|
خطأ طبي ... أودى بمستقبلي للقبر..... بسم الله الرحمن الرحيم نعم أحبتي الخطأ الطبي أنهى حياتي العلمية ..... الخطأ الطبي جعلني لا أحب القراء بل أكرة الدراسة بل الافضع من ذلك اكره العلم والمتعلمون ..... هذه الحالة أصابتني فترة من الزمن ولكن الحمد لله بدأت تتلاشى بل تلاشت بشكل كبير ولله الحمد والمنة ... نعم الخطأ الطبي وهو ليس بخطئي بل بيد طبيب وهي احد أسباب الواسطة في مستشفياتنا العزيزة... كان والدي (رحمة الله) مريضا بالمرض الخبيث(السرطان) أعاذنا الله وإياكم وأهلينا والمسلمين من شر هذا المرض... كنت ادرس في الثانوية وللأسف أعدت الدراسة في ثالث ثانوي لأجل (النسبة ) ولكن انظروا ماذا حدث ... خطئ طبي ينهي نسبتي من 99.89 بالمائة إلى 73.85 بالمائة... هذا سلمكم الله دكتور للأسف (سعودي) خريج جامعة الملك سعود وين تخصص مدري شكله متخصص في الصناعية.... ذهب والدي إلى المستشفى لعمل الفحوصات الدكاترة اجمعوا جميعهم بضرورة دخوله تحت رعايتهم وملاحظتهم .... للاسف هذا الدكتور طلع رئيس القسم قال بالحرف الواحد .... وشولة تترقد عندنا ما يحتاج ما في شي رح عيش حياتك بس ....!!!! هذا بالله أسلوب دكتور...!!!! المشكلة مستشفى كبير (يطرد) بروفيسور لأجل واحد خريج جامعة الملك سعود ...!!!! الدكاترة فالولي حالة أبوك بدت تتغير وفي أعراض غريبة لازم يكون تحت رعايتنا ويكون الجو صحي لكن ما باليد حيلة ..... بعد فترة يدخل والدي في حالة استدعت ذهابه للمستشفى بالإسعاف ووضع حالته الصحية متدهور ينام أكثر اليوم يقوم للصلوات ويرجع ينام حتى الأكل لا يأكل يحيا على المغذي ...... الغريبة المستشفى وضعوا والدي في قسم كبار الشخصيات مما أثار الشك فيني ...!!! يوم الثلاثاء قمت للمدرسة باقي يومين وبعدها أسبوع وتبدأ اختبارات الوزارة الله يعيننا... مالي خلق أروح أقول ورى ما أروح لأبوي المستشفى واقعد عنده اليوم من أوله اطلع أغير ملابسي أبي أروح القى ولد خالي جايب الوالدة من المستشفى دموعها تنزل تقلي أبوك دخل في غيبوبة ...!!! اذكر من بيتنا للمستشفى في حوالي حوالي 8 اشارات ما وقفت عند اي وحدة فيهم اللي اذكره أني وقفت السيارة في موقف غلط ولو أقولكم اني رميت مفتاح السيارة في كشك للعساكر وقمت اركض ودموعي تنزل والعبرة غاصة في حلقي قام ركض العسكري (جزاه الله خير) ناحيتي ومسكني وهداني وقالي سيارتك بحطها لك بالمواقف وترى العناية بالجهة الثانية ....!!! وش عرفة إني أبي العناية المركزة ....!!!! ادخل ألاقي في وجهي العائلة كاملة دموعهم على عيونهم عرفت في شي غلط جيت أبي ادخل منعوني أحاول ما خلوني خالي كبير في السن نعم بيني وبينة خلافات كثيرة ولكنة وقفني وحب على راسي ويقول سامحني ....!!! خالي عمرة ما تنازل لأحد ما عمرة قال انا غلطان الحين يقلي سامحني ويبكي ويحب على راسي ...!!!! حبة الراس فهمت كل شي خلاص بعد اليوم مافي كلمت يبة ...... خلاص ما في حنان الاب ... ما في كلمت غلط يا ولدي .... ما في شخص أعطية اسراري .... ما في شخص أنادية يا أبو صلاح ... خلاص ما عاد أروح المسجد يدي بيد أبوي واصلي جنبه.. العصر والمغرب والعشاء والفجر والجمعة والعيدين ..... خلاص بصلي علية.....!!!! بيكون قدامي وانأ أصلي ....!!!! قعدت ابكي على من علمني الأخلاق ... علمني أكون صلاح قبل لا أكون ابن الشيخ احمد..... قعدت ابكي حضر الدكتور احمد ( الدكتور اللي قال لازم يكون أبوك تحت رعايتنا) ..... عزاني ومسك بيدي وقالي ما أحد يلومك لو بتحرق الدنيا بس أبيك تكن قوي ولا تخاف من أحد ....!!! فهمت إن رئيس القسم له دخل ... بعد ما خلصت الإجراءات طلعت للدكتور احمد في مكتبة وسألته وش اللي صار حاول يصرف مسكتة وقلت له قلي ولا تخبي وحلفت أني ما أقول انه طلع الكلام .... ما ينلام الرجال خايف على وظيفته من رئيس القسم ( المدعوم) بس عطاني كل شي ..... بكل بساطة وقت ما تم حجز غرفة للوالد الله يرحمه جاه احد أقاربه ويبي المستشفى ففضلة على حساب أبوي...!!!! بعدين لما ساءت الحالة خاف وقرر يشوف له مكان فما كان من رئيس القسم إلا وضعة في قسم كبار الشخصيات ..... بكل بساطة يقلي سبب وفاة والدي هو إهمال طبي خطئ طبي.... من رئيس القسم ...... هي أرقاب الناس سهله .....!!!! وقـــــــــــــــــــــــــــــــــــــــف مكانك مو أنا اللي أتنازل عن حقي بسهولة ...!!! هذا أبــــــــوي تفهمون وش معنا كلمة أب وأبن .... طلعت وأنا ما أشوف في دربي إلا شي واحد ..... وين اللي (ذبح) أبوي....... لقيت الدكتور في ممر في المستشفى مليء بالمراجعين و(الممرضات) وقاعد يسولف ..... مسكتة ابتسم بوجهي ويقلي عظم الله أجرك في أبوك.....بكل بساطة يقولها وهو يبتسم .....!!!!! وقاحة...!!! حرمتني من أبوي لأجل واحد داخل المستشفى (سياحة) من أقاربك كمان تعزيني وأنت تبتسم....!!! مسكتة وضربته ضرب لين نزل الدم منه وصلت الشرطة وكان من بينهم العسكري اللي اخذ مفتاح سيارتي... وقفوا وخلوني أكمل ضربي ما فيهم احد مسكني ....!!!! بعد ما وقفت مسكني وأخذني القسم وعزاني وقالي كنت متفق أنا و الدكتور وكنت عارف انك بتجي وبتمد يدك وقررت امسك الوردية بدال الزملاء واخذ أصحابي عشان نطلعك لان الدكتور احمد صارحني بكل شي بس بحاول اني اخليك تطلع عشان أبوك واعرف رئيس القسم مو أول شخص يسوي معه هل حركة.......!!! ما شاء الله أجل الدكتور من ربع "متعوده دايما "....!!!! الدكتور جاء يشتكيني وحلف انه ما يخليني احضر قبر أبوي وأنا حلف إن ما طلعت الظهر أصلي على أبوي صليت عليك العصر في نفس المسجد وأدفنك بيدي في نفس المقبرة وجنبه....!!! لحظة غضب كلامي غير موزون ولا احد يلومني هذا أبوي ......!!!!! تدخل بعض الدكاترة بيننا واقنعوا رئيس الغفلة عفوا رئيس القسم بالتنازل.... خرجت بعد ما خلصت صارت الدنيا بوجهي سوداء.... صغير وحيد أهله ما تخرج من الثانوية وين بتوديني الحياة ....!!!!! بعد اختبار قياس ملفي المدرسي طلبته البترول والمعادن وطلبته جامعة الملك عبدا لعزيز بجدة .... بس مين له نفس يدرس نعم شهادة قياس كانت عالية .... ونسبت الدراسة حتى الاختبار الشهري في الفصل الدراسي الثاني جيدة ... يعني نسبتي بتكون فوق 94 إذا أنا داج ....... موقف الصلاة وحضور 80 بالمائة من طلاب المدرسة من كل الصفوف لمعرفتهم بي .... مدرسين ووكلاء والمرشد ومدير المدرسة ......حضروا وقفوا بجواري في المقبرة .....!!! ما توقعت إن في احد بيحبني للها لدرجة في المدرسة قلت يمكن اثنين ثلاثة مع مدرسين او ثلاثة ... لكن حتى المدرسين اللي ما يدرسوني حضروا وألغيت آخر حصتين ... مين أكون....!!!! بعد الفراغ من المقبرة ذهبنا للبيت وحضروا كل أصحابي كل مدرسيني إلا واحد كان مسافر اتصل علي .... حضروا ناس كثير للعزاء معظمهم ما اعرفهم ... حتى في ناس غير مسلمين حضروا القبر والعزاء في البيت كانوا يعملون مع الوالد الله يرحمه ..... سبحان الله مدرستي كاملة , عملة , أصحابة , حضروا..... بكل بساطة حضر المدير وسألته وش سبب حضور المدرسة من أكون.... يقلي حنا مانعرف أبوك ... نعرفك أنت وأنت كنت احد رموز المدرسة وحبوك الطلبة بأخلاق لا اجل مال ولا شهره كسبت محبتهم وابسط شي يجون يوقفون جنبك صدقني يا أبو أحمد ( قالها وحسيت إن الحمل زاد حسيت الدنيا كلها تدور فيني وقتها) الأخلاق الحميدة تخلي الناس تحبك صدقني أي شي بالدنيا ينشرى إلا الحب الأخوي ... ومو غريبة نجي نعزيك بالشخص اللي رباك على هالأخلاق الحميدة ... قلبت كلامه كله وفكرت في الناس اللي جو من أقصى البلاد يعزوني وعرفت إن أخلاقة الله يرحمه هي كنزه هي كل ثروته هي اللي بها الواحد يعيش الحياة الأخلاق الحميدة هي اللي خلت الناس يحبونه ....... الله يا أبوي علمتني كيف أكون ثري ولا قلت لي انه نفس ثروتك..... الله يا أبوي علمتني وأنت حي وتعلمني وأنت تحت الثراء ...... اعتزلت الناس والكلام... بدت الاختبارات بعد أسبوع ما ذاكرت شي ولا لي خلق اكتب شي اكتب اسمي واقفل القلم ..... المدرسين يترجوني اكتب احل .... موجة من مدرسة أخرى عرف بسالفتي دخل علي يا ابني اكتب حرام تضيع مستقبلك ....... لا تلوموني يا بشر مو بيدي قلبي مفطور على أبوي .... !!! الأب اللي كان يعاملني كأخ وليس كابن ... الأب اللي كل كلمة او قصة يعطيني حكمة وعبرة... آسف ما اقدر عقلي مقفل ... مكتوب علية مقفل حتى إشعار آخر ...... واحد من المدرسين حلف يطلق حرمته لو ما كتبت ... فحلفته ضربت مخي ... وقلت له بكتب هل اختبار ولو حلفت بعدها او أي شخص تروه بيطلق حرمته وأنا أنذرتكم..... سبحان الله صلاح ينذر مدرسية ومدرسية ولا كلمة ...... كانت مادة الكيمياء وكنت ما افهم هل مادة وحليت اللي قدرت علية واستوعبته .... وبعد ما خلصت الاختبارات ورحت المدرسة استلم الشهادة المدرسين يقولون حرام يا صلاح ظلمت نفسك مو كذا تناخذ الحياة وترى الله يرحمه ما يرضا اللي تسوية بنفسك وتنهي مستقبلك بهالطريقة .... نفس لسؤال تكرر ليش كل هذاك سويتوه معي من أكون.... يقولون أنت الطالب الوحيد اللي نقبل مزحة معنا كمدرسين لأنها بحدود الأدب أنت الشخص الوحيد اللي نحب نسمع راية وناخذة ونعمله حساب ... أنت الشخص الوحيد اللي اعتبرناك أخ لنا وليس طالب صلاح أنت تعتبر نفسك ولا شيء بس صدقني الأخلاق الطيبة هي اللي تخلي اللي قدامك مجبر انه يحترمك .... وذكروني بحادثة تكريم الكشافة وتكريم سمو الأمير نايف بن عبدا لعزيز في حفل تجمع الكشافين العرب وكلامه اللي اعتبره شرف ووسام على صدري ويقلي (( انتبه على نفسك يا ولدي أنت شرفتنا اليوم في هل محفل العربي وأتمنى انك تسير على هل منوال ولا تتخلى عن مبادئك السامية في الحياة ...)) انتهى كلامه حفظة الله .... يقولون كل هذا أنت تقول لنفسك من أكون نعم مين أكون وحظل من أكون فليس من طبعي الغرور ولله الحمد....أكملت بعد كلامهم طريقي.... قريت النسبة وحطيت الشهادة في الملف ومشيت وحاولوا المدرسين جزآهم الله خير يرفعون من معنوياتي ..... مندوب جامعت البترول جته صدمة من النسبة ويوم عرف السبب قال هذي هي الحياة كثييييير مثله صار لهم كذا وضاع مستقبلهم بسبب ظرف عارض .... تذاكر السفر لبريطانيا لدراسة اللغة الانجليزية رميتها.... يمكن البعض يقلي أنت مزودها حبتين بس بقولك هذا أبوي وصدقوني بعدني ما قلت شي فيه كل شخص يخلي أبوة قدوته لكن حتى أقاربي كان قدوتهم الله يرحمه .... خالي اكبر من أبوي بـ20 سنة ( إلي قالي سامحني وحب راسي).... كان كل يوم يقلي أبوك علمني وأبوك علمني.... سبحان الله أبوي علمك وأنت اكبر منه ليش.....!!! هنا علم جديد علمني ياه أبوي وهو تحت الثراء مو شرط أكون صغير والكبير ما يسمعلك .... حتى الكبار ممكن يتعلمون منك وأنت صغير أهم شي انك تكون صح وحاول تبتعد عن الغلط والعيبه .... جاء بعد فترة يعزيني ( عم أبوي الله يرحمهم) وكان اكبر من أبوي بحوالي 37 سنة ....ويقلي تعلمت من أبوك ..... ويوم سوينا مع أبوك ويوم جينا ويوم رحنا.....!!!!! كان وهو صغير يوقف مع الكبار حتى أن جدي وعمه الله يرحمهم جميعا إذا صار في خلاف يحتكمون عنده ...... ما شاء الله من وين تعلم هل حاجات وكيف كان بصغره يجونه الكبار .... سالت كل واحد كان عايش معه فكانت اجاباتهم وحدة .... إذا تكلموا الكبار سمع وإذا تكلموا اللي قده سمع وإذا تكلموا الصغار سمع .... وكان ما يتكلم إلا نادرا ويحب القراءة يحب القصص ويحب الحكم والحكماء يحب مجالسة الكبار ... حرم نفسه من متعت اللعب لمن هم في سنة... كبير يا أبوي ما زلت أتلقى الدروس والعبر وأنت تحت الثراء ..... وهنا وقفت حالت الحزن وأول كتاب مسكتة بيدي هو كتاب الشيخ علي الطنطاوي رحمة الله (صور وخواطر) .... كان فيه شبة كبير من حياة والدي رحمهم الله ...... وبعد النسبة السيئة وبعد ما في أي جامعة راح تقبل فيني قررت إني ادرس بأحد الجامعات الأهلية ولكن للاسف التخصص هذا اعرفه ولكن ما هو عشقي اللي تمنيته .... وبعد ما مرت ثلاث سنوات عدت لحنيني بعد دخولي قسم الحاسب الآلي وجدت إحدى الجامعات البريطانية تدرس الإعلام عبر الانتساب وها أنا ولله الحمد أكمل الدراستين بالحاسب والإعلام ... قد يقول البعض إن كتابتي هذي لتفريغ الهموم نعم قد تكون ولكن....!!!! ما هي الفائدة من همومي ماذا ستفدت أنت منها أيها القارئ ...!!!! عبر تلقيتها في وفاته وبعد مماته .... خاص *رئيس القسم تم فصلة من عملة بعد حادثتي حيث كانت الحالة الـ28 ما شاء الله يعني لازم يوصل هل عدد عشان تعرفون انه دكتور فاشل ..... وتزعلون ليش الناس يتعالجون برى.....وبعد شهادة الدكاترة علية في المحكمة أمر بسجنه وتنازل من الـ 28 عشرة عن حقوقهم والباقي رافضين رفض تام ... *كتبت هل قصة في عجالة بعد أن وقع في يدي مرة أخرى كتاب الشيخ علي الطنطاوي رحمة الله.... * أتمنى من كل القارئ أن يكتب ماذا استفاد من قصتي فقد أكون نسيت إحدى العبر واستفيد منها أيضا .... * أتمنى من القارئ الدعاء بالرحمة والمغفرة لوالدي ولجميع أموات المسلمين .... *وفي نهاية الخاطرة أتمنى أن لا أكون أطلت عليكم وعذرا عن أسلوب الكتابة العربية الممزوجة بالأسلوب العامي ولكن صدقوني الكتابة عن والدي رحمة الله شيء (رهيب) لدرجة أني أتخيله رحمة الله خلفي يقرا ما اكتب بل هو بجواري يناقشني فيما كتبت .... سبحانك الله اللهم وبحمدك واشهد أن لا اله إلا أنت أستغفرك وأتوب إليك حرر في 17 شعبان 1428هـ أخوكم صلاح بن أحمد السليماني |
لا حول ولا قوة إلى بالله |
لاحول ولاقوة الابالله والله يرحم ابووك ويسكنه فسيح جناته وهذا الشبل من ذاك الأسد ... قصتك هاذي اخوي صلاح أثرت فيني كثير وفيها عبر وحكم يمكن مايرتكز فيها ومايعرفها الا اللي يتمعن ويفكر فيها .. ومافي جديد كالعاده النحر البشري او مايسمونه المستشفيات بـ (الخطأ الطبي ) يتجدد ويتسبب بفقدان العوائل والأبناء لأعز الناس .. ومالهم رادع الا اذا طاح الفاس بالرأس .. إقتباس:
ومالقى من يوقفه عند حده .. بس الله أراد انه تكون نهايته على يدك اخووي صلاح .. والله لايوفقه هالدكتور اذا ضميره وامانته المهنية تخليه يلعب بحياة الناس ... والله يرحم أبووك ويسكنه فسيح جناته .. وان شاء الله الكل يقتدون فيك مثل مااقتدوا بوالدك الله يرحمه .. وكل الشكر لك اخووي صلاح .. ولاهنت ياغالي .. ودمت بوود وعافي .. |
لاحول ولاقوة إلى بالله . الله يرحم أبوك ويدخله جنة الفردوس يارب والمسلمين أجمعين |
الله يرحم ابوووك ان شاااء الله وموتى المسلمين بصراااااحه كلامك ابكااااااني :( :( :( الله يوفقك ان شاااء الله |
اخوي صلاح بكل صراحه وانا اقراؤ قصتك خنقتني العبره إقتباس:
ياليت كل ابائنا كذا ...... كان الدنيا بخير الله يرحم ابوك ويسكنه جنات النعيم .. امين والله يوفقك بحياتك انت ماشاء الله عليك باين عليك طالب علم ومجتهد الله يعطيك على قد نيتك يااخوي ويوفقك ويوفقنا لما هو خير |
الله يرحمه ويغفر الله ويسكنه في فسيح جناته هذا اللي اقدر أقوله أخوي صلاح والله يوفقك في حياتك :) |
إقتباس:
الله يرحم أبوك ويغفر له .. الله يوفقك في حياتك أخوي . هذا اللّي قدرت أكتبه أخوي لأن قصتك مؤثره مرررره |
إقتباس:
شويـة عليه وقـاحة !! لازالت الأخطاء الطبية تواصل جماحها .. قبل فترة احد اصدقائي بيسوي عملية في فخـذه الأيسـر وكان فيها المرض .. وبقـدرة قـادر سوو العمليـة بفخذه الأيمـن !!!!! وبعدهـا قرروا بتـر رجـلة من أولها لآخـرها !!! وش ااستفـاد الحين !! واللوم على وزارة الصـحة .. اللي مهمليـن المستشفيـات وخصوصـاً الأهليـة منها :) الله يرحم الوالد رحمة وااسعـة :) والله يوفقـك ياخوي بدراستـك :) وان شاء الله تحصـل الشهادة والمُـعدل اللي يرضيـك :) تقبل مروري :) |
قصه مؤثره اخوي صلاح وان شاء الله تكون خير خلف لاْبوك ... وبتكلم عن الدكاتره ... مو كل من (هب ودب) صار دكتور... الطالب الي ناوي يدرس طب ...لازم يعرف حجم المسؤليه الي بيواجهها ....لانه بيعالج أنســــان بيكون تحت يده بعد الله.. هذا اول شي... ولما يصير دكتور لازم يكون عنده ذمه وضمير ...وان حياة هالشخص بين يدينك بعد الله... من جد الواسطه في دراسة الطب بشكل كبير مشكله كبيره يتعرض فيها حياة البشر للموت! والواسطه بالتوظيف بالمستشفيات! والواسطه بالعلاج ! لللاسف اذا جيت تتكلم عن اكثر شي حساس لانه يتعلق بحياة موت ...ولللاسف تدخل فيه الواسطات والقوه! فالدكتور مهنه عظيمه لازم الشخص ...يعرف قدر المسؤليه الي بيدينه! الله يوفقك اخوي وياهلا فيك بمنتدانا |
قصتك جداًمحزنه ومؤلمه أخي صلاح رحم الله والدك واسكنه فسيح جناته |
عظم الله اجرك في وفاة غاليكـ وجمعنا الله واياه في جنان الفردوس والله مدري وش اكتب الي كتبة مؤلـم ويحرق القلب محد بيلومكـ ياخوي فقد الاب شي عظيم اسال الله ان يطيل باعمار ابائنا وامهاتنا ماكتبتة عن والدكـ هو فخرا لنـا جميعااا اسال الله له الرحمة والمغفره والدكـ بحاجه لدعائنا لادموعنا فلاتحرم هذا الكريم بخلقة وعظيم بقدرة من الدعاء والله مدري متى ارواح الناس بتروووح بسبب اخطاء طبية وتهور وحوادث:cry: مايحتاج اتكلم لان كلامي ماراح يفيد ولانملك الا الدعاء لهم بالهداية:) الله يعوضكـ خير يارب وان شاء الله تفرح اهلكـ بتخرجكـ:) الهنوووف كانت هنا ورحلت |
الله يرحمه بس القصه مره مؤثره مسكت دمعتي قبل لاتطلع والله يوفقك في حياتك واخرتك وخل املك في الحياه كبير مو كل الناس سواسيه واصابع يدك مو سوا والله يكثر من امثالك ولاتنساه من دعائك فهو محتاجك اشد الحاجه لدعاء وحتى لو كان صالح زيادة الخير خيرين مشكور واسفه عالاطاله بس من زمان ماشفنا مواضيع زي كذا |
عظم الله أجرك والله يغفر للوالد ويرحمه يارب ،، قصتك مؤثره جداً .. والله يحقق لك مبتغاك إن شاء الله وتفرح أهلك يارب ياكريم .. أخوي مدري وش أقول بس والله القصه مؤثره .. يعطيك العافيه أخوك راشد .. |
لاحول ولا قوة إلا بالله رحمك الله أخوي وعظم الله أجرك أهم شئ ادعي له بالرحمة نسأل الله الحماية من الأخطاء الطبية المنتشرة بكثرة أتمنى أن تقلص هذه الظاهرة ولا أطلب بإتفائها من الصعوبة أن نزيل هذه الظاهرة ولكن نطالب بتقليصها تقبل تحياتي وتقديري لك ولقلمك صحاري نجد |
| الوقت المعتمد في المنتدى بتوقيت جرينتش +3.
الوقت الان » 08:12 PM. |
Powered by: vBulletin Version 3.8.7
Copyright ©2000 - 2024, Jelsoft Enterprises Ltd