات ..
الآن أغلبية الاعضاء ملتزمين بالقوانين واصبحوا أكثر وعياً ولله الحمد ..
ولا أخفيك .. بأني احياناً اجد بعض الصعوبات في متابعة الروابط ، والمخالفات الموجودة هناك ..
لكن الحمد لله .. ما يقصرون معي الاخوان
اللي يبلّغ عن مشاركة سيئة ، واللي يرسل رسالة خاصة ..
يعني الحمد لله في تعاون من الجميع ،
بالإضافة لتعاون المشرفين معي على القسم ..
4- هل أنت كمشرف تقرأ كل رد في المنتدى الخاص بك من أجل تعديل المشاركة أو حذفه أو تثبيته ؟
اكون معك صريح .. لا ما اقرأ كل رد في منتدى العالمية
وهذا شي أقرب للمستحيل .. بأني اقرا جميع الردود يومياً !!
ما شاء الله يعني عندك قسم الروابط .. صعب جداً تراقب كل الردود ..
لكن نحن كـ مشرفين نكمّل بعض ، يعني احياناً انا اراقب جزء والاخوان يراقبون جزء آخر .. وهكذا
واحياناً اذا كنت فاضي مرة ، اراقب كل ردود قسم العالمية دون الروابط ..
وانا احاول بقدر المستطاع اراقب الردود اللي اقدر عليها ..
واحاول ادخل بعض المواضيع اللي يكون فيها نقاش جامد ، لان مثل هذي المواضيع ربما تشاهد فيها بعض المخالفات التي تستدعي تدخل المشرف ..
وايضاً بعض المواضيع اللي تكون بعد مباراة مثيرة جداً ،
ايضاً تحتاج للمراقبة ..
5 - بدأت اللجنة الإستشارية منذ وقت قصير , كيف رأيت فكرة إنشائها ؟
فكرة أكثر أكثر من رائعة ..
كلمة حق تقال .. الاخوان جميعهم في الجنة الاستشارية
ما قصروا أبداً ، ولا زالوا يقدمون جهد يشكرون عليه ..
والفكرة لها مردود إيجابي واضح ..
كثير من الأمور نتشاور فيها مع بعض من أجل مصلحة المنتدى ..
وأمور كثيرة يقترحونها لها أثر ايجابي ممتاز ..
استغل سؤالك هذا .. بتوجيه الشكر لكل الموجودين في اللجنة الاستشارية ..
وان شاء الله ما يقصرون معنا في خدمة منتدى العالمية لما فيه مصلحة الجميع
lll.lll أسئلة رياضية lll.lll
1- بما أنك تميل للريال .. كيف ترى حظوظ الفريق عموماً في هذا الموسم؟
عشان ما يفهم السؤال بشكل آخر ..
انا مب مدريدي متعصب ! ..
يعني احياناً يميل قلبي للريال ، واحيان أخرى للـ مان يونايتد ، واحيان أرسنال ..
حظوظ ريال مدريد اشوفها كبيرة في تحقيق اللقب ،
الفريق يقدم مباريات رائعة .. ونتائج مميزة ..
بإمكانه المحافظة على اللقب ، شريطة عدم الاستهتار أو التخاذل من اللاعبين ..
ولعب جميع المباريات باعتبار انها مباراة نهائية ..
لأن أي نقطة .. هي مفيدة جداً في سلم الترتيب ..
نقطة خارجيّة :
لا جينا للمنتخبات .. فـ أنا ( برازيلي )
وهنا لا مجال للـ تعاطف ! .. فـ بلاد السامبا لها " رونق " خاص ! ..
وصراحة أحب اشاهد جميع لاعبين المنتخب البرازيلي واتعاطف معهم
2- ماهو حكمك لصفقات ريال مدريد هذا الموسم ؟
صفقات رائعة ، من جميع الصفوف ..
كنت اتمنى عدم رحيل رييس ، لأنه لاعب مميز ..
لكن عموماً صفقات مدريد رائعة جداً ..
3 - إنفاق الريال في الصيف ألا يعد كثيراً جداً , أم أنه يستحق مادفع فيه ؟
لا أحد ينكر بأن انفاق الريال كثير جداً ،
وصراحة تعودنا على هـ الشي في عهد الرئيس بيريز ..
ربما الآن مع كالديرون .. الأمور خفت نوعاً ما ..
هناك بعض الصفقات مبالغ فيها ، والبعض منها اعتبرها جيّدة جداً ..
يعني مثلاً سابقاً في صفقة بيكهام وصفقة زيدان ..
صحيح انها صفقات فنية .. لكن لها مردود إيجابي من ناحية الإعلانات والدعايات اللي يجنيها الريال من لاعبين الشهرة ..
4 - بيبي , سافيولا , روبين , هاينزه , شنايدر , متزلدر , درينثي , شوستر .. هل قادرين على إرضاء الجماهير الموسم القادم ؟
قادرين بكل قوة .. مع أني كنت اتمنى بقاء الداهية " كابيلو "
لكن تجري الرياح .. بما يشتهي ( كالديرون ) !!
5 - من تتوقع أن يفوز بالدوريات الأوربية لهذا الموسم ؟
الايطالي : ميلان
الانجليزي : شيلسي
الاسباني : مدريد
6 - من هو أفضل فريق من خلال صفقات الصيف ؟
صفقات ريال مدريد .. ربما تكون الأفضل
7 - من هو أفضل لاعب رأيته في حياتك ( غير بيليه , مارادونا , زيدان ) ؟
غير الثلاث لاعبين اللي ذكرتهم في سؤالك ..
صعب تلقى !! ..
وليتك ما ذكرت زيدان .. عشان ما تقلّب المواجع
أفضل لاعب غيرهم .. امممم والله ما عندي إجابة محددة
كان يعجبني " ريفالدو " أيام برشلونة ..
ويعجبني " كانتونا " أيام مان يونايتد ..
ويعجبني " رونالدينهو " ، و " كريستيان رونالدو " ..
و " رونالدو البرازيلي " ايام انتر ميلان .. كان شي خيالي ..
يعني مافي لاعب معيّن بصراحة ..
لكن اقدر اقول .. يوسف الثنيان
8- من هو اللاعب الذي تتمنى قدومه للريال ؟
جيرارد .. اعتقد هاللاعب قدومه للريال بيكون ضربة معلم ، لكن الظاهر بدري عليهم .. لأن صعب جداً ان تفرط إدارة الليفر بـ كابتن الفريق ..
9- ماهي ميولك الإيطالية والإنجليزية ؟
في انجلترا : احياناً اميل للـ مان أو الأرسنال ..
على ايام هنري ، كنت أميل للـ أرسنال ..
في ايطاليا : صراحة الدوري الايطالي الأقل متابعة بالنسبة لي ، لكن أميل للـ ميلان اكثر شي ..
10 - كيف تصنف أنت الدوريات الأوروبية ؟
من ناحية الإثارة والمتعة ..
الدوري الانجليزي
ثم الدوري الايطالي ..
ثم الدوري الإسباني ..
الدوري الانجليزي .. له اثارة خاصة
يعجبني جمهورهم ، اعتقد 90% من المباريات تكون ممتلئة بالجماهير ..
وتعجبني أرضية الملاعب هناك ، جداً رائعة ..
والجمهور القريب من الملعب .. يعطي إثارة كذلك ..
والتنظيم هناك .. له تأثير كذلك ..
الدوري الايطالي رغم اني قلت انه الاقل متابعة ،
لكن تطربني مباريات الأندية العملاقة ..
مثلاً مباريات الانتر واليوفي .. ميلان والانتر
اليوفي ورما .. روما وميلان ..
روما ولاتسيو ..
اما الاسباني ..
مباراة الكلاسيكو " مدريد وبرشلونة " لها طابع آخر ..
والحماس هناك .. له طابع جنوني !! ..
11- كيف تصنف أنت الكلاسيكوات والديربيات بالترتيب ؟
ريال مدريد × برشلونة
انتر ميلان × اي سي ميلان
مانشستر × شيلسي
اليوفي × انتر ميلان
مانشستر × ليفربول
ليفربول × شيلسي
ميلان × اليوفي
روما × لاتسيو
ريال مدريد × اتلتيكو مدريد
12- ماهي المباراة التي ندمت على تفويتها ؟ والمباراة التي تمنيت بأنك لم تشاهدها ؟
ندمت على تفويت مباراة ليفربول × ميلان .. نهائي الشامبينز ليق ، للأسف حالت الظروف دون مشاهدة اللقاء ..
اعتقد كان أحد اجمل لقاءات العالم ..
اللي تمنيت اني لم اشاهدها ، مباراة ايطاليا × فرنسا ( تصفيات يورو 2008 ) .. قبل أمس
.. مباراة مملة جداً للأسف !! ..
ولم اتمنى مشاهدة مباراة السعودية والمانيا !! ..
شاكرين لك حسن تعاونك معنا
يعطيكم العافية على مجهودكم الرائع
وإلى الأمام .. وسامحونا ع القصور ..
واسمحولي .. اقدم تحياتي لجميع أعضاء الشبكة خصوصاً اعضاء منتدى العالمية ..
ومبارك عليكم قدوم الشهر المبارك ..
وكل عام وانت بخير
بالتوفيق